San Marcos 1
1
Ra Juan, ra síkuchi naꞌa, xíka ra iku yuyu káꞌan ndoso ra xaꞌa tuꞌun Ndioxi
(Mt. 3:1-12; Lc. 3:1-9,15-17; Jn. 1:19-28)
1Soꞌva kua ku̱u tá ndi̱tuvi tuꞌun vaꞌa xaꞌa Tata yo Jesucristo, ra kúu Seꞌe Ndioxi ra ti̱ꞌvi Ndioxi vaxi sikaku na ñuu ivi.
2Tá íyo ya ta̱a ra Isaías, ra, ndi̱kaꞌan ndoso tuꞌun yuꞌu Ndioxi xinaꞌa ya ndi̱kaꞌan Ndioxi xiꞌin ra, nuu káchi Ndioxi saa xiꞌin Jesucristo:
Tiꞌvi i iin ra káꞌan ndoso tuꞌun i, kunuu ra kuꞌun ra nuu un,
tá káa ra xáa vií ichí saa koo ra, kaꞌan ndoso ra xaꞌa un xiꞌin na ñuu ivi.
3Ta nuu íyo iku yuyu kaka ra kaꞌan ra, kachi ra saa:
‘‘Yachi ka, tá täꞌan kixi ra chee nuu yo, ta ná koo tuꞌva nima ndo nuu ra. Tá kuꞌva íkan na xáa vií na ichí kivi xáa iin ra chee nuu na,
saa ikan ndo, xaa vií ndo ini ndo, ta saa ndundaku ini ndo”,
káchi tuꞌun Ndioxi ya ta̱a ra Isaías.
4Saa ku̱u nuu xa̱á ra Juan síkuchi ra naꞌa iku yuyu. Saa káꞌan ra xiꞌin na ya ndinuu ini na ná ndiko koo ini na xaꞌa kuachi na, ta saa kuchi na, saa xaa kaꞌnu ini Ndioxi xaꞌa kuachi na, káchi ra xiꞌin na. 5Kuaꞌa ka vi na kuaꞌan nuu ra, kuaꞌan na ñuu Jerusalén xiꞌin ndiꞌi ka na ñuu ya ñúꞌu estado Judea, kuaꞌan na kuni soꞌo na ya káꞌan ra. Tá xíni soꞌo na ya káꞌan ra, saa náꞌma na kuachi na nuu Ndioxi, saa síkuchi ra Juan na ini ita Jordán.
6Ta ndíxi ra Juan toto ya ndi̱kuaꞌa xiꞌin ixi kiti camello, saa núꞌni ñii toko ra, ta xíxi ra kiti tika ndiama tin ñuñu iku. 7Ta káꞌan ra xaꞌa Jesús xiꞌin na, káchi ra saa:
―Sata yeꞌe vaxi inka taa, ra ndee ni nuu i, xaꞌa ya kaꞌnu ni ra nuu i, ta nda sata nduxan ra küvi kuyati i ndaxín i chi yáꞌa ni chee ra nuu i. 8Yakan yeꞌe ta xiꞌin tikuii va síkuchi i ndóꞌo̱, sundi ra ikán ku ra sikuchi ndóꞌo̱ xiꞌin Tachi I̱í Ndioxi ―káchi ra Juan xiꞌin na.
Ya ku̱u nuu si̱kuchi ra Juan Jesús
(Mt. 3:13-17; Lc. 3:21-22)
9Saa ku̱u ke̱e Jesús ñuu Nazaret, ya ndíkaa estado Galilea, ta ndi̱xaa ra ita Jordán, ta ikán si̱kuchi ra Juan ra. 10Tá sindiꞌi si̱kuchi ra Juan ra saa ke̱ta ra ini tikuii, ñaa xi̱ni ra xúna nuu ndivi ta xi̱ni ra vaxi nuu Tachi I̱í Ndioxi, tá káa sata loꞌo saa káa ya vaxi nuu sata ra. 11Saa ke̱ta tachi Ndioxi nuu ndivi ndi̱kaꞌan ya xiꞌin ra, káchi ya saa:
―Yóꞌo̱ ku Seꞌe mani i, ta íyo vaꞌa ni ini i xíni i yóꞌo̱ ―káchi Ndioxi xiꞌin ra.
Kiti nǎꞌa xíto ndoso ri Jesús
(Mt. 4:1-11; Lc. 4:1-13)
12Tá ndi̱ꞌi chi̱chi Jesús, ta saa ndi̱kiꞌin Tachi I̱í Ndioxi ra, kuaꞌan ra xiꞌin ya iku yuyu. 13Uvi xiko kivi ndi̱xiyo ra iku yuyu ikán, saa ndi̱xaa kiti nǎꞌa xíto ndoso ri ra, ta íyo ni kiti kueꞌe ikán. Sundi íyo tatun Ndioxi chíndee ñaꞌa ya.
Ñuu Galilea ku nuu xa̱á Jesús káꞌan ra xaꞌa tuꞌun Ndioxi
(Mt. 4:12-17; Lc. 4:14-15)
14Sindiꞌi tá chi̱kaa ra Herodes ra Juan veꞌe kàà, saa ke̱e Jesús kuaꞌan ra estado Galilea kaꞌan ra tuꞌun vaꞌa xaꞌa Ndioxi ndá kuꞌva kua kaꞌnda chiñu ra. 15Ta ya káꞌan ra xiꞌin na kua yóꞌó:
―Vitin kua ti̱ndaa tiempo, ta xa ku̱yati ni ya xa̱á Ndioxi kaꞌnda chiñu ra nuu na ñuu ivi yóꞌó. Yakan kuni soꞌo ndo ya káꞌan i xiꞌin ndo, ta xinu ini ndo ndiko koo ndo nuu Ndioxi, ta kandixa ndo ya vaꞌa yóꞌó ―káchi Jesús xiꞌin na.
Jesús ka̱na ra kumi nda xáꞌni tiaka ya kundikun ñaꞌa nda
(Mt. 4:18-22; Lc. 5:1-11)
16Saa ku̱u iin kivi ke̱e Jesús xíka ra kuaꞌan ra yuꞌu Nduta Ñûꞌu Galilea. Ta ikán xi̱ni ra ta Simón xiꞌin ra Andrés ñani ra, ñúꞌu nda xáꞌni nda tiaka. Ta saa chíkaa nda ñunu nda ini tikuii, chi nda xáꞌni tiaka ku nda. 17Saa ndi̱kaꞌan ra xiꞌin nda, káchi ra saa:
―Naꞌa ndo koꞌyo xiꞌin i, ta yeꞌe taxi i inka chiñu ndaꞌa ndo, ta tïin ka ndo tiaka, sundi ndóꞌo̱ ta kuꞌun ndo kaꞌan ndo xiꞌin naꞌa ya ná kundikun na ichí Ndioxi ―káchi Jesús xiꞌin nda.
18Tá ndi̱kaꞌan soꞌva ra xiꞌin nda, saa ndikun si̱ndikoo nda ñunu nda, ñaa ndi̱kiꞌin nda kuaꞌan nda xiꞌin ra.
19Saa xíka nda kuaꞌan nda. Naꞌa loꞌo ta xi̱ni nda ra Jacobo xiꞌin ra Juan ñani ra. Nda seꞌe ra Zebedeo ku nda, ta ñúꞌu nda ini itun barco síndaꞌa nda ñunu nda. 20Saa ka̱na Jesús nda. Tá ka̱na soꞌva ra nda ta ndikun ndi̱kiꞌin nda kuaꞌan nda xiꞌin ra. Si̱ndoo nda iva nda xiꞌin na xáa chiñu xiꞌin nda, ndi̱ndoo na sata barco ikán, ta ndi̱kiꞌin nda kuaꞌan nda xiꞌin Jesús.
Síndaꞌa Jesús iin taa ra kúu mií tachi nduvaꞌa
(Lc. 4:31-37)
21Saa ndi̱xaa Jesús xiꞌin nda ítaꞌan xiꞌin ra ñuu Capernaum. Ta kivi i̱í, kivi ndíkundee na, ndi̱kiꞌvi Jesús ini veꞌe ñuꞌu sinagoga sínaꞌa ra naꞌa. 22Ta ndi̱kanda ni ini naꞌa xíni soꞌo na ya káꞌan ra, chi káꞌan ra tá káꞌan iin ra kúu mií chiñu ndee ni, ta köo káꞌan ra tá kuꞌva káꞌan nda maestro nda sínaꞌa ley ya ta̱a ra Moisés. 23Ta saa ndíkaa iin ra kúu mií tachi nduvaꞌa ini veꞌe ñuꞌu sinagoga ikán, ta ndee ka vi ndi̱kaꞌan ra, ndi̱ndaꞌi koꞌo tachi nduvaꞌa nuu Jesús, káchi ya saa:
24―Yóꞌo̱ ku Jesús, ra ñuu Nazaret, ta ¿ndachu kuakiꞌvi un xiꞌin nde? ¿Án vaxi un sindiꞌi xaꞌa un ndeꞌe? Chi yeꞌe ta xíni vaꞌa i yóꞌo̱, yóꞌo̱ ku ra i̱í, ra ke̱e nuu Ndioxi ―káchi ya xiꞌin ra.
25Saa ndi̱kuiin Jesús ndi̱ndaꞌi ra xiꞌin tachi ikán, káchi ra saa:
―Kutaxin yuꞌu un, ta keta kuáꞌan ―káchi ra xiꞌin ya.
26Saa ndinuni loꞌo si̱kisi ñaꞌa ya, ta iin ndendee ndi̱ndaꞌi koꞌo ya, saa ke̱ta ya kuaꞌan ya. 27Ta ndi̱kanda ka vi ini na xi̱ni ya ikán, ñaa xa̱á na ndákan tuꞌun taꞌan na, káchi na saa:
―¿Ndá ndee kua kúu mií ra yóꞌó kua? Xa síin va ku ya sínaꞌa ra, ndee ni va ndee kúu mií ra, chi nda tachi nduvaꞌa xíni soꞌo káꞌan ra ―káchi na xiꞌin taꞌan na.
28Ta kama ku chi ndi̱xita ndiꞌi tuꞌun xaꞌa Jesús, ndiꞌi kúu estado Galilea ku̱ndaa ini na ñuu xaꞌa ra.
Ya yóꞌó ku̱u nuu si̱ndaꞌa Jesús yá siso ra Simón Pedro
(Mt. 8:14-15; Lc. 4:38-39)
29Saa tá ka̱na koo nda ini veꞌe ñuꞌu sinagoga ikán, ta ndi̱kiꞌin Jesús kuaꞌan ra veꞌe ra Simón xiꞌin ra Andrés ñani ra, saa kuaꞌan ra Jacobo tin ra Juan xiꞌin ra. 30Ta ndee ka vi ndóꞌo yá siso ra Pedro, ndítuvi ya xiꞌin yá índuꞌu yá nuu xito. Ta ndi̱tuꞌun nda xiꞌin Jesús ya kúꞌvi yá. 31Saa ku̱yati ra yuꞌu xito yá, ñaa ti̱in ra ndaꞌa yá ta ka̱ndichi ra yá. Saa ndikun ndu̱vaꞌa yá, ndikun ki̱ndaa ya ndítuvi ya xiꞌin yá. Saa xa̱á yá xáa vií yá kuxi nda.
Kuaꞌa ni na kúꞌvi síndaꞌa Jesús
(Mt. 8:16-17; Lc. 4:40-41)
32Tá kuaꞌan kúxikuáa, tá xa ndi̱keta ñu̱ꞌù, saa ndáka naꞌa na kúꞌvi xiꞌin na kúu mií tachi nduvaꞌa, ndáka ñaꞌa na ndi̱xaa na nuu Jesús. 33Ta iin chu̱tu ndaa na ñuu yeꞌe veꞌe ra Simón. 34Kuaꞌa ni nuu kueꞌe kúu mií na ndi̱xaa nuu ra, ta sava na kúu mií tachi nduvaꞌa, ta iin si̱ndaꞌa ndiꞌi ra na. Ta̱va ndiꞌi ra tachi nduvaꞌa ku̱u mií na, ta köo ndi̱taxi ra kaꞌan tachi nduvaꞌa, saa chi xa xíni vaꞌa ya kúu ra Seꞌe Ndioxi.
Xíka Jesús káꞌan ndoso ra tuꞌun Ndioxi ndiꞌi kúu ñaꞌñu estado Galilea
(Lc. 4:42-44)
35Xitaan ni tá täꞌan tuvi, saa ndi̱koo Jesús kuaꞌan ra iin ñaꞌñu nuu köo nda iin naꞌa. Kuaꞌan ra kaꞌan ra xiꞌin Ndioxi. 36Sindiꞌi saa xa̱á ra Simón ndúku ñaꞌa ra xiꞌin nda taꞌan ra. 37Tá ndi̱taꞌan nda ra saa ndi̱kaꞌan nda xiꞌin ra, káchi nda saa:
―Tata, ndiꞌi kúu na xíka ndúku yóꞌo̱ ―káchi nda xiꞌin ra.
38Saa ndi̱kuiin ra káꞌan ra xiꞌin nda, káchi ra saa:
―¿Án saa va? Sundi yoo ta xíniñuꞌu yo kuꞌun yo ñuu ya ñúꞌu yati, ya kaꞌan ndoso i tuꞌun Ndioxi, saa chi xaꞌa ya ñaa kua ti̱ꞌvi ra yeꞌe vaxi i ―káchi ra xiꞌin nda.
39Saa xa̱á ra xíka ra ndiꞌi kúu veꞌe ñuꞌu sinagoga ya ñúꞌu estado Galilea. Xíka ra káꞌan ndoso ra tuꞌun Ndioxi, saa táva tu ra tachi nduvaꞌa ya ndóꞌo naꞌa va.
Síndaꞌa Jesús iin taa ra ndóꞌo kueꞌe taꞌi
(Mt. 8:1-4; Lc. 5:12-16)
40Saa ku̱u ndi̱xaa iin ra ndóꞌo kueꞌe taꞌi, náni lepra, ndi̱xaa ra si̱kusiti ra nuu Jesús, káchi ra saa:
―Tata, xíni i iindaa yóꞌo̱ ku ra kuchiñu sindaꞌa yeꞌe, ta köo xíni i án kúni un ikan loꞌo un ya vaꞌa xiꞌin i ―káchi ra xiꞌin Jesús.
41Saa ku̱ndaꞌvi ini Jesús xi̱ni ñaꞌa ra. Ñaa si̱kaa ra ndaꞌa ra ti̱in ndaa ñaꞌa ra, ta ndi̱kaꞌan ra xiꞌin ra, káchi ra saa:
―Kúni i sindaꞌa i yóꞌo̱, ná nduvaꞌa un ―káchi ra xiꞌin ra.
42Tá ndi̱kaꞌan soꞌva ra xiꞌin ra, saa ndikun ndu̱vaꞌa ra. 43Saa nda̱i Jesús ra, ta ndi̱kaꞌan ni ra xiꞌin ra, káchi ra saa:
44―Kuáꞌan, ta nda iin naꞌa käꞌan un xiꞌin ya si̱ndaꞌa i yóꞌo̱. Iin ndaku kuꞌun un nuu sutu ná koto ra yóꞌo̱ ya ndu̱vaꞌa un. Ta kuniꞌi un ñaꞌa taxi un ndaꞌa ra, ya xaa ndúvi un ya káꞌan ley Ndioxi ya ta̱a ra Moisés. Tá si̱ndiꞌi un xa̱a ndúvi ndiꞌi un ya ikán, saa kundaa ini ndiꞌi na ya ndu̱vaꞌa un ―káchi ra xiꞌin ra.
45Saa ke̱e ra ikán kuaꞌan ra, sundi köo ndi̱xaa ndúvi ra ya ndi̱kaꞌan Jesús xiꞌin ra. Saa chi tá kuaꞌan ra ichí, ta xa̱á ra ndítuꞌun ndiꞌi ra xiꞌin na ya si̱ndaꞌa Jesús ra. Xaꞌa ya ikán kua köo ndi̱kuchiñu ka kiꞌvi Jesús nda iin ñuu. Ndá nuu ñuu, nuu köo naꞌa kua xíka ra. Ta saa ni kuaꞌan ni naꞌa nuu ra, ndiꞌi kúu ñaꞌñu kée na xáa nuu ra.
Valgt i Øjeblikket:
San Marcos 1: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.