मती 21
21
ईसू मरंग सहर एरुसलेमरेय बोलोयान
(मरकूस 11:1-11; लूका 19:28-40; एहुना 12:12-19)
1ईसू अरू आँयगरिकुःआ चेलाकूतेन एरुसलेम मरंग सहरराः लेनेसान जइतून पहाड़रे बतफेगा गाँवरेकू सोदोरनेना। दो ईसू बार होड़ चेलाकिनतेन नाःआ इया कतावातेडखने वारगोतेडकिन, 2“अबा मड़ंगराः गाँवरेबा सलाव जुवाः अरू ओहेन मीटोंग गदहा तोलतो अरू हाँयग गदहा सुदा मीटोंग होनतो हों ञेलेयताबा। हँकिन लड़ाकेडखन ईंग एचेरेबा अगूकिन। 3अबा एचेरे तोनोंगीग कही माःआने कताय दो कतायबा, परबूके नँकिनराः जरूरइत इदा, माःआन। दो हाँय हँकिन ओहेने वारगोडकिनता।”
4भगवानराः बड़रा कता होड़ते भगवान कतातेरा हना कता पुरावगुः लगा दोहोना;
5“सीयोन#21:5 सीयोन एरुसलेम सहरराः एटाः ञाव हवे। सहररिकुःआ होड़कूपे कतावा,
ञेलेयपे, अपेरीग राजा अनँयग आँयग हुडिंगे ओंगलुःता,
अरू गदहा होन चोटरे
दुडुःकियानखन अपे एचेरे दरवाया।”#जक 9:9
6दो बनर चेलाकिनतेन सेनेडा अरू ईसू कतातेरा हनन इयाकिन एचेतेरा। 7हनते हँकिन गदहा अरू गदहा होन ईसू एचेरेकिन अगूतेडकिना अरू गदहा होन चोटरे सोनहेकू लतकातेरा अरू ईसू हाँयग गदहा होन चोटरेय दुड़ुःनेना। 8दो हना दूररे मुरुक बगरा होड़कू ईसू मान मरजइतगेय लगा अँननकूराः बहरी तुसिंगतो सोनहेकू बेल इदीया अरू एटाः होड़कू सींगकूनराः डइड़कून तपेग अगूकेडखन हाँय मड़ंग मड़ंगकू बेल इदीगेया। 9मुरुक बगरा होड़कू हाँय मड़ंग मड़ंग अरू देह दूरकू सेनेडा अरू हँकुःआ होड़कू मुरुक खिररी घड़ीनकू कताया,
“दाऊद राजारीग नइड़-बाँस होड़के होसनना!”
“परबूराः ञावतेय वेगता हाँयग होड़राः जीव भगवान भलावाता!”#सेरेंगकून 118:26
“सेरमो देसरीग भगवानके होसनना!”
10ईसू एरुसलेम मरंग सहररेय बोलोनेन दो सहररे हलो-गदोड़ीयान अरूकू होंबोरतेड, “नाँय इये हवे?”
11दो हाँय सुदाकू सेनेडा हँकुःआ होड़कू कतातेड, “नाँय गलील छतरराः नसरत सहर अतेय वेगकिया हाँयग भगवानराः बड़रा कतायीग होड़ ईसू हवे।”
ईसू भगवानराः ओड़ाःरे
(मरकूस 11:15-19; लूका 19:45-48; एहुना 2:13-22)
12ईसू भगवानराः ओड़ाःरे बोलोकियानखन फेरवइत होड़कू जमाकूय जोः उडुंगगोतेडकू अरू ढिबुवाकू बदलाःआ हँकुःआ होड़कूराः टिबुलकून अरू पेरवाँ तितीगकूकू अकरिंगा हँकुःआ होड़कूराः मछिलाकूने उलटाव एंडागोतेडे। 13अरू ईसू हँकू एचेरेय कताया, “भगवानराः कागदरे ओजाःतो इदा,
ईंगराः ओड़ाः अरजी ओड़ाः माःआनकू कतावाता,
मनदो अपे नान इनिग होड़कूराः लातपे बड़ाँवगोतेडा।”#इर 7:11
14हनते अंधा होड़कू अरू लंगड़ा होड़कू ईसू एचेरेकू सेनेडा अरू हाँय हँकूय नपायतेरा। 15मनदो मरंग पुजउरीकू अरू नियम चेडदार होड़कू, ईसू एचेतेरा हना बयाव जुवाः इयाःआ बुताकूनकू ञेलतेरा अरू भगवान ओड़ाःराः राचरे लइंकू, दाऊद राजारीग नइड़-बाँस होड़के होसनना, माःआन खिररीतकू अयूमतेरा दो, हँकू मुरुककू रीसयान।
16दो हँकू ईसू एचेरेकू होंबोरतेरा, “नँकुःआ लइंकू चेले माःआनकू कतायतना, आम मेरेम अयूमगरा जा?”
दो ईसू कता कुदातेड, “हाव, अपे भगवानराः कागदरे मेरपे बछावगना जा,
लइंकू अरू दूदकू ञूता हँकुःआ डेंबाकू,
आमकू जाग लगा आम अनमतेम सपड़ावतेडकुःआ,#सेरेंगकून 8:2 माःआन?”
17हनते ईसू हँकुःआ होड़कू अड़ाःतेडखन हना सहर अते बहरी बेतनिया गाँव अगी तोराय अरू हंडा मी रइते दोहोनेना।
ईसू लुवा दूबे सती-सरापतेरा
(मरकूस 11:12-14; 11:20-24)
18निनिंदावा निंदावा ईसू अरू चेलाकूतेन एरुसलेम सहर अगी कुदान मेला, हाँय रंगेगतिरिया। 19हनमेला दूर कुटीरे मीटोंग लुवा दूब ञेलतेडखन ईसू जोःओत इदा माःआनते हना लुवा सींग अगीय सेनेडा। मनदो हना सींगरे सकमतो एकला दोहोना। अरू हाँय हना लुवा सींग एचेरेय कतातेरा, “नुँहू वरीते आम कहियो ओरोम जोनेना।” दो हना लुवा दूब ओहेन झुरायान।
20हना लुवा दूब झुरात ञेलतेडखन चेलाकूतेन मुरुककू बयावयान अरू हँकू ईसू एचेरेकू होंबोरतेड, “नाःआ लुवा सींग करा इयारे ओहेन झुरायना?”
21दो ईसू चेलाकूतेने कतावाड, “अपे ईंगपे अयूम! अपे बिसवासकेडखन बार जीवगुः घड़ीन अलोपे दोहोन दो, ईंग लुवा दूब एचेरेयिंग एचेकेरा हना अते अरू मरंग मरंग बयाव जुवाः इयाःआ बुताकूनपे एचे अवेयता। अपे नाःआ पहाड़ होँपे कतावा, नाःआते रवीग उडुंगकियानखन समुंदररे लुजरुः, दो हनन इया होया जुवाःता। 22जे हों सकालाः अपे बिसवासकेडखन अरजी घड़ीनपे असेय हना जमा अपे पवाव जुवाःतापे।”
ईसूराः हातपात बदीरेकू होंबोरतिरिया
(मरकूस 11:27-33; लूका 20:1-8)
23ईसू भगवानराः ओड़ाःरे बोलोनेनखन होड़कूय चेचेडा। दो मरंग पुजउरीकू अरू होड़कूरिकुःआ हातपातदारकू हाँय एचेरे वेगनेनखनकू होंबोरतिरिया, “आम नाःआ इया बुता इयेराः हातपाततेम एचेयता? अरू नाःआ एचेय लगा इये हातपाते ओवाडमेःआ?”
24दो ईसू हँकूय कता कुदावाड, “ईंग हों अपे एचेरे मीटोंग कतायिंग होंबोरपेता। हना कता बदीरे ईंगपे उदुःवा दो, नाःआ बुता ईंग चिला हातपाततेयिंग एचेयता हना कता बदीरे ईंग हों अपेयिंग कता उदुःवाता। 25एहुना बतिसमा एमेवाकू लगा इये हातपाते ओवातिरिया, भगवान जा मनुवाकू?”
दो हँकू अँननकू अँकू कता होड़ेंगा, “नाःआ हातपात एहुना सेरमो देस अगीतेय पवावकिया, माःआनबू कताय दो, हाँय एचेरे चिला लगा मेरपे बिसवासगाड, माःआने कतावाबूता। 26अरू जमा होड़कू एहुना भगवानराः बड़रा कतायीग होड़ माःआनकू मनवेयता। हनालगा हाँय होड़कू अगीते हातपाते पवावकिया, माःआनबू कताय दो, अबू नँकुःआ होड़कूबू बोरोवाता।”
27दो हँकू ईसू एचेरेकू कता कुदातेरा, “अले मेरले सुसुदीतना।”
दो ईसू हँकू एचेरेय कतातेरा, “दो ईंग हों नाःआ बुता ईंग चिला हातपाततेयिंग एचेयतना हना अपे एचेरे ओरोयिंग उदुःवातेडपेःआ।”
बार होड़ बेटाकिनराः अउल-तउल कहड़ी
28“अपे चेले माःआनपे ओंगलेता? मी होड़रिकिनाः बार होड़ बेटाकिन दोहोना। अपात मरंगीग बेटात एचेरेय कतातेरा, ने बाबू, तिसिंग आम अंगूर बगइचारे सेनेकियानखनमे बुता।
29दो हाँयग बेटात कतातेरा, ईंग ओरोयिंग सेनेडा। मनदो तयोमते हाँय पसतावनेनखने सेनेडा अरू अंगूरराः बगइचारेय बुतानेना।
30हना तयोमरे अपात हुडिंगीग बेटात एचेरे सेनेडखन हनन इयाय कतातेरा। दो हुडिंगीग बेटात कतातेरा, हाव, सेनतिंग। मनदो हाँय बुता लगा अंगूर बगइचारे मेरेय सेनेगान।
31दो हँकिनाः बार होड़ वगियारे इये अपातराः हिछाकिन पुरावतेरा?”
हँकू कतातेरा, “मरंगीग बेटात।”
दो ईसू हँकुःआ होड़कूय कतावाड, “अपे ईंगपे अयूम! मलगुजारी गोः होड़कू अरू सनहा-सनही होड़कू अपे अते मड़ंग भगवानराः राइजरेकू बोलता। 32बतिसमा एमेयीग होड़ एहुना नपाय धरमिया दूरे उदुःवातेडपेःआ। अरू अपे हाँय एचेरे मेरपे बिसवासगाड। मनदो मलगुजारी गोः होड़कू अरू सनहा-सनही होड़कू बिसवासतेरा। अरू नाःआ ञेलतेडखन तयोमरे हों अपे कसूर अते जीव कुदाकेडखन एहुना एचेरे मेरपे बिसवासगाड।”
बेलूर अधियादारकूराः अउल-तउल कहड़ी
(मरकूस 12:1-12; लूका 20:9-19)
33“अपे अरू एटाः मीटोंग अउल-तउल कहड़ीपे अयूम। मी होड़ अंगूरराः बगइचाय लगावतेरा अरू हनाराः चइरो गतर दिरिराः घोरनाय तुलातेरा अरू अंगूरराः रस लेन लगा मीटोंग चटइन कोटेग कोटेगे लाः बोलोतेरा अरू मीटोंग उनुसूल अगुरा मसाय तुलातेरा। हनते हाँय अधियादारकू एचेरे अधिया एमे अटूवाडखन एटाः देस तोराय। 34हनते जोःराः बेला सोदोरनेन दो हाँयग मालिक अधियादारकू एचेरे आँयग बंटा अगू लगा हड़वाहाकूतेने वारगोतेडकू।
35दो अधियादारकू हाँयग मालिकरिकुःआ हड़वाहाकू साबतेडखन मी होड़कू लुटीगतिरिया, एटाः होड़कू ञेड गोएग एंडातिरिया अरू मी होड़ दिरितेकू तेकेतिरिया। 36हना तयोमरे हाँयग मालिक अरू बगरा हड़वाहाकूतेने वारगोतेड। दो हँकुःआ अधियादारकू हनन इया हँकू सुदा होंकू एचेतेरा। 37टुनुटीगरे हाँयग मालिक बेनेटाते वारगोतेडीग। हाँय ओंगोलतेरा, हँकू नाँयकू मान मरजइतगेयता, माःआन।
38मनदो हँकुःआ अधियादारकू बेटात ञेलतेडखनकू कता होड़ेंगा, ननाँय हवे नाःआ बगइचारीग इताडदार। दबूपे, नाँयबू ञेड एंडाय अरू नाँयराः इताड अबू गोःयाता। 39हनते हँकू हाँय साबतिरिगखन बगइचा अतेकू रेमगे उडुंगतिडिगखनकू ञेड एंडागोतेडीग।
40अंगूर बगइचारीग मालिक हँकुःआ अधियादारकू एचेरेय सेन दो, हाँय हँकू सुदा चिलाय एचेता?”
41हँकू हाँय एचेरेकू कता कुदातेड, “हाँय हँकुःआ बेलूर होड़कू मुरुक कटसिया एमे घड़ीने लाय एंडाकूता। हनते हाँय अंगूरराः बगइचा अनँयग बंटा जोःओकू एमेवायता हँकुःआ एटाः अधियादारकू एचेरेय एमेगोडता।”
42ईसू हँकू एचेरेय कतातेड, “अपे भगवानराः कागदरे मेरपे बछावगना जा,
ओड़ाः तुला मिसतिरीकू ओरो बड़ाँवनेना माःआनकू चलाः एंडातेरा,
हनानाः दिरि जमा दिरिकून अते ननपाय दिरि होयानेना।
नाःआ दो परबू अगीते होयाकिया
अरू अबू बयावयनाबू। #सेरेंगकून 118:22,23
43हनालगा ईंग अपे एचेरेयिंग कतायतना, भगवानराः राइज अपे अते चलाः एंडा जुवाःता अरू नपाय जोःओकू जोःता हँकुःआ एटाः जइत होड़कू हनाकू पवाःता। 44[नाःआ दिरिरेय लुजरुःता हाँयग होड़ लंजाः हटिंग जुवाःताय। मनदो तोनोंगीग होड़ चोटरे नाःआ दिरि लुजरुः दो हाँय गिलाव जुवाःता।”]
45मरंग पुजउरीकू अरू नियम चेडदार होड़कू ईसूराः नाःआ अउल-तउल कहड़ीकू अयूमतेडखनकू सुदीगोतेड, नाँय अबू बदीरेय कतायतना, माःआन। 46अरू हँकू हाँय सबेय लगा दोंगकू ञामा। मनदो होड़कू हाँय भगवानराः बड़रा कतायीग होड़ माःआनकू मनवेया। हनालगा हँकू होड़कूकू बोरोवाःआ।
Valgt i Øjeblikket:
मती 21: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.