San Mateo 24
24
Káꞌan Jesús ya ndiꞌi xaꞌa veꞌe ñuꞌu kaꞌnu ñuu Jerusalén kivi vaxi
(Mr. 13:1-2; Lc. 21:5-6)
1Tá ke̱ta Jesús keꞌe veꞌe ñuꞌu kaꞌnu, ta xa ndi̱kiꞌin ra kuaꞌan ra, saa ku̱yati nda ítaꞌan xiꞌin ra nuu ra, káꞌan nda xiꞌin ra xaꞌa veꞌe ñuꞌu ikán ya chee ni ya. 2Saa ndi̱kaꞌan ra xiꞌin nda, káchi ra saa:
―¿Án vaꞌa ni náꞌa ya túvi ndo? Ya ndaa káꞌan i xiꞌin ndo ndiꞌi xaꞌa ndiꞌi ya. Nda iin yu̱ú xaꞌa ya ndöo ―káchi ra xiꞌin nda.
Ñaꞌa ya kuu tá täꞌan ndiꞌi xaꞌa ñuu ivi
(Mr. 13:3-23; Lc. 21:7-24; 17:22-24)
3Saa ke̱e nda kuaꞌan nda iku Olivo, ñaa ndi̱kunduꞌu Jesús xiki ikán, ta ku̱yati nda ítaꞌan xiꞌin ra nuu ra káꞌan sěꞌe nda xiꞌin ra, káchi nda saa:
―Tata, kúni nde kaꞌan un xiꞌin nde maa kua kuu saa. ¿Ta ndá seña kua koo tá ná ndiko koo un tin tá ná ndiꞌi xaꞌa ñuu ivi? ―káchi nda xiꞌin ra.
4Saa ndi̱kuiin Jesús, káꞌan ra xiꞌin nda, káchi ra saa:
―¡Kuenta ni koo ndo. Täxi ndo sindaꞌvi naꞌa ndóꞌo̱! 5Saa chi kuaꞌa ni nda taa kixi ta kaꞌan nda xiꞌin ndo: “Yeꞌe ku Cristo, taa ra ti̱ꞌvi Ndioxi sikaku na ñuu ivi yóꞌó”, kachi nda xiꞌin ndo, ta kuaꞌa ni naꞌa sindaꞌvi nda. 6Tá xíni soꞌo ndo káꞌan naꞌa, íyo kuachi xáꞌni taꞌan na ñuu íyo yati án ñuu xika ni, ta ku ïꞌvi ndo. Saa chi nduxa saa xíniñuꞌu kuu, sundi süvi ya xa ndiꞌi xaꞌa ku ñuu ivi. 7Kivi ya vaxi ta ndikuita na ñuu naꞌnu kani taꞌan na xiꞌin inka na ñuu naꞌnu, kani taꞌan rey iin ñuu xiꞌin inka rey ra inka ñuu, saa koo tama tin kuaꞌa ni nuu kueꞌe koo, ta kuaꞌa ni ñuu taan. 8Süvi ya xa ndiꞌi xaꞌa ku ñuu ivi, ya sikan xa̱á ku ya tixuꞌvi ni na.
9’Ta kivi ikán tiin na ndóꞌo̱ kuꞌun ndo xiꞌin na, ta nditaxi na ndóꞌo̱ ndaꞌa na chiñu ya xaa nduvaꞌa ni na xiꞌin ndo, ta kaꞌni na sava ndo. Ta ndiꞌi naꞌa kundasi nuu na kuni na ndóꞌo̱ xaꞌa ya ndíkun ndo yeꞌe. 10Ta kuaꞌa ni naꞌa ndiko koo ini xaꞌa ya kándixa na yeꞌe, ñaa ndixiko taꞌan mií na nuu na chiñu, ta kundasi ni nuu na kuni taꞌan mií na. 11Ta kuaꞌa ni nda profeta vata kana koo, saa sindaꞌvi ni nda naꞌa. 12Saa ndundee ni ka ya väꞌa, ta xaꞌa ya ikán ta ni küꞌvi ka ini naꞌa kuni taꞌan na. 13Sundi ndiꞌi na köo ndiko koo ini xaꞌa ya kuaꞌan na ichí i, na ikán ku na kaku. 14Ta na ndíkun yeꞌe kuꞌun na ndiꞌi ni kúu ñuu ivi kaꞌan ndoso na xiꞌin ndiꞌi naꞌa xaꞌa ichí nuu xáꞌnda chiñu Ndioxi ya ná kundaa ini na xaꞌa tuꞌun vaꞌa xaꞌa i. Tá ná kuu saa, ta saa kua ndiꞌi xaꞌa ñuu ivi yóꞌó.
15Xaꞌa ya ñaa kua ná kundaa ini ndo xiꞌin ya ta̱a ra profeta Daniel. Chi yeꞌe káꞌan i xiꞌin ndo: Tá xíto ndo ya väꞌa, ya kini, ya kúndasi nuu Ndioxi xíni ra, ndi̱xaa ya íyo ya ñaꞌñu ií ni ini veꞌe ñuꞌu kaꞌnu, ta saa kua kundaa ini ndo ya xa ti̱ndaa kivi ya ndee ni ndee vaxi tindoꞌo. Saa ndiꞌi naꞌa, na káꞌvi ya yóꞌó ta ná kundaa ini na xiꞌin ya. 16Ta ndiꞌi na ndóo estado Judea yóꞌó ta xíniñuꞌu kunu na kuꞌun na nuu íyo iku sukun. 17Ta na ndóso sata veꞌe na, ta ná nüu ka na tava na ñaꞌa ini veꞌe na. 18Ta na ñúꞌu xáa chiñu iku, ta ná ndïko koo ka na veꞌe na ya ndikuiso na toto na. 19¡Ndaꞌvi ni ná síꞌi ñúꞌu seꞌe, saa tu ná íyo seꞌe vali na chíchi, tá ná tindaa kivi ya kuu saa! 20Kaꞌan ni ndo xiꞌin Ndioxi, ta ná köo ya yóꞌó kivi vixin ni án kivi i̱í ya ndíkundee yo. 21Saa chi kivi ikán ta ndoꞌo ni na. Nda nani xi̱koo xaꞌa ñuu ivi ta köo na ndóꞌo ni tá kuꞌva ndoꞌo na kivi ikán. Ta nda iin ka kivi ya vaxi ndöꞌo ka na tá kuꞌva ndoꞌo na kivi ikán. 22Ta xaꞌa ya kúꞌvi ni ini Ndioxi xíni ra na ndi̱kaxin ra ndíkun ichí ra kua chi̱tuni ra loꞌo kivi ndoꞌo na ñuu ivi yóꞌó. Tá ra köo ndi̱chituni ku ra ya ndoꞌo na loꞌo kivi ta nda iin naꞌa käku, ndikuu.
23’Tá ndá naꞌa káꞌan xiꞌin ndo: “Koto, yóꞌó íin Cristo ra ti̱ꞌvi Ndioxi sikaku na ñuu ivi”, án “Koto, kaá íin ra”, káchi na xiꞌin ndo, ta kändixa ndo ya káꞌan na. 24Chi kana koo kuaꞌa ni na vata kachi na saa: “Yeꞌe ku ra ku Cristo ra ti̱ꞌvi Ndioxi”, án “Yeꞌe ku profeta ra káꞌan ndoso tuꞌun yuꞌu Ndioxi”, kachi na, ta süvi na ndaa ku na. Ikan na yatuꞌun nuu sindaꞌvi na naꞌa, saa ndikanda ni ini na xiꞌin ya vata ikan na nuu naꞌa, ta nda na ndi̱kaxin Ndioxi kuni na sindaꞌvi na. 25Xa yachi ka ndítuꞌun i xiꞌin ndo, tá ná kuu saa ta kuenta ni koo ndo xiꞌin mií ndo. 26Yakan tá káꞌan naꞌa xiꞌin ndo, káchi na saa: “Kuaꞌan ndo koto ndo iku yuyu kaa íyo ra ti̱ꞌvi Ndioxi vaxi sikaku na ñuu ivi”, kachi na xiꞌin ndo. Án kaꞌan na xiꞌin ndo, kachi na saa: “Naꞌa ndo koto ndo ini cuarto yóꞌó ndíkaa sěꞌe ra”, kachi na xiꞌin ndo, ta kändixa ndo ya káꞌan na xiꞌin ndo. 27Tá ná ndiko koo yeꞌe Taa ra xa̱a ñuu ivi yóꞌó, ta tá kuꞌva ndíyeꞌe taxan nuu ndivi iin ndíyeꞌe ndaa yaa nuu kéta ñu̱ꞌù iin saa nda nuu kěta ya, saa kuu kivi tá ná ndiko koo i, ndiꞌi ni kúu naꞌa kuni ndiko koo i. 28Tá xíto yo míi kua kátin ni mbelo, ta saa kúndaa ini yo índuꞌu kiti ndi̱xiꞌi ―káchi Jesús.
Kivi ndiko koo Jesús
(Mr. 13:24-37; Lc. 21:25-36; 17:25-36; 12:41-48)
29Saa ndi̱kaꞌan tuku Jesús, káchi ra saa:
―Tá ndi̱ꞌi ya ndo̱ꞌo ni naꞌa, ta saa ndikun kunaa nuu ñu̱ꞌù, ni yoó ta ndïyeꞌe ka ri, ta koyo kiti kimi, ta ndiꞌi ya kúu mií ndee íyo nuu ndivi ta ndee ni kanda ndiꞌi ya. 30Ta ndiꞌi naꞌa kuni na koo seña nuu ndivi ya ndiko koo yeꞌe, Taa ra xa̱a ñuu ivi yóꞌó, saa kuaku ni na ñuu ivi yóꞌó, kusuchi ni ini na. Ta ndiꞌi naꞌa kuni na yeꞌe kixi i xiꞌin viko, kixi i xiꞌin ndee chee ni xiꞌin ndiꞌi ya yéꞌe̱ ni. 31Saa tiꞌvi i na tatun Ndioxi ta ndee ni ndaꞌi na xiꞌin trompeta tivi na kuꞌun na ndikaya na ndiꞌi na ndi̱kaxin i ya kundikun na ichí i. Ta ndiꞌi ni kúu xaꞌa ñuu ivi kana koo na, xaa na nuu i.
32Ta ndóꞌo̱ sikuáꞌa ndo tuꞌun ndíchi ya káꞌan xaꞌa itun higo: Tá xa̱á vaxi nána ndixin ndaꞌa nu ta kúni kachi ya, xa yati ni xa̱á kuun savi. 33Kuꞌva saa kua íyo tu ya yóꞌó va, tá xíto ndo kuaꞌan xínu ndiꞌi ya ndi̱tuꞌun i xiꞌin ndo, saa kundaa ini ndo xa vaxi kúyati ni kivi ya ndiko koo i ñuu ivi yóꞌó. 34Ya ndaa káꞌan i xiꞌin ndo, naꞌa na táku xíto ya xa̱á seña yóꞌó, ta kutaku ka na nda kivi tá ná xinu ndiꞌi ya ndi̱tuꞌun i xiꞌin ndo. 35Ndiꞌi xaꞌa ndivi tin ñuꞌú yóꞌó, sundi tuꞌun i ta nda iin kivi ndïꞌi xaꞌa ya xinu ndiꞌi ya káꞌan ya.
36’Nda iin naꞌa köo xíni maa ndiko koo i, ndá kivi kua ni ndá hora kua ndiko koo i ñuu ivi yóꞌó, ni na tatun Ndioxi köo xíni, ni yeꞌe kúu Seꞌe ra köo xíni. Iindaa mií Iva i Ndioxi ku ra xíni.
37’Tá kuꞌva i̱kan naꞌa kivi xi̱taku ra Noé, saa ikan na kivi tá ná ndiko koo i ñuu ivi yóꞌó. 38Saa chi xinaꞌa tá xi̱taku ra Noé tá täꞌan kuun savi íꞌná ta ndiꞌi naꞌa xíxi na tin xíꞌi na, tíndaꞌa na tin táxi na seꞌe na tíndaꞌa ná. Saa i̱kan na nda kivi tá ndi̱keta ra Noé ini itun barco. 39Ta köo ndi̱kundaa ini na unkua kundoꞌo na, nda kivi tá xa̱á kúun kini ni savi íꞌná, ñaa ta̱ni na ta ndi̱kaꞌan ndaa na xiꞌin tikuii ndi̱xiꞌi ndiꞌi na. Tá ndo̱ꞌo na ikán saa kundoꞌo na ndóo vitin chi köo íyo nduvi na kivi tá ná ndiko koo yeꞌe, Taa ra xa̱a ñuu ivi yóꞌó. 40Ta kivi ikán tá ñúꞌu uvi nda taa iku, ta ndikiꞌin i iin ra kuꞌun xiꞌin i, ta inka ra ndoo. 41Saa tá ñúꞌu uvi ná síꞌi ndíko ná, ta ndikiꞌin i iin yá kuꞌun yá xiꞌin i, ta inka yá ndoo.
42’Saa ndóꞌo̱, koo tuꞌva ndo saa chi köo xíni ndo maa kua ndiko koo yeꞌe, ra kúu Tata ndo, ra chee nuu ndo. 43Ta kuñuꞌu vaꞌa ini ndo ya yóꞌó: Iin taa, tá xíni ra maa kua kiꞌvi na kuiꞌna sikuiꞌna na ñaꞌa veꞌe ra, ta ni küsun ra, koo ra kundaa ra veꞌe ra. 44Saa ndóꞌo̱, xíniñuꞌu ndo koo tuꞌva ndo, saa chi iin kuu soꞌva ndiko koo Yeꞌe, Taa ra xa̱a ñuu ivi yóꞌó ―káchi Jesús xiꞌin na.
Ra moso xáa chiñu ni xiꞌin ra moso iku ni ini
(Lc. 12:41-48)
45Saa ndi̱kaꞌan tuku Jesús, káchi ra saa:
― Ná ndituꞌun i xiꞌin ndo unkua íkan iin ra xáa chiñu tatu, ra toꞌo ni. Xaꞌa ya vaꞌa ni xáa chiñu ra, ta ta̱xi xitoꞌo ra ichí ndaꞌa ra ndáa chiñu ra xiꞌin ndiꞌi na xáa chiñu nuu xitoꞌo ra, saa taxi ra kuxi na, tá ti̱ndaa hora kuxi na. 46Vaꞌa ni kee ra moso yóꞌó kivi tá ná ndiko koo xitoꞌo ra, ta kuni ra vaꞌa ni xáa chiñu ra. 47Ya ndaa káꞌan i xiꞌin ndo taxi ndiꞌi xitoꞌo ra chiñu ndaꞌa ra, ndikuiso chiñu ra xiꞌin ndiꞌi chiñu tin na xáa chiñu nuu xitoꞌo ra. 48Sundi tá tu iin moso ra iku ini ku ra, ñaa xa̱á ra ndikani ini ra, kachi ra saa: “Ni ndïko koo yachi xitoꞌo yo”, kachi ra. 49Ñaa xa̱á ra xaa nduvaꞌa ra xiꞌin na taꞌan ra, na xáa chiñu nuu xitoꞌo ra, saa xa̱á ra kuxi ra tin koꞌo ra xiꞌin na xíꞌi. 50Ta iin kuu soꞌva ndiko koo xitoꞌo ra, kivi köo ndátun ra ya ndiko koo ra, ni hora ya ndiko koo ra köo xíni ra. 51Ta ndee ni sitixuꞌvi ñaꞌa patrón ra. Ñaa tiꞌvi ñaꞌa ra kuꞌun ra nuu ndóo na väꞌa, na uvi ini. Ta ikán ku nuu kuaku ni na ndakua ndikaxi nuꞌu na, xaꞌa ya ndee ni tíxuꞌvi na.
Valgt i Øjeblikket:
San Mateo 24: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.