Pin'ilʋg 17
17
Baŋʋ kpɛn'ɛb nɔnaar la yɛla
1Abram da an yʋma piswai nɛ awai la ka Zugsɔb nie o mɛŋi pa'al o, ka yɛl ye, “Man anɛ Wina'am Onɛ Galis;#17:1 Hibiru anɛ Elsadai. dɔl mam nɛ pʋpielim. 2M na maal nɔnaar man nɛ fʋn teŋsʋk, ka fʋ yaas na nɔbigi zu'oe hali ti galis.” 3Ka Abram vanbin teŋin na'as o, ka Wina'am yɛl o ye, 4“Mam nɔnaari nwa' ka m tisidif. Fʋ ye fʋ lieb nɛ buudi bɛdegʋ yaab. 5Ba kʋ lɛm buonnɛ fʋ yʋ'ʋr ye Abram ya'asa, fʋ yʋ'ʋr na anɛ Abraham, bɔzugɔ m na kɛ ka fʋ lieb buudi bɛdegʋ yaab. 6Man na tisif du'am bɛdegʋ ka fʋ na lieb buudi kɔn'ɔb-kɔn'ɔb yaab, ka na'anam na yii fʋ san'an na. 7Man na kɛ ka m nɔnaar kanɛ ka m maal man nɛ fʋn teŋsʋk la bɛ saŋa kanɛ ka' naarɛ, hali ti paae fʋ yaas banɛ na dɔlli fʋ nya'aŋ na. Man na an fʋn nɛ fʋ yaas wʋsa Wina'am. 8M na nɔk Keenan teŋ la wʋsa tis fʋn nɛ fʋ yaas saŋa linɛ ka' bɛnnɛ, ka na aan ba Wina'am.” 9Ka Wina'am lɛn yɛl Abraham ye, “Fʋn din anɛ ye fʋ siaki m nɔnaar la yɛl si'el la wʋsa. Fʋn nɛ fʋ yaas nɛ zʋmaʋŋ kanɛ na dɔlli fʋ nya'aŋ na wʋsa. 10M nɔnaari nwana ka m tisid fʋn nɛ fʋ yaas ye ba siak ka dɔlli li sʋ'ʋŋa. Fʋ biribiŋ wʋsa sʋm ye o kpɛn' baŋʋ. 11Asɛɛ ka ya kpɛn' baŋʋ ka li lieb nɔnaar kanɛ bɛ mam nɛ fʋn sʋʋgin. 12Ba ya'a du'a biribiŋ wʋsa asɛɛ ka ba kpɛn'ɛs o baŋʋ daba anii daar. Nwa' ka'anɛ fʋn nɛ fʋ yidim ma'aanɛ, amaa sankpan'as banɛ ka ba du'a ba fʋ yin, nɛ banɛ ka fʋ da' teŋ si'a na wʋsa. 13Ba wʋsa kpɛn'ɛm baŋʋ, banɛ ka ba du'a fʋ yin nɛ banɛ ka fʋ da' nɛ ligidi. Nɔnaar zanbin kaŋa na bɛ saŋa wʋsa. 14Biribiŋ kanɛ wʋsa pʋ kpɛn' baŋʋʋ, yanam yisim o buudi la ni, bɔzugɔ o ki'is man nɔnaar la nɛ.” 15Ka Wina'am lɛn yɛl Abraham ye, “Da lɛm buonnɛ fʋ pu'a la ye Sarai, yʋ'ʋn buolim o ye, ‘Sara.’ 16Man na niŋ o bareka ka o na du'a biribiŋi tisif. M mɛ na niŋ o bareka ka o lieb buudi bɛdegʋ yaab. Ka buudi na'anam na yii o san'an na.”
17Ka Abraham lɛn vanbin teŋin na'as Wina'am amaa ka la' yɛl o sʋʋnrin sa ye, “Dau na niŋ wala an yʋma kɔbiga ka lɛn nyaŋi du'a biiga? Sara na nyaŋi du'a biig ka an yʋma piswai laa?” 18Ka Abraham yɛl Wina'am ye, “Li ya'a anɛ Isimael n ye o di'e albareka kaŋa.” 19Ka Wina'am lɛbis o ye, “Ayei! Fʋ pu'a Sara na du'a biribiŋi tisif, ka fʋ na pʋd o yʋ'ʋr ye Isaak.#17:19 Isaak gbin Hibiru ni anɛ “O la'ad”. Ka m na maali m nɔnaar nɛ on nɛ o yaas ka li bɛ saŋa wʋsa. 20M wʋm fʋn sɔsim si'eli zaŋi keŋ Isimael yɛla la; gɔsima, m na niŋ o zug bareka ka o du'a biis bɛdegʋ ka tuongatib pii nɛ ayi' na yi o san'an na. M na kɛ ka o lieb teŋ tita'ar sɔb. 21Amaa li anɛ fʋ biig Isaak onɛ ka Sara na du'a yʋʋm anwana win la na paam mam nɔnaar bareka la.” 22Wina'am nɛ Abraham sɔnsig la da naae la, o da bas Abraham ka gaad.
23Daakan la ka Abraham da nɔk o biig Isimael nɛ biribis banɛ du'a o yin la kpɛn'ɛsi ba baŋʋ wʋʋ Wina'am yɛl o si'em la. 24Abraham da anɛ yʋma piswai nɛ awai saŋkanɛ ka o kpɛn' baŋʋ la, 25ka o biribiŋ Isimael mɛ mɔr yʋma pii nɛ atan' ka ba kpɛn'ɛs o baŋʋ. 26Babayi' la wʋsa da kpɛn' baŋʋ nɛ daar yinne. 27Banɛ wʋsa du'a o yin, nɛ banɛ ka o da' nɛ ligidi da kpɛn' baŋʋ mɛn.
Valgt i Øjeblikket:
Pin'ilʋg 17: kus_gh
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2023, Ghana Institute of Linguistics, Literacy and Bible Translation