Beliebte Verse in Wenía 1

Teilen

Askávai, “ramaro yora nokẽ yora vimaki, noke keská akĩ nõ shovimanõ. Ãatõ enẽ yoinavo, yoini peiyavo, iná ati, maĩ noyõ ikiya, maĩ meshoya akárasĩ katseki ave ivonõ”, ikí. Aská akĩ ãwẽ yora vimaki, yora shovimakĩ. Aa keská akĩ vene, aĩvo aká shovimakĩ.

Aská akĩ, shovimakĩ mashtevaĩvaíki vana roapa ivo atomẽ netãki. “Revotsoma. Maitioi peás itsoma. Enẽ yoinavo, yoini peiyavo, maĩ noyõ ikiyavo, maĩ meshoyavo, aká vesosho shokotsoma”, ato akĩ.

Txitavíki, Yové Koĩni naí shavá, mai shavá akápari shovimakĩ.

Mai tanatĩpa rakáa, ãwẽ awe yama, vakíchise tsaóa. Askánamã Yové Koĩni Chinã waka matxise ronóa.

Askánamãsho Yové Koĩ, “shaváiná”, ãwẽ imaĩnõ, shaváinái.

Aská akĩ mashtevaíki ãwẽ oĩa, roa roaka oĩki. Askámaĩnõ, yamékawãvai, shavákawãti, anõsho 6 shavá ivo iti.

Aská ashõ ãwẽ oĩa, roaka oĩki. Shavá, vakíchi aká ãwẽ pashkavakĩa.

Aská ashõ ato vana aoki. “Maĩsho koayavo õsi õsipa mato ẽ ashõai, naaro matõ pitivere.

Aská ashõ, shavá aneki “variké”, akĩ aneki. Vakíchi anekiro “yamé”, akĩ aneóki. Askámaĩnõ, yamékawãvai, shavákawãti, anõsho shavá txitavía ivo iti.

Askávai txipo, vanainaói. “Anõ verák ati nẽenõ, waka ave teanõ. Waka wetsaro, aa matxi rakãi, wetsaro aa teró rakãi avévakĩnõ”, ikí vanai.

Askámaĩnõ, mani peirasĩro, maĩ yoinavo, yoini peiyavo, maĩ noyõ ikiya, maĩ meshoya akárasĩni pitivere”, ato akĩ. Askái ãwẽ vanamaĩnõse, ãwẽ chinã keskái iyakéi.

Askávai, Yové Koĩ vanainaói. “Naĩ masosho naóyavorasĩ masõnõ, anõsho shavá, yamé, shavá tekía, vari shavá tekía aká tanati.

Askávai, “Maĩsho koayavo õsi õsipa ave shovinõ”, ikí. Askái ãwẽ vanamaĩnõse, ãwẽ chinã keskái iyakéi.

Aská akĩ anõ verák ati nẽeki. Anõsho waka wetsa aa matxi rakãi, wetsaro aa teró rakãi avévakĩki. Ãwẽ aská aká, askái.

Maĩsho koayavo õsi õsipa shovii. Aská akĩ shovimashõ ãwẽ oĩa, roaka oĩki.

Askáki naóya ravévakĩ anipa shovimakĩ, naó anipa ivoro shavá naómái, naó animase ivoro yamé naómái akĩ. Aská akĩ ichirasĩ shovimaói.

Askávai vanainaói. “Naa mai shavapa waka rakákoĩkéna. Waka, mai aká ave pesokoĩkénõ”, ikí. Askái ãwẽ vanamaĩnõse, ãwẽ chinã keskái iyakéi. Aská avaikĩ “mai”, akĩ aneki. Askámaĩnõ waka rakãkoĩkevaíki anekiro “waka kayarasĩ”, akĩ aneóki. Aská ashõ ãwẽ oĩa, roaka oĩki.

Aská avaikĩ vana roapa atomẽ netãki. “Revoi, ene shavátiótsoma. Yoini peiyavorasĩní, revoótsoma”, akĩ.

Askávai, “naa mai shavapa shokoa yoini õsi õsipavo, iná ati, nĩi shokoya, maĩ noyõ ikiyavo, maĩ meshoyavo akárasĩ ave shovinõvo”, akĩ. Askái ãwẽ vanamaĩnõse, ãwẽ chinã keskái iyakéi.

Askávai vanainaói. “Enẽ yoinavorasĩ wakateãtimanõ. Peiyavo shovimaónõ”, ikí.

Aská akĩ nĩi yoini, iná ati ivo yoini, maĩ noyõ ikiyavo, maĩ meshoyavo, aká õsi õsipakĩ shovimakĩ. Aská ashõ ãwẽ oĩa, roaka oĩki.