Pin'ilʋg 21
21
Isaak du'am yɛla
1Zugsɔb la da maali tis Sara nwɛnɛ on da tis nɔɔr si'em la. 2Ka Sara nɔk pʋʋgʋ du'a biribiŋi tis Abraham o bʋnkʋttim saŋa. Nwa' da tʋm nɛ wʋʋ Wina'am da yɛl ye li na maal saŋa si'a la. 3Ka Abraham pʋd biig la yʋ'ʋr ye Isaak. 4Abraham da kpɛn'ɛs biig la baŋʋ daba anii daar, nwɛnɛ Wina'am da zi'el si'em la. 5Saŋkan la Abraham da anɛ yʋma kɔbiga. 6Ka Sara yɛl ye, “Wina'am kɛ ka m la', ka onɛ wʋm nɛ' mɛ na la'ad nɛ m. 7Anɔ'ɔn na yɛl ye man Sara na du'a biiga? Nɛ wala wʋsa man du'a biribiŋi tis Abraham o bʋnkʋttim saŋa.”
Ban kad Haga nɛ Isimael yis la yɛla
8Ka Isaak nɔbig ka tuk bin'isir. Biig la daa tuk bin'isir daasi'er la, Abraham da maal sumalisim di'ema. 9Ka daar yinne ka Sara nyɛ ka bikanɛ ka Haga onɛ an Egipt pu'a la du'a tis Abraham la la'ad Isaak. 10Ka o yɛl Abraham ye, “Kadim pu'a kanɛ an yammʋg la nɛ o biig la ya'a ka' alaa o biig la na ti pʋdig faar la nɛ mam biig Isaak.” 11Ka nɛ'ɛŋa san'am Abraham sʋʋnr hali, o biig Isimael zug. 12Amaa Wina'am da yɛl Abraham ye, “Da kɛ ka fʋ sʋʋnr san'am biig la nɛ o ma la zugɔ. Amaa maalim linɛ wʋsa ka Sara yɛlif ye fʋ niŋ la, ka li anɛ Isaak tuŋʋn ka fʋ yaas amɛŋa na yina. 13Amaa mam na kɛ ka yammʋg biig la buudi mɛ lieb bɛdegʋ bɔzugɔ o anɛ fʋ biig mɛn.” 14Ka Abraham isigi maal diib, ka nɔk ku'om su gan'arine tis Haga ye o mɔri dɔl biig la keŋ. 15Ka ku'om la da naae la ka o nɔk Isimael n digil tutuud ma'asim, 16ka keŋ lalig bi'ela ka ye, “Mam kʋ nyaŋi gɔti m biig ka o kpiida!” Ka zin' lallisa ka kum. 17Wina'am daa wʋm biig la kaasig la, o maliak daa naam saazug ka buol Haga bu'os o ye, “Haga! Bɔɔ maalɛ? Da zɔt dabiem bɔzugɔ Wina'am wʋm biig la dig tutuud ma'asim kaasid la. 18Duom nɔk biig la; ka m na kɛ ka o buudi nɔbigi lieb bɛdegʋ.” 19Ka Wina'am nie o nini ka o nyɛ bulig, ka keŋ wik ku'om liie pɛ'ɛl gan'ar la m mɔri keŋ tis o biig la ka o nu. 20Ka Wina'am da bɛ nɛ biig la. O da bɛ mɔɔgin la nɔbigi lieb tɔn'ɔs. 21O da zin'inɛ Paran sian'arin ka o ma bɔ pu'a Egipt teŋin na n tis o.
Abraham nɛ na'ab Abimelek n naal nɔɔr si'em
22Saŋa kan la Na'ab Abimelek nɛ Fikol onɛ an o soogianam kpɛɛm la da kena yɛl Abraham ye, “Wina'am bɛ nɛf ka sʋŋidif fʋn tʋm si'el wʋsa. 23Alazug, pɔɔm Wina'am ye fʋ kʋ maal mam bɛɛ m biis bɛɛ m yaas bɛ'ɛdɛ. Mam maalif sʋ'ʋŋa, alazug, pɔɔm ye fʋ mɛ na maal man nɛ m teŋgbauŋ kanɛ ka fʋ zin' la sʋm.” 24Ka Abraham ye, “Tɔ', m pɔya.” 25Ka Abraham fabili tis Na'ab Abimelek bulig kanɛ ka Na'ab yammis la faaɛn la yɛla. 26Ka o lɛbis ye, “Man zi' onɛ tʋm nwaa, fʋ mɛ pʋ yɛli ma. Zina ma'aa ka m wʋm.” 27Ka Abraham mɔr pɛ'ɛs nɛ niigi na tis Na'ab Abimelek ka babayi' la maal nɔnaar nɛ taaba. 28Ka Abraham yis pɛsa'as ayɔpɔi o pɛ'ɛs la ni zi'eli ba kɔn'. 29Ka Na'ab Abimelek bu'os o ye, “Fʋ gaans pɛsa'as ayɔpɔi la ye fʋ maal bɔ?” 30Ka Abraham lɛbis ye, “M bɔɔd ye fʋ di'e pɛsa'as ayɔpɔi la ka li pa'al ye manɛ tu bulig la.” 31Alazug ka ba buon zin'ig la ye Beerseba#21:31 Li gbin pa'al ye bulis ayɔpɔi bɛɛ nɔpɔɔr bulis. bɔzugɔ anina ka nidib ayi' nwa' pɔɔ tis taaba. 32Nɔnaar la nya'aŋ la ka Abimelek nɛ Fikol onɛ an o soogianam kpɛɛm la lɛbi kul Filistia sʋ'ʋlimin. 33Abraham da sɛ tima'asir Beerseba teŋin ka pʋ'ʋs Wina'am Kanɛ Ka' Naar la. 34Ka Abraham zin'in Filistia teŋin yuug hali.
Valgt i Øjeblikket:
Pin'ilʋg 21: kus_gh
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2023, Ghana Institute of Linguistics, Literacy and Bible Translation