San Juan 12

Ijnko chojnichjin kjuíncheka aceite xraxé to̱té chꞌin Jesús

(Mt. 26:6-13; Mr. 14:3-9)

1Injon ña̱o na̱xa̱ tꞌitjáña ndá tsꞌixin ti kia Pascua, la chꞌin Jesús sákjui̱ chꞌan chjasin Betania ti itjen chꞌin Lázaro, ti nkexro kjuínchexechón chꞌan. 2Ndá ntiha ijnko kójín kjónie sin kixin xi̱kaha kjuíkosáyehe sin chꞌin Jesús. Ti tjan Marta mé kjuínchechján tjan ti nkehe kjónie sin la chꞌin Lázaro la ko íso sin mé kjonieko sin ti chꞌin Jesús. 3#Lc. 7:37, 38.*A̱ndá ti tjan María mé kjui̱ka̱o itꞌo̱ litro aceite tsíkꞌónaxín itsjo nardo imá tjete sínkí, mé kjuíncheka tjan to̱té chꞌin Jesús, la ka̱xi̱hi tjan kjuínchexámáxin tjan. La kuenté ti nkaxehen nchia kókaxraxéxehen ti aceite. 4Ndá chꞌin Judas Iscariote, xje̱en chꞌin Simón, ijnko ti nkexro kꞌuájiko chꞌin Jesús, la ko ti nkexro sinchekji ti chꞌin Jesús chrꞌéxi̱n, mé ndáchro:

5―¿Nkekuènté kóxihya ti aceite xraxé náxrjón i, chrókóxi̱xi̱n iní ciento denario kixin chrókjuinki̱tseheni ti sin nóa?

6Kjánchó ti chꞌin Judas la jehya ndáchro xi̱kaha kixin chrókui̱konoéhe chꞌan ti sin nóa. Náhí. Ndáchro chꞌan xi̱kaha kixin jehe chꞌan la ijnko chojni che̱e la kja̱xin jehe chꞌan tꞌayakohen chꞌan ti nkehe tjinká chichaon xrenájín ntiha la ó xráxín teé chꞌan. 7Ndá ndáchro chꞌin Jesús:

―Ti̱to̱héra tjan kixin jehe tjan tsíkja̱kꞌe̱chji̱na tjan ti aceite i kixin ti ña̱o tsoxravána. 8#Dt. 15:11.*Ti sin nóa la nkochríxín tsꞌejokoára sin. A̱ndá janhan la nkochríxínhña tsꞌejóni.

Kjuenka̱yáxin sin tsꞌóñá sin Lázaro

9A̱ndá itsjé ti sin judío kónohe sin kixin chꞌin Jesús kjuákꞌe ti chjasin Betania, ndá sákjuí sin ntiha. Jehya chrókjuitsjehe sin ti chꞌin Jesús ó. Náhí. Kja̱xin tjinkaon sin chrókjuitsjehe sin ti chꞌin Lázaro, ti nkexro xechón kixin ti kjuaxroan kjuíchꞌe chꞌin Jesús. 10A̱ndá ti sin ncha̱tꞌá tꞌe̱to̱an mé kónkotsé sin la kjuénka̱yáxin sin kixin kja̱xin chrókꞌóñá sin ti chꞌin Lázaro 11kixin itsjé ti sin judío kꞌuaxrjekjaxín sin ntiha kixin kuitekaon sin ti chꞌin Jesús kixin kjuínchexechón chꞌan ti chꞌin Lázaro.

Chꞌin Jesús kꞌuíxehen Jerusalén

(Mt. 21:1-11; Mr. 11:1-11; Lc. 19:28-40)

12Nchónhña chojni sátsíkji̱ ti chjasin Jerusalén kixin ti kia Pascua. A̱ndá ti ña̱o chrꞌéxi̱n kónohe sin kixin ó tsjiji chꞌin Jesús ntiha. 13#Sal. 118:25, 26.*Ndá kóchríjin sin chaon ntakajni xraá sin la kjuíxihin sin nti̱a chꞌin Jesús, la itsje sin, ndáchro sin:

―Chjéheni Díos kjuasáya. Imá jína ti nkexro kui̱xi̱n ti kjuachaxíen Itꞌéni itjen nkaya nka̱jní. Imá jína ti Rey tsꞌe̱tue̱hen ti nación Israel.

14Ndá chꞌin Jesús tsíkꞌitja ijnko kolócho la kjuákꞌekjen chꞌan, éxi nixja ti xroon itén Díos:

15 # Zac. 9:9. *Chrakonhñara jahara tjejora Jerusalén,

tsjehéra ó ikui ti Rey kuèntára,

tjekjen ijnko kolócho.

16Ti ó kóhen tíha, la kienxínhña ti sin kꞌuájiko chꞌin Jesús nkekuènté xi̱kaha kóhen. A̱ndá chrꞌéxi̱n ti ó kjuixin sákjui̱jia chꞌin Jesús nkaya nka̱jní, ndá xráxinkaon sin kixin xi̱kaha tsíkjin ti sin kꞌuéchronka itén Díos ósé nkexrín tso̱hen chꞌin Jesús, ndá xi̱kaha chaxín xiteyá.

17Kaín ti sin kꞌuéjóko chꞌin Jesús ti ó kꞌuéye̱he̱ chꞌan ti chꞌin Lázaro kixin tsꞌaxrjexín chꞌan ti tòye̱ tsíxravá chꞌan ndá xechón chꞌan, mé ti sin a chrónka sin ti nkehe kꞌuíkon sin. 18Mé xi̱kaha sákjuixihin sin nti̱a ti chꞌin Jesús, kixin ó nohe sin ti kjuaxroan ijié tsíkjasin chꞌan. 19Méxra̱ ti sin fariseo la ikjo sin kícho sin, ndáchro sin:

―Tsjehéra, tsjachahyani sichꞌeni ninkehó kixin kaín chojni sákjuichréhe̱ sin chꞌan.

Iso sin griego tjeyá sin chꞌin Jesús

20Iso sin griego tjejóyákjan ti sin sákjui̱ ti kia kuènté ti chjasin Jerusalén kixin tsoxraxinkakonxín sin Díos. 21Mé kóchjinehe sin ti chꞌin Felipe, tsíkji̱xi̱n chjasin Betsaida, ijnko chjasin kuènté Galilea, mé chrónòa sin, ndáchro sin:

―Tjinkaoni chrókꞌuíkoni ti chꞌin Jesús.

22Ndá chꞌin Felipe sákjuichenka chꞌan ti chꞌin Andrés. Ndá yóí sin sákjuichenka sin ti chꞌin Jesús. 23Ndá chꞌin Jesús ndáchro:

―Ó kjuixraká ti ña̱o, ndá ti Xje̱en Díos kꞌóna chojni mé sátsji̱ tsꞌáyéhe̱ ti kjuachaxin ijié tsjajon Itꞌé chꞌan. 24A̱ndá tso̱tjo̱nkara ijnko nkehe chaxín kixin ti chrókꞌuitsínkahya ijnko noatrigo ti inche la chrókꞌuénhña ti noa, la nkoko̱a noa ó chrókjuákꞌe. A̱ndá ti itsꞌen ti noa a ndá tsꞌóna nchónhña noa la jína tsotjá chojni. 25#Mt. 10:39; 16:25; Mr. 8:35; Lc. 9:24; 17:33.*Ti nkexro imá tjue̱hé a̱sén kixin kohya nkehe chrókꞌuatsínka la tsochóntahya ti kjuachón nkochríxín. A̱ndá ti nkexro tjue̱hya a̱sén ntihi chjasintajni, chrakonhña chronka itén Díos la mé chrꞌéxi̱n tsochónta sin kjuachón nkochríxín. 26A̱ndá ti nkojín nkexro tjinkaon chrókjuitꞌana ixra̱, la ticháxi̱n tsochréhe̱ ti janhan, kixin ti tsjakꞌe janhan mé kja̱xin tsꞌejó ti sin si̱tꞌána ixra̱. Ti nkojín nkexro sichꞌe ti ixra̱ kuénta̱na mé xi̱kaha Tꞌaná la tsjikosáyehe chꞌan ti jehe sin.

Chꞌin Jesús chrónka kixin itsꞌen

27’Ijie imá tꞌává a̱sená. ¿Xá nkehe chróndáxrja̱n? ¿Á chrókjuáncháha̱ Tꞌaná kixin sinchekaána chꞌan kixin ti nkehe tso̱na ijie ní? Náhí, kixin tíha kꞌuinkaxian janhan. 28Jaha Itꞌéni, tjáko̱xián ti kjuachaxin kuènté ti ihni̱á ―ichro chꞌin Jesús.

Ndá kuíhin sin nixja ijnko nkexro nkaya nka̱jní ndáchro:

―Ó kjuixin kjuáko̱xián ti kjuachaxin kuénta̱na la ko xi̱kaha na̱xa̱ xíkjáko̱xia̱n ínaá.

29A̱ndá ti sin tjejóntaxín ntiha tsíkihin tíha, mé ndáchro sin kixin kjónta, a̱ndá íso sin ndáchro:

―Ijnko ángel nixje̱he̱ ti jehe chꞌan.

30Kjánchó ndáchro chꞌin Jesús:

―Jehya kixin janhan nixja̱xi̱n ti itan. Náhí. Nixja kixin jahara tsinhínra. 31Ndá ijie tsito̱exín iji̱é kaín chojni chjasintajni, la ti jínahña tꞌe̱to̱an ti chjasintajni i la tsꞌaxrjexín ntihi. 32A̱ndá ti ó tsjakꞌenka̱nia ijnko ntacruz, ndá nchónhña chojni tsitekaon ti janhan.

33Mé xi̱kaha chrónkaxín chꞌan nkexrín itsꞌen chꞌan. 34#Sal. 110:4; Is. 9:7; Ez. 37:25; Dn. 7:14.*A̱ndá kjuáte̱he ti sin tjejó ntiha, ndáchro:

―Kuíhini nchekuáxin sin ti xroon tsíkjin sin ósé chronka kixin ti Cristo la nkochríxín tsjakꞌe. ¿Ndá nkekuènté ndáchrua kixin ti Xje̱en Díos kꞌóna chojni la ticháxi̱n tsjakꞌenkáni ijnko ntacruz? ¿Xá nkexro ti Xje̱en Díos kꞌóna chojni? ―ichro sin.

35Ndá ndáchro chꞌin Jesús:

―Na̱xa̱ itjen ti xrohi tꞌejoko̱ara, kjánchó í séhya tsjakꞌe. Chrókꞌuájira ti na̱xa̱ itjen ti xrohi tꞌinkaséñaxín nti̱a. A̱ndá ti náhí, la ó tsꞌixin tie. A̱ndá ti sin ixri ti sítie mé noehña sin nketí sátsji sin. 36Titekáonra ti xrohi ti na̱xa̱ itjen tꞌinkaséñaxín kixin tsꞌónara chojni kuènté ti tꞌinkaséña.

Ndá kjuixin chrónka chꞌin Jesús tíha, ndá sákjuí chꞌan kjuákꞌeméhe chꞌan ti jehe sin.

Ti sin judío kuitekakuenhña sin ti chꞌin Jesús

37Kjónté kꞌuékjasin chꞌin Jesús nchónhña kjuaxroan ijié kꞌuíkonxín ikon sin, la kjónté xi̱kaha la kuitekakuenhña sin ti jehe chꞌan. 38#Is. 53:1.*Mé xi̱kaha xiteyá ti xroon tsíkjin Isaías ndáchro:

Ìnchéni, ¿nkexro kuitekaon ti nkehe chrónkani?

¿Xá nkexro kjua̱ko̱he̱ ti kjuachaxin kuèntá?

39Méxra̱ kuitekakuenhña sin ti chꞌin Jesús éxi tsíkjin chꞌin Isaías kja̱xin:

40 # Is. 6:10. *Díos kjuínchekꞌikonhña chꞌan sin la ko kjuínchecha chꞌan a̱sén sin,

kixin chrókꞌuíkonhña sin,

la ko chrókienxínhña sin,

ndá chrókóchjinehña sin ti jehe chꞌan kixin chrókjuinchekito̱he chꞌan jína ti jehe sin.

41Mé xi̱kaha kꞌuéchronka chꞌin Isaías imá ósé kixin tsíkꞌikon chꞌan ti kjuachaxin ijié kuènté chꞌin Jesús, ndá kꞌuéchronka chꞌan ti nkehe tsíkꞌikon chꞌan.

42Itsjé ti sin judío tꞌe̱to̱an la kuitekaon sin ti chꞌin Jesús, kjánchó chenkahya sin ninkexró kixin tso̱noehña ti sin fariseo, kixin ti tso̱nohe sin la tso̱nínkaon sin ndá tsjajonhña sin kjuachaxin chrókꞌuixehen sin ti ni̱nko. 43Mé xi̱kaha imá kóxríhi̱n sin kixin chojni chjasintajni ó chrókjuikosáyehe ti jehe sin, ndá kanhñó kjueyá sin kixin chrókjuikosáyehe sin Díos.

Jesús ikui kixin sinchekaá chojni chjasintajni

44Ndá itsen nixja chꞌin Jesús ndáchro:

―Ti nkexro tsitekaon ti janhan la jehya janhuán titekaon sin, kja̱xin titekaon sin ti Tꞌaná, ti nkexro ichrꞌán ti janhan kꞌuinka. 45A̱ndá ti nkexro tꞌikon ti janhan mé kja̱xin tꞌikon ti nkexro ichrꞌán ti janhan kꞌuinka. 46Janhan mé ti xrohi kꞌuinka chjasintajni kixin ti nkexro tsitekaon ti janhan la tsꞌejóhya sin ti sítie. 47A̱ndá ti nkojín nkexro tihin ti nkehe tjéxrja̱nka ndá titekákonhña, la jehya janhan si̱ntakjasótia sin kixin jehya kꞌuinka si̱ntakjasóte chojni chjasintajni. Náhí. Kꞌuinka kixin si̱ntakaá chojni. 48A̱ndá ti nkexro tsitekakonhña ti janhan la ko tsitekakonhña ti itan kuénta̱na la ó siín nkexro tsjanchia ijie̱, ti itan xrja̱nká mé tsjasótexín sin ti ña̱o tsjixixín. 49Jehya ti nkehe kuénta̱na xrja̱nká. Náhí. Tꞌaná, ti nkexro ichrꞌán ti janhan kꞌuinka, mé kꞌue̱to̱an ti nkehe tso̱xrja̱nka la ko ti nkehe tsjàkua. 50A̱ndá nona kixin ti sin titekaon ti nkehe kꞌue̱to̱an Tꞌaná mé tsꞌáyéhe̱ sin ti kjuachón nkochríxín. Mé xi̱kaha ti nkehe ndáxrja̱n, mé Tꞌaná kꞌue̱to̱an tsondáxrja̱n.

Zur Zeit ausgewählt:

San Juan 12: poeNTplus

Markierung

Kopieren