मती 24
24
भगवानराः ओड़ाःराः लाय एंडान
(मरकूस 13:1-2; लूका 21:5-6)
1ईसू भगवानराः ओड़ाः अते उडुंगकियानखने सेन मेला आँयगरिकुःआ चेलाकू हाँय एचेरेकू सेनेडा। अरू हँकू भगवानराः ओड़ाः तुमिन सुघर तुलात इदा माःआनकू उदुःतेरा। 2दो ईसू हँकूय होंबोरतेरा, “अपे नाःआ जमाकूनपे ञेलतना जा? अपे ईंगपे अयूम! नंडा मीटोंग दिरि हों एटाः दिरि सेरमो ओरो दोहोनेना। जमा दिरिकून कसड़ लोजोरगोडताकू।”#24:2 ई. त. 70 रे रूमी देसरिकुःआ सइना होड़कू एरुसलेम सहररेकू वेजेडखन भगवानराः ओड़ाः होंकू कसड़ लोजोर एंडागोतेडा। हनमेला ईसूराः नाःआ कतत सरवन पुरावयना।
चउंदीस टुटीगगुःराः चिनहाकून
(मरकूस 13:3-23; लूका 21:7-24)
3हनते ईसू जइतून पहाड़रेय दुड़ुःकुःआ। हनमेला हाँयरिकुःआ चेलाकू हाँय एचेरे एकला सेनेवाडखनकू होंबोरतिरिया, “ने गुरुजी आम उदुःवालेमे, नाःआ कता तुमिस होयाःता? आमराः कुदा वेग अरू चउंदीस टुटीगगुःराः चिनहा करा इया दोहोनता?”
4दो ईसू हँकू एचेरेय कताया, “तोनोंगीग अपे अहाकू बहकाव अवेपे लगा सवासितीपे दोहोन। 5मुरुक बगरा होड़कू ईंगराः ञावते अपे एचेरेकू वेगता अरूकू कतायता, ईंग मसी हवे, माःआन अरू हँकू मुरुक होड़कूकू अडिगगोडकूता। 6अपे लड़ाइ बुँहड़ीनता, हना बदीरेपे अयुमेता। मनदो अपे अहापे बयावगुः। नाःआ इयाःआ कताकून मड़ंगरे होनोयाः लगा इदा। मनदो हनमेला लुलिगगुःराः बेला कोवानेःआ। 7मी जइतरिकुःआ होड़कू एटाः जइतरिकुःआ होड़कू सुदा अरू मी देसरिकुःआ होड़कू एटाः देसरिकुःआ होड़कू सुदाकू लड़ाइता। एटाः एटाः ततेरराः ओत डोलाःता अरू कतकाल हों होयाःता। 8नाःआ जमाकून, सवाड़ीनराः हसू इया बुँहड़ीनता।
9हनते होड़कू अपे संतावपे लगा अरू ञेड एंडापे लगाकू जिमापेता। जमा जइतरिकुःआ होड़कू ईंगराः ञाव अते अपेकू हिनइस-बिनइसवापेता। 10हना कटसिया मेला मुरुक होड़कू बिसवास अड़ाःकेडखनकू कुदा जुवाःता। मुरुक होड़कू एटाः होड़कूकू एचे साबता अरूकू हिनइस-बिनइस होड़ेंगता। 11भगवानराः बड़रा लबराकेडखनकू कतायता हँकुःआ मुरुक बगरा होड़कू रेम चड़ाँनता अरू मुरुक बगरा होड़कूकू बहकावगोडकूता। 12बेलूर कताकून चउंदीसरे मुरुक बगरानता, जेमहा होड़कूराः दुलार ओहराव जुवाः। 13मनदो टुटीग वरी सहाव घड़ीने दोहोनता हाँयग होड़ बनसाव जुवाःता। 14अरू भगवानराः राइजराः नपाय सरवन चउंदीसराः जमा जइत होड़कू एचेरेकू परसारगेता। अरू हना तयोमरे चउंदीस टुटीग जुवाःता।
15नाःआ चेडतोय बछाःता हाँयग होड़ बुझाः लगा इदा। भगवानराः बड़रा कतायीग होड़ दानिएल कतातेरा हन इया मुरुक बेलूर जिनिस मुनुरुक सुद ततेररेपे ञेल दो, 16हनमेला एहूदिया छतररे इदानकुःआ हँकुःआ होड़कू पहाड़ अगीकू ञीर जुवाः। 17तोनोंगीग होड़ सड़ुम सेरमोरेय दोहोन दो, हाँय हंडा अते उतरावकियानखन अनँयग ओड़ाः अते तोनोंगाः जिनिस अलोय उडुंगे, 18अरू तोनोंगीग होड़ दोहोड़रेय दोहोन दो, आँयग सोनहे अगू लगा अलोय कुदान। 19हना दिनकूनरे उड़सी अइमीकू अरू दुदू एचे ञू अइमीकू लगा मुरुक कटसिया होयाःता। 20हनालगा अपेराः ञीरराः बेला ररंग दिनरे सहे लोड़ोनराः दिनरे अहा होयाः लगापे अरजीगे। 21हना बेलारे ओतरिकुःआ होड़कू लगा मुरुक सिकिसता होयाःता। भगवान ओते तुलाकेरा हना वरीते, हना बेलारे होयाःता हान इयाःआ सिकिसता मेर होयागना अरू हनाते मड़ंग अगी हों नाःआ इया सिकिसता ओरो होयानेना। 22भगवान नाःआ सिकिसताराः दिनकून मेरेय हुडिंगकेः दो तोनोंगीग होड़ ओरोय बनसावकुःआ। मनदो भगवान अनँयगरिकुःआ सुनावतो होड़कूराः ओजाहते नाःआ दिनकूने हुडिंगगेता। 23हना बेला तोनोंग तोनोंग होड़कू कतायता, ञेलेयपे, नंडा मसी इदानिया अरू माररे मसी इदानिया, माःआन। दो अपे हना कतारे अलोपे बिसवासगे। 24हना बेला मुरुक बगरा होड़कू लबरा घड़ीनकू कतायता, ईंग मसी हवे अरू ईंग भगवानराः बड़रा कतायीग होड़ हवे, माःआन। हँकू मुरुक चिनहाकून अरू बयाव जुवाः इयाःआ बुताकून एचेवाडखन भगवानरिकुःआ सुनावतो होड़कू हों बहकावकू लगाकू कुरनिसगेता। 25अयुमेपे! नाःआ जमाकून होयाः अते मड़ंगरे अपे एचेरेयिंग उदुःगेतना।
26दो होड़कू अपे एचेरेकू कताय, ञेलेयपे, माँय टयंगाब ततेररे इदानिया। दो अपे हना अगी अलोपे सेन। हँकू अपेकू कतावा, ञेलेयपे, माँय कुठरीरे इदानिया, दो अपे अलोपे बिसवासगे। 27ठेड़ररे पुरुब होर विड़चेड़ता दो, पछिम वरी विड़चेड़ सोदोरता, हनन इया मनुवारीग बेटातराः कुदा वेग होयाःता। 28लास दोहोनता हननंडा कुड़ीडकू जुमाःता।”
ईसूराः कुदा वेग
(मरकूस 13:24-27; लूका 21:25-28)
29“हना सिकिसताराः दिनकून अते तयोमरे,
बेर अंदरा जुवाःता,
अरू बांगो अते मरसल ओरो टेडेगनेना।
अरू सेरमो अते इपीलकू लुजुरुःता
अरू सेरमोरे विड़चेड़ता हना जंगरकून डोलाव जुवाःता।
30हनते मनुवारीग बेटातराः चिनहा सेरमोरे होयाःता। अरू चउंदीसरिकुःआ जमा जइत होड़कू फिकीर घड़ीनकू इयामता। अरू हनमेला हँकू मनुवारीग बेटात मुरुक जंगर अरू विड़चेड़तो मरसल इया बदरीरे वेगतोकू ञेलेयता। 31हनते हाँय अनँयगरिकुःआ बराहीलकू मरंग सोहनाई ओंग घड़ीने वारकूता अरू हाँय चउंदीसराः चइरो गतर अते, सेरमोराः मी कोना अते एटाः कोना वरीते, भगवान सुनावकेडकुःआ हँकुःआ जमा होड़कू भगवान एचेरेय एचे जुमावकूता।”
लुवा दूबराः अउल-तउल कहड़ी
(मरकूस 13:28-31; लूका 21:29-33)
32“लुवा दूब अते अपे नाःआ कतापे चिडुः। सींग दूबराः डइड़ अते नँवा गोजा पलहुवानतान दो, हनमेला अपे सुदीगोडता जेट असाड़ सोदोरयना, माःआन। 33ईंग कताया हना जमाकूनपे ञेल दो अपे सुदीबाःका ईंग कुदा वेगराः दिन निचकाःतना। 34अपे ईंगपे अयूम, नाःआ जमाकून अरीन होयाः वरी नाःआ जूगरिकुःआ होड़कू ओरोकू गोएगनेना। 35ओत अरू सेरमो टगाव जुवाःता, मनदो ईंगराः सरवन कहियो ओरो टगावनेना।”
जगलेपे दोहोन
(मरकूस 13:32-37; लूका 17:26-30,34-36)
36“मनदो हना दिन सहे बेला तोनोंगीग होड़ मेरकू सुसुदीता। सेरमोरिकुःआ बराहीलकू अरू बेटात हों मेरकू सुदीयतना, मनदो अपांग भनगवान एकला नाःआय सुसुदीतना। 37मनुवारीग बेटात कुदा वेगता हना दिन नूहराः परियारे होयानेना हना इया होयाःता। 38नूह मरंग जहाजरे अरीने देग वरी होड़कू जोम ञूःआ अरू बियाहगुःआकू अरू बियाह लगाकू एमे होड़ेंगा। 39पुरा दाः वेग वरी हँकू तोनोंगीग मेरकू सुदीगाड अरू जमा होड़कू हना दाःरेकू तू एंडायान। हनन इया मनुवारीग बेटात वेग मेला हों होयाःता। 40बार होड़ दोहोड़रेकिन बुताता दो, भगवान मी होड़े रेम गोःयायता अरू मी होड़े अटू एंडा अटूयता। 41बार होड़ अइमीकिन जंतारेकिन दड़ीता दो, भगवान मी होड़े रेम गोःयायता अरू मी होड़े अटू एंडा अटूयता।
42अपे मेरपे सुसुदीतना अपेरीग परबू तुमिसे वेगता। हनालगा अपे जगलेपे दोहोन। 43अपे नाःआ कता सुदीगे लगा इदा। मीटोंग ओड़ाःरीग मालिक इनिग होड़ तुमिसे वेगता हना हाँय सुदीय दो हाँय जगलेय दोहोनता अरू इनिग होड़ मेरेय बोलो ओवायता। 44मनुवारीग बेटात तुमिसे कुदा वेगता, हना अपे मेरपे सुदीयतना। हनालगा अपे हों सपड़ावतोपे दोहोन।”
नपाय अरू बेलूर सेवकियाकिन बदीरे
(लूका 12:41-48)
45“कनहूनदार अरू नपाय बिसवासगेयीग सेवकिया होड़ इये हवे? एटाः सेवकिया होड़कू नपाय बेलारे जोम जिनिसकून एमेवाकू लगा मालिक मूक होड़े बड़ाँवतिरिया हनाँय हवे। 46दो मालिक वेग मेला हाँयग सेवकिया होड़ अनँयग बुता नपाय एचेयतेय ञेलेयता दो, हाँयग सेवकिया होड़राः जीव नपाय दोहोनता। 47अपे ईंगपे अयूम! हाँयग मालिक हनाँयग सेवकिया होड़ एचेरे आँयगराः जमा जिनिसकूने जिमागोडता। 48मनदो हाँयग सेवकिया होड़ बेलूर इदानिया अरू अनँयग आँयगे कतायता, ईंगरीग मालिक वेग लगा कुबेरगेतनाय, 49अरू हाँय एटाः सेवकिया होड़कूय ञेडता अरू मतवाड़कू सुदाय जोम ञूयता। 50दो मालिकतेन मेरेय टकागेयता अरू मेरेय सुदीयता हनन मेलाय वेगता। 51अरू मालिक हाँयग सेवकिया होड़ मुरुक डंडियावकिडिगखन पचघुचिया होड़कू सुदाय वार एंडागोडेयता। अरू हना ततेररे होड़कू इयाम घड़ीन तिरिंगकू कड़रावता।”
Valgt i Øjeblikket:
मती 24: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.