If you have would like a copy of this version please contact info@davarpartners.org

Bareli Pauri New Testament, CC-BY-SA-4.0, Friends Missionary Prayer Band (Text), Bareli Pauri New Testament Audio Bible, CC-BY-SA-4.0, Davar Partners International, Bridge Connectivity Solutions, 2022 (Audio).

Bareli Pauri New Testament

Bareli Pauri New Testament (TLF)

Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.

जेतार येसु बारथे चेला काजे आग्या आप देदलु होतु, ती चू तिंदरा सोहरोमा सिकाळने एने प्रचार कोरने चा गोथू जात रोयू. योहान जेलखानामा मसिह येसुन कामोन वारली खोबर सोमव्यू एने तेरा चेला काजे तेरेनचा यो पुछने मूकल्यु, “काय आवने वावु तुत छे, कि आमु कुदान दिसरान वाट जुवजे?” येसु जोवाब आप्यू, “जो काहीन तुमु सोमवतेला एने देखतेला, चो आखो जायीन योहान काजे कोय देवू, कि आंदवा देखतेला एने लेंगळा चालतला एने फिरतेला, कुळावाक चुखा कोराय जातला एने बेहरा सोमवतेला, मोरलाक जीवता कोराय जातला, एने गोरीबोक वारली खोबर सोमवाळाय जातली. एने सोयावा छे चे, जे मारे वोजेसी ठूकर नि खाय.”

जेतार चे चा गोथा जाणे बाज गोया ती, येसु योहानोन बारामा माणसो काजे कोयने बाज गोयू, “तुमु बोयळामा काय देखणे गोयला होता? काय हवासी हालणे वावा सुटा काजे?” एने तुमु काय देखणे गोयला होता? काय मोखमोलोन छिंदरा पेहेरला माणसो काजे? देखू, जे घाटावा छिंदरा पेहेरला, चे राजान राजवाळामा रोयतेला. ती एने का गोयला? काय काहना भविष्य कोरता काजे देखणे कोरीन? होव मे तुमु काजे कोयो कि भविष्य कोरणे वावा गोथा बी मोटला काजे. यो चो छे जीनान बारामा लिखलो छे देख, मे आपना दुतो काजे तारे ओगोव मुकलो; जू तारे ओगोव तारी वाट तीयार कोरसे.
“मे तुमु काजे छाचलीन कोयो कि जे बायरासी जन्मो लेदला छे, तिंदरेसी योहान बाप्तिस्मा आपनेवावामा कुदू मोटू नि होय; बाकीन सोरगोन राजमा नानासी नाना छे चे आखा गोथा मोटा छे.” योहान बाप्तिस्मा आपनेवावा दाहळे गोथा हिमी तोक सोरगोन राजमा ताकतोन चढाई, एने ताकत वावा तीनाक हापकी लेतला. योहान तोक आखा भविष्य कोरता एने नियम शास्त्रान भविष्यवाणी कोरता रोया. एने मोर्जी ते माणू कि एलिया जू आवने वावू होतु, चू युत छे. जिंदरा सोमवनेन कानटा होसे, चे सोमवी लेवू.
“मे इनी टेमेन माणसोन भाव कुणी काजे आपो? चे इनू पुऱ्या सारका छे, जे हाटोमा बोसीन दिसरा काजे आयळीन-आयळीन कोयतेला,” आमु तुमरेन कोरीन पावी वाजाळतेला, एने तुमु नि नाच्या; आमु दुख कोरतेला, एने तुमु नी रोड्या. काहाकि योहान नि खातू आव्यु एने नि पितु, एने चे कोयतेला तीनामा भुंडली आत्मा छे. माणसोन पुऱ्यु खातू-पीतू आव्यु, एने कोयतेला, देखू, खादळ्यु एने मोंदळ्यु माणूस, फावू लेनेवावा एने पापी माणसोन दुस्तीदार बाकीन ग्यान तेरा काममा खोरलो ठेराय गोयलो छे.


तेत्यार चू तिना सोहोरोक दोषी लागाळने बाज गोयू, जीनामा चू घोणा मोटला कामे कोरलु होतु, काहाकि चे तिंदरा मोन नि फिराव्या. “हाय खुराजीन! हाय, बेथसदा, जे मोटला कामे तुमरेमा कोरायला, ओगर चे सोर एने सिदोनमा कोरायता, ती गोनटो पांघरीन, एने रुखळामा बोसीन चे तेतारुत मोन फिराव लेता.” बाकीन मे तुमु काजे कोयो कि नियावोन दाहळे तुमरी हालत सोर एने सिदोन गोथी बी जादा सोहनेन लायक होयसे. कफर्णहुम, काय तू सोरग तोक उचू कोरायसे? तू ते अधोलोक तोक नेचू कोरायसे जे मोटला कामे तारेमा कोरायला छे, ओगर सदोममा कोरायता, ती चू आज तोक रोयतु. बाकीन मे तुमु काजे कोयो कि नियावोन दाहळे तेरी हालोत सदोमोन हालोत गोथी जादा सोहोनेन लायक होयसे.


तिनी टेमे येसु कोयू, “हे बासो, सोरग एने धोरतीन प्रभू, मे तारो धन्यवाद कोरो कि तू इनी वातो काजे ग्यानी एने समजदारीसी डुकाळीन मेक्यू, एने पुऱ्या काजे आप देदू.” होव, हे बास, काहाकि तुसेक यो वारलो लाग्यो.
“मारू बास मेसेक आखो काहीन सोप देदलु छे; एने कुदू बासो काजे नी उवखतलु, निस्तु; पुऱ्या काजे; एने चू जीना पोर पुऱ्यु तीनाक देखाळने हिंडे.”
हे आखा मेहनत कोरणे वावा एने भारोसी दाबायला माणसे, मारेनचा आवू; मे तुमु काजे आराम आपीस. मारो जुवळो आपनेपोर हाकली लेवू, एने मारेसी सीकू; काहाकि मे नम्र एने मोनोन गोरीब छे एने तुमु काजे आपना आत्मामा आराम जोळसे. काहाकि मारो जुवळो सोपो एने मारु भार होलकु छे.

Höre मत्ती 11