Lucas 18
18
Ti tjan ikꞌán la ko ti juez
1Kja̱xin kjuíncheyóe̱xin chꞌin Jesús ijnko nkehe kixin nkochríxín chrónixje̱he̱ sin Díos la ko chrókꞌóxrjéhya sin. 2Ndá ndáchro chꞌan:
―Ijnko chjasin kjuákꞌe ijnko juez kjuikosáyehya Díos la ko kꞌuéchóntehya kjuasàya ninkexró. 3La kja̱xin ntiha kjuákꞌe ijnko chojnichjin ikꞌán, nkoya̱xón sákjuitsjehe tjan ti juez kjuanchia tjan ijie̱, ndáchro tjan kixin chrókꞌuixiyóxin kixin ijnko chojni nínkakohen ti jehe tjan. 4Nchónhña vece tjitsjehe tjan ti juez la chrohya chꞌan sinchekito̱exín chꞌan. Ndá chrꞌéxi̱n kjuénka̱yáxin ti chꞌin juez ndáchro: “Kjónté tsjíkosáyahya Díos la ko ninkexró chóntehya kjuasàya 5la ti tjan ikꞌán i nkoya̱xón tjanchia tjan ijie̱, la tsjinki̱tsaha̱ tjan tso̱yóxin ti ijie̱ tjanchia tjan kixin ti nkoya̱xónhña itsi tjan tsochronòa tjan la a̱ntsí tso̱nínka̱oan.”
6Ndá ndáchro Ìnchéni:
―Mé xi̱kaha ichro ti juez jínahña. 7A̱ndá Díos la, ¿xá chrókjuinki̱tsehya chꞌan ti sin kjueyá chꞌan ti ó chróchronòa sin ncha̱kotjin la ko tie ní? ¿Á tjokahya chrókjuinki̱tsa Díos ti jehe sin ní? 8Janhan ndáxrja̱n kixin Díos la tjoka tsinki̱tsa chꞌan ti jehe sin. A̱ndá ti ó tsokjan ti Xje̱en Díos kꞌóna Chojni la, ¿á na̱xa̱ chrókꞌuitja chꞌan chojni tinkáchónki ti jehe chꞌan ntihi chjasintajni ní?
Ti fariseo la ko ti nkexro nchekjènki̱
9Ndá chꞌin Jesús nixje̱he̱ chꞌan iso chojni tjenka̱yáxin sin kixin imá jína sin, a̱ndá ti íso chojni la náhí, la kjuíncheyóe̱xin chꞌan jnko nkehe, ndáchro chꞌan:
10―Iyó #18:10 Iyó yaá dos. sin ndoa sákjui̱ sin ni̱nko kixin tsonixje̱he̱ sin Díos. Ijnko la fariseo la ko ti íjnko la chojni nchekjènki̱. 11A̱ndá ti fariseo tjexín to̱té la itsen nixje̱he̱ Díos ndáchro: “Itꞌéni Díos, kjuasáya kixin jeheni la chóntahyani ijie̱ éxi ti íso sin kixin jehe sin la teé sin la ko chꞌiyehe kícho sin la ko chꞌiyehe sin chojnichjin. Kja̱xin jeheni la jehya éxi ti nkexro nchekjènki̱ tjihin. 12Jeheni la niehñani yaá ña̱o nkojnko semana la ko kja̱xin tjajoni ti te̱xi̱n parte ti nkehe tjachani#18:12 te̱xi̱n parte ti nkehe tjachani diezmo”, ichro ti fariseo. 13A̱ndá ti chojni nchekjènki̱#18:13 nchekjènki̱ publicanos, cobradores de impuestos la imá ikjín kuíto̱he chꞌan la kóntahya chꞌan nka̱jní jehó chjéhe chꞌan ntakuin chꞌan, la ndáchro chꞌan: “Itꞌéni Díos ti̱konoéhéni kixin nchónhña ijie̱ chóntani”, ichro ti nkexro a. 14#Mt. 23:12; Lc. 14:11.*A̱ndá chaxín ndáxrja̱n kixin ti chojni nchekjènki̱ la kjuaxróxin ikjan ndo̱e kixin Díos kui̱konoéhe̱ ti jehe chꞌan la kjuìin ti ijie̱ chónta chꞌan, a̱ndá ti fariseo la náhí. Kixin kaín chojni nchejié a̱sén#18:14 nchejié a̱sén enaltece, engrandece, se cree importante la imá tso̱ntsí. A̱ndá ti nkexro nchejiéhya a̱sén la tsꞌánkí ti kjuachaxin kuènté.
Chꞌin Jesús kjuíncheñao chájan
(Mt. 19:13-15; Mr. 10:13-16)
15Kja̱xin kjui̱ka̱o sin chájan ntsíntsí ti itjen chꞌin Jesús kixin chrókjuincheñao chꞌan xjan, kjánchó ti ó kꞌuíkon ti sin kꞌuájiko chꞌin Jesús la kjuajonhña sin kjuachaxin kixin tso̱chjinako sin xjan. 16Ndá chꞌin Jesús kꞌuéye̱he̱ ti ixjan la ndáchro:
―Ti̱to̱héra ti ixjan tsoxrakoa ti itjén la tꞌínka̱kuénhñara xjan kixin ti kjuachaxin kuènté Díos la jehó kuènté ti nkexro tꞌóna éxi ti xjan i. 17Chaxín ndáxrja̱n kixin ti nkexro tsꞌónahña éxi ijnko ti ixjan i la xitjahya tsꞌejó sin ti tsꞌe̱to̱anxín Díos.
Ijnko ndasoá rico
(Mt. 19:16-30; Mr. 10:17-31)
18Ijnko nkexro tꞌe̱to̱an kuènté ni̱nko kjuanchankíhi chꞌin Jesús, ndáchro:
―Maestro jína, ¿nkehe chrókjuíchꞌeni kixin chrókꞌuitjani ti kjuachón nkochríxín?
19Ndá kjuáte̱he chꞌin Jesús ndáchro:
―¿Nkekuènté ndáchrua kixin jína janhan? Jehó nkoko̱a nkexro mé jína, Díos tíha. 20#Ex. 20:14; Dt. 5:18; Ex. 20:13; Dt. 5:17; Ex. 20:15; Dt. 5:19; Ex. 20:16; Dt. 5:20; Ex. 20:12; Dt. 5:16.*Jaha la ó noha nkexrín kꞌue̱to̱an Díos: “Chrokjuacheéhya kichua, chrókꞌoñáhña chojni, chrókueéhyara, chróndáchrohyara ninkehó nkehe chaxínhña kuènté ókjé chojni, la ko chróchontehé kjuasàya itꞌá la ko ìná.”
21A̱ndá ti nkexro, la ndáchro:
―Kaín tíha la kjuínchexiteyáni ndesi xja̱ntsíni.
22A̱ndá ti ó kuíhin chꞌin Jesús, la ndáchro:
―Nkoko̱a nkehe na̱xa̱ tꞌitjáña si̱chꞌe, nchekjia kaín ti nkehe chonta, la chje̱hé ti sin nóa. Ndá ti nkehe tjete la tsochonta nkaya nka̱jní. Ndá tsjixin la tsjihá, la chréhé ti janhan ―ichro chꞌin Jesús.
23A̱ndá ti ó kuíhin xi̱kaha la imá kꞌuává kixin imá itsjé nkehe chónta chꞌan. 24Ndá ti ó kꞌuíkon chꞌin Jesús kixin imá kꞌuává ti nkexro a la ndáchro chꞌan:
―Imá ixra̱ kixin ijnko chojni chónta nchónhña nkehe tjete tsꞌixehen ti tꞌe̱to̱axín Díos. 25A̱ntsí xra̱hya chrókꞌuatsínka ijnko kokamello ti tjexja ijnko ntachika ke ijnko chojni chónta itsjé nkehe chrókꞌuixehen ti tꞌe̱to̱axín Díos.
26A̱ndá kaín ti sin kuíhin la ndáchro:
―Ti xi̱kaha la, ¿xá nkexro chrókjuacha chrókuaá?
27Ndá ndáchro chꞌin Jesús:
―Ti nkehe tsjachahya chojni, la Díos la tsjacha sichꞌe kaín tíha.
28Ndá chꞌin Pedro ndáchro:
―Ìnchéni, jeheni la kuíto̱heni kaín nkehe chóntani, ndá chréhe̱ni ti jaha.
29Ndá kjuáte̱he chꞌin Jesús ndáchro:
―Chaxín ndáxrja̱n kixin ti nkojinra kui̱to̱héra ndo̱ara, itꞌára o̱ ìnára, o̱ kichuara, o̱ ichjiánra, o̱ xja̱anra kixin chrókjui̱chꞌera ixra̱ kuènté Díos 30la a̱ntsí itsjé tsꞌayéhéra ntihi chjasintajni la ko chrꞌéxi̱n la tsꞌayéhéra kjuachón nkochríxín ―ichro chꞌan.
Chꞌin Jesús chrónka ínaá kixin itsꞌen
(Mt. 20:17-19; Mr. 10:32-34)
31Ndá chꞌin Jesús kꞌuéye̱he̱ ti teyó sin kꞌuájiko chꞌan ó la ndáchro chꞌan:
―Ijie sátsji̱ni Jerusalén. La ntiha tsoxiteyá kaín ti nkehe tsíkjin ti sin kꞌuéchronka itén Díos ósé, nkexrín tso̱hen ti Xje̱en Díos kꞌóna Chojni. 32Tsjikaán sin chꞌan ti tjejó ti sin jehya judío la ko tsjanoá sin chꞌan la ko tsꞌándaxínhi̱n sin chꞌan la ko tsi̱ki̱te sin nda̱té sin ti jehe chꞌan. 33Tsjate sin chꞌan, ndá chrꞌéxi̱n la tsꞌóñá sin chꞌan, kjánchó ti níxin ña̱o la tsoxechón chꞌan ínaá.
34Ndá jehe sin la kienxínhña sin ti nkehe chrónka chꞌan kixin tíha la ijnko nkehe na̱xa̱ tsjachahya sin tsienxín sin.
Ijnko chojni chjasin Jericó kuito̱he jína
(Mt. 20:29-34; Mr. 10:46-52)
35A̱ndá ti ó chjina tsꞌixehen chꞌin Jesús ti chjasin Jericó ndá chrínta nti̱a tjetja̱xi̱n ijnko nkexro tꞌikonhña, tjanchakꞌá. 36La ti ó kuíhin ti nkexro tꞌikonhña kixin sítꞌatsínka nchónhña chojni, la kjuanchankí ndáchro:
―¿Xá nkehe sítóhen?
37Ndá chenka sin kixin chꞌin Jesús tsíkji̱xi̱n Nazaret tjetꞌatsínka ntiha.
38Ndá ti nkexro tꞌikonhña la itsen kꞌóyako, ndáchro:
―Jesús, xje̱en David, ti̱konoéhéni.
39A̱ndá ti sin sítaón nti̱a la kꞌue̱to̱an sin kixin tsotání chꞌan, kjánchó a̱ntsí itsen kꞌuéya chꞌan ndáchro chꞌan:
―Jaha xje̱en David, ti̱konoéhéni.
40Ndá chꞌin Jesús kjuákꞌechóhen la kꞌue̱to̱an kixin tsjikakjín sin ti nkexro a. Ndá ti ó kjui̱ka̱o sin chꞌan la chꞌin Jesús kjuanchankí, ndáchro:
41―¿Nkehe tjinkaoan chrókjui̱tꞌa?
Ndá ti nkexro tꞌikonhña, la ndáchro:
―Tjinkaoni tsꞌikoni.
42Ndá chꞌin Jesús ndáchro:
―Ó tsꞌikuan. Ó kuito̱ha jína kixin kuitekaoan ti janhan.
43Ndá tuénxín ti nkexro tꞌikonhña la ó kꞌuíkon chꞌan, a̱ndá chréhe̱ chꞌan ti chꞌin Jesús la ko chjéhe chꞌan kjuasáya Díos. La ko kaín ti sin kꞌuíkon kixin xi̱kaha kóhen la chjéhe sin kjuasáya Díos.
Zur Zeit ausgewählt:
Lucas 18: poeNTplus
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2016, Wycliffe Bible Translators, Inc. All rights reserved.