San Lucas 1
1
Tutu ya kuaꞌan ndaꞌa ra Teófilo
1Tata Teófilo, xa kuaꞌa ni va naꞌa ku̱ni ta̱a ikun ndiꞌi ya ndee ni ndaa i̱kan Tata yo Jesús tañu yo. 2Tá íyo ya si̱naꞌa nda xi̱taꞌan xiꞌin ra, nda xi̱ni xiꞌin nuu ndiꞌi ya i̱kan ra, saa íyo ya ta̱a nda, chi nda ikán ku nda ndi̱kuiso chiñu kaꞌan ndoso nda tuꞌun ra. 3Ta saa tu yeꞌe va, kuekuee ndi̱nduku vaꞌa ndiꞌi i xaꞌa ya, ndá kuꞌva ndi̱xiyo ndiꞌi ya i̱kan ra xiꞌin ya si̱naꞌa ra kivi núnu̱ú, yakan kua tíꞌvi i tutu yóꞌó xaa ya nuu un ñani yo, 4ya ná kuchiñu un kundaa vaꞌa ka ini un ya ndaa ni va kua si̱naꞌa na yóꞌo̱ ―káchi ra Lucas xiꞌin ra Teófilo.
Káꞌan tatun Ndioxi ndá kuꞌva kaku ra Juan ra síkuchi naꞌa
5Tiempo ku̱u ra rey Herodes chiñu nuu ndiꞌi na xi̱ndikun ndaa chí estado Judea, ta ndi̱xiyo iin sutu náni Zacarías, ndíkaa ra xiꞌin iin tiꞌvi nda sutu, ta Abías náni tiꞌvi nda ikán. Ta yá síꞌi ra Zacarías ku yá náni Elisabet. Seꞌe sikua ra Aarón ndi̱xiyo yá. 6Ta vaꞌa ni ndi̱xiyo ra Zacarías xiꞌin yá síꞌi ra ka̱ñuꞌu ni na Ndioxi, tá íyo ya ndi̱kaꞌan ra, saa íyo ya i̱kan na. Xaꞌa ya ikán kua köo ndi̱niꞌi ndá ka naꞌa taxi na kuachi xaꞌa ra Zacarías xiꞌin yá síꞌi ra. 7Ta nda iin seꞌe na köo ndi̱xiyo chi yá núma ku yá síꞌi ra, yá Elisabet, saa xa ku̱naꞌnu ni na ta köo ndi̱kuvi koo seꞌe na.
8Saa ku̱u ti̱ndaa kivi ya xaa chiñu tiꞌvi nda sutu nda ítaꞌan xiꞌin ra Zacarías, ikán nda chiñu veꞌe ñuꞌu kaꞌnu ñuu Jerusalén nuu Ndioxi. 9Sundi tixin ndiꞌi nda ikán ta iindaa va ku ra xíniñuꞌu kiꞌvi choꞌma, saa chi̱kaa nda suerte, ta ndi̱kava ya sata ra Zacarías ya kiꞌvi ra choꞌma ra nuu Ndioxi ini cuarto i̱í ni ya ndíkaa maꞌñu ini veꞌe ñuꞌu kaꞌnu. 10Tá xa̱á ra chóꞌma ra, ta saa xa̱á ndiꞌi na ñuu káꞌan na xiꞌin Ndioxi, ndíta na keꞌe káꞌan na xiꞌin ra. 11Ta mií tiempo ikán ndi̱tuvi iin tatun Ndioxi ndíchi ya iin ñaꞌñu kuáꞌá xiin tun mesa nuu ndíkaa ra chóꞌma ra. 12Tá xi̱ni ra tatun Ndioxi ikán, ta ndi̱kanda ka vi ini ra saa ndi̱ndiꞌvi ni ra. 13Saa ndi̱kaꞌan tatun ikán xiꞌin ra, káchi ya saa:
―Tata Zacarías ku ïꞌvi un, saa chi xi̱ni soꞌo Ndioxi ya ndi̱kaꞌan un xiꞌin ra. Ta vitin kaku seꞌe yá síꞌi un, chinuu un kivi ra kunani ra Juan. 14Chi ná kaku ra ta kusini ni ndo. Saa kuaꞌa ni inka naꞌa kusini ni na ná kaku ra. 15Saa chi chee ni koo ra loꞌo ikán nuu Ndioxi. Ni köꞌo ra ndixi ni vinu köꞌo ra, nditaxi ndiꞌi ra mií ra ndaꞌa Ndioxi. Nda tá kivi ñúꞌu ra tixin siꞌí ra ta koo ndee Tachi I̱í Ndioxi xiꞌin ra. 16Ta kuaꞌa ni na kúu seꞌe ra Israel sindiko koo ra ichí Ndioxi. 17Chi suvi ra kunuu kuꞌun nuu ra kee kixi nuu Ndioxi, ta koo Tachi I̱í Ndioxi xiꞌin ra, saa koo ndee Ndioxi xiꞌin ra taꞌan ya ndi̱xiyo xiꞌin ra Elías ra ndi̱kaꞌan ndoso tuꞌun Ndioxi xinaꞌa, taꞌan ya ikán ku ya koo xiꞌin ra. Saa kuu mií ra ichí kaꞌan ra xiꞌin naꞌa ya ndikundoo vaꞌa na xiꞌin iva na tin seꞌe na. Ta saa ndiꞌi na iku ni ta nduvaꞌa na ikan na ya vaꞌa. Ta ra loꞌo seꞌe un ku ra chindee na koo ndúvi na, xáa na kaka na ichí Iva yo xiꞌin ndiꞌi nima na ―káchi tatun Ndioxi xiꞌin ra.
18Ta saa ndi̱ndakan tuꞌun ra Zacarías tatun Ndioxi, káchi ra saa:
―¿Ta unkua ikan i kundaa ini i án ya ndixa ku ya kaku seꞌe yá síꞌi i? Xa yata ni va uvi saa nde ―káchi ra.
19Saa ndi̱kuiin tatun Ndioxi káchi ya saa:
―Yeꞌe Gabriel ku yeꞌe, ta ndiꞌi saa kivi ndíchi i nuu Ndioxi, íyo tuꞌva i kaka i chiñu nuu ra. Suvi ra ti̱ꞌvi yeꞌe vaxi i kaꞌan i tuꞌun vaꞌa yóꞌó xiꞌin un. 20Sundi yóꞌo̱ ta köo ndi̱kandixa un yeꞌe. Xaꞌa ya köo ndi̱kandixa un ya ndi̱kaꞌan i xiꞌin un, yakan kindoo meꞌme un vitin. Saa chi vaxi tiempo ta xinu ya ndi̱kaꞌan i xiꞌin un. Vitin ta küchiñu un kaꞌan un, nda ná tindaa kivi kaku ra loꞌo seꞌe un saa kuchiñu kaꞌan un ―káchi tatun Ndioxi xiꞌin ra.
21Ta saa ndóo ndiꞌi na ñuu ndátun ñaꞌa na keta ra, ta köo ra kéta, saa xa̱á ndíꞌi va ini na xaꞌa ra. 22Sundi tá ke̱ta ra, ta ni köo ndi̱kuvi ka kaꞌan ra xiꞌin na. Saa ku̱ndaa ini na íyo ñaꞌa si̱tuvi Ndioxi nuu ra ini cuarto i̱í ikán. Ndá seña íkan ndaꞌa ra nuu na, köo ndi̱kuvi ka kaꞌan ra, ki̱ndoo meꞌme ra.
23Saa tá ndi̱xinu kivi xa̱a chiñu ra veꞌe ñuꞌu, ta ke̱e ra kua̱nuꞌu ra veꞌe ra. 24Ta saa ndi̱kee seꞌe yá Elizabet síꞌi ra, ta ni köo ndíkee mií yá. Uꞌun yoó köo mií yá ndi̱keta. Saa xa̱á yá ndíkani ini yá, káchi yá saa: 25“Ndioxi ku ra i̱kan ya vaꞌa yóꞌó xiꞌin i ya ná kündasi nuu ka naꞌa kuni na yeꞌe”, káchi yá.
Káꞌan tatun Ndioxi ndá kuꞌva kaku Jesús
26Tá ndi̱xinu iñu yoó ñúꞌu seꞌe yá Elisabet ta ti̱ꞌvi Ndioxi tatun ra Gabriel kuaꞌan ya iin ñuu náni Nazaret ya ndíkaa estado Galilea. 27Kuaꞌan ra koto ra iin yá kuâán loꞌo yá náni María. Ta nda iin taa täꞌan kusun xiꞌin yá. Xa íyo nduvi ndiꞌi ya tindaꞌa iin ra náni José xiꞌin yá. Ta ra José ku seꞌe sikua ra rey David. 28Saa ndi̱xaa tatun Ndioxi ndi̱kiꞌvi ya ini veꞌe nuu ndíkaa yá María. Ta saa chi̱ndee ya yá, káchi ya saa:
―¡Kuáꞌa un yá loꞌo, vaxi i kaꞌan i xiꞌin un chi kúsini ni Ndioxi xíni ra yóꞌo̱, saa yóꞌo̱ kusini ni ka yóꞌo̱ nuu ndiꞌi kúu ná ñaꞌa! ―kachi tatun Ndioxi xiꞌin yá.
29Saa tá xi̱ni yá tatun Ndioxi ta iin ndi̱kanda ini yá xaꞌa tuꞌun ya ndi̱kaꞌan ya xiꞌin yá, ñaa xa̱á xíka ni ini yá xaꞌa tuꞌun ikán. 30Ta saa ndi̱kaꞌan ya xiꞌin yá, káchi ya saa:
―María, ku ïꞌvi un xaꞌa ya ndi̱kaꞌan i xiꞌin un, saa chi yóꞌo̱ ta ndi̱taꞌan un ya vaꞌa nuu Ndioxi. 31Ta vitin kee seꞌe un, kaku iin seꞌe un, taa loꞌo koo ra kaku. Ta chinuu un kivi ra kunani ra Jesús. 32Chi Seꞌe Ndioxi koo ra, ndee ni taa kuu mií ra. Saa kaꞌan na xiꞌin ra: Seꞌe Ndioxi ra kaꞌnu kachi na xiꞌin ra. Chi mií Iva yo Ndioxi ndasa kaꞌnu ni seꞌe un, ta nduu ra rey tá ndi̱xiyo xii sikua ra David saa koo ra. 33Kuniꞌi ra ichí kaꞌnda chiñu ra nuu ndiꞌi na Israel. Nda iin kivi ndïꞌi xaꞌa chiñu ya kuu mií ra ―káchi tatun Ndioxi xiꞌin yá.
34Ta saa ndi̱kaꞌan yá, káchi yá saa:
―¿Ndá kuꞌva koo ya ñaa? Ta nda iin taa täꞌan tindaa yeꞌe ―káchi yá.
35Saa ndi̱kuiin tatun Ndioxi, káchi ya saa:
―Käka ini un chi mií Tachi I̱í Ndioxi ku ya kixi sata un, tá káa vikó saa koo ndee Ndioxi ra Chee ni kixi ya ndikasi ya yóꞌo̱, ñaa kee mií seꞌe un. Yakan kua koo ra, ra i̱í, saa kunani ra Seꞌe Ndioxi. 36Saa tu yá Elisabet taꞌan va un, xa íyo iñu yoo ñúꞌu seꞌe yá, vani xa chee ni yá ta ndi̱kee seꞌe yá, köo ndi̱kuvi koo seꞌe yá ta ndi̱kaꞌan na xiꞌin yá, yá numa. 37Saa chi nda iin ya köo ndíchi nuu Ndioxi ―káchi tatun Ndioxi xiꞌin yá.
38Ta saa ndi̱kaꞌan yá xiꞌin tatun Ndioxi, káchi yá saa:
―Moso ku i nuu Iva yo, ta vaꞌa ná ikan ra ya kúni mií ra xiꞌin i, tá íyo ya ndi̱kaꞌan un xiꞌin i saa ná koo ya ikan ra ―káchi yá xiꞌin tatun Ndioxi.
Saa ndi̱ko koo ya kuaꞌan ya.
Kuaꞌan yá María koto ñaꞌa yá Elisabet
39Saa ku̱u ta iin kivi ke̱e yá María xínu yá kuaꞌan yá iin ñuu kíuꞌun ya ndíkaa chí estado Judea. 40Tá ndi̱xaa yá ñuu ikán, saa ndi̱xaa yá veꞌe ra Zacarías, saa chi̱ndee ñaꞌa yá Elisabet. 41Tá xi̱ni soꞌo yá Elisabet chi̱ndee yá María ta ndikun ndi̱kanda ya loꞌo seꞌe yá tixin yá, ta saa si̱kutu Tachi I̱í Ndioxi ya vaꞌa yá xiꞌin ndee Ndioxi. 42Saa ndi̱kaꞌan yá xiꞌin yá María, káchi yá saa:
―¡Vaꞌa ni ke̱e yóꞌo̱ nuu ndiꞌi ná ñaꞌa íyo ñuu ivi yóꞌó, ta vaꞌa ni ke̱e tu seꞌe un ya ndíkaa tixin va un! 43¿Unku vi yeꞌe yakan vaxi un koto un yeꞌe, chi yóꞌo̱ ku siꞌí Iva i? 44Saa chi tá xi̱ni soꞌo i chi̱ndee un yeꞌe ta ku̱sini ka vi seꞌe i ndikun ndi̱kanda ya tixin i. 45¡Ta yóꞌo̱, vaꞌa ni kée un chi ka̱ndixa un tuꞌun ya ndi̱kaꞌan Ndioxi xiꞌin un, ta vitin ndátun un sixinu ra ya ndi̱kaꞌan ra xiꞌin un! ―káchi yá Elisabet xiꞌin yá María.
46Saa xa̱á káꞌan yá María, káchi yá saa:
Xáa kaꞌnu ni ya vaꞌa i Iva yo Ndioxi.
47Saa kúsini ni ya vaꞌa i xiꞌin Iva yo ra síkaku yoo.
48Vani ndaꞌvi ni va i ta ndi̱kaxin ra yeꞌe, ya xaa chiñu i nuu ra,
chi tiempo vitin xiꞌin ndiꞌi saa ka tiempo ya vaxi ta chinuu vaꞌa naꞌa tuꞌun i, kaꞌan na xaꞌa i ya ndee ni vaꞌa kée i, kachi na xaꞌa i.
49Chi Ndioxi ra Chee ni ku ra i̱kan ni ya vaꞌa xiꞌin i.
Ta ndee ni i̱í kivi ra.
50Ndiꞌi saa tiempo xáa kaꞌnu ini ra xaꞌa na ivi, na káñuꞌu ñaꞌa,
íkan ra ya vaꞌa xiꞌin na íyo tiempo vitin tin ndiꞌi saa ka tiempo ya vaxi kundaꞌvi ini ra kuni ra na.
51Xiꞌin ndee kúu mií ra i̱kan ra chiñu ndee ni,
ta na ndíkani ini ndee ni na túvi na ta ndi̱saka nuu ndiꞌi ra ya ndíkani ini na.
52Xiꞌin ndee ra ki̱ndaa ra ndee kúu mií na chiñu naꞌnu ni.
Ta nda̱niꞌi ra na ndaꞌvi, na ni̱nu̱ ni kúni.
53Na ndaꞌvi, na xíꞌi soko ta ta̱xi ra kuaꞌa ni ya xíxi ndaꞌa na,
ta na kuika si̱ndiko koo yuchi ra na kuaꞌan na.
54Ku̱ndaꞌvi ini ra xi̱ni ra yo Israel xáa chiñu nuu ra.
Xaꞌa ya kúndaꞌvi ini ra xíni ra yoo kua ndi̱kaꞌán ini ra xaꞌa yo.
55Tá íyo ya ndi̱kaꞌan Ndioxi xiꞌin xii sikua yo ra Abraham,
saa íyo ya i̱kan ra xiꞌin yo na kúu seꞌe sikua ra.
Nda iin kivi ndïndoso ini ra xaꞌa yo ―káchi yá María.
56Saa ndi̱ndoo yá María xiꞌin yá Elisabet tá kuꞌva uni yoó, ta sindiꞌi saa ndi̱ko koo yá kuanuꞌu yá veꞌe yá.
Ya ku̱u nuu ka̱ku ra Juan, ra síkuchi naꞌa
57Saa ku̱u ta ndi̱xinu kivi ya kaku seꞌe yá Elisabet, taa loꞌo ku ra ka̱ku.
58Saa ku̱ndaa ini na veꞌe yá xiꞌin na xíni taꞌan xiꞌin yá, ku̱ndaa ini na xaꞌa ya i̱kan Ndioxi xiꞌin yá ka̱ku seꞌe yá. Ta kúsini ka vi na tá ku̱ndaa ini na ka̱ku seꞌe yá, saa tu mií va yá, ku chi kúsini yá.
59Saa ku̱u tá ti̱ndaa una kivi ka̱ku ra loꞌo seꞌe yá. Ta ndi̱kunuu tuni Ndioxi ra, chi saa íyo ley Ndioxi ya xáa súvi na Israel ñuu na. Tá chi̱nuu na tuni Ndioxi ra saa xa̱á káꞌan na veꞌe ra chinuu na kivi ra kunani ra tá náni iva ra, káchi na.
60Sundi siꞌí ra ta köo ndi̱xiin yá kunani ra tá kuꞌva náni iva ra. Saa ndi̱kaꞌan yá, káchi yá saa:
―Künani ra tá kuꞌva náni iva ra. Juan va kunani ra ―káchi yá soꞌva.
61Saa ndi̱kaꞌan na xiꞌin yá káchi na saa:
―¿Ndachu kua kúni un kunani seꞌe un Juan, ta nda iin na veꞌe yo köo náni saa? ―káchi na xiꞌin yá.
62Ñaa xa̱á xíka ndaꞌa na nuu iva ra, káꞌan na xiꞌin ra ndá kuꞌva kunani ra loꞌo, káchi na.
63Saa ndu̱ku ra iin tabla nuu na. Ta ta̱xi na nu ndaꞌa ra, ñaa ta̱a ra nuu nu, ta ya ta̱a ra ikán káchi ya saa: “Juan kunani ra”, káchi ya. Saa tá xi̱ni na ya ta̱a ra ta ndi̱kanda ni ini na.
64Tá ta̱a soꞌva ra, ta saa xa̱a tuꞌun ra xa̱á ra káꞌan ra. Ta káꞌan ka vi ra ya vaꞌa xaꞌa Ndioxi.
65Saa tá xi̱ni na xíni taꞌan xiꞌin ra ya xa̱á ra káꞌan ra ta ndi̱ndiꞌvi ka vi na. Xa̱ta ndiꞌi na tuꞌun xaꞌa ya ndo̱ꞌo ra. Ndiꞌi saa ñuu ya ñúꞌu iku estado Judea ku̱ndaa ini na xaꞌa ya ndo̱ꞌo ra.
66Ta ndiꞌi na ku̱ndaa ini ya ndo̱ꞌo ra ndi̱ndakan tuꞌun taꞌan na, káchi na saa:
―¿Ndá chiñu kua kuu mií ra loꞌo yóꞌó nuu Ndioxi ná kuchee ra? ―káchi na.
Chi tixin ra loꞌo ikán si̱naꞌa Ndioxi ndee ra nuu na.
Yaa ya xíta ra Zacarías
67Ta saa ndu̱ndee ni ra Zacarías iva ra loꞌo Juan xiꞌin ndee Tachi I̱í Ndioxi, saa xa̱á ra káꞌan ra xaꞌa Ndioxi, káchi ra saa:
68Kaꞌnu ni ná koo Ndioxi ra chíndee yoo na Israel,
saa chi vaxi ra koto ra yoo saa saña ndíka ra yoo.
69Xaꞌa ya ti̱ꞌvi ra iin ra Chee ni vaxi ra sikaku ra yoo ta tixin seꞌe sikua ra David, ra xa̱a chiñu nuu ra kua i̱kan ra saa xiꞌin yo.
70Tá íyo ya ndi̱kaꞌan ra tixin nda ndi̱kaꞌan ndoso tuꞌun yuꞌu ra xinaꞌa, saa íyo ya i̱kan ra, káchi ya saa:
71Sikaku ra yoo nuu na sáa ini xíni yoo tin sikaku ra yoo nuu ndiꞌi na kúndasi nuu xíni yoo.
72Saa chi kúndaꞌvi ni ini ra xíni ra iva yo ta köo ndi̱ndoso ini ra xaꞌa tuꞌun ya i̱í ndi̱kaꞌan ra xiꞌin xii sikua yo.
73Chi ya chi̱naꞌa ra tá ndi̱kaꞌan ra xiꞌin xii sikua yo ra Abraham ta ya ndinuꞌu ni ku ya:
74Saña ra yoo ndaꞌa na sáa ini xíni yoo, ta ni ku ïꞌvi yo kuni yo na,
saa vaꞌa ni xaa chiñu yo nuu ra.
75Chi ïkan ka yo ya väꞌa, nduu i̱í yo ndiꞌi saa kivi ya koo yo ñuu ivi yóꞌó ―káchi ra Zacarías.
Ta saa ndi̱kaꞌan ra xiꞌin ya loꞌo seꞌe ra, káchi ra saa:
76Ta yóꞌo̱ ra loꞌo, ra káꞌan tuꞌun yuꞌu Iva yo Ndioxi koo un chi ra Chee ni ku ra,
saa chi kunuu un nuu Tata yo kuꞌun un kaꞌan un xiꞌin na ya ndasa vií un ichí nuu ra.
77Saa sinaꞌa un na ndá kuꞌva kuu sikaku Ndioxi yo na kúu ñuu ra, ya xaa kaꞌnu ini ra xaꞌa kuachi ndiꞌi yo.
78Saa chi kúndaꞌvi ni ini Iva yo xíni ra yoo,
2 yakan ti̱ꞌvi ra seꞌe ra, ra ke̱e nuu ndivi, ta ra ikán ku ra káa tá káa nuu túvi inka kivi.
79Chi kixi ra sindiyeꞌe ra nuu na ndóo nuu naá, na köo xíni xaꞌa ra, chi na ikán tá íin na xa ndátun kuvi va saa íin na.
2 Saa sinaꞌa ra ichí nuu yo kuꞌun yo nuu luvi ni káa ―káchi ra Zacarías xiꞌin ya lee loꞌo seꞌe ra.
80Saa xáꞌnu ka ra loꞌo Juan ndúndee ka ra xiꞌin ndee Ndioxi, ta xíka ra iku yuyu. Ndiꞌi saa kivi ndi̱xika ra iku yuyu nda kivi tá si̱naꞌa ra mií ra nuu na ñuu ra, na Israel.
Valgt i Øjeblikket:
San Lucas 1: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.