Lucas 21
21
Ti chichaon kjuajon ti tjan kꞌán
(Mr. 12:41-44)
1Ndá ti nkaxehen ni̱nko la chꞌin Jesús kꞌuíkon kixin ti sin rico la kjui̱ka̱o sin chichaon chrꞌáxehen sin ti ntacajón tóxroyéya chichaon kuènté ofrenda. 2La kꞌuíkon chꞌan ikjui ijnko tjan ikꞌán nóa, la chrꞌáxehen tjan yaá chichaon ntsíntsí kanhñó tjete sínkí. 3Ndá chꞌin Jesús ndáchro:
―Chaxín ndáxrja̱n kixin ti tjan ikꞌán i, kjónté nóa tjan, la a̱ntsí kjuajon tjan kixin kaín a̱sén tjan kjuajon tjan, ke ti íso sin 4kixin kaín ti chichaon kjuajon sin la ti chichaon ó tsíxehe̱ sin. A̱ndá jehe tjan, kjónté nóa tjan, la kjuajon tjan kaín ti chichaon chrókꞌuite nkehe chrókjonie tjan ―ichro chꞌin Jesús.
Chꞌin Jesús ndáchro kixin tsoxika ti ni̱nko
(Mt. 24:1-2; Mr. 13:1-2)
5Ndá iso sin tjejótjo sin kixin náxrjón tsjehe ti ni̱nko tsíkꞌónaxín ixro̱ náxrjón la ko íso nkehe náxrjón tsíkjajon chojni tsíkꞌáyéhe̱ Díos. A̱ndá chꞌin Jesús ndáchro:
6―Kaín ti nkehe tꞌikonra i, la itsi ijnko ña̱o la kaín tsoxika. La ninkehó ixro̱ tsꞌejókjenhña kícho.
Ti nkehe tso̱hen ti na̱xa̱ tsꞌitjáñahña chjasintajni
(Mt. 24:3-28; Mr. 13:3-23)
7Ndá kjuanchankíhi sin chꞌin Jesús, ndáchro sin:
―Maestro, ¿nkesá tso̱hen kaín tíhi? ¿Nkexrín tso̱noexíni ti ó tso̱hen kaín tíhi?
8Ndá chꞌin Jesús ndáchro:
―Tꞌejotsjehéra jína kixin chrókjuitꞌayahyara chojni, kixin nchónhña chojni itsi tsondáchro sin kixin jehe sin ti Cristo, la ko tsondáchro sin: “Ijie tsoxiteyá kaín nkehe”, la kjónté xi̱kaha tsondáchro sin la chrókuitekákonhñara. 9Ti ó tsinhínra tsondáchro chojni kixin ó siín guerra la ko tjajo̱nko kícho chojni, la chróchrakonhñara kixin kaín tíha la ticháxi̱n tso̱hen, kjánchó na̱xa̱ tsꞌitjáña chjasintajni.
10A̱ndá na̱xa̱ ndáchro chꞌin Jesús:
―Ijnko nación tsjajo̱nko íjnko nación la ko ijnko chjasin tsjajo̱nko íjnko chjasin. 11Itsjé nketí tsꞌinki nonte la ko tso̱kjinta la ko tso̱níhi chojni nchónhña chjasin, ndá ti nka̱jní la nchónhña kjuachrakon ijié tso̱hen tsꞌikon chojni.
12’Kjánchó ti na̱xa̱ tso̱enhña kaín tíhi la tso̱nínkakohanra sin, tsotséra sin, sátsjiko sin ti jahara ti ni̱nko la tsjanchia sin ijie̱ la ko tsꞌíkjahara#21:12 tsꞌíkjahara encarcelar tsꞌejóchjina sin la ko sátsjiko sin ti jahara nkayakon ti sin rey la ko ti sin gobernador kixin tinkachónkira ti janhan. 13Ti ña̱o xi̱kaha tso̱hen la jína tso̱chro̱nkara kixin tinkachónkira ti janhan. 14#Lc. 12:11, 12.*Ti ña̱o a la tóxakuanhñara nkehe tsjate̱héra ti ó tsjanchankí sin nkojín nkehe 15kixin janhan tsjánjua ti kjuaxrexinkaon jína la ko ti nkehe tsonixjara kixin nijnko ti sin nínkakohanra la xitjahya tsondáchro sin kixin nduáhya ti nkehe tsjate̱héra. 16Kixin kjónté itꞌára o̱ kichuara o̱ ti sin kjéhyara o̱ ti sin itjóra jína mé tsjikaánra sin, la tsꞌóñá sin nkojinra 17la kaín chojni tso̱nínkakohanra kixin tinkachónkira ti janhan. 18Kjánchó nijnko ka̱xi̱hi chónta ikjára tsꞌitjáñahña. 19A̱ndá ti tsi̱to̱éhyara tsinkachónkira ti janhan la tsochontara ti kjuachón nkochríxín.
20’A̱ndá ti ó tsꞌikonra kixin tsíka̱ntatjen ti sin soldado kuenté Jerusalén la tso̱noaxínra kixin í séhya tsꞌitjáña ti chjasin. 21A̱ndá ti sin tjejó Judea la sáchrókjui̱ sin nó ijna̱. A̱ndá ti sin tjejó ntiha la sáchrókjuixin sin ntiha la ti sin tjejó no̱nte̱e la í tsokjanhña sin chjasin 22#Os. 9:7.*kixin ti ña̱o a la tsjasóte kaín chojni kixin tsoxiteyá kaín ti nkehe nixja xroon itén Díos. 23Kjánchó nóa ti chojnichjin tjejóyá ti ña̱o a la ko ti sin chónta xjanhnte̱ na̱xa̱ takí. Kixin ti ña̱o a la tsꞌixin kjuachrakon ti chjasin la Díos tsjajon kjuachaxin kixin tsjasóte kaín chojni. 24La itsje chojni tsꞌenxín sin espada la ko nkojín sin la tsotsé sin sátsjiko sin ti tjejó kaín ti íso nación la ntiha tsjasóte sin. A̱ndá kaín ti sin jehya judío tsji̱xi̱n ókjé nación mé tsinkátja sin ti chjasin Jerusalén hasta tjeje̱ ti ña̱o kjuajon Díos kjuachaxin xi̱kaha tso̱hen.
Ti itsi ti Xje̱en Díos kꞌóna Chojni
(Mt. 24:29-35, 42-44; Mr. 13:24-37)
25 #
Is. 13:10; Ez. 32:7; Jl. 2:31; Ap. 6:12, 13. *’A̱ndá tsꞌikonra tsꞌixikóhen nkehe ti ña̱o la ko nitjó la ko ti konotsé. A̱ndá ti chjasintajni nchónhña kjuaxikaon tsꞌixin kaín nación la ko tsochrakon chojni kixin imá tso̱jna̱ ti nda̱ñao la tsinkákjaminkí ìnta̱ itsi. 26Ndá kaín chojni la tsꞌaniátexín sin ti kjuachrakon ti ó tsjenka̱yáxin sin ti nkehe tso̱hen ti chjasintajni kixin kaín ti nkehe sinkáni nka̱jní la tsꞌinki. 27#Dn. 7:13; Ap. 1:7.*Ndá xi̱kaha tsꞌikon sin itsi ti Xje̱en Díos kꞌóna Chojni, itsi chríkjan itji̱ tsi̱ka̱o ti kjuachaxin ijié kuènté nkaya nka̱jní. 28Ti ó tsoxrankíxin tso̱hen kaín tíhi, la chrókócháhara chrókontára nka̱jní kixin í kjínhña itjen ti nkexro tsaáxinra.
29Kja̱xin kjuíncheyóe̱xin chꞌan ijnko nkehe ndáchro chꞌan:
―Tsjehéra ti inta tꞌóna to higo la ko kaín ti íso inta. 30Ti ó tsꞌikonra kixin tinkákꞌaña ti kahnte̱, la tso̱noaxínra kixin í séhya tsi ti ncha̱kuén ichrin. 31Mé xi̱kaha ti ó tsꞌikonra kixin kaín ti nkehe í sítóhen, la tso̱nohara kixin ti kjuachaxin kuènté Díos la ó chjino itjen.
32’Chaxín ndáxrja̱n kixin kaín tíhi tso̱hen ti na̱xa̱ tꞌenhña ti chojni tjejó ijie. 33Ti nka̱jní la ko ti chjasintajni la tsꞌitjáña. A̱ndá ti itan kuénta̱na la tsꞌitjáñahña nkochríxín.
34’Méxra̱ chrókóxakohanra, kixin chrókjuichròehyara kixin ti nkehe nduáhya chꞌera la ko ti tókoanra la ko ti kjuaxikaon chontara, ndá titàya̱ itsié ti ña̱o tsjixixín la chrókꞌuejochoénhñara. 35La mé éxi ijnko trampa chrókꞌuikjehe̱ mé xi̱kaha itsi ti ña̱o a, la xi̱kaha tsjasóte kaín ti chojni siín chjasintajni ti tsꞌejóchóe̱nhña sin. 36Méxra̱ jína chrókꞌuejotsjehera la ko chrónixjehéra Díos kixin ti ó itsi kaín ti kjuaxikaon la Díos chrókjuinchekaá ti jahara kixin tsjachara tso̱chjinara ti itjen ti Xje̱en Díos kꞌóna Chojni.
37 #
Lc. 19:47. *La xi̱kaha kaín ña̱o kjua̱ko̱xi̱n chꞌin Jesús ti ni̱nko, ndá ti ó tie la sátji chꞌan ti ijna̱ Olivo, la ntiha kuíto̱he chꞌan. 38La kaín chojni nchítjón kóchjina sin ti ni̱nko nkojnko ña̱o kixin tsihin sin ti nkehe tjako chꞌan.
Zur Zeit ausgewählt:
Lucas 21: poeNTplus
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2016, Wycliffe Bible Translators, Inc. All rights reserved.