मती 19
19
अइमी अड़ाःगे बदीरे चेड
(मरकूस 10:1-12)
1ईसू नाःआ बड़रा कतातेडखन गलील छतर अते एरदन नई मार परोम एहूदिया छतररेय सेनेडा। 2मुरुक बगरा होड़कू ईसू देह दूरकू ओतोंग सेना अरू ईसू हँकूय नपायतेडकुःआ।
3हनते फरीसी होड़कू तोनोंग तोनोंग कतारे ईसू अंदजावकिडिगखन बझावगेय लगाकू होंबोरतिरिया, “ने गुरुजी, अबूराः नियम इया तोनोंगीग होड़, तोनोंगाः कता बदीरे आँयगरीग अइमीय अड़ाः अवेयता जा?”
4दो ईसू कता कुदातेरा, “अपे भगवानराः कागदरे मेरपे बछावगना जा? हंडा ओजाःतो इदा, बुँहड़ीरे भगवान अइमी अरू मरदे तुलाकेरा। #रेःएत 1:27 5अरू मरद अनँयग एंगात-अपात अते एटाःकियानखन अनँयगरीग अइमी सुदाय दोहोनता अरू हँकिन बना होड़ मिनी देहकिन होया जुवाःता। #रेःएत 2:24 6अरू हना वरीते हँकिन बार होड़ कोवाकिना, मनदो मिनी होड़ हवे। हनालगा भगवान मिनीकेडकिनाय हँकिनाः होड़किन, तोनोंगीग होड़ अहाय हिगार हटिंगकिन।”
7हनते फरीसी होड़कू कतातेड, “दो मोसेस नाःआ इया चिला लगाय कतातेरा, तोनोंगीग होड़ अड़ाःगेराः चिठी ओजाःकेडखन आँयगरीग अइमी अड़ाः एंडागोडेय,#दो. नि. 24:1-4 माःआन?”
8दो ईसू हँकू एचेरेय कतातेड, “अपेराः जीव कटकट इदा। हनालगा अपेरिकुःआ अइमीकू अड़ाः एंडाकू लगा नाःआ इयाय हुकुमवातेडपेःआ। मनदो बुँहड़ी वरीते नाःआ इया मेरे दोहोगान। 9अपे ईंगपे अयूम, सनही अते तोनोंगाः एटाः कताते अनँयग अइमी अड़ाःकेडखन एटाः अइमीय सगइता दो हाँयग होड़ सनहाता।”
10दो चेलाकूतेन ईसू एचेरेकू कतातेरा, “मी होड़ मरद अरू अनँयगरीग अइमी सुदा नाःआ इया इदान दो अहाय बियाहगुः होले नपाय दोहोनता।”
11हनते ईसू चेलाकूतेन एचेरेय कतातेड, “जमा होड़कू नाःआ कता ओरोकू मनेवातेरा। मनदो नाःआ कता मनेवा लगा भगवान एचे सुदीकेडकुःआ हँननकुःआ होड़कू एकलाकू मनेवाता। 12मनदो तोनोंग तोनोंग होड़कू जनम अते चकुराकू दोहोनता अरू तोनोंग तोनोंगकू होनोड़कू चकुराकू बड़ाँवकेडकुःआ अरू तोनोंग तोनोंग होड़कू भगवानराः राइज लगा बेगर बियाहते इदानकुःआ। बुझाव अवेनता, हाँयग होड़ ईंगराः कताय मनाः।”
ईसू लइंकू लगाय अरजीतेरा
(मरकूस 10:13-16; लूका 18:15-17)
13ईसू तिःई खेपाकेडखन लइंकू अरजीवा लगा होड़कू ईसू एचेरे लइंकूकू अगूकुःआ। हना ञेलतेडखन चेलाकूतेन हँकूकू डंटावतेरा।
14दो ईसू कतातेड, “लइंकू अहापे रोंकावकू। ईंग एचेरेपे वेग ओवाकू। नँकुःआ लइंकू इया इदानकुःआ हँननकुःआ होड़कूराः हवे भगवानराः राइज।” 15हनते ईसू लइंकूराः बोःरे तिःईय खेपातेरा अरू हना ततेर अते एटाः अगीय सेनेडा।
मीटोंग मइद सवाल
(मरकूस 10:17-31; लूका 18:18-30)
16मी दिन मी होड़ ईसू एचेरे वेगवाडखने कतातेरा, “ने गुरुजी, ओरो टुटीगनेना हना जीव पवाः लगा ईंग चिला नपायिंग एचे?”
17दो ईसू हाँयग होड़े कतावाड, “नपाय चिला हवे हना बदीरे आम ईंग एचेरे चिला लगाम होंबरेतना? भनगवान एकला नपाय इदानिया। आम ओरो टुटीगनेना हना जीव पवाः लगाम चाहाःतान दो भगवानराः नियमकूनमे मनाः।”
18दो हाँयग गिरहत होड़ ईसू एचेरेय होंबोरतेड, “चिला नियमकूनिंग मनाः?”
दो ईसू कतातेड, “तोनोंगीग अलोम ञेड एंडाय, अलोम सनहाःआ, तोनोंगीगराः जिनिस अलोम इनिगगे, अरू लबरा हिदइत अलोम कता उदुःगे। 19आम एंगा-अपाकिनमे मान मरजइत#एचे उडुंग 20:12-16; दो. नि. 5:16-20 अरू आमरीग परुसी अनम इयाम अलार-दुलारगेय।”#लेवी 19:18
20दो हाँयग डिंघा होड़ कतातेड, “ने गुरुजी, नाःआ जमा नियमकून ईंग मनावकिया। नुँहू ईंग अरू चिला एचे इदा?”
21दो ईसू कता कुदातेरा, “आम नाय नपाय बड़ाँः लगाम चहाःतना दो, सेनेकियानखन आमराः जमा जइतकून अकिरिंगकेडखन गरीब होड़कूम हटिंगगोडवा। अरू हना तयोमरे आम ईंग अगीम ओतोंग वेग। दो आम सेरमो देसरे मुरुक नपाय नपाय इमानमे पवाःता।”
22हाँयग डिंघा होड़ मुरुक गिरहत होड़े दोहोना। हनालगा हाँय नाःआ कताय अयूमतेरा दो, अनँयग जीव हुडिंगनेनखन ओड़ाःए कुदायान।
23हनते ईसू चेलाकूतेन एचेरेय कतातेड, “अपे ईंगपे अयूम, गिरहत होड़कू भगवानराः राइजरे बोल लगा मुरुक मसकिल इदा। 24ईंग अरूयिंग कतायतना, भगवानराः राइजरे मी होड़ गिरहत होड़ बोल अते मीटोंग सुईराः बुचाःते ऊँट सेने पारगुः लगा रिता इदा।”
25नाःआ बड़रा अयूमतेडखन चेलाकूतेन मुरुककू बयावयान अरूकू कतातेरा, “दो इये सडाव अवेनता?”
26ईसू चेलाकूतेन अगी ञेलतेडखने कतातेरा, “मनुवाकू अते नाःआ इया ओरो होया अवेनेना। मनदो जमाकून भगवान अते होया जुवाःता।”
27दो पतरस ईसू एचेरेय कतातेरा, “अले दो जमा बरानाः अड़ाः एंडाकेडखन आम देह दूरले वेगकिया। दो अले चिलाले पवाःता?”
28दो ईसू कतातेड, “अपे ईंगपे अयूम, नँवा चउंदीस बड़ाँः मेला, मनुवारीग बेटात मान मरजइत घड़ीन राइजगे लगाय दुड़ुःता। हनमेला ईंग देह दूरपे सलाःतना अपे हों, बारहगोटोंग गदीरे दुडुःकियानखन इसराएलरिकुःआ बारहगोटोंग गोतोररिकुःआ होड़कूपे राइजता। 29अरू अँनकूराः ओड़ाः सहे वपक-बोपोहकूतेन सहे अपात, लइंकूतेन सहे दोहोड़कून ईंग लगाकू अड़ाःगोतेडा, हँकू मी सव गुनाकू पवाःता अरू ओरो टुटीगनेना हना जीवकू पनावाःता। 30मनदो मड़ंगरे इदानकुःआ, हँकुःआ होड़कू अते मुरुक बगरा होड़कू तयोम जुवाःता अरू तयोमरे इदानकुःआ, हँकुःआ होड़कू अते मुरुक बगरा होड़कू मड़ंग जुवाःताकू।”
Valgt i Øjeblikket:
मती 19: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.