मरकूस 7
7
जीव मइलावगोडता हना जिनिसकून
(मती 15:1-20)
1दो एरुसलेम सहर अते तोनोंग तोनोंग फरीसी होड़कू अरू एटाः एहूदा नियम चेडदार होड़कू ईसू एचेरे जुमाः लगाकू वेजेडा। 2अरू ईसूरिकुःआ चेलाकू अते अदोम चेलाकू बेगर तिःई अचंगतेकू जोमा, हना हँकू ञेलतेरा। 3(फरीसी होड़कू अरू जमा एहूदाकू अँकूरिकुःआ खुटिपरिया होड़कूराः रिती-बिधी इयाकू सलाःआ अरू हँकूराः रिती-बिधी इया तिःई अरीनकू अचंगगुः वरी हँकू तोनोंगाः जिनिस मेरकू जोमा। 4अरू हनन इया हँकू बजार अते ओड़ाःरेकू वेगता दो हँकू अरीनकू उमुः वरी तोनोंगाः जिनिस मेरकू जोमा। हँकू अँकूराः रिती-बिधी इया गिलासकून, दाः बुराः भंडाकून, पितड़राः इसिंग चटूकूनकू बुहाला अरू एटाः एटाः कताकूनकू एचेया।)
5दो फरीसी होड़कू अरू एहूदा नियम चेडदार होड़कू ईसूरिकुःआ चेलाकू एचेया हनाकू ञेलतेड अरू हाँय एचेरेकू होंबोरतेड, “ने गुरुजी, चिला लगा आमरिकुःआ चेलाकू अबू खुटिपरियारिकुःआ होड़कूराः रिती-बिधी इया मेरकू सलाःतना अरू मइलावतो तिःईतेकू जोमतना?”
6दो ईसू हँकू एचेरेय कतातेरा, “भगवानराः बड़रा कतायीग होड़ एसयाह, अपे पचघुचिया होड़कू बदीरे मड़ंगरेय कतातेरा हना कता जमा सताय हवे।
भगवानराः कागदरे ओजाःतो इदा,
नँकुःआ होड़कू बनाड़रा बड़रारे ईंगकू मान-मरजइतता,
मनदो हँकूराः ओंगोल ईंग अते एनेटाः अगी दोहोनता।
7हँकुःआ होड़कू बेगर मतलोब ईंगकू जागतना,
अरू हँकूराः चेड जमा होड़कूराः ओंगोलते इदा, हना नियमकून हवे।#एस 29:13
8अपे भगवानराः नियमकून मनाः अड़ाःगोतेडापे अरू होनोड़कूराः नियमकूनपे मनाःतना।”
9ईसू अरू हँकू एचेरेय कतातेरा, “अपे भगवानराः नियमकून चलाःकेडखन अँननपेराः रिती-बिधी सलाव लगा एटाः दूरपे ञामकेरा।
10मोसेस मड़ंगरेय कतातेरा,
आम एंगा-अपा मान मरजइतकिन लगा इदा,#एचे उडुंग 20:12; दो. नि. 5:16
अरू
तोनोंगीग होड़ आँयग एंगा अपाकिने सती-सरापता, हाँय जिते जीयत ञेड एएंडा लगा इदा।#एचे उडुंग 21:17; लेवी 20:9
11मनदो अपे कतायतना, तोनोंगीग अनँयग एंगा-अपा एचेरेय कताय, अबा संघरागे लगा दोहोना, हना ईंग कोरबान#7:11 एहूदाकूराः रिती-बिधी इया तोनोंगीग होड़ तोनोंगाः जिनिस कोरबान हवे माःआन कतावाडखन भगवान लगाय एटाः अवेयता। दो हाँय हना कता तोनोंगीग एचेरेय कतातेरा, अरू हना कताय अयूमतेरा हाँय, हना जिनिस ओरोय उपयोत अवेतेरा। हना जिनिस भगवानराः जिनिस दोहोन होले, भगवान लगाय जिमातेरा हाँय बलिदान इया हना जिनिस एएमे कोवानेःआ। अरू हान हाँय अनँयग लगाय दोहो अवेयता। ईसू सुदीगोतेडा, फरीसी होड़कू अरू नियम चेडदार होड़कू अँननकूराः नफा लगा नाःआकू एचेकेरा। अँकू अँननकू लगा जमाकून दोहोगे लगाकू एचेतेरा अरू एंगा-अपाकिन लगा तोनोंगाः संघरा एमे अतेकू रोंकावकूता। इयायिंग एटाःकेरा। हनालगा हना ओरोयिंग एमे अवेतेरा। 12हनाते अपे हाँय आँयग एंगा-अपा लगा तोनोंगाः संघरा एमेवाकिन लगा मेरपे ओवायता। 13नाःआ इया अपेराः रिती-बिधी होड़कूपे चेडकूता अरू भगवानराः नियमकूनपे चलाःगोडता। अरू अपे नाःआ इयाःआ एटाः एटाःकूनपे एचेयता।”
14हंडाकू दोहोना हँकुःआ होड़कू अनँयग एचेरे अरू राःतेडकूखने कताया, “अपे जमाकू ईंगपे अयूम अरू नाःआ बड़रापे बुझाः। 15तोनोंगाः जिनिस जोम होले होड़ मेरेय मइलाःता, मनदो होड़राः जीव अते उडुंगगुःता हनानाःते होड़ मइलाव जुवाःता। 16[अयूम अवेयता हाँयग होड़, नपायतेय अयूम ठुड़ावागे।”]#7:16 तोनोंग तोनोंग मड़ंग कागदरे नाःआ लबदकून कोवानेःआ।
17हनते ईसू होड़कू अगीते तोराय अरू मीटोंग ओड़ाःरेय बोलोयान। हाँयरिकुःआ चेलाकू हाँय एचेरे नाःआ कहड़ीराः मतलोबकू होंबोरतेरा। 18दो ईसू हँकू एचेरेय होंबोरतेरा, “अपे मेरपे बुझाःतना जा? 19होड़कू जोमता, हना जिनिसकून हँकूराः जीवरे मेर सेनता, मनदो दोंगेरे सलाव जुवाःता अरू दोंगेते बहरी उडुंग जुवाःता।” (नाःआ बड़रा कता अते ईसू जमा बरानाः जोम जिनिसकून सुद माःआने कतावारा।)
20ईसू अरूय कताया, “होड़कूराः जीव अते उडुंगगुःता, हना अते हँकू मइलाव जुवाःता। 21होड़कूराः इंदरी अते बेलूर ओंगोल, जपाल होड़ेंग, इनिग, ञेड गोजेय, सनहा-सनही, 22लुभी, बेलूर बुता, अडिग, बेलूर घुड़ी, इरा, ओपता बड़रा, बड़वार अरू बुयांगतो होयाःता। 23नाःआ जमा बेलूरकून होड़कूराः जीव अते उडुंगकियानखनकू मइलाव जुवाःता।”
सूरुफिनिका छतररीग अइमीराः बिसवास
(मती 15:21-28)
24हना तयोमरे ईसू गलील छतर अते सूर अरू सइदा छतररे तोराय। हाँय हंडा मीटोंग ओड़ाःरे बोलोयाने अरू तोनोंगीग हाँय अहाकू सुदीगींग माःआने चहाः। मनदो हाँय मेरेय ओको अवेगान। 25हना छतररे मी होड़ अइमी दोहोना। हाँय सूर फिनिका छतररीग बेगर एहूदा होड़े दोहोना। हाँयरीग मी होड़ बिटीत दोहोना, अरू हाँय एचेरे भूत समसावनेना। 26हाँय ईसूराः बदीरेय अयूमतेरा अरू हाँय ओहेन ईसू एचेरे वेजेडखन हाँयराः काट कुटीरेय तबेरयान। हाँयरीग बिटीत अते भूत एचे उडुंगगेय लगा ईसू एचेरेय असेःआ।
27दो ईसू हाँयग अइमी एचेरेय कतातेरा, “मड़ंगरे लइंकू जोम लगा एएमे लगा इदा। अरू लइंकूराः जोम जिनिसकून गोःकेडखन कुतुकू एचेरे तेकेगे दो नपाय कोवानेःआ।”
28दो हाँयग अइमी कता कुदातेरा, “मनदो परबू, ओड़ाःरिकुःआ कुतुकू हों लइंकू जोम सकड़ीगेता हनाकू जोमता।”
29दो ईसू हाँय एचेरेय कतातेरा, “आम नपायमे कताकेरा। आम ओड़ाःमे सलाव जुवाः। आम बिटी अते भूत उडुंगयनाय।” 30दो हाँय ओड़ाः तोराय अरू हाँयग बिटीत खटी डसनारे गेतेगतोय दोहोना अरू हाँय अते भूत उडुंगयाने।
ईसू बहिरा अरू कोंदा होड़े नपायतेरा
31हनते ईसू आँयग चेलाकू सुदा सूर अरू सइदा देस अते उडुंगनेनखन दिकापुलीस#7:31 दसगोटोंग सहरकून राइज पारनेनखन गलीलराः हुडिंग समुंदररेकू सोदोरनेना। 32हंडाकुःआ होड़कू बहिरा अरू कोंदाय दोहोना हाँयग होड़ ईसू एचेरेकू अगूतिरिया। अरू हँकू ईसू एचेरे वेजेडखनकू असेया, “ने गुरुजी, नाँयग होड़ चोटरे आमराः तिःई खेपाकेडखनमे नपायगेय।”
33दो ईसू हँकुःआ होड़कू अते हाँयग होड़ तोरेरेय गोःयाडीग अरू हाँयराः बनर लुतूररे आँयगराः अंगरीय गुतू बोलोतेरा। हनते ईसू अनँयग अंगरीरे बेगवाडखन हाँयराः अलंगतोरेय टोँवावतेरा। 34हनते ईसू सेरमो अगी संगीलतेडखने सहेडतेरा। अरू हाँय एचेरेय कतातेरा, “एफाता!” (नाःआ लबदराः मतलोब गीग जुवाः हवे।) 35हननमेला हाँयग होड़ अयुमेःआ अरू हाँयराः लार सुतरी सीडयान अरू हाँय नपायतेय बड़राःआ।
36दो ईसू होड़कू एचेरेय कतातेड, “नंडा होयाकिया हना अपे तोनोंगीग एचेरे अलोपे उदुःगे।” मनदो ईसू अलोपे कताय माःआने कतातेरा, हिनिनमिन अरूकू कता उदुः होड़ेंगा। 37होड़कू मुरुक बयावनेनखनकू कताया, “ओहरे! नाँयग होड़ तोनोंगाःय एचेयता दो हना जमा ननपाय इदा। नाँयराः कतारे बहिरा होड़कू होंकू अयुमेता अरू कोंदा होड़कू होंकू बड़राता।”
Valgt i Øjeblikket:
मरकूस 7: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.