लूका 18
18
रंडियाहीनराः अउल-तउल कहड़ी
1हना तयोमरे ईसू आँयग चेलाकू एचेरे मीटोंग अउल-तउल कहड़ीय कता उदुःतेरा, जेमहा हँकू सगर बेलाकू अरजीगे अरू भगवान एचेरेकू भरसा हड़ाःगे। 2दो हाँय कतातेरा, “मीटोंग सहररे मी होड़ फड़ियावदार होड़ दोहोना। हाँय भगवानराः अकूस मेरेय मनवेःआ अरू होड़कू मेरेय गदनेवाकुःआ। 3हनानाः सहररे मी होड़ रंडियाहीन अइमी होंय दोहोना। हाँयग रंडियाहीन फड़ियावदार एचेरे घड़ी घड़ी सेनेकियानखने कताया, ईंगरीग मुदइ होड़ फड़ियावकिरिगखन हाँय अते ईंगमे बनसाव, माःआन। 4दो तोनोंग बेला वरी हाँय हाँयग अइमी मेरेय संघरावागडीग। तयोमरे हाँय अनँयग जीवरेय ओंगोलतेरा, ईंग भगवानराः अकूस मेरिंग मनवेयता अरू होड़कू मेरिंग गदनेवाकूता। 5मनदो नाँय अइमी ईंग दोंगेराः सरा मेरेय पसाव ओवाता। हनालगा नाँय ईंग संघरावायतिंग। हनाते नाँय घड़ी घड़ी वेगकियानखन ओरोय हलकइनतिरिंगा।”
6हनते ईसू अरूय कतातेड, “नपायते मेरेय फड़ियावगेता हाँयग होड़राः कतापे अयूम। 7भगवान सुनावकेडकुःआ हँकुःआ होड़कू दिन रइत भगवान संघरावाकू लगाकू अरजी दो, भगवान हँकू ओरोय संघरावतेडकुःआ जा? हँकू संघरावकू लगा भगवान कुबेरगेताय जा? 8ईंगपे अयूम, भगवान ओहेन हँकुःआ होड़कू लगाय फड़ियावगेता। मनदो मनुवारीग बेटात कुदा वेग मेला चउंदीसरिकुःआ होड़कू हाँय एचेरेकू बिसवासगेता जा?”
फरीसी होड़ अरू मलगुजारी गोः होड़किनराः अरजी
9तोनोंग तोनोंग होड़कू अँननकू एचेरे भरसाकेडखनकू ओंगलुःता, अले बेगर गारबार होड़कू हवे, माःआन अरू एटाः होड़कू हुडिंगकू ओंगोलकूता। हँकुःआ होड़कू एचेरे ईसू मीटोंग अउल-तउल कहड़ीय कतातेरा। 10“बार होड़ भगवान ओड़ाःरे अरजीगे लगाकिन सेनेडा। मी होड़ फरीसी होड़ दोहोना अरू मी होड़ दोहोना मलगुजारी गोः होड़। 11दो फरीसी होड़ चड़ाँवाडखन नाःआ इयाय अरजीःआ, ने भगवान, ईंग एटाः होड़कू इया इनिग होड़, सहे कसूर होड़, सहे सनहा होड़ कोवायिंगा। ईंग नाँयग मलगुजारी गोः होड़ इया हों कोवायिंगा। हनालगा आम ईंग धनियाबादिंग ओवामता। 12ईंग हपतारे बार दिन उपासिंग दोहोनता अरू ईंग बुता अदेरगेता हना अते दस बंटारे मी बंटा आम लगायिंग एमेयता।
13मनदो मलगुजारी गोः होड़ तोरेरेय चड़ाँनेना अरू सेरमो अगी ञेल लगा हों मेरेय चहावगान। हाँय अनँयग कुड़ोम चपाड़ घड़ीने कताया, ने भगवान, ईंग कसूर होड़ हवे। आम ईंगमे मयावा, माःआन।”
14दो ईसू चेलाकू एचेरेय कताया, “अपे ईंगपे अयूम, हाँयग फरीसी होड़ कोवान, मनदो मलगुजारी गोः होड़ भगवान ओंगोलरे बेगर गारबार होड़े बड़ाँवनेना। अनँयग आँयग मरंगे ओंगलुःता हाँय भगवान हुडिंगे बड़ाँवगेयता अरू अनँयग आँयग हुडिंगे ओंगलुःता हाँय भगवान मरंगे बड़ाँवगेयता।”
ईसू एचेरे डेंबाकू
(मती 19:13-15; मरकूस 10:13-16)
15होड़कू डेंबाकू हों ईसू एचेरेकू अअगुःआ, जेमहा हाँय हँकूय टोँवाव अवे। हना ञेलतेडखन चेलाकूतेन हँकूकू डंटावतेरा। 16मनदो ईसू डेंबाकू अनँयग एचेरे राःतेडकूखन चेलाकू एचेरेय कतातेरा, “लइंकू ईंग एचेरेपे वेग ओवाकू। मँकू अहापे रेडकू। भगवानराः राइज नननकुःआ लइंकू इयाराः हवे। 17अपे ईंगपे अयूम, लइंकू इया भगवानराः राइज मेरकू मनेवाता हँकुःआ होड़कू भगवानराः राइजरे ओनोरोकू बोलो अवेनेना।”
गिरहत हातपात होड़
(मती 19:16-30; मरकूस 10:17-31)
18मी दिन मी होड़ हातपात होड़ ईसू एचेरेय होंबरेःआ, “ने नपाय गुरुजी, ओरो टुटीगनेना हना जीव पवाः लगा चिलायिंग एचेय?”
19दो ईसू हाँय एचेरेय कताया, “आम चिला लगा ईंग नपायमे रगींगतना? भगवान अड़ाःकेडखन तोनोंगीग नपाय कोवाया। 20आम भगवानराः नियमकूनमे सुदीयतना। हना नियमरे नाःआ इया ओजाःतो इदा,
अलोपे सनहा-सनही,
अलोपे ञेड एंडाकू,
अलोपे इनिगगे,
लबरा हिदइत अलोपे एमेय,
अरू अपे एंगा अपापे मान मरजइत।”
21दो हाँयग हातपात होड़ कताया, “ने गुरुजी, ईंग लनँइगिंग दोहोन वरी, ईंग जमा कता मनाः घड़ीनिंग हराकिया। अरू ईंग चिलायिंग एचे?”
22नाःआ अयूमवाडखन ईसू कताया, “आमके मीटोंग कता अरू एएचे इदा। आमराः जमा बरानाः अकिरिंगवाडखन गरीब होड़कूम हटिंगोडवा। दो सेरमो देसरे मुरुक नपाय नपाय इमानमे पवाःता। अरू नाःआ एचेकेडखन ईंग देह दूररेम ओतोंग वेग।”
23हाँयग होड़ मुरुक गिरहते दोहोना। हनालगा नाःआ बड़रा अयूमकेडखन हाँयराः जीव मुरुक हुडिंगयान। 24ईसू हाँयग होड़ ञेलवाडखने कताया, “गिरहत होड़कू भगवानराः राइजरे बोल लगा मुरुक मसकिल इदा। 25भगवानराः राइजरे मी होड़ गिरहत होड़ बोल अते, मीटोंग सुईराः बुचाःते ऊँट सेने पारगुः लगा रिता इदा।”
26नाःआकू अयूमतेरा हँकुःआ होड़कू होंबरेया, “नाःआ इया इदान दो इये सडाव अवेनता?”
27दो ईसू कताया, “मनुवा मेरेय एचे अवेयता हना जमाकून भगवान अते होया जुवाःता।”
28दो पतरस कतातेड, “अले दो अलेराः ओड़ाःकून अड़ाःकेडखन आम देह दूरले वेगकिया।”
29दो ईसू हँकू एचेरेय कताया, “ईंगपे अयूम, तोनोंगीग होड़ अनँयगराः ओड़ाः सहे एरात, सहे वपक-बोपोहकू सहे एंगा-अपा सहे लइंकू भगवानराः राइज लगाय अड़ाःगोडकूता दो, 30हाँय चउंदीसरे नाःआ जमालेःआ मुरुक बगरा गुनाय पवाःता अरू सेरमो देसरे ओरो टुटीगनेना हना जीव होंय पनावाःता।”
ईसू पेय तुरहा अनँयग गुजुः बदीरेय कतायतना
(मती 20:17-19; मरकूस 10:32-34)
31हनते ईसू आँयग बारहगोटोंग मूक चेलाकूय एटाःतेरा अरू हँकू एचेरेय कताया, “अयुमेपे, अबू एरुसलेम अगीबू सलाःतना। अरू भगवानराः बड़रा कता होड़कू मनुवारीग बेटात बदीरेकू ओजाःकेरा हना जमा होया जुवाःता। 32एहूदाकू हाँय बेगर एहूदाकू एचेरेकू जिमागेयता। हँकुःआ होड़कू हाँयकू लंदा एरांगवायता अरू बेग-हतावायताकू अरू हाँय चोटरेकू बेगगोडता। 33हँकुःआ होड़कू हाँय गुरुंदतेकू ञेंडेयता अरू ञेड एंडागोडेयताकू। हनते भगवान हाँय पेय दिनरेय जियाव रिमुःता।”
34ईसू कतातेरा हना तोनोंगाः कता चेलाकूतेन मेरकू बुझाव अवेगान। हना बड़रा हँकू लगा ओकोत इया दोहोना अरू हँकू मेरकू समझाव अवेगान।#लूका 9:45; 24:45-46
ईसू अंधा होड़े नपायतेरा
(मती 20:29-34; मरकूस 10:46-52)
35ईसू एरीहो सहरराः लेसाने सोदोरनेना। दो हंडा मी होड़ अंधा होड़ संडक धरीरे दुडुःकियानखने असे जोमा। 36हाँय मुरुक बगरा होड़कूराः अरो अयूमवाडखन होड़कू एचेरेय होंबरेःआ, “नाःआरे चिला होयाःतना?”
37दो हँकुःआ होड़कू हाँय एचेरेकू कताया, “नसरत सहररीग ईसू नाःआ दूरतेय पारतना।”
38दो हाँय खिररी घड़ीने कताया, “ने ईसू, दाऊद राजारीग नइड़-बाँस होड़, ईंगमे सोगावा।”
39मड़ंग मड़ंगकू सेना हँकुःआ होड़कू हाँयकू डंटावा, आम कलेकालमे दोहोन, माःआन। मनदो हाँय अनउर मुरुक सटीते खिररीवाडखने कताया, “ने दाऊद राजारीग नइड़-बाँस होड़, ईंगमे सोगावा।”
40दो ईसू चड़ाँनेनखने हुकुमतेरा, “माँय ईंग मड़ंगरेपे अगूगे।” हाँय ईसू मड़ंगरे वेगनेन दो ईसू हाँय एचेरेय होंबोरतेरा, 41“आम लगा चिलायिंग एचे?”
दो हाँय कताया, “ने परबू, ईंग ञेल लगायिंग चहाःतना।”
42ईसू हाँय एचेरेय कताया, “हा दो ञेलगेमे। आम बिसवासकेरा अतेम नपाययना।” 43हननमेला हाँय ञेलगोडा अरू भगवान जाग घड़ीन ईसू देहोरे सेना। जमा होड़कू नाःआ ञेलवाडखन भगवानकू जागतेरा।
Valgt i Øjeblikket:
लूका 18: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.