Lucas 23
23
Mndeno zha Jesús lo Pilat
(Mt. 27:1‑2, 11‑14; Mr. 15:1‑5; Jn.18 :28‑38)
1Tsa lee reta zha ngwateli ne mndeno zha Jesús lo Pilat.
2Ne mndelo re zha mkeki zha Jesús, ne mbez re zha:
―Ngogaa zha ree lo re nee, lee zha ndano tawlaz nee tedib net kuu went, ne mbez zha lo re men: “Ndoblot kizhaa temi chaan yezlyu lo César zha kuu nabee Roma”, ne noga nzhab zha: “Lee zha nak Crist Kuu Mtaal Diox Nabee”.
3Tsa lee Pilat mnaabdiz lo Jesús, ne nzhab:
―¿Chu lu nak rey chaan re zha Israel?
Jesús mkab lo Pilat ne nzhab:
―Taxal neʼa, tabaa nake.
4Tsa lee Pilat nzhab lo re ngwleyy kuu nabee lo re ngwleyy ne lo re men kuu nzi tya:
―Ndakʼn neeka thib falt mndaat mbyi ree.
5Per lee re men ndelo mbez:
―Wii, asta yezlyu Galilea mndelo zha ngeloo zha kwent chaan zha, ne nal mzina zha asta nzhee yez Judea.
Mtaal zha Jesús lo rey Herodes
6Leettsa mbin Pilat koree, tsa mnaabdiz Pilat:
―¿Chu zha yezlyu Galilea nak mbyi ree?
7Ne leettsa mbin Pilat lee Jesús nak zha yezlyu ta nabee rey Herodes, tsa mtaal Pilat Jesús lo rey Herodes. Ne lee wiza lee Herodes ndo yez Jerusalén. 8Ne kwathoz laz Herodes or mwii zha Jesús, tak ndaʼa wiz nlaaz zha wii zha Jesús, tak kwathoz tyen welt nda nzhon zha kwent chaan Jesús, ne nlaaz zha wii zha tsow Jesús thib kuu thoz. 9Tsa lee Herodes mnaabdiz kwaro kwaa lo Jesús, per yent kwan mkab Jesús lo zha. 10Per lee re ngwleyy kuu nabee lo re ngwleyy, ne re maestr kuu nloo xkiiz Diox kuu nzi tya, naroob kuu mkeki re zha Jesús. 11Tsa lee Herodes ne re soldad zha, taxal zha kuu nataagt mtsowno re zha Jesús ne mzhizno zha Jesús. Ne mtegok xab zha Jesús taxal thib rey. Tsaraa mtaal Herodes Jesús lo Pilat tedib welt. 12Ne wiza lee Pilat rop Herodes myey, tak mbyo rop zha ndala.
Pilat mndaa Jesús tsa kuth zha Jesús
(Mt. 27:15‑26; Mr. 15:6‑15; Jn.18 :39–19:16)
13Tsa lee Pilat mrez re ngwleyy kuu nabee lo re ngwleyy ne re zha kuu nabee lo re zha yez, ne re men yez, tsa kaltaa re zha.
14Tsa nzhab Pilat lo re zha:
―Lee goo myaadno zha ree lon, ne nkeki goo zha lee zha nkedi re men, ne ndano zha re men net went. Ne nal ngewii goo mnaabdizʼn lo zha, ne ndakʼn neeka thib re kuu nkeki goo zha mtsowt zha. 15Ne noga Herodes ndak yent kwan mtsow zha, kona mre Herodes mtaal zha lon tedib welt. Ne neeka thib kuu went mtsowt zha ree par ndoblo zha gath zha. 16Nal tetin zha, tsaraa telaan zha.
17Ne gandata liin leettsa ntsow zha ani Paskw, lee Pilat ntelaa thib zha kuu nzo tsib. 18Per reta men mndelo mrez dib gan, ne nzhab:
―¡Nlaazt nee telaaʼa mbyi baa! ¡Lee nee nlaaz telaaʼa Barrabás!
19Ne lee Barrabás nak thib zha kuu mbeth men, leettsa mbyo Barrabás kon re zha kuu nabee yez, kona mloo zha Barrabás tsib.
20Tsa lee Pilat ngwalaaz gatelaa Jesús, tsa mre Pilat mni zha lo re men tedib welt.
21Per lee re men mre mrez dib gab tedib welt, ne nzhab:
―¡Bkee zha lo kruz, bkee zha lo kruz!
22Myon welt mre Pilat nzhab lo re men:
―Mbay, ¿kwan thib kuu went mtsow zha ree? Ter yetsalʼn neeka thib kuu went kuu mtsow zha par ndoblo gath zha, beeta tetin zha, tsaraa telaan zha.
23Per lee re zha tataka dib gan nzo zha mbez zha; ndoblo ke Jesús lo kruz. Ne kwaro mrez re zha, asta mtsow zha gan mtsow Pilat kuu nlaaz zha. 24Tsa lee Pilat mnabee gake taxal nlaaz re men. 25Tsa mtelaa Pilat Barrabás kuu nzo tsib, kuu mbeth men leettsa mbyo re zha, kon zha kuu nabee yez, ne mndaa Pilat Jesús lo re zha, tsa tsowno zha Jesús loka kuu nlaaz zha.
Mkee zha Jesús lo kruz
(Mt. 27:32‑44; Mr. 15:21‑32; Jn.19 :17‑27)
26Leettsa ndano zha Jesús par kee zha Jesús lo kruz, tsa lee thib mbyi kuu le Simún kuu nak zha yez Cirene, ndyaad ngwa wan, tsa mnabee re soldad gwe Simún kruz Jesús ne teke Simún dits Jesús.
27Ne kwathoz men mndeke dits Jesús, ne kwathoz re ngot nalatt nzhonn ne Jesús. 28Per lee Jesús mwii lo re ngot ne nzhab:
―Rtsaapʼn zha Jerusalén, nzhonnt goo ne goo na, lee goo nzhonn kwent chaanka goo ne kwent chaan re zhiinn goo. 29Tak too thib wiz kuu gab goo: “Kwathoz wen nda re ngot kuu mndaat Diox mbet lo, ne noga kwathoz wen nda re ngot kuu ngwiit mbet nzii”. 30Tsa telo re men gab lo re yii: “Bla goo dits nee”. Ne noga gab zha lo re yii: “Bkaats goo nee”. 31Tak os lee zha tenzhee ntsow zha lo thib ya nayee, ¿kwanta nak ya biz lo zha?
32Ne noga ndano zha chop zha nakap, tsa thibka kuth zha rop zhaʼa kon Jesús.
33Leettsa mzin re zha thib ta ni zha “Tsith yek men”, tsa lee re soldad mkee Jesús lo kruz, ne noga mkee zha rop zha kuu mbeth men lo kruz, thib zha mkee zha lad ban lo Jesús lee tedib zha mkee zha lad beg lo Jesús. 34Tsa lee Jesús nzhab:
―Xutʼn, btuyy re kuu went kuu ngetsow re zha ree, tak net zha naa kwan ngetsow zha.
Ne mloo re soldad swert naa cho tsow gan xab Jesús, tsa naa kwan diinn kadta thib thib zha. 35Ne dita lo Jesús nzi re men ngewii, ne xid re zhaʼa nzi re zha kuu nabee lo re zha yez, ne mzhizno zha Jesús, mbez zha:
―Mlaat zha gagath tedib net zha, ne chebee gagt la zha leeka lee zha lo kruz, os lee zha nak Crist Kuu Mtaal Diox Nabee lo re zha Israel. 36Ne noga re soldad mzhizno Jesús, ne mbig zha mndaa zha xit ub kuu ni gu Jesús. 37Tsa nzhab re soldad lo Jesús:
―Os lu nak rey chaan re zha Israel, blaʼa leeka lu lo kruz.
38Ne mkee zha thib letr lo kruz kuu nzhab: “ZHA REE NAK REY CHAAN RE ZHA ISRAEL”. 39Tsa lee thib wann kuu nke lo kruz cho Jesús, mtsalzhoo Jesús, ne nzhab:
―Os lu nak Crist Kuu Mtaal Diox Nabee, blaʼa leeka lu lo kruz, ne blaga nee lo kruz.
40Per lee tedib wann kuu nke tedib lad cho Jesús lo kruz, mnayii lo tedib wanna, ne nzhab:
―¿Chebee nzebta neʼa Diox? Si re yonaa ngeriid yalti. 41Ropaa ndoblo ridaa yalti tak mtsowaa kuu went, per lee mbyi ree neeka thib kuu went mtsowt zha.
42Tsa nzhab zhaʼa lo Jesús:
―Zha Nabee, btelaazʼn, leettsa tsina ta nabeeʼa.
43Tsa lee Jesús nzhab lo zha:
―Wlipaa na nin loʼa, leeka naltseree leeʼa to kon na laats chul chaan Diox.
Jesús nguth
(Mt. 27:45‑56; Mr. 15:33‑41; Jn.19 :28‑30)
44Ne ndrol wiz mkow yezlyu, ne kona mxek asta las tres mziy yezlyu. 45Ne lee wiz mndaat raa xni. Ne lee lar kuu now Ta Kwathoz Nayon leen gwodoo mrat ngok chop le. 46Tsa lee Jesús mrez ne nzhab:
―Xutʼn, loʼa tan xbi da.
Or ngwalo nzhab Jesús kona, nguth Jesús.
47Tsa lee soldad kuu nabee lo thib gayoo soldad, or mwii zha xa nguth Jesús, mbil zha lo Diox, ne nzhab zha:
―Wlipaa lee mbyi ree nak thib mbyi nali.
48Ne reta zha kuu nzi ngwii naa xa nguth Jesús, kwathoz nabil ngoo leettsoo zha ne nkaan yaa zha pech zha ndya zha. 49Ne reta zha kuu nzaal leettsoo ne Jesús, ne re ngot kuu mndeke dits Jesús desde Galilea, tithxa mrin zha mwii zha re kuu mtsowno re men Jesús.
Mkaats zha Jesús
(Mt. 27:57‑61; Mr. 15:42‑47; Jn.19 :38‑42)
50Noga ngoo thib mbyi wen kuu le Che. Zhaʼa nak thib zha yez Arimatea yez chaan yezlyu Judea, ne nak zha thib re zha kuu nataak lo re zha Israel, re zha kuu mnabee nguth Jesús. 51Ne ngebet zha tsin wiz kuu nabee Diox, ne ngoot leettsoo zha kuu mtsowno re men Jesús. 52Tsa ngwa zha lo Pilat ne mnaab zha kwerp Jesús. 53Leettsa mla zha kwerp Jesús lo kruz, mchiix zhay thib le lar kuu kwathoz wen, ne mloo zha kwerp Jesús leen thib baa kuu mdaan zha cho ke. Kuu neeka thib zha ter yo. 54Wiza nak wiz kuu ndexkwaa re zha re kuu nzhow zha wiz kuu ndroxkwan zha, kuu mera telo.
55Ne lee re ngot kuu mndeke dits Jesús desde Galilea, ngwa re ngot roo baa. Ne mwii ngot xa mloo zha kwerp Jesús leen baa. 56Tsa mretab re ngot ndya ngot, ne mzhii re ngot thib perfum kuu kwathoz chul ndetsi, ne mneyy re zha wiz kuu ndroxkwan re zha, taxal nabee ley.
Valgt i Øjeblikket:
Lucas 23: zao
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2007, Wycliffe Bible Translators, Inc. All rights reserved.