San Lucas 19
19
Jesús Zaqueo dɨga illa rafue
1Jericómo Jesús rillanona, nainomo macaritemo, 2naie facaise nainomo Zaqueo raillamɨe ite. Gobierno ucubena nanoca oraɨma. Naimɨedɨ eo ucuberede. 3Jesús baɨ macaritemo, Zaqueo naimɨena cɨoacade; iadedɨ ailluena comɨnɨ illamona, Zaqueo ianorina jira, Jesúna cɨonide. 4Ie jira uicodo aisɨcana jaide, amenamo a jaillena, naimɨena cɨoillena. 5Naimɨe dɨne Jesús rillano, Zaqueomo a erodate. Naimɨena uaidote:
—Zaqueo, raɨre ana bi. O dɨga danomo illena, o jofo dɨne jaitɨcue.
6Ie jira raɨre ana bite. Ie jofomo Jesúna iocɨre feiñote. 7Iena jɨaɨe comɨnɨ cɨuanona, Jesús joreñona jeare ñaɨanona raitɨmacɨ:
—Mariñedɨcɨnona fɨnoraɨma jofomo naimɨe jaide.
8Jesúna naimɨe feiñua mei, Zaqueo Jesús ecɨmo naidaita, naimɨemo llote:
—Nama, atuedo cue raruiaɨna dueredɨnomo biruimona fecaitɨcue. Bumona navui cue fɨɨia, cuatro dɨga ra abɨdo iitɨcue.
9Jesús uai ote:
—Iese o llua jira, o comɨnɨ dɨga Jusiñamuina jai o ɨɨnuana uiñotɨcaɨ. —Jamai bitɨnomo llote:
—Zaqueodɨ Abraham mɨcorɨ jito; ia Jusiñamuina navui ɨɨnoñede. 10Naimɨe isoidɨno jillobitallena, bitɨcue. Monamona billanona, ɨimana jaie jaidɨcue. Jusiñamuina ɨɨnoñedɨnona jenuaɨbidɨcue, naimacɨna jillobitallena.
Illaɨma ie mullaɨaɨmo ucubena fecaja rafue
11Zaqueo jofomo itɨno Jesús llofuiana cacajano, comecɨna facadɨmacɨ: “Jerusalén ianori ite. Nainomo Jesús rilla mei, illaɨma isoi nainomo Jusiñamui ie comɨnɨna raɨre sedaite”. 12Iena naimacɨ raise uiñollena, Jesús bie rafue naimacɨmo llote:
—Illaɨma jito ie nanoca illaɨma dɨne jɨaɨe naɨraɨmo jaide. Ie comɨnɨna sedallena, nanoca illaɨmamona ie uaina feiñoiacade. Iemei abɨdo biacade. 13Nia naimɨe jaiñenia, diez dɨga ie mullaɨaɨna uaidote. Nagamɨerie daberie ucubena fecade. Naimacɨmo llote: “Bie ucube dɨga jɨaɨe ucube ocana omoɨ jai”. Ie mei oni jaide. 14Ie comɨnɨ naimɨena enoidɨmacɨ. Jɨaɨnona nanoca illaɨma dɨne oretajano, raitɨmacɨ: “Bimɨe caɨna sedajana jitaiñedɨcaɨ”; ia nanoca illaɨma dɨnena naimacɨ lluana jaca cacaiñede. Ie jira naie nanoca illaɨma naie illaɨma jitomo ie uaina ite. 15Ie uaina feiñua mei, abɨdo ie enɨruemo jaide. Rilla mei, ie mullaɨaɨna uaidote. Nɨe dɨese ucubena ocana naimacɨ jaillana uiñoiacade. Ie jira naimacɨna uaidote. 16Nano bitɨmɨe raite: “Nama, o cuemo dabe fecadɨo. Dabedemona jai cuemo ite diez dɨgabe”. 17Naie illaɨma naimɨemo llote: “Eo marena maɨjɨdɨo. Mare mullaɨmadɨo. Janore ra raise o sedaja jira, ona diez naɨraɨaɨna sedataitɨcue”. 18Ie mei jɨaɨe mullaɨma billanona, raite: “Nama, o cuemo fecaca dabedemona jai cuemo ite cinco dɨgabe”. 19Illaɨma llote: “Ona cinco naɨraɨaɨna sedataitɨcue”. 20Ie mei jɨaɨe mullaɨma bite. Raite: “Nama, jadi, o cuemo iga o ucube. Ɨniroimo tɨllɨano, iena eenotɨcue. 21Ona cue jacɨruillano, odɨ eo rɨimɨena jira, iena jamai eenotɨcue. Jɨaɨe comɨnɨmona ie rana baɨrocabidɨo. O maɨjɨñena ramona ocabitɨo”. 22Illaɨma dɨnena raite: “Eo maraiñede mullaɨmadɨo. Cuena o llua isoi, ona duere fɨnoitɨcue. Cue rɨimɨenana uiñotɨo. Jɨaɨe comɨnɨ ie rana cue baɨruana uiñotɨo. Cue maɨjɨñena motomo ra cue uana uiñotɨo; ia buena maɨjɨñedɨo. 23¿Bue ñellena bancomo cue ucube joneñedɨo? Bancomo itena, jɨaɨe ucubena ocana jaide. Ie mei abɨdo cue bia, omo cue fecaja ucube baɨfemo feiñotɨcue”. 24Nainomo itɨnomo llote: “Naie ucube naimɨemona baɨruano, diez dɨgabe itɨmɨemo feca”. 25Uai otɨmacɨ: “Naimɨemo ailluena ucube jai ite. ¿Bue ñellena dane jɨaɨe fecaitɨo?” 26Illaɨma dɨnena uai ote: “Ailluena raredɨmɨe jɨaɨe rana feiñoite; iadedɨ janore raredɨmɨe ie rana faɨfite. 27Cuena enoidɨnona bene atɨ. Naimacɨna cue sedajana jitaiñedɨmacɨ. Naimacɨna meine”.
Jesús nia llote:
—Ie isoide. Iese omoɨmo suiñellana, Jusiñamui ie comɨnɨ sedallɨruina omoɨ uiñoñena jira, cue jitaillacɨno fɨnocana jai.
Jesús Jerusalémo jailla rafue
(Mt 21.1-11; Mr 11.1-11; Jn 12.12-19)
28Naie rafuena llofuia mei, Jerusalén dɨne comɨnɨ uicodo ie llofueoicaigano dɨga Jesús jaide. 29Jerusalén iaɨreicaidemo, mena naɨraɨmo riacade. Betfagémo railla naɨraɨmo ride. Betania nainomo jɨaɨ ite. Olivos railla anedumo naga naɨraɨ iaɨmaiaɨ ite. Ie llofueoicaiganomona mena orede. 30Raite:
—Bie naɨraɨ illa uicomo mai omɨco jai. Nainomo cuinaca burritona baitomɨco. Naie burrito emodomo nia buna jaiñena. Iena suiñuano bene atɨ. 31Omɨcomo: “¿Bue ñellena iena suiñodomɨco?” bu jɨcanoia, llono: “Coco Nama iena jitaide”.
32Naimɨe llua isoi jaidɨiaɨmaiaɨ. Naimɨe llua isoi burritona baitɨiaɨmaiaɨ. 33Ie facaise ie nanɨaɨ iaɨmaiaɨmo jɨcanote:
—¿Bue ñellena caɨ burritona suiñodomɨco?
34Uai otɨiaɨmaiaɨ:
—Coco Nama iena jitaide.
35Ie mei Jesúmo iena atɨdɨiaɨmaiaɨ. Burrito emodomo ɨniroina jobianona, ie emodomo Jesúdɨ raɨnadate. 36Jesús iese jaidemo, naimɨena iobitallena, illaɨma isoi naimɨe jaillena, comɨnɨ imacɨ ɨniroi dɨga, naɨso motomo jobedɨmacɨ. 37Jerusalémo joide naɨso ite nafaɨ muidomo naimɨe rillanona, naie ituemo ana jaillanona, nana Jesús dɨga jaidɨno caɨmare itɨmacɨ. Nana Jesús siño fɨnoca rafuena naimacɨ jai cɨua jira, iena naimacɨ uibiñuamona, Jusiñamuimo iobillacɨnona ado eo fecadɨmacɨ. 38Raitɨmacɨ:
—¡Caɨ Illaɨma billa! ¡Jusiñamui mamecɨdo bitɨmɨemo caɨ iobicabillasa! O muidona Jusiñamuidɨ comɨnɨ dɨga uri ite. ¡O fɨnoca rafue muidona Jusiñamuimo iobicabillasa!
39Naie comɨnɨmona dajerie fariseuaɨ raitɨmacɨ:
—Maestro, o dɨga jaidɨnona llɨɨcaillena, naimacɨna lleta.
40Uai ote:
—Naimacɨ llɨɨcaia, biso fuemo ite nofɨcɨdɨ cuena marena ñaɨte.
41Jerusalémo Jesús iaɨrei ria, iena cɨuano, eede. 42Raite:
—Jerusalén itɨno, Jusiñamui dɨga omoɨ uri illena jai bitɨcue. Omoɨna naimɨe comɨnɨna itataiacadɨcue; iadedɨ iena jitaiñedomoɨ. Iena jitaidomoɨdena, ɨco duere sefuiñeitomoɨ. 43Jɨaɨruido omoɨ bacauai jobaimena fɨnuanona, omoɨna cɨrɨnoitɨmacɨ. Omoɨ ecɨdo llaɨtɨmacɨ. 44Omoɨna meineitɨmacɨ. Omoɨ uruiaɨna meineitɨmacɨ. Omoɨ illanona judaɨitɨmacɨ. Jusiñamui omoɨ motomo birui illana omoɨ uiñoñena jira, iese omoɨmo suite.
Jesúdɨ Jusiñamui jofomona damɨeriena dotaja rafue
(Mt 21.12-17; Mr 11.15-19; Jn 2.13-22)
45Jerusalémo Jesús rilla mei, Jusiñamui jofomo jaide. Jusiñamuimo ofomaɨaɨna fecallena, naimɨemo toɨca llaudaɨaɨna fecallena, nainomo comɨnɨ jaisoidɨmacɨ. Naie comɨnɨna ɨbatajanona, ofomaɨaɨna, toɨca llaudaɨaɨ dɨga, damɨerie fecauidɨmacɨ. Iena cɨuanona, naimacɨna jino orede. 46Raite:
—Ie facaina lloraɨma mɨcorɨ Jusiñamui llogacɨno jaie cuega: “Cue jofo ite nainomo cuemo comɨnɨ jɨɨllena” cuega. Ero, ailluena omoɨ ɨbataja jira, naimɨe jofona fɨɨriruidɨno jofona omoɨ fɨnoca.
47Jusiñamui jofomo nagarui Jesús llofuete. Judíuaɨ illaɨcomɨnɨdɨ Jesúna meineiacadɨmacɨ; 48iadedɨ nɨese nɨbaɨñedɨmacɨ, nana comɨnɨ naimɨe llofuiana eo jitailla jira.
Valgt i Øjeblikket:
San Lucas 19: huu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2008, Wycliffe Bible Translators, Inc. All rights reserved.