Mateo 9
9
Jesús mtegwe thib zha mthans
(Mr. 2:1‑12; Lc. 5:17‑26)
1Tsa mndaab Jesús leen thib kano, ne mriid Jesús tedib lad roo nitdoo, ne mzin Jesús ta nak laz Jesús. 2Tya mbe zha thib zha mthans kuu nzoob lo luun lo Jesús. Ne myeen Jesús lee re zha kuu ndyaadno mthansa, nyelaaz lee Jesús tak tegwe mthans, tsa nzhab Jesús lo mthans:
―Wen bloo leettsooʼa; tak reta falta myuyya.
3Tsa lee chop tson maestr kuu nloo xkiiz Diox mtsow xgab: “Went ni zha ree Diox, tak mbez zha lee zha tak tuyy re falt men”. 4Per lee Jesús neʼa naa kwan ntsow re zha xgab, tsa mnaabdiz Jesús lo re zha:
―¿Chebee kwathoz went ntsow goo xgab? 5¿Kwan ntsow goo xgab? ¿Kwan mas nagant gap na lo mbyiz ree: “Lee re falta myuyya”, per nagan tegwe men zha ne gab men lo zha, “Gwache ne bte”? 6Tsowʼn koree lo goo, tsa ne goo lee na, Kuu Mzin Ngok Men, napʼn yalnabee tuyʼn re falt goo.
Tsa nzhab Jesús lo mthans:
―Gwache bzhen luuna, ne tyee liza.
7Tsa lee mthans ngwache mzhen luun ne ndya lize. 8Leettsa mwii re men kona, kwathoz mzeb re men ne mbil men lo Diox, tak lee Diox mndaa yalnabee lo thib men, tsa tegwe men tedib men.
Jesús mrez Mateo
(Mr. 2:13‑17; Lc. 5:27‑32)
9Leettsa mroo Jesús tya mwii Jesús na kuu le Mateo, ndobʼn ngetsowʼn kobral temi chaan yezlyu kuu nzhax lo zha Roma, tsa ne Jesús lon:
―Bteke ditsʼn.
Tsa ngwatelin ne mndekeen dits Jesús. 10Ne leettsa ngeyow Jesús lizʼn, noga mzin tedib net re zha kuu ntsow kobral temi chaan yezlyu kuu nzhax lo zha Roma, ne tedib net re zha kuu ntsow kuu went, ne mndob re zha roo mes kon Jesús, ne kon re zha kuu ngeteed lo Jesús. 11Ne or mwii re fariseo koree, tsa nzhab zha lo re zha kuu ngeteed lo Jesús:
―¿Chebee nzhow maestr goo, kon re zha kuu ntsow kobral temi chaan yezlyu kuu nzhax lo zha Roma, ne kon re zha kuu ntsow kuu went?
12Jesús mbin kona, tsa nzhab Jesús lo re zha:
―Lee re zha kuu net ndak, ndechet zha doctor, per lee re mbyiz, zhaʼa ndeche doctor. 13Tyaa goo, ne bteed goo naa kwan nak re diiz ree: “Kuu nlazʼn nak, blat leettsoo goo ne goo taben goo, nlaztʼn beeta kuth goo maa taa goo lon”. [Os. 6:6] Tak ndyaltʼn ndyaadchezʼn re zha wen, sinke lee na ndyal ndyaadchez re zha kuu ndab falt, tsa tsee zha mod went kuu nak zha.
Yalnaabdiz chaan ayun
(Mr. 2:18‑22; Lc. 5:33‑39)
14Tsa mbig re zha kuu mndeke dits Juan kuu mtsowleyy, ne mnaabdiz zha lo Jesús, nzhab zha:
―¿Chebee re nee, ne re fariseo kwaro ntsow nee ayun, ne lee re zha kuu ngeteed loʼa ntsowt zhay?
15Jesús mkab, ne nzhab:
―¿Chu tak tsow re zha kuu nzi lo fandan ayun, leettsa lee mbyi kuu mtseyaʼa ndoka lo re zha? Per tetsin wiz kib re zha mal mbyi kuu mtseyaʼa lo re zha; tsasi lee re zha tsow ayun.
16Noga nzhab Jesús:
―Neeka thib zha ngibt thib le lar kub cho lar gox, tak lee lar kub mbich, leettsa nteech zhay ne masraa nchatte lar gox ne gagt raa lortsin zhay. 17Ne neeka ngot zha xit ub kuu kub leen gom yid gox, tak lee xit ub kuu kub yezhoob, ne chatte gom gox. Tsa lee xit ub zho, ne noga gom lux. Kona lee xit ub kuu kub ndoblo yo leen gom yid kub tsa neeka thibe luxt.
Jesús mtegwe thib ngot ne mteroban rtsaap Jairo
(Mr. 5:21‑43; Lc. 8:40‑56)
18Leettsa bee ngenika Jesús lee thib mbyi mzin lo Jesús, mbyiʼa nak thib zha kuu nabee ta nkaltaa re zha Israel nteed xkiiz Diox, ne mtobxub zha lo Jesús ne nzhab zha:
―Ngulota nguth rtsaapʼn; per os leeʼa yaada ne xooba yaaʼa yek nzaa teroban nzaa.
19Tsa lee Jesús kon re zha kuu ngeteed lo Jesús mndeli ne mndeke dits mbyiʼa. 20Ne ora lee thib ngot kuu ndaʼa tsiibchop liin nlath ren leettsoo, mbig dits Jesús ne mdiinn ngot xab Jesús. 21Tak mtsow ngot xgab: “Os anta diinn na xab Jesús tegwen”. 22Per lee Jesús mre ne mwii lo ngot, ne nzhab:
―Rtsaapʼn. Wen bloo leettsooʼa, tak ngwalaaza lee Diox tak tegweʼa, kona mgweʼa.
Ne leeka ora lee ngot mgwe.
23Ne leettsa mzin Jesús kon chop tson zha kuu ngeteed lo Jesús liz zha kuu nabeeʼa, tsa mwii Jesús lee re musk nzi ngeyol, ne lee re men nzi nzhonn ne mbetsyath tak nguth nzaa. 24Tsa nzhab Jesús lo re zha:
―Broo goo nzhee, tak ngutht nzaa, beeta naxat nzaa.
Tsa lee re men mzhizno Jesús, tak tata nzhab Jesús. 25Per or ngwalo mroo re men leen yuu, tsa mndaab Jesús ne mzhen Jesús yaa nzaa, ne lee nzaa mroban ne mndeli. 26Ne reta men yezlyuʼa mbin kuu mtsow Jesús.
Jesús mtegwe chop zha syeg
27Leettsa mroo Jesús tya, lee chop zha syeg mndeke dits Jesús, dib gan zha mrez zha ne nzhab zha lo Jesús:
―¡Lu kuu nak thib zha raz rey David, blat leettsooʼa neʼa nee!
28Per or mndaab Jesús leen yuu, lee rop syeg mbig gax lo Jesús, tsa mnaabdiz Jesús lo rop zha:
―¿Chu nyelaaz goo tak tegwen goo?
―Zha Nabee, tak tsow luy ― mkab rop zha.
29Tsa lee Jesús mdiinn ngutlo zha, ne nzhab lo rop zha:
―Tak ngwalaaz goo tak tegwen goo, kona mgwe goo.
30Ne oraaka mzaal lo rop zha, tsa nzhab Jesús lo rop zha:
―Yent cho lo gab gooy.
31Per or mroo rop zha, mndelo zha mndaa zha kwent kuu mtsow Jesús lo rop zha, lo reta men dita yezlyuʼa.
Jesús mtegwe thib zha mud
32Leeka or kuu mroo rop zha kuu ngok syeg, lee tedib net zha ndyaadno thib zha mud kuu nzo mbi fyer leettsoo lo Jesús, tsa tegwe Jesús zha. 33Ne or mloo Jesús mbi fyer leettsoo mbyiʼa, mndelo mbyiʼa mndediz. Tsa mzegey leettsoo re men, ne nzhab re men:
―¡Neeka mas ter wiiʼaa thib kuu tenzhee lazaa!
34Per lee re fariseo nzhab:
―Maxuuy kuu nabee lo reta mbi fyer, mndaa diiz lo zha par ngoo zha re mbi fyer.
Mlat leettsoo Jesús ne re men
35Tsa mriid Jesús re yez ne re ranch ne reta ta mloo Jesús lo re men, ne mndaa Jesús kwent Diiz Chul chaan ta nabee Diox ne mtegwe Jesús relota yiz ne relota yalne. 36Or mwii Jesús lo re men mlat leettsoo Jesús ne Jesús re men, tak kwathoz nalatt nzhak re men, taxal mbak zhiil kuu napt bzhaan. 37Tsa nzhab Jesús lo re zha kuu ngeteed lo Jesús:
―Wlipaa na nin lo goo, kwathoz naroob rtsin Zha Nabee nzo, per lutta zha kuu ntsow rtsin zha nzo. 38Kona bnaab goo lo Zha Nabee, tsa taal zha masraa zha ke tsiin thop yalgonn chaan Zha Nabee.
Valgt i Øjeblikket:
Mateo 9: zao
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2007, Wycliffe Bible Translators, Inc. All rights reserved.