Mateo 3
3
Juan bënni rkiile nis bunach rdxiine lu yu biidx
(Mr 1:1-8; Lc 3:1-9,15-17; Jn 1:19-28)
1La dza na'z blui'lau'e Juan bënni rkiile nis bunach, lu yu biidx ki yu Judea. 2Rne': «¡Gulubi'i laadxi'li len Dios, koma yëla rnabe' ki yewayuba chi zua gdxin!»
3Kie' Juan'a be'e diidza Dios lu ne'e Isaías bënni be'e diidza ulaaz kie', kati gne':
«Chi'e bënni ruskua' zidzj lu yu biidx:
“Gulupa'a nëëz kie' Xan'ru;
Gulusaalj kie' nëëz li.”»
4Laari nakue' Juan naki li'tza'ba kameyo, ati ruugi'de ley len pan giid lsiine'e; ati buchuwa' len bdxindu gda'we. 5Bënni yëdz Jerusalén len yugute' yëdz ki yu Judea len yëdz de ra yeego Jordán gularooje len tuzenaage le'. 6Tuxua'le'pe xhtu'la'ke len Juan rkiile leke nis lu yeego Jordán.
7San kati Juan ble'i'de ki zian'ke bënni fariseos len bënni saduceo yajake ki jkiile leke nis, gudxe leke: «¡Xi'in bel'! ¿Nuxh gudx lbi'ili ki gunn gxhunji'li yëla rsaka'zi' xhën'te le chi zua gdxin? 8Gulkëëz bach chi nubi'i'laadxi'li len Xan'ru, 9len ti gnaali lu ikj'laadxi'dau'li, “Netu nak'tu xi'in'xhzue' Abraham”; Koma le nak'te rea' lbi'ili, Dios gun guune ga giaj ni lak ka xi'in'xhzue' Abraham. 10Gia'waag chi zua rbëëz ki kchuug lu luit yaag. Yugute' yaag le ti rbia xhlu'li'i dxia'a, tuchuuge len tuzal'ke ley lgi'. 11Le nak'te, neda rkiila lbi'ili len nis len rea' lbi'ili ki rala ubi'i'laadxi'li len Dios; san bënni ze'e kuudza'a jkiile lbi'ili len Bë' La'ay Kie' Dios lekz'ka' len gi'. Le' nap're yëla wak ka neda, len ti nak'kza bach kseedxa xhtui lëële'. 12Zëëne lu ne'e le rgui'i'de bë' ki kchi'e xhua'xhtiil len ubiije xhpebi. Gun'chi'e xhua'xhtiil lu liidxi, ati gzegie xhpebi lu gi' le ti uulkz.»
Jesús bdiile nis
(Mr 1:9-11; Lc 3:21-22)
13Jesús brooje Galilea ziije ra yeego Jordán, ga zue' Juan, naar Juan jkiile Le' nis. 14Juan ti gu'uni'tiiz'de jkiile Le' nis len re' Le':
—¿Li' za'tzu zdujyu' neda? La Li'a rala jkiilu neda nis.
15Jesús bubi'e diidza:
—Ben ka rala gak, koma ka' gunn kë'xhbei dxia'a yugute' lau'e Dios.
Na'ar Juan beene ka gne'a. 16Ka buudx'z bdiile nis Jesús len burooje lu nis'a, byaalj yewayuba len ble'i'de Bë' La'ay kie' Dios bëtje ga zue' ka tuuba palom. 17Len byën tu chi'i za' yewayuba, le rna: «Bënni ni nake bënni Xi'ina, nadxi'i'tzki'da'ne, len rdzag'laadxa'ne.»
Valgt i Øjeblikket:
Mateo 3: PZD
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de México AC