Hechos 6
6
Ti yato sin xreyá tsjinki̱tsa
1A̱ndá ti ña̱o a, la a̱ntsí tinkákótsjé ti sin tinkáchónki Ìnchéni. La ti sin griego mé kónínkakohen sin ti sin hebreo. Ndáchro sin kixin ti sin ikꞌán griego la kanhñó tꞌáyéhe̱ sin ti nkehe xika sinie sin nkojnko ña̱o. 2Ndá ti teyó ti sin tsíkjeyá chꞌin Jesús mé kꞌuéye̱he̱ sin kaín ti sin tinkáchónki Ìnchéni la ndáchro sin:
―Jehya jína kixin tsíto̱heni tsjakoni ti itén Díos ndá jeheni tsꞌóxika̱ye̱heni ti nkehe sinie sin. 3Méxra̱ ijie, kíchóni, tjéyára yato chojnindoa ti tjejora, chojni choxínra jína la ko nohe sin la ko chónta ti kjuachaxin kuènté Ncha̱kuén Díos, la tíha ti sin tsꞌáyéhe̱ ti ixra̱. 4A̱ndá jeheni la a̱ntsí tsonixje̱he̱ni Díos la ko tsjakoni ti itan ni̱xin tsaáxin chojni ―ichro sin.
5Ndá ti ó kuíhin sin tíha la kóchéhe̱ sin, la nkoko̱a kjuénka̱yáxin sin la kjueyá sin chꞌin Esteban, ijnko nkexro imá titekaon Ìnchéni la ko chónta ti kjuachaxin kuènté Ncha̱kuén Díos. Kja̱xin kjueyá sin Felipe, Prócoro, Nicanor, Timón, Parmenas la ko Nicolás, ijnko nkexro tsíkji̱xi̱n Antioquía la kuitekaon chꞌan éxi ti sin judío. 6Ndá ti ó kjuixin la kjui̱ka̱o sin ti tjejó ti sin tsíkjeyá Ìnchéni, la jehe sin nixje̱he̱ sin Díos la ko kꞌuejótja itja sin ikja ti sin tsíkónoxín.
7Ndá a̱ntsí itsjé chojni kuíhin ti itén Díos la a̱ntsí kótsjé ti sin tinkáchónki Ìnchéni ti chjasin Jerusalén, la kja̱xin itsjé ti sin ncha̱tꞌá judío kuitekaon sin Ìnchéni.
Itsé sin Esteban kixin sinchekjasóte sin
8A̱ndá Esteban mé ijnko nkexro chónta ti kjuachaxin kuènté Díos mé kjua̱ko̱xi̱n chꞌan itsjé kjuaxroan ti chjasin ntiha. 9A̱ndá iso sin tsíkji̱xi̱n ti ni̱nko judío kuènté ti sin kꞌuékjichꞌexón ixra̱, la ko iso ti sin tsíkji̱xi̱n Cirene, Alejandría, Cilicia, la ko Asia, mé kjuankíxin kónínkaon sin la ikjo sin ti chꞌin Esteban. 10Kjánchó kjuachahya sin kixin Ncha̱kuén Díos kjuínki̱tsa ti chꞌin Esteban la jína kjuáte̱he chꞌan. 11Ndá jehe sin la kjue̱nke̱he sin íso chojni tsochronka kixin kuíhin sin kꞌuándaxíhi̱n chꞌin Esteban Díos la ko Moisés. 12La xi̱kaha kjuínchekónínkaon sin kaín ti chojni la ko kaín ti sin tꞌe̱to̱an kuènté ti ni̱nko judío la ko ti sin tjako ley. Ndá itsé sin ti chꞌin Esteban la sákjui̱ko sin ti tjejó ti sin tꞌe̱to̱an. 13La ntiha kóchjina ti sin kjue̱nke̱he sin, la ndáchro sin:
―Ti nkexro i, la titoéhya tꞌándaxíhi̱n ti ni̱nko kuènténi la ko ti ley. 14La kuíhini ndáchro chꞌan kixin Jesús, ti nkexro tsíkji̱xi̱n Nazaret, mé tsꞌóxika ti ni̱nkuéni la ko tsjinkí chꞌan ti nkehe titekaoni, ti nkehe tsíkꞌe̱to̱an Moisés ―ichro sin.
15Ndá kaín ti sin tꞌe̱to̱an la ko ti sin kꞌuejótja̱xi̱n ntiha la komá sin ti chꞌin Esteban la kꞌuíkon sin kixin ti nkayakon chꞌan la tsjehe éxi nkayakon ijnko ángel.
Zur Zeit ausgewählt:
Hechos 6: poeNTplus
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2016, Wycliffe Bible Translators, Inc. All rights reserved.