Juan 9
9
Jesús ru'uune bënni lau'chul
1Kati burooje, Jesús ble'i'de tue' bënni ka guulj'ze nake bënni lau'chul. 2Bënni useed kie' gulunaab'de le':
—Bënni Useed, ¿bixhkia' bënni ni ka guulj'ze nake bënni lau'chul? ¿Nia'a ki xhtu'la'ke xuuz'xhne'e u nia'a ki xhtu'le'e?
3Jesús bubi'e kieke diidza:
—Keg nia'a ki xhtu'le'e le' len keg nia'a ki xhtu'la'ke xuuz'xhne'e; guk ki naar lu yëla naban kie' glui'lau'i le Dios runn guune. 4Xuuza nusë'le'e neda len tzal ni nak te'dza run bayuudx gun'ru xhchiine; koma za' chi'dzë'ël kati nuturnu gunn gun dxin. 5Tzal zua' yëdz'lyu ni, naka yëla yeni ki yëdz'lyu.
6Buudx gne' ki Jesús gru'u'ne xhëëna lyu, len xhëëna'a beene guuna len gdeebi'de lau'e bënni lau'chul'a. 7Chi nak ka gne':
—Yajtiib lau'u lu piil ki Siloé (le re'e'ni gna: «Nusë'la'ke»).
Bënni lau'chul ni gyiije len gdiibe lau'e ati kati budxiine chi rle'i'de. 8Bënni nakua'ke ga'la ga zue' len bënni'a nale'i'kde le' rnaabe nu gnëëdzj kie' dumi, tunaabi lza'a'ke:
—¿Naru keg le' bënni'a rnaabe nu gnëëdzj kie' dumi?
9La'ke tanáke:
—Leel, le'a.
Ye la'ke tanáke:
—Ka'teez ruune san keg le'a.
San kuin'kze gne':
—Needa'a.
10Na' gulunaab'de le':
—¿Ati nakxh guk na'a chi rle'i'du?
11Le' bubi'e kieke diidza:
—Bënni'a le' Jesús beene guuna, gdeebi'de ley lau'a len gudxe neda: “Gyaj lu piil ki Siloé len gdiib lau'u.” Neda gyiija len kati gdiiba lau'a, bule'i'da.
12Na' gulunaab'de le':
—¿Gaxh yu'e bënni'a na'a?
Le' gudxe leke
—Ti nëëz'da.
Bënni fariseo tunaab'yuudxe bënni'a guke bënni lau'chul
13-14Kati Jesús buune lau'e bënni lau'chul'a len guuna nak dza Tu'ueak'laadxi'ke Bënni Judea. Lena'a yajua'ke bënni'a guke bënni lau'chul lau'ke bënni fariseo, 15ati leke gulunaab'de le' nakxh guk chi rle'i'de. Len le' bubi'e kieke diidza:
—Gdeebi'de guuna lau'a, gdiiba ley, len na'a chi rle'i'da.
16La'ke bënni fariseo gulanake:
—Bënni'a buune le' ti ze'e kie' Dios, koma ti ruune baal dza Tu'ueak'laadxi'ke Bënni Judea.
San ye la'ke tanáke:
—Ti gunn tue' bënni dula guune yëla wak xhën ki.
Lena'a bënni fariseo ni gulula'a lza'a'ke, 17ati yubl gulunaab'de bënni'a guke bënni lau'chul:
Na'a chi buune li', ¿bixh rnou' li' kie' bënni'a?
Le' bubi'e kieke diidza:
—Neda rnia' ki nake tue' bënni rue'e diidza ulaaz kie' Dios.
18San bënni Judea ti gulayajle'ke ki le' guke bënni lau'chul len na'a chi rle'i'de, lena'a gululiidze xuuz'xhne'e 19len gulunaab'kde leke:
—¿Naru bënni xi'in'li bënni ni, bënni'a lbi'ili rnaali ki ka guulj'ze nake bënni lau'chul? ¿Nakxh guk na'a chi rle'i'de?
20Xuuz'xhne'e gulubi'e diidza:
—Nëëzi'tu ki leel bënni xi'in'tu bënni ni len ka guulje na'chul lau'e; 21san ti nëëzi'tu nakxh guk na'a chi rle'i'de, lekz'ka' ti nëëzi'tu nuxh bun le'. Le' gulunaab'de; bënni yéxu' chi nake len kuin'kze gunn kixhjë'e.
22Ki gulanake xuuz'xhne'e le glaadxi'de, koma bënni Judea chi nun'ke diidza lubiije lu yu'u useed bunach lanáke ki Jesús nake Le' Cristo. 23Lena'a gulane' xuuz'xhne'a: «Le' gulunaab'de; bënni yéxu' chi nake.»
24Bënni Judea yubl gululiidze bënni'a kchul lau'e len gle'ke le':
—Ti siye'u lau'e Dios. Netu nëëzi'tu ki bënni ni nake bënni dula.
25Le' bubi'e kieke diidza:
—Xhki nake bënni dula, neda ti nëëz'da. Le nëëz'da nak ki neda guka bënni lau'chul len na'a chi rle'i'da.
26Yubl ka gulunaab'de le':
—¿Bixh beende li'? ¿Bixh beene naar bule'i'du?
27Le bubi'e kieke diidza:
—Chi gdixhji'da lbi'ili san ti rzenaagi'li neda. ¿Bixhkia' re'eni'li yugixhjë'a le yubl? ¿Naru lekz'ka' lbi'ili re'eni'li tziaj'leen'li'ne?
28Na' gulutzag'yuudxe le' diidza len gle'ke le':
—Li' gaku bënni useed kie' bënni'a; netu nak'tu bënni useed kie' Moisés. 29Len nëëzi'tu ki Dios bliidze Moisés, san bënni ni ti nëëzi'tu gaxh brooje.
30Bënni ni bubi'e kieke diidza:
—¡Bixha'kza na'a! Lbi'ili ti nëëzi'li gaxh ze'e bënni ni, ati neda buune lau'a. 31Dxia'a'du nëëzi'ru ki Dios ti rzenaage bënni dula; rzenaag'ze bënni tayiijilaadxi'ke Le' len tuune le ryaazlaadxe'e. 32Gat'ga ryëëni'ru lanáke ki tue' bënni guune ga gle'i'de tue' bënni ka guulj'ze na'chul lau'e. 33Xhki bënni ni ti nusë'le'e le' Dios ti gunn bi guune.
34Na' gle'ke le':
—Li', ka guulj'zu nadze'iz'du dula, ¿Ati re'en'du kseed'du netu?
Na' gulubiije le' lu yu'u useed.
Bënni lau'chul lu yëla rajle'
35Jesús byëën'de rye' diidza ki gululaage bënni'a; len kati budzaage le', bnaab'de le':
—¿Ba rajle'u'ne Le' Xi'ine Bënni?
36Le' gudxe Le':
—Xan, gudx neda nuxha', naar tzajle'a'ne.
37Jesús bubi'e kie' diidza:
—Chi ble'i'du'ne: needa'a, bënni'a rui'leenu'ne diidza.
38Ati bënni'a gudxe Le':
—Xan, rajle'a.
Na' bzechu xhiibe lau'e Jesús.
39Chi nak ka Jesús gne':
—Neda za'a yëdz'lyu ni zdujchuugbe'a, naar bënni lau'chul lale'i'de ati bënni tale'i'de kchul lau'ke.
40La'ke bënni fariseo nakua'leene le', kati gulayëën'de le ni, gulunaab'de le':
—¿Naru lekz'ka' netu nak'tu bënni lau'chul?
41Jesús bubi'e kieke diidza:
—Nar'la lbi'ili nak'li bënni lau'chul ti kuia'li xhgia' ki xhtu'la'li. San koma rnaali ki rle'i'li, dxia'li xhgia'.
Valgt i Øjeblikket:
Juan 9: PZD
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de México AC
