मूक चेलाकू 15
15
एरुसलेमराः पंचाइत
1अदोम एहूदाकू एहूदिया छतर अते अंतकियारेकू वेजेडा अरू बिसवासी होड़कूकू चेडा, अपे मोसेसराः नियम इया मेरपे खतनान दो, भगवान अपे ओरोय सडावतेडपेःआ, माःआन। 2पउलूस अरू बरनाबास हँकू सुदा रायरे मेरकिन दोहोगान अरू हँकू सुदा मुरुक बेला वरी हना कता बदीरेकिन अड़ा-चउकीःआ। हनालगा अंतकियाराः कलसियारिकुःआ बिसवासी होड़कू पउलूस अरू बरनाबास एरुसलेम अगी सेनेडखन ईसूरिकुःआ मूक चेलाकू अरू कलसियारिकुःआ अगुवा होड़कू सुदा नाःआ कता बदीरे कता उदुःगे लगा हँकिनकू लुंबाड़तेरा।
3कलसियारिकुःआ बिसवासी होड़कू हँकिनकू वारगोतेड। अरू हँकिन फिनिका छतर अरू समरिया छतर पारनेनखन एरुसलेम अगीकिन सेना अरू सेनेन दूरराः कलसियारिकुःआ बिसवासी होड़कू एचेरेकिन कता उदुःतेरा, बेगर एहूदाकू हों ईसू एचेरेकू बिसवासतेरा, माःआन। नाःआ कता अयूमकेडखन जमा बिसवासी होड़कू बहालयानकू। 4हँकिन एरुसलेमकिन सोदोरनेन दो कलसियारिकुःआ बिसवासी होड़कू, ईसूरिकुःआ मूक चेलाकू अरू कलसियारिकुःआ अगुवा होड़कू हँकिनकू नेत-नेवारतेडकिना। दो हँकिन हँकू एचेरे भगवान अँकूतेय एचेतेरा हना जमाकूनकिन कता उदुःतेरा।
5दो मड़ंगरे फरीसी होड़कूरिकुःआ गउदारेकू दोहोना हँकुःआ बिसवासी होड़कू अते अदोम होड़कू कताया, बेगर एहूदाकू बिसवासरे वेग लगा इदान दो हँकू मड़ंगरे एचे खतनान लगा इदा अरू मोसेस एमेतेरा हना जमा नियमकून हँकू मनावगे लगा इदा, माःआन।
6हनते ईसूरिकुःआ मूक चेलाकू अरू कलसियारिकुःआ अगुवा होड़कू नाःआ कता बदीरे कता होड़ेंग लगा मिनीरेकू दुड़ुःयान। 7हँकू मुरुककू कता होड़ेंगा अरू हना तयोमरे पतरस हँकू तलारे चड़ाँनेनखने कताया, “ने वपक बोपोहकूतिंग, अपे नाःआ कतापे सुसुदीतना। तोनोंग बरिस मड़ंगरे बेगर एहूदाकू ईंगते भगवानराः नपाय सरवन अयूमकेडखन बिसवासगे लगा अपे अते भगवान ईंगे सुनावकेरा। 8जमा होड़कूराः इंदरीय सुदीता हाँयग भगवान, अबूय सुनावकेरा अरू हँकुःआ होड़कू लगा आँयग सुद बिरुवा एमेतेडखने उदुःतेरा, ईंग अपे होयिंग सुनावकेडपेःआ, माःआन। 9हाँयग भगवान अबू अरू हँकू एचेरे तोनोंगाः पाचपटी सुदा मेरेय एचेकेरा। हँकू ईसू एचेरेकू बिसवासतेरा, हनालगा हाँय हँकूराः जीवे एचे सुदकेरा। 10दो नाःआ इया इदान दो अपे चिला लगा बेगर एहूदाकू, एहूदाकूराः नियम मनाः लगा बोझा एमेवाडकूखन भगवानपे अंदजावतना? नाःआ बोझा अबूरिकुःआ खुटिपहार होड़कू अरू अबू हों मेरबू मनाव अवेनतना। 11दो अबू बिसवासगेतना हँकुःआ होड़कू भगवान सडावकेडकुःआ, हनन इया अबूरीग परबू ईसूराः मयाते भगवान अबू होंय सडावकेरा।”
12हना तयोमरे पउलूस अरू बरनाबास, भगवान बेगर एहूदाकू एचेरेय एचेतेरा हना जमा चिनहाकून अरू बयाव जुवाः इयाःआ बुताकूनकिन कता उदुःतेरा दो जमा बिसवासी होड़कू कलेकालयान अरू हँकिनराः बड़राकू अयूमतेरा।
13हँकिन बड़रा उरियावनेन दो एकूब#15:13 एकूब एरुसलेम सहरराः कलसियारीग अगुवा होड़ अरू ईसूरीग बोहोत होंय दोहोना। कतातेरा, “ने वपक बोपोहकूतिंग, ईंगपे अयूम! 14सिमोन पतरस अबू एचेरे नपायतेय कता उदुःकेरा, भगवान करा उड़ी मड़ंगरे बेगर एहूदाकू अते अनँयग लगा निकता होड़कू तुलाकू लगा अदोम होड़कू सुनावतेडखन अनँयग दुलारे उदुःवातेडकुःआ। 15भगवानराः कागदरे ओजाःतो इदा हनन इया, नाःआ कता भगवानराः बड़रा कता होड़कू हों सताय हवे माःआनकू कतायता,
16हना तयोमरे ईंग कुदा वेगकियानखन,
दाऊद राजाराः राइज अरूयिंग तुलागोडता।
नरी नठीयना हाँयराः राइज अरूयिंग तुलागोडता,
अरू हना राइजिंग बड़ियाड़गोडता।
17नाःआते एटाः जइत होड़कू हों ईंगकू ञामता,
अरू ईंगराः ञावकू सुदीयता हँकुःआ बेगर एहूदाकू होंकू ञामिंगता।
18जूग परिया अते होड़कूय एचे सुदीकूता,
अरू जमाकूनिंग एचेयता ईंग परबू भगवान नाःआ इयायिंग कतायतना।”#अमोस 9:11-12
19एकूब अरूय कताया, “दो ईंगरिकुःआ वपक बोपोहकूतिंग ईंग नाःआ कतारे नाःआ फड़ियाविंग एमेयतना। भगवानकू मनेवाता हँकुःआ बेगर एहूदाकू लगा बोझाबू एमेयता दो हना नपाय कोवानेःआ। 20मनदो हँकू एचेरे नाःआ कता ओजाः इदीगे लगा इदा। हँकू मुरतीकून मड़ंगरे मंडावतो तोनोंगाः जिनिसकून अहाकू जोम, सनहा-सनहीते तोरेकू दोहोन#एचे उडुंग 20:14 अरू अइठाव गोएगतो जानरकूराः मास जोजोम लगा कोवानेःआ अरू बलंगी कहियो जोजोम कोवानेःआ।#लेवी 17:12; दो. नि. 12:23-24 21मनाड़ंग जूग वरीते मोसेस एमेतेरा हना नियमकून सहर सहररेकू परसार उदुःतेरा अरू जनामा लोड़ोनराः दिनरे अरजी ओड़ाःकूनरेकू बछाव उदुःवाकूतना। हनालगा बेगर एहूदाकू हों नाःआ कताकूनकू सुसुदीतना।”
बेगर एहूदा बिसवासी होड़कू लगा चिठी
22हनते ईसूरिकुःआ मूक चेलाकू अरू कलसियारिकुःआ अगुवा होड़कू जमा बिसवासी होड़कू सुदा अँकूरिकुःआ तोनोंग तोनोंग होड़कू सुनावतेडखन पउलूस अरू बरनाबास सुदा वारकू लगाकू रायनेना। बिसवासी होड़कू अते बार होड़, कलसियारिकिनाः अगुवा होड़किन दोहोना हँकिनाः जूदा (हाँयराः एटाः ञाव दोहोना बरसाबास) अरू सिलासकू सुनावतेरा, जेमहा पउलूस अरू बरनाबास सुदा अंतकियाकिन सेन। 23हँकू हँकिन तिःईरे नाःआ चिठीकू एमे ओतोंगगोडतेरा।
अले अपेरिकुःआ वपक बोपोहकू, ईसूरिकुःआ मूक चेलाकू अरू कलसियारिकुःआ अगुवा होड़कू, अंतकिया सहर, सिरिया सहर अरू किलिकिया छतररिकुःआ बेगर एहूदा बिसवासी होड़कू लगा अले अगीते मसी सलाम।
24अले नाःआ इयाले अयूमकेरा, अले अते तोनोंग तोनोंग होड़कू अपे एचेरे सेनेकियानखन हँकूराः कताते अपेराः जीवकू एचे कुहकावगोतेरा अरू अपेराः जीवकू बहकावगोतेडा। मनदो अले हँकू एचेरे तोनोंग हातपात मेरले एमेवागाडकुःआ। 25हनालगा अपे एचेरे बरनाबास अरू पउलूस सुदा सुनावतो होड़कू वारकू लगाले ओंगोल रायनेना। 26नँकुःआ होड़कू परबू ईसू मसी लगा अँनकूराः जीव हों एमेय लगा सपड़ावतो इदानकुःआ। 27हनालगा अले जूदा अरू सिलास, बरनाबास अरू पउलूस सुदा अपे एचेरेले वारकूतना। हँकू सेनेकियानखन अले ओजाःकेरा हना कता हँकू अँननकू अपे एचेरेकू कता उदुःगोडता। 28नाःआ कताकून अड़ाःकेडखन अपे एचेरे अरू तोनोंगाः बोझा अहा होयाः लगा भगवानराः सुद बिरुवा लगा अरू अले लगा हों नपाय लगावनेना।
29अपे मुरतीकून मड़ंगरे मंडावतो तोनोंगाः जिनिसकून अहापे जोम,
बलंगी अरू अइठाव गोएगतो जानरकूराः मास कहियो जोजोम कोवानेःआ
अरू सनहा-सनहीते तोनोरे दोहोन लगा इदा।
अपे नाःआ जमाकून अते सवासितीपे दोहोन दो नानाः अपे लगा ननपाय दोहोनता।
नपायतेपे दोहोन।
30दो हँकुःआ चइरगोटोंग होड़कू, कलसियारिकुःआ होड़कू वारतेडकुःआ अरू हँकू अंतकिया सहर तोराकू। हंडा सेनेडखन हंडाकुःआ बिसवासी होड़कू एचेरेकू जुमावनेन अरू हँकू हना चिठीकू एमेवातेडकुःआ। 31जमा होड़कू हना चिठीकू बछावनेना अरू कता बहालगे इयाःआ सरवन अयूमवाडखनकू बहालयान। 32जूदा अरू सिलास भगवानराः बड़रा कता होड़किन दोहोना अरू हँकिन, बिसवासी होड़कू ईसू एचेरे एचे बड़ियाड़कू लगा मुरुककिन कता उदुःतेरा। 33हँकिन तोनोंग बेला वरी हंडाकिन दोहोना अरू बिसवासी होड़कू भगवान हँकिनराः जीव सलसतरे दोहोन लगाकू अरजीतेरा अरू हँकिनकू वारतेरा हँकुःआ होड़कू एचेरेकू वार कुदागोतेडकू। 34[मनदो सिलास मेरेय सेनेगना। हाँय हंडाय दोहोना।] 35अरू पउलूस अरू बरनाबास अंतकियारेकिन दोहोना। हँकिन हंडा परबूराः सरवन एटाः होड़कू सुदाकिन परसार उदुःतेरा अरूकिन चेडतेडकुःआ।
पउलूस अरू बरनाबास एनेटाः दूरकिन साबतेरा
36तोनोंग दिन तयोमरे पउलूस, बरनाबास एचेरेय कतातेरा, “दोलंग सेनता अरू परबू ईसूराः सरवनलंग परसारतेरा हना सहरकूनरिकुःआ बिसवासी होड़कू एचेरे सेनेकियानखन हँकूराः हाल-चाललंग अयूम अगुगेता।” 37हँकिन सुदा मरकूस माःआन एटाः ञाव दोहोना हाँयग एहुना हों गोःगेय लगा बरनाबास ओंगोलतेरा। 38मनदो पंपुलियारे मरकूस हँकिन अड़ाःतेडखने सेनेडा,#मूक चेला 13:13 हनालगा हाँय हँकिन सुदा सेन लगा पउलूस मेरेय चहाःआ। 39नाःआ कता बदीरे हँकिन बना होड़ मुरुककिन अड़ा-चउकीयान अरू हना तयोमरे हँकिन एटाः एटाः अगी परसारगे लगाकिन सेनेडा। बरनाबास, मरकूस सुदा जहाजरे सइपरास डुगु अगी तोराय। 40मनदो पउलूस सिलासे सुनावतेरा, अरू बिसवासी होड़कू परबू हँकिने संभाड़किन लगाकू अरजीतेरा अरूकू वारगोतेडकिन। 41हँकिन सिरिया अरू किलिकिया छतरतेकिन सेनेडा अरू हंडाकुःआ बिसवासी होड़कू ईसू मसीराः बिसवासरेकिन एचे बड़ियाड़गोतेडकू।
Valgt i Øjeblikket:
मूक चेलाकू 15: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.