Genesis 11
11
Babels ǂgō-ommi
1ǂGuron ge hoaraga khoen ǃhūbaib dina ǀgui gowab, ǁîban gere ǃhoab ǀguiba ge ūhâ i. 2Aiǂoasa xun ge doe on ge khoena ǂgā ǃkhai-e Babiloniab ǃnâ hō tsî ǁnāpa ge ǁan. 3Tsîn ge ge mîǀîgu: “ǀKhī, î da ǂnubiǀuide kuru tsî ǁîde ǂhubi, î di karo.” ǁÎn ge ǀuidi di ǃās ǃnâ ǂnubiǀuide sîsenū tsî ǂgoab ǃaroma tēr-e ge sîsenū, ǂnubiǀuide nî ǀguipa ǃkhōǁarese. 4Tsîn ge ǁnās khaoǃgâ “A da nēsisa ǃā-i, ǀhommi kōse ra sī ǂgō-om-e ūhâ-e ǂnubibasen tsî ǁnā ǀgaus ai kai ǀon-e dībasen tsî tā ǁnātikōse hoaraga ǃhūbaib ai khoraǂuisen” ti ge mî.
5Ob ge ǃKhūba ǁgôaxa tsîb ge nē ǃās tsî ǂgō-ommi hîan nē khoena ǂnubi hâba mû, 6o ge mî: “ǀGui khoen, ǀgui gowaba ra ǃhoan asen go nēsa a dītsoatsoa, on ge ǀapeǁguin ka xū-i xare-i xa ǃaruǀî īǁoasabahe tide. 7ǀKhī, î ge ǁgôa tsî gowab âna ǀgom kai, în tā ǃaruǀî ǁnâuǃāgu.” 8Tsîb ge ǃKhūba ǁîna hoaraga ǃhūbaib ai ge ǀgaruǀgaru tsîn ge ǃāsa ge ǂnubiǀû. 9Nē ǃās ge Babel#11:9 Babel: Nē ǀons ge Hebregowab di mîs ǀgom kai ti hâs khami ra ǀō. ti ge ǀonǂgaihe, ǃKhūb ge ǁnāpa khoen di gowaga ǀgomǀgom xui-ao.
Semmi di surib
(1 Kroniks 1:24-27)
10Nēb ge Semmi suriba:
ǀGam kurikha, kai ǁgammi dâus khaoǃgâb ge Semma ǀguikaidisi kurixab a hîa Arpaksada ge ǁorabahe. 11ǁNās khaoǃgâb ge Semma noxopa korokaidisi kuriga ûi tsî ǀnî ǀgôan tsîna ge ūhâ i.
12ǃNonadisikoroǀa kurixab ge ob ge Arpaksada Selaxa ge ǁorabahe; 13ǁîb ge noxopa hakakaidisi tsî ǃnona kuriga ûi tsî ǀnî ǀgôan tsîna ge ūhâ i.
14ǃNonadisi kurixab ge, ob ge Selaxa Ebera ge ǁorabahe 15tsî noxopa hakakaidisi tsî ǃnona kuriga ûi tsî ǀnî ǀgôan tsîna ge ūhâ i.
16Eberi ge ǃnonadisihakaǀa kurixab a hîa Pelega ǁorabahe 17tsî noxopa hakakaidisiǃnonadisi kuriga ûi tsî ǀnî ǀgôan tsîna ge ūhâ i.
18Pelegi ge ǃnonadisi kurixab a hîa Reuba ǁorabahe 19tsî noxopa ǀgamkaidisi tsî khoese kuriga ûi tsî ǀnî ǀgôan tsîna ge ūhâ i.
20Reub ge ǃnonadisiǀgamǀa kurixab a hîa Seruga ǁorabahe 21tsî noxopa ǀgamkaidisi tsî hû kuriga ûi tsî ǀnî ǀgôan tsîna ge ūhâ i.
22ǃNonadisi kurixab a hîab ge Seruga Nahora ǁorabahe 23tsî noxopa ǀgamkaidisi kuriga ûi tsî ǀnî ǀgôan tsîna ge ūhâ i.
24Nahori ge ǀgamdisikhoeseǀa kurixab a hîa Teraba ǁorabahe 25tsî noxopa ǀguikaidisi tsî disikhoeseǀa kuriga ûi tsî ǀnî ǀgôan tsîna ge ūhâ i.
26Terab ge hûdisi kurixab a hîa Abrammi, Nahori tsî Haran hâga ge ǁorabahe.
Terab di surib
27Nēb ge Terab, Abrammi, Nahori tsî Haran hâgu îb di suriba. Haranni, 28ǁgûsi ǃās, Urs, Babiloniab ǃnâ hâs ǃnâ ge ǁgûb noxopa ûitsama hîa ǁōb ge Loti îba. 29Abrammi ge Sarais ǀkha ge ǃgame tsîb ge Nahora Milkas, Haranni ôas, Iskas di ǃgâsas ǀkha ge ǃgame. 30Sarais ge ge ǁora ǁoa i tsî ǀgôa-e ge ūhâ tama hâ i.
31Ob ge Teraba ǁîb di ôab, Abrammi, ǁnuriǀgôab Loti tsî ǀuiǀgôas Sarais tsîn ǀkha Urs, Babiloniab disa xu Kanaanǃhūb ǁga doe tsî Harans tawa sī ge ǁan. 32ǁNāpab ge Teraba ǀgamkaidisi tsî koro kurigu ǀkha Harans ǃnâ ge ǁō.
Valgt i Øjeblikket:
Genesis 11: KKG20
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Khoekhoegowab Elobmîs © Bible Society in Namibia, 2020.