San Juan 14

Jesús mé ti nti̱a tsji̱xini ti itjen Díos

1’Tóxakuanhñara. Titekáonra Díos la ko titekáonra ti janhan. 2Ndo̱e Tꞌaná la itsjé nchia siín tsꞌejóni. A̱ndá ti chrókójehya xi̱kaha la ó chróndáxrja̱n. Méxra̱ sátsjiá si̱ntayóxian ti tsꞌejóni. 3A̱ndá ti sátsjiá la si̱ntayóxian ntiha, ndá tsꞌinka ínaá, ndá sátsji̱ni kixin ti tsjakꞌé janhan la kja̱xinra tsꞌejora. 4Jahara la ó nohara nketí sátsjiá la ko ó nohara ti nti̱a.

5Ndá kjuáte̱he chꞌin Tomás ndáchro:

―Ìnchéni, noehñani nketí sátsjia. ¿A̱ndá nkexrín chrókónoheni ti nti̱a?

6Ndá chꞌin Jesús ndáchro:

―Janhan mé ti nti̱a la ko ti itan chaxín la ko janhan mé tsjánjua ti kjuachón. Ninkexró xrokjuahya tsjiji ti itjen tꞌaná, jehó ti nkexro tsitekaon ti janhan mé jína tsjiji ntiha. 7Ti chrókjuatso̱anra ti janhan, ndá xi̱kaha chrókjuatso̱anra Tꞌaná. Ndá ijie ó choxínra chꞌan la ko ó tjejókoara chꞌan.

8Ndá chꞌin Felipe ndáchro:

―Ìnchéni, ti̱to̱héni tsochóxini ti Itꞌá. Táhó mé tjinkaoni.

9Ndá kjuáte̱he chꞌin Jesús ndáchro:

―Felipe, ósé tjejóni, ¿ndá na̱xa̱ tjátso̱anhñara ti janhan ní? Ti nkexro tꞌikon ti janhan la ó kꞌuíkon sin ti Tꞌaná kja̱xin. ¿Ndá nkekuènté tjánchàna kixin tsꞌikuan ti Tꞌaná? 10¿Á titekákonhña kixin janhan la nkoko̱a tjéki̱a̱n Tꞌaná, la Tꞌaná itjen ti itjén janhan ní? Ti nkehe níxja janhan la jehya kuénta̱na. Náhí. Tꞌaná tjéki̱a̱n mé tjechꞌe ti ixra̱. 11Titekáonra kixin nkoko̱a tjéki̱a̱n Tꞌaná, la Tꞌaná itjen ti itjén janhan. Kjónté chrókuitekáonra kixin ti kjuaxroan ijié kjuáko̱xián kꞌuíkonra. 12Ijnko nkehe chaxín tso̱tjo̱nkara kixin ti chaxín tsítekáonra ti janhan, la kja̱xinra tsjachara si̱chꞌera ti ixra̱ tjétꞌa̱, la ixra̱ a̱ntsí ijié tsjachara si̱chꞌera kixin janhan la sátsjiá ti itjen Tꞌaná. 13La kaín ti nkehe tsjanchehéra Tꞌaná, tsjanchatoxixínra ni̱ná la tsjánjua janhan kixin xi̱kaha tsjáko̱xia̱n ti kjuachaxin ijié kuènté Tꞌaná. 14Ti nkojín nkehe tsjanchatoxixínra ni̱ná la janhan tsjánjua.

Chrónka Chꞌin Jesús kixin tsochrꞌán ti Ncha̱kuén Díos

15’Ti chaxín tjue̱héra ti janhan, la chrókjui̱nchexiteyára ti nkehe kuéto̱an. 16Ndá tso̱xrja̱noáha̱ Tꞌaná kixin tsochrꞌán chꞌan ti Ncha̱kuén chꞌan kixin tsjinki̱tsa ti jahara la ko sinchechéhe̱ a̱sánra, la tíha tsꞌejoko̱ara nkochríxín. 17Ti Ncha̱kuén chꞌan mé chaxín ndoá. Ti chojni chjasintajni la xitjahya tsꞌáyéhe̱ sin ti Ncha̱kuén Díos kixin tꞌikonhña sin la ko chónhña sin. Kjánchó jahara ó choxínra kixin tjekoara la ko tsjakꞌeko̱ara nkochríxín. 18Janhan la tsi̱toáhyara nòé; janhan la tsokjan ínaá tsꞌejóni. 19A̱ndá í séhya ndá ti chojni chjasintajni la í tsꞌikonhña sin ti janhan, kjánchó jahara la tsꞌikonra ti janhan. Ndá kja̱xinra tsꞌejochonra kixin janhan la tjéchua̱n. 20A̱ndá ti ña̱o a tso̱nohara kixin Tꞌaná la ko janhan nkoko̱a tjéki̱a̱n la ko kja̱xin jahara la ko janhan nkoko̱a tjejóni. 21Ti nkexro nohe ti nkehe kuéto̱an la ko nchexiteyá, mé xi̱kaha tsja̱ko̱xi̱n sin kixin chaxín tjua̱na sin. A̱ndá ti nkexro tjua̱na, la kja̱xin Tꞌaná tso̱tjue̱hé ti jehe sin la ko janhan tso̱tjua̱ha̱ sin la ko tsjáko̱xia̱n nkexrín itjén janhan ―ichro chꞌin Jesús.

22A̱ndá ndáchro ti chꞌin Judas, jehya Iscariote:

―Ìnchéni, ¿nkekuènté jehóni ó tsjáko̱xian, ndá tsjákoèxinhña ti chojni chjasintajni?

23Ndá kjuáte̱he chꞌin Jesús ndáchro:

―Ti nkexro tjue̱he ti janhan mé sinchexiteyá ti nkehe této̱an. La ko Tꞌaná mé tso̱tjue̱he ti jehe sin, ndá Tꞌaná la ko janhan tsꞌejóki̱a̱n sin. 24Ti nkexro tjue̱hya ti janhan mé nchexiteyéhya ti nkehe tjàkua. Ti nkehe tjàkua tjejotihínra la jehya kuénta̱na. Náhí. Kuènté Tꞌaná, ti nkexro ichrꞌán ti janhan kꞌuinka.

25’Na̱xa̱ tjejóni la tjétjo̱nka̱ra kaín tíhi. 26A̱ndá Tꞌaná, mé tsochrꞌán ti Ncha̱kuén chꞌan kjuachaxíen ni̱ná, mé tsjinki̱tsa ti jahara, la ko tsja̱ko̱hara kaín ti ixra̱ la ko sinchexraxinkáonra kaín ti nkehe xrja̱nká.

27’Ti kjuaxróxin tsi̱to̱ha̱ la ko ti kjuaxróxin kuénta̱na tso̱tja̱hára. Jehya éxi ti kjuaxróxin tjajon ti chjasintajni. Náhí. Chrokóxakuenhña a̱sánra la ko chróchrakonhñara. 28Ó kuihínra ndáxrja̱n kixin sátsjiá la ko tsokjan tsꞌejóni ínaá. Ti chaxín tjue̱héra ti janhan ndá chrókócháhara ti kuihínra kixin sátsjiá ti itjen Tꞌaná kixin jehe chꞌan la a̱ntsí tꞌe̱to̱an chꞌan ke janhan. 29A̱ndá ijie ó senó xrja̱nká tíhi kixin ti ó tso̱hen la tsꞌikonra la tsítekáonra.

30’A̱ndá ijie la í séhya tsonixjahára kixin ó itsi ti Jínahña, ti nkexro tꞌe̱to̱an ti chjasintajni. A̱ndá tíha la ninkehó tꞌe̱tue̱nhña ti janhan. 31Kjánchó ticháxi̱n tso̱hen kaín nkehe, ndá ti chojni chjasintajni mé tso̱nohe sin kixin janhan tjua̱ha̱ Tꞌaná la ko nta̱xiteyá ti nkehe kꞌue̱to̱an chꞌan. Ndá ijie tꞌínkatjenra, sátsjixini ntihi.

Zur Zeit ausgewählt:

San Juan 14: poeNTplus

Markierung

Kopieren