Beliebte Verse in ᤋᤥᤗᤡᤱᤛᤥᤔᤢ 37

Teilen

ᤌᤡᤰᤗᤧᤱ ᤕᤥᤛᤣᤑᤖᤧ ᤛᤧᤵᤔᤠᤱᤎᤡᤰ ᤔᤠᤰᤋᤢ॥ ᤂᤢᤏᤧ᤹ ᤂᤧᤴ ᤁᤢᤛᤧᤵᤔᤠᤱᤅᤡᤴ ᤁᤢᤶᤓᤢ᤹ᤛᤡ ᤆᤧᤰᤋᤢᤛᤡ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤋᤃᤡᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤆᤡ᤺ᤵᤔᤠ ᤔᤧᤜᤣ᤺ᤰᤋᤢ॥

ᤕᤠᤁᤢᤒᤧᤴ ᤁᤠᤵᤐᤥᤒᤠ ᤋᤢᤶᤛᤧᤸᤗᤧ ᤕᤢᤛᤢᤑᤧᤴ ᤁᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤘᤣ᤹ ᤁᤢᤛ᤻ᤛᤠᤜᤠ᤹ᤏᤢ᤺ᤸᤗᤧ ᤕᤖᤡᤰ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢ॥ ᤜᤧᤰᤁᤩᤠᤱ ᤕᤠᤁᤢᤒᤧᤸᤗᤧ ᤁᤢᤛ᤻ᤛᤠ ᤕᤢᤛᤢᤑᤧᤴ ᤁᤢᤓᤢᤱ ᤀᤡᤛᤣ᤺ᤱᤒᤠ ᤗᤳᤇᤠ ᤁᤣ᤺ᤶᤒᤠ ᤗᤃᤣ᤺ᤳᤌᤡᤰ ᤋ᤹ᤖᤢ॥

ᤁᤖ ᤁᤢᤶᤓᤢ᤹ᤛᤡᤖᤧ ᤕᤢᤛᤢᤑᤧᤴ ᤂᤢᤴᤇᤡ᤹ ᤐᤠ᤺ᤸᤗᤧ ᤂᤢᤴᤇᤡ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤠ ᤔᤧᤏᤡᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤆᤡ᤺ᤵᤔᤠ ᤔᤧᤜᤣ᤺ᤰᤋᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ᤏᤢ ᤏᤢᤖᤡᤰᤁᤠᤱ ᤔᤧᤶᤒᤠᤖᤧᤴ॥

ᤂᤧᤒᤩᤠᤱ ᤂᤢᤏᤧ᤹ ᤘᤣ᤹ ᤛᤧᤵᤔᤠᤱᤎᤡᤰ ᤔᤠᤰᤋᤢ ᤜᤧᤰᤁᤩᤠᤱ ᤁᤢᤶᤓᤢ᤹ᤛᤡ ᤆᤧᤰᤋᤢᤛᤡ. “ᤂᤧᤵᤛᤧᤶᤔᤥ. ᤀᤠᤱᤃᤠ᤹ ᤘᤣ᤹ ᤛᤧᤵᤔᤠᤱᤎᤡᤰ ᤔᤠᤰᤋᤢᤱ॥ ᤏᤠᤶ. ᤗᤠᤒᤠ ᤏᤢ ᤌᤡᤒᤥᤱᤅᤠᤱ ᤌᤡᤰ ᤂᤣ᤺ᤶᤛᤡᤰᤐᤠᤜᤠ᤹ᤖᤧ ᤀᤠᤱᤃᤠ᤹ ᤛᤧᤘᤠ ᤔᤧᤔᤧᤳᤋᤠᤱ॥”

ᤂᤧᤒᤩᤠᤱ ᤂᤧᤸᤗᤧ ᤁᤢᤶᤓᤢ᤹ᤛᤡᤖᤧ ᤂᤢᤏᤧ᤹ ᤏᤠᤜᤧᤵᤔᤠ ᤔᤧᤜᤣ᤺ᤰᤋᤢ॥ ᤁᤖ ᤁᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤁᤢᤶᤒᤠᤖᤧᤃ ᤁᤢᤏᤡᤱᤘᤠ᤹ᤀᤥᤀᤣ ᤕᤢᤰᤂᤢ॥

ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤔᤠᤰᤋᤢᤱᤒᤠ ᤛᤧᤵᤔᤠᤱᤅᤡᤴ ᤂᤧᤵᤛᤧᤶᤔᤧ᤹ᤀᤥ॥ ᤀᤠᤏᤡ᤹ ᤁᤧᤖᤧᤰ ᤐᤩᤠᤱᤛᤡᤀᤥ ᤆᤠᤎ᤺ᤱᤔᤠ ᤀᤡᤀᤠᤄᤣ᤺ᤰᤛᤢᤶᤗ ᤀᤠᤕᤠᤃᤧ॥ ᤀᤠᤱᤃᤠ᤹ ᤀᤡᤄᤣ᤺ᤰᤛᤢᤱᤒᤠ ᤆᤠᤎ᤺ᤱᤔᤠ ᤀᤠᤃᤰᤁᤡᤴ ᤐᤥᤃᤧ. ᤜᤧᤰᤁᤩᤠᤱ ᤂᤡᤏᤡ᤹ ᤆᤠᤎ᤺ᤱᤔᤠ ᤁᤰᤜᤠ᤹ ᤂᤡᤷᤗᤡ ᤔᤧᤈᤢᤵᤛᤧᤀᤠᤱ ᤀᤠᤱᤃᤠ᤹ ᤀᤠᤈᤠᤎ᤺ᤱᤔᤠ ᤀᤠᤃᤰᤁᤡᤴ ᤛᤧᤘᤠ ᤔᤧᤔᤧᤳᤋᤢ॥”

ᤗᤢ. ᤀᤠᤸᤗ ᤂᤧᤴ ᤛᤧᤖᤢᤶᤔᤠᤱ ᤗᤳᤇᤠ ᤘᤒᤠᤰᤁᤥ ᤗᤠᤵᤑᤣᤛᤢᤶ ᤁᤣ᤺ᤳᤋᤢᤶ॥ ‘ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤂᤧᤴ ᤆᤖᤇ’ ᤑᤠ᤹ᤀᤠᤱ ᤐᤠᤵᤐᤠ᤹ ᤔᤧᤳᤋᤢᤶ. ᤂᤧᤒᤩᤠᤱ ᤂᤧᤸᤗᤧ ᤁᤢᤛᤧᤵᤔᤠᤱᤜᤠ᤹ ᤌᤣ ᤐᤥᤱᤒᤡ. ᤀᤥᤔᤧᤳᤋᤢᤶ ᤛᤠ᤹ᤖᤢᤶ॥”

ᤂᤧᤸᤗᤧᤆᤥᤃᤢᤸᤗᤧ ᤔᤡᤎᤩᤠᤏ ᤁᤧᤕᤢᤱᤒᤠ ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ ᤜᤠᤒᤠ ᤂᤧᤴ ᤗᤠᤶᤔᤥᤗᤠᤶ ᤔᤧᤓᤧᤖᤧᤸᤗᤧ ᤕᤢᤛᤢᤑᤧᤴ ᤂᤢᤏᤧ᤹ ᤁᤢᤶᤓᤢ᤹ᤛᤡᤖᤧ ᤘᤒᤠᤰᤁᤥᤏᤢ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢᤀᤠᤱ ᤂᤧᤴ ᤀᤡᤛ᤻ᤔᤠᤀᤣᤗᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤏᤡᤒᤥᤱ ᤕᤢᤵᤐᤠᤕᤠᤱᤅᤥ ᤔᤧᤛᤱᤄᤢ ᤔᤧᤍᤣᤛᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤢᤛᤢᤑᤧᤴ ᤔᤡᤛᤪ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢᤀᤠᤱ ᤔᤧᤒᤣ॥

ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤂᤧᤴ ᤛᤧᤵᤔᤠᤱ ᤁᤧᤔᤠᤰᤐᤧᤴ ᤑᤧᤸᤗ ᤐᤳᤗᤥ॥

ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤠ᤺ᤱᤄᤠᤗᤠᤶᤔᤣ ᤑᤧᤖᤧᤖ ᤐᤳᤇᤧᤒᤠ ᤔᤧᤏᤡᤛᤢ. ᤜᤧᤰᤁᤩᤠᤱ ᤂᤢᤴᤇᤡ᤹ ᤐᤣᤛᤠᤱ ᤁᤧᤵᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤧ᤹ ᤛᤧᤵᤔᤠ ᤐᤠᤴ ᤀᤡᤱᤔᤧᤍᤱᤄᤢ॥

ᤀᤠᤏᤡ᤹ ᤂᤧᤸᤗᤧ ᤁᤢᤔᤠᤰᤂᤡ᤹ ᤛᤧᤛᤢᤶ ᤔᤣ᤺ᤴ॥ ᤀᤣ᤺ᤰᤛᤠᤍᤧᤴᤏᤥᤒᤠ ᤗᤳᤇᤠ ᤘᤒᤠᤰᤁᤥᤖᤰ ᤀᤠᤰᤋᤢᤶ. ᤁᤖ ᤂᤢᤏᤧ᤹ ᤂᤠ᤺ᤴᤍᤢᤶ ᤔᤣ᤺ᤴ॥” ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤛᤧ᤺ᤵᤔᤠᤀᤠᤱ ᤂᤧᤴ ᤁᤢᤶᤒᤠᤖᤥ ᤋᤣ᤹ᤔᤠ ᤑᤠ᤹ᤀᤠᤱ ᤖᤢᤒᤧᤏᤧᤸᤗᤧ ᤜᤧᤰᤁᤣ ᤔᤧᤳᤋᤢᤛᤡᤀᤠᤱ ᤘᤕᤧ॥