लूका 20
20
ईसूराः हातपात बदीरे सवाल
(मती 21:23-37; मरकूस 11:27-33)
1मी दिन ईसू भगवान ओड़ाःरे होड़कूय चेचेडा अरू भगवानराः नपाय सरवने कता उदुःवाकुःआ। दो मरंग पुजउरीकू अरू नियम चेडदार होड़कू इसराएल होड़कूरिकुःआ मूक होड़कू सुदा वेगवाडखन, 2ईसू एचेरेकू कताया, “उदुःवालेमे, नाःआ नाःआ इयाःआ बुताकून करा इयाम एचेयतना? नाःआ एचेय लगा इये हातपाते ओवाडमेःआ?”
3हाँय हँकू एचेरेय कताया, “मीटोंग सवाल ईंग हों अपेयिंग होंबोरता। हना सवालराः जबाब उदुःगेपे। 4एहुना बतिसमा एमेवाकू लगा इये हातपाते ओवातिरिया, भगवान जा मनुवाकू?”
5दो हँकू कता होड़ेंगा, “एहुना बतिसमा एमे लगा भगवान हातपाते ओवातिरिया, नाःआ इयाबू कताय दो नाँय होंबोरबूताय, दो अपे चिला लगा हाँय एचेरे मेरपे बिसवासगाड, माःआन। 6मनदो मनुवाकू होरते माःआनबू कताय दो जमा होड़कू सुसुदीतनाकू, एहुना भगवानराः बड़रा कतायीग होड़ हवे, माःआन अरू हँकू अबू दिरिकूनतेकू तेके ञेड एंडागोडबूता।”
7हनलगा हँकू कताया, “अले मेरले सुदीयतना एहुना बतिसमा एमे लगा इये हातपात ओवातिरिया।”
8दो ईसू कताया, “ईंग हों ओरोयिंग उदुःतेरा इये ईंग लगा हातपाते एमेवारिंगा।”
बेलूर अधियादारकूराः अउल-तउल कहड़ी
(मती 21:33-46; मरकूस 12:13-17)
9हनते ईसू होड़कू एचेरे मीटोंग कहड़ीय कतातेरा, “मी होड़ अंगूरराः बगइचाय लगावतेरा। अरू हाँय तोनोंग तोनोंग अधियादारकू एचेरे हना बगइचा अधिया एमेकेडखन मुरुक बरिस लगा एटाः देस तोराय। 10दो अंगूर जोनेना हनमेला हाँय मी होड़ हड़वाहा आँयग बंटा अंगूर जोःओ अगू लगाय वारगोतेडीग। मनदो अधियादारकू हाँय ञेडतिडिगखन सदा तिःईतेकू वार कुदागोतेडीग। 11मालिक मी होड़ हड़वाहा अरूय वारगोतेडीग। हनते हाँय होंकू ञेडतिरिया अरू बेग-हतावातेडीगखन सदा तिःईतेकू वार कुदागोतेडीग। 12हनते हाँय अरू मी होड़ हड़वाहाय वारतेरा। हँकू हाँय हों ञेड दोरो-मोरोतिरिगखन हना ततेरतेकू वार उडुंग एंडागोतेडीग।
13दो हना बगइचारीग मालिक ओंगोलतेडखने कतातेरा, नुँहू ईंग चिलायिंग एचे? ईंग दुलारगेयता मिनीटोंग बेटायिंग वारकेः दो, हँकुःआ होड़कू हाँयकू मान मरजइतकेःआ करे?
14अधियादारकू बेटात ञेलतेडखनकू कता होड़ेंगा, नाँय दो इताडदार हवे। दबूपे नाँयबू ञेड एंडागेय। दो नाँयराः इताड जमा अबूराः होया जुवाःता, माःआन। 15अरू हँकू हाँय बगइचा अते ओर उडुंगतिडिगखनकू ञेड एंडागोतेडीग।
नाःआ इया होयाः दो अंगूर बगइचारीग मालिक हँकुःआ अधियादारकू करा इयाय करेगकूता? 16हाँय वेगवाडखन हँकुःआ अधियादारकूय ञेड एंडाकूता अरू अंगूर बगइचा एटाः होड़कूय जिमागोडवाता।”
नाःआ कहड़ी अयूमवाडखन होड़कू कताया, “नाःआ इया कहियो अलो होयाः।”
17ईसू हँकू एचेरेय कताया, “दो भगवानराः कागदरे चिला लगा नाःआ इया ओजाःतो इदा,
ओड़ाः तुला मिसतिरीकू ओरो बड़ाँवनेना माःआनतेकू चलाः एंडातेरा,
हनानाः दिरि जमा दिरिकून अते ननपाय दिरि होयानेना।#सेरेंगकून 118:22; एस 28:16; मूक चेला 4:11; इपी 2:19-20; 1 पत 2:7
18तोनोंगीग हना दिरिरेय लुजरुः दो हाँय लंजाः हटिंग जुवाःता,
अरू तोनोंगीग चोटरे नाःआ दिरि लुजरुः दो, हाँय गिलाव जुवाःता।”#एस 8:13-15; लूका 2:34
19मरंग पुजउरीकू अरू नियम चेडदार होड़कू सुदीया, ईसू हँकू बदीरे नाःआ कहड़ीय कताया। हनलगा हँकू हाँय एचे साबगेय लगाकू ओंगोलतेरा। मनदो हँकू होड़कूकू बोरोवातेरा।
मलगुजारी एएमे बदीरे सवाल
(मती 22:15-22; मरकूस 12:13-17)
20दो मरंग पुजउरीकू अरू नियम चेडदार होड़कू ईसूकू ञेल हड़ाःआ अरू बराहीलकू ईसू एचेरेकू वारतेडकुःआ। हँकू ननपाय होड़कू इयाकू उदुःगुःआ, जेमहा ईसूराः तोनोंग बड़रारे हाँय साबवाडखन रूमी देसरीग मरंग हातपात होड़ एचेरेकू जिमागोडेय। 21दो हँकू ईसू एचेरेकू होंबोरतेड, “ने गुरुजी, अले सुदीयतना आम नपायतेम बड़राता अरूम चेडकूता। आम होड़कू जहंडाव होड़ ना लवे। हनालगा आम तोनोंगीग होड़ आम ननायगे लगा मेरेम एचेयतना। मनदो भगवानराः सताय दूरमे उदुःवाकूता। 22दो अले उदुःवालेमे आम चेले माःआनमे ओंगलेतना? कइसर राजा मलगुजारी एमेवाय लगा नपाय इदा जा कोवान?”
23ईसू हँकूराः अडिग बड़रा सुदीतेडखने कतातेरा, 24“मीटोंग चाँदीराः रिचकी ढिबुवा ईंगपे उदुःवा। हना रिचकी ढिबुवारे इयेराः मुरइत अरू ञाव ओजाःतो इदा?”
हँकू कताया, “मरंग राजा कइसरराः।”
25दो ईसू कताया, “मरंग राजा कइसरराः हवे हान हनाँयपे ओवा अरू भगवानराः हवे हान भनगवानपे एमेवा।”
26दो हँकू नाःआ कता अते होड़कू मड़ंगरे ईसू मेरकू बझाव अवेगडीग। हाँयराः बड़रा अयूमवाडखन हँकू बयावयान अरू कलेकालयानकू।
जियाव रिमुः अरू बियाह बदीरे चेड
(मती 22:23-33; मरकूस 12:18-27)
27सदूकी होड़कू कतायता तोनोंगीग गोएगतो होड़ ओरोय जियाव रेमनेना अरू हँकू अते अदोमकू ईसू एचेरे मीटोंग सवालकू होंबोरतेरा। 28“ने गुरुजी, मोसेस अबू नाःआ इया एचेगे लगाय ओजाःकेरा, तोनोंगीग होड़ बियाहकियानखन हाँय बेगर लँइगतेय गोएग जुवाः दो, गोएगयनाय हाँयरीग बोहोत रंडियाहीने सगइ अरू गोएगतो वगात लगा लइंकिन जनमाव।#दो. नि. 25:5 29दो मीटोंग गाँवरे सात वगीयाकू दोहोना। मरंगीग वगातकू बियाहतेडखन लँइग अरीन होयाःतेय गोएगयान। 30हनते हाँयग रंडियाहीन हुडिंगीग बोहोत सगइतिरिया अरू तयोमते हाँय होंय गोएगयान। 31हनते हाँयते अरू हुडिंगीग बोहोत हों हाँयग रंडियाहीने सगइतेरा अरू हाँय हों गोएगयान। हनन इया सातो वगीयाकू लँइग अरीन होयाःतेकू गोएगयान। 32देहोरते हाँयग अइमी होंय गोएगयान। 33हाँयग अइमी सातो वगीयाकू सुदाय हेरेल पुरावनेना दो, हाँय जियाव रिमुः मेला इयेरीग अइमीय होयाःता?”
34दो ईसू हँकू एचेरेय कताया, “नाःआ चउंदीसरिकुःआ होड़कूराः बियाह होयाःता। 35मनदो गोएगतो अते जियाव रिमुः जुकूर अरू हना जूगरे दोहोन जुकूर इदानकुःआ हँकुःआ होड़कू ओरोकू बियाहनेना अरू ओरोकू एचे बियाहतेडकुःआ। 36हँकू ओरोकू गोएगनेना अरू सेरमो देसरिकुःआ बराहीलकू इयाकू दोहोनता। हँकुःआ होड़कू भगवान जियाव रेमकेडकुःआ अते, हँकू भगवानरिकुःआ लइंकू होयाःता।#रूमी 1:4; 1 एहु 3:1-3 37अपे ईंगपे अयूम, भगवान मोसेस सुदा सलगावतो बुदारेय बड़रानेना। हनमेला भगवान मोसेस एचेरेय कतातेरा, ईंग इबराहीमरीग, इसहाकरीग अरू एकूबरीग भगवान हवे।#एचे उडुंग 3:6 हना अते मोसेस हों उदुःगेता भगवान गोएगतो होड़कूय जियाव रेमकूता, माःआन।#20:37 इबराहीम, इसहाक अरू एकूब अते 450 बरिस तयोमरे मोसेस दोहोना। 38भगवान गोएगतो होड़कूरीग भगवान ना लवे। मनदो हाँय जीयत होड़कूरीग भगवान हवे अरू भगवान मड़ंगरे जमा होड़कू जीयत इदानकुःआ।”
39ईसूराः बड़रा अयूमवाडखन तोनोंग तोनोंग नियम चेडदार होड़कू कताया, “ने गुरुजी, आम नपायमे कताकेरा।” 40हना वरीते सदूकी होड़कू ईसू एचेरे तोनोंग इयाःआ सवालकून होंबोर लगा मेरकू डीड़गेःआ।
मसी इयेरीग बेटा?
(मती 22:41-46; मरकूस 12:35-37)
41अरू ईसू हँकू एचेरेय होंबोरतेरा, “अपेरिकुःआ चेडदार होड़कू चिला लगाकू कतायता, मसी दाऊद राजारीग नइड़-बाँस बेटात हवे, माःआन?
42दो हनाँय सेरेंगकूनराः कागदरे नाःआ इयाय ओजाःकेरा,
परबू ईंगरीग परबू एचेरेय कताया,
ईंग आमरिकुःआ मुदइ होड़कू हरुवावकेडकूखन
43आमराः काट चोडुः लगा अरीनिंग तुलाकू वरी
ईंगराः खउना तिःई गतर दुडुःकियानखन आम ईंग सुदाम राइजकू। #सेरेंगकून 110:1
44दाऊद राजा हों हाँय परबू माःआने कतावायता दो हाँय करा इया दाऊदरीग नइड़-बाँस होड़े होयाः?”
नियम चेडदार होड़कू अते सवासिती
45जमा होड़कू अअयूमा, हनमेला ईसू आँयग चेलाकू एचेरेय कताया, 46“अपे नियम चेडदार होड़कू अते सवासितीपे दोहोन। हँकू झोलोंग झोलोंग सोनहे तुसिंगकेडखन जमा होड़कू ञेलले माःआनते जमा होड़कूराः मड़ंग मड़ंगकू सेनता। बजाररिकुःआ होड़कू जमाकू अलेकू सलामकेःआ माःआनकू चहाःता। हँकू अरजी ओड़ाःरे अरू जोम लगाकू राःता हँकू ओड़ाःरे मइद ततेररे दुड़ुः लगाकू चहाःता। 47रंडियाहीनकू एचेरेकू अडिग जोमता अरू होड़कू उदुःवाकू लगा हँकू मुरुककू अरजीता। मनदो भगवान हँकुःआ होड़कू मुरुके डंडियावकूता।”
Valgt i Øjeblikket:
लूका 20: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.