मरकूस 9
9
1दो ईसू हँकुःआ चेलाकू एचेरे अरूय कतातेरा, “अपे ईंगपे अयूम, नंडा चड़ाँत इदानकुःआ, नँकुःआ होड़कू अते अदोम होड़कू भगवानराः राइज जंगरते बुँहड़ीनता हना अरीनकू ञेल वरी ओरोकू गोएगनेना।”
ईसू विड़चेड़नेना
(मती 17:1-13; लूका 9:28-36)
2छो दिन तयोमरे ईसू पतरस, एहुना अरू एकूब आँयग सुदा मीटोंग उसूल पहाड़ सेरमो एकलाय गोःयाडकू। दो हाँय हंडा हँकू मड़ंगरेय बदलावयान। 3चउंदीसरे नाःआ इया तोनोंगीग धुबिया सोनहे ओरोय बुहाल अवेतेरा हना इया हाँयराः सोनहे फक-फक उजड़यान। 4दो हनमेला असाका भगवानराः बड़रा कता होड़किन, मोसेस अरू इलियाह हंडाकिन एचे ञेलयान। अरू ईसू सुदाकिन बड़राःआ।
5दो पतरस ईसू एचेरेय कताया, “ने गुरुजी, अबू नंडा इदानबुःआ दो नपाय इदा। दो अले पेयटोंग कुंबाले तुलाता, मीटोंग आम लगा, मीटोंग मोसेस लगा अरू मीटोंग इलियाह लगा।” 6हँकू मुरुककू बोरोयान, हनालगा पतरस मेरेय सुदीया हाँय चिलाय कताःआ, हना।
7पतरस कताय मेला बदरी हँकू जमाकू दाब रेडगोतेडकू। हना बदरी अते भगवानराः बड़राकू अयूमतेरा, नाँय ईंगरीग दुलार बेटा हवे। दो अपे नाँयराः कतापे मनाः, माःआन।
8ञेनेल ञेल हँकू चइरो गतरकू ञेलतेरा अरू ईसू एनेकला हंडाय दोहोना।
9पहाड़ अते उतराः मेला हाँय हँकू एचेरेय हुकुमतेरा, “मनुवारीग बेटात गोएगतो होड़कू अते अरीने जियाव रिमुः वरी, अपे नाःआ कता तोनोंगीग एचेरे अहापे कताय।”
10दो हँकुःआ पेनेय चेलाकू नाःआ कताकू अयूम सोलोंग दोहोतेरा अरू अँननकू अँकू कता होड़ेंगा, “गोएगतो अते जियाव रिमुःराः मतलोब चिला हवे?” 11अरू हँकू हाँयकू होंबोरतेरा, “ने गुरुजी, नियम चेडदार होड़कू चिला लगाकू कतायता, इलियाह मड़ंगरे वेग लगा इदा, माःआन?”
12दो ईसू हँकू एचेरेय कतातेरा, “सतायरे इलियाह मड़ंग वेगकेडखन जमाकूने मंदरावगोडता। मनदो मनुवारीग बेटात बदीरे चिला लगा नाःआ इया ओजाःतो इदा, हाँय मुरुक कटसियाय सहावता अरू आड-बेकारवायताकू?#एस 53:3 13ईंग अपे एचेरेयिंग कतायतना, इलियाह वेगनेना#9:13 ईसू नंडा बतिसमा एमेयीग होड़ एहुना बदीरेय कतायतना। अरू हाँय बदीरे ओजाःतो इदा, हनन इया होड़कू चहावनेना हनन इया जमाकून हाँय सुदाकू एचेतेरा।”#मला 4:5,6; मती 7:13
ईसू मी होड़ लँइग अते भूते उडुंगतेरा
14ईसू आँयगरिकुःआ चेलाकू एचेरेय सेनेड दो हँकूराः चइरो गतर मुरुक बगरा होड़कू दोहोना। अरू नियम चेडदार होड़कू चेलाकू सुदाकू अड़ा-चउकीःआ। 15जमा होड़कू ईसू ञेलतेडखनकू बयावयान। हँकू हाँय अगी बतकाव सेनेवाडखनकू सलामतिरिया।
16दो ईसू हँकू एचेरेय होंबोरतेड, “अपे नँकू सुदा चिलापे अड़ा-चउकीतना?”
17दो होड़कू अते मी होड़ ईसू एचेरेय कतातेड, “ने गुरुजी, ईंग बेटा एचेरे मीटोंग कोंदा भूत इदानिया। हनालगा ईंग बेटा आम एचेरेयिंग अगूकिरिया। 18हाँयग भूत सबेयता हनमेला एचे लेबदागोडेयताय अरू आहतोरे पोतो पेरेग उडुंगगुःता अरू तिरिंगे कड़रावता। हनते हाँय टड़-टड़ाव जुवाःताय। ईंग आमरिकुःआ चेलाकू एचेरेयिंग असेतेरा, नाँयग भूतपे उडुंगगोड, माःआन। मनदो हँकू मेरकू उडुंग अवेगडीग।”
19नाःआ अयूमवाडखन ईसू आँयग चेलाकू एचेरेय कतातेरा, “ने गुनमिन बिसवासगे होड़कू, अपे सुदा तुमिस वरीयिंग दोहोन? तुमिन वरी अपेयिंग सहाव?”
हनते ईसू कतातेड, “माँय ईंग एचेरेपे अगूगेय।”
20दो होड़कू हाँयग लँइग ईसू मड़ंगरेकू अगूतिरिया। भूत ईसूय ञेलतेड दो हाँयग लँइगे एचे डोलावगेया। हनते हाँय ओतरेय लेबदायान अरू घोलंडावनेनखन आहत अते पोतो उडुंगगुःआ।
21दो ईसू हाँयग लँइगरीग अपात एचेरेय होंबोरतेडा, “नाँयराः नाःआ इया तुमिस वरीते होयाःतना?”
अपात कताया, “लनँइग वरीते होयाःतना। 22हाँय गोजेय लगा तोनोंग मेला सेंगेलरे अरू तोनोंग मेला दाःरेय एचे लेबदाया। मनदो आम कहीम एचे अवे दो अले सोगावाडखन संघराम ओवाले।”
23ईसू हाँय एचेरेय कताया, “चिला लगाम होंबरेतना, आम एचे अवेयताम जा कोवान? ईंग एचेरेय बिसवासगेता हाँय लगा जमाकून होनोया जुवाःता।”
24दो हाँयग लँइगरीग अपात मुरुक सटीतेय कतातेरा, “ने परबू, ईंग बिसवासगेतानिंग। अरू बड़ियाड़िंग बिसवासगे लगा संघराम ओवायिंग।”
25ईसू ञेलतेडकुःआ होड़कू मुरुक बतकाव वेग घड़ीन मिनीरेकू जुमाःआ। दो हाँय भूत डंटावतेडखने कताया, “ने कोंदा अरू भइरा भूत, ईंग आमिंग कतावातना, नाँय अतेम उडुंग जुवाः अरू कहियो नाँय एचेरे अलोम जवाःगुः।”
26हनते मुरुक खिररीवाडखन अरू हाँय मुरुक एचे घोलंडावाडिगखन भूत उडुंगयाने। अरू हाँयग लँइग गोएगतो इयाय होयायान। मुरुक बगरा होड़कू कताया, “नाँयग लँइग गोएगयनाय।” 27ईसू हाँयग लँइग तिःईरे साबतिरिगखने रेमगोतेडीग। हनते हाँय चड़ाँयान।
28ईसू ओड़ाःरेय वेजेड दो आँयगरिकुःआ चेलाकू एकलाकू होंबोरतिरिया, “ने गुरुजी, अले चिला लगा हाँयग भूत मेरले उडुंग अवेगडीग?”
29ईसू हँकू एचेरेय कताया, “ने वपक बोपोहकूतिंग, बेगर अरजी अरू उपासते नाःआ इयायीग भूत ओरोय उडुंगनेना।”
अनँयग गुजुः बदीरे ईसू अरूय कताया
(मती 17:22,23; लूका 9:43-45)
30ईसू अरू आँयगरिकुःआ चेलाकूतेन गलील छतर होर तोराकू। मनदो हाँय नाःआ इयाय चहाःआ, अबू तोनोंगीग अलोकू सुदीबू, माःआन। 31अरू ईसू आँयगरिकुःआ चेलाकू चेडतेडखने कताया, “मनुवारीग बेटात होड़कूराः तिःईरेकू एचे सबेयता अरू हाँयकू ञेड गोजेयता अरू पेय दिनरेय जियाव रिमुःता।” 32मनदो हँकुःआ चेलाकूतेन हना बड़रा मेरकू बुझाव अवेगन अरू हनारे हों हाँय एचेरे होंबरे लगाकू बोरा।
मरंग इये हवे?
33हना तयोमरे ईसू अरू आँयगरिकुःआ चेलाकू कपरनहूम सहररेकू सेनेडा। अरू ओड़ाःरे सेनेकियानखन ईसू चेलाकूतेन एचेरेय होंबोरतेरा, “दूररे अपे चिला बड़रारेपे अड़ा-चउकीःआ?”
34हँकू दूररे अँननकू अँकू नाःआ इयाकू अड़ा-चउकीःआ, अबू अते इये मरंग इदानिया? हनालगा हँकू कलेकालकू दोहोना।
35दो ईसू दुड़ुःनेनखन आँयगरिकुःआ बारहगोटोंग मूक चेलाकूय राःतेड अरू हँकू एचेरेय कताया, “तोनोंगीग होड़ मरंग बड़ाँः लगाय ओंगले दो हाँय जमाकूते हुडिंग अरू जमाकूरीग सेवादारे बड़ाँः।”
36हनते मी होड़ लँइग अगूकेडखन हँकू तलारेय एचे चड़ाँतिरिया अरू आँयग एचेरे सहेरतिरिगखने कतातेरा, 37“तोनोंगीग होड़ नाँयग लँइग इया तोनोंगीगे नेत-नेवारगेय दो, हाँय ईंगे नेत-नेवारता। ईंगे नेत-नेवारता, हाँय ईंग एकला कोवान मनदो ईंगे वारकेरा हाँयग भगवान होंय नेत-नेवारता।”
इये ईसू सुदा इदानिया
38दो एहुना ईसू एचेरेय कतातेरा, “ने गुरुजी, मी होड़ आम ञावते भूतकू होड़कू अतेय उडुंगा, हाँयले ञेलतेरा। मनदो हाँय अबूरीग होड़ ना लवे। हनालगा अले हाँय रोंकावगेय लगाले कुरनिसतेरा।”
39दो ईसू कतातेरा, “हाँय अहापे रोंकावगेय। तोनोंगीग होड़ ईंगराः ञावते बयाव जुवाः इयाःआ बुता एचेकेडखन ओहेन ईंग बदीरे बेलूर बड़रा ओरोय कता अवेतेरा। 40अबूरिकुःआ मुदइकू ना लवे, हँकू अँननबूरिकुःआ होड़कू हवे। 41अपे ईंगपे अयूम, तोनोंगीग होड़ अपे मसी होड़कू इदानपेःआ अते गुनमिन हों दाः ञूय लगाय एमेवापेता दो हाँय लगा भगवान इमाने एनेमेवायता।#मती 10:42
एचे कसूरगेराः अंदजाव
(मती 18:6-9; लूका 17:1-2)
42ईंग एचेरेकू बिसवासगेता हँकुःआ होड़कू अते हुडिंगीग होड़ होंय एचे कसूरगेयता, हाँयग होड़राः होटोःरे जंता इया मरंग दिरि तोलकिरिगखन समुंदररे तेनेके बोलोगोडेय, हना ननपाय इदा। 43आमराः तिःई आम एचे कसूरगोडमेता दो, हना तिःई बोंगोर एंडागोडमे। दो बनर तिःई दोहोन हों नरगराः ओरो टुटीगनेना हना सेंगेलरे एचे सोलोंगुः अते लुलहाकियानखन सेरमो देसरेम बोल दो ननपाय इदा। 44[नरगरिकुःआ पिलवाकू मेरकू गुजुःता अरू हना सेंगेल मेर इड़ीगगुःता।] 45आमराः काट आम एचे कसूरगोडमेता, दो हना काट बोंगोर एंडागोडमे। बनर काट दोहोन हों नरगराः ओरो टुटीगनेना हना सेंगेलरे एचे सोलोंगुः अते लंगड़ाकियानखन सेरमो देसरेम बोल दो ननपाय इदा। 46[नरगरिकुःआ पिलवाकू मेरकू गुजुःता अरू हना सेंगेल मेर इड़ीगगुःता।] 47आमराः मेड आम एचे कसूरगोडमेता, दो हना मेड गुड़तीग उडुंगगोडमे। बनर मेडे दोहोन हों नरगराः ओरो टुटीगनेना हना सेंगेलरे एचे सोलोंगुः अते कनाँकियानखन सेरमो देसरेम बोल दो ननपाय इदा।#एस 66:24 48[नरगरिकुःआ पिलवाकू मेरकू गुजुःता अरू हना सेंगेल मेर इड़ीगगुःता।]#एस 66:24
49जमा होड़कू सेंगेलते एचे बुलुंगकूता।#9:49 एहूदाकू बलिदान देगवाडखन सेंगेलतेकू बालगे मेला हना बलिदानरे बुलुंग होंकू सोलोंगेता। (लेवी 2:13-16) 50बुलुंग नपाय जिनिस हवे। मनदो बुलुंगराः सेबेल मेर दोहोन दो हना बुलुंग अते करा इयाबू बुलुंग सेबेलगे? अपे जीव अरू ओंगोल बुलुंग इया नपाय दोहोन इदा अरू अँननपे अपे सलसतरेपे दोहोन।”
Valgt i Øjeblikket:
मरकूस 9: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.