Ntandiliko 3
3
Sambi inandi na asabu yake
1Nnyongo ávele na ulamba kuvapunda anyama vammalele va munnyitu vanavaumbile Yahwe Nnungu. Bahi nnyongo nkunnyaulila ayula mmahe kuchidoni, “Ati muhiu kuva Nnungu áhawile kuva munalye vihepo vya nnandi wohewo wa m'bustani?” 2Mmahe nkunnyang'ula ayula nnyongo kuchidoni, “Nanga, tùnahulula chihi kulya vihepo vya milandi ivêle m'bustani, 3henga Nnungu áhawile kuva, tunalye vihepo vya nnandi uvêle ching'ati bustani, na wala tunaukwahe, na tukàtenda uchocho tùmbekuhwa.” 4Nnyongo nkunnyaulila mmahe kuchidoni, “Mmh! Nanga pamumbekuhwa! 5Nnungu áhawile uchocho kwa kuva ànimala kuva mukàlya vihepo vya nnandi anewo ding'ano dyenu dichidihunukuliwe, na mwenu mùmbekuva muchi mwene Nnungu kwa kumala lambone na lahakalenge.”
6Bahi mmahe pawene kuva vihepo anevyo vìnafala namene kwa chakulya, na vìnautila mmeho na vìnafala kwa kupata lúnda, nang'e nkuhepa chihepo cha nnandi anewo, nkulya, nkumwing'a na nng'andomwe anavele nawe pamo, nanang'e nkulya. 7Upala vammalele nkuhunukuliwa ding'ano, nkulimala kuva vàvele chihi lukundu mwandu, bahi nkutota mahamba la nnandi wa tini la kulikuhikija.
8Bahi chinalyulo, mpapa pauchipunga, ayula nnume na n'jawe nkupilikana dihinji dya Yahwe Nnungu waonga m'bustani, vanang'o nkulipiha mmilandi ya m'bustani kuchinga Yahwe Nnungu anavone. 9Henga Yahwe Nnungu nkunchema ayula nnume na kummuja kuchidoni, “Ùvele kwachi?” 10Nang'e nkunnyang'ula kuchidoni, “Nangu ngúpilikene dihinji dyako m'bustani, nangu nkuyopa, nkulipiha, kwa kuva ngúvele lukundu mwandu.” 11Yahwe Nnungu nkummuja kuchidoni, “Nnani akuhaulidîle kuva úvele lukundu mwandu? Dachi, ùlile chihepo cha nnandi chinikulimbijije unalye?” 12Ayula nnume nkuyang'ula kuchidoni, “Ayu mmahe úngupèlè aikale pamo na nangu njo angupêle chihepo cha nnandi anewo, nangu nkulya.”
13Anepo Yahwe Nnungu nkummuja ayula mmahe kuchidoni, “Chinu ntwani achino chiuchitendile?” Mmahe nkuyang'ula kuchidoni, “Nnyongo áningulambila, nangu nkulya.”
Asabu
14Bahi Yahwe Nnungu nkunnyaulila nnyongo kuchidoni,
“Kwa kuva wako ùtendile uchocho,
bahi ùnilaniwa kupunda anyama vammalele valângwa,
na kupunda anyama vammalele va munnyitu.
Ùmbekwava kwa litumbo lyako,
na kuwila litutunga maduva lammalele la umi wako.
15Nìmbevika umongo kati yakuwe na ayu mmahe,
kati ya chiveleko chako na vanu va nnukolo lwanga ayu mmahe.
Na munu yumo muvanu va nnukolo lwake àmbeponda muti wako,
na wako ùmbennuma aneyo munu chihing'ino chake.”
16Anepo nkunnyaulila ayula mmahe kuchidoni,
“Nìmbekunonoheja uchungu wa kuveleka,
ùmbevaveleka vana kwa uchungu.
Henga, pamo na anelyo, wako ùmbekuva chihi nkuntamwa namene ntwalo,
nanang'e àmbekutawala wako.”
17Anepo Yahwe Nnungu nkunnyaulila ayula nnume kuchidoni,
“Kwa kuva wako ùmpilikanidile n'jalo,
nkulya vihepo vya nnandi vinnakulimbijije unalye,
bahi ulongo ùnilaniwa ing'anya yakuwe.
Na wako ùmbelipatila chakulya kuhaloka muulongo anewo kwa kukola madengo lakamajanga namene,
mmaduva lammalele la umi wako.
18Ulongo ùmbemeja miva na lukwekwe kwajili yako,
na wako ùmbekulya mahamba la mmwelu.
19Na ùmbelipatila chakulya kwa kukola madengo lakamajanga namene,
mpaka paumbeuya muulongo mutwaliwije.
Kwa kuva, wako úumbwije kwa litutunga, na uchiuile kavila kuva litutunga.”
20Bahi ayula nnume nkunchema n'jawe lina “Eva,#3:20 Lidi lya lina Eva lìpilikanika muchi lilove lya Chieblaniya livêle na mana ya “avêle na umi.”” kwa kuva, àmbekuva mama wa vanu vammalele. 21Yahwe Nnungu nkunkatapajija Adamu na n'jawe mambende, nkuvawaja.
Adamu na Eva vàvingangwa m'bustani
22Bahi Yahwe Nnungu nkuchidoni, “Vino vanu vàvele muchi mutuvelelee hwetu, kwa kulamala lambone na lahakalenge. Vino vàlembelewa vadivilwe kulya chihepo cha nnandi wa umi ukee na ntululilo, kwa kuva, vakàlya vàmbekuva na umi ukee na ntululilo. 23Bahi Yahwe Nnungu nkuvavingangila anevo vanu panda bustani ya Adeni, uchinga vakalime muulongo muvanatwaliwijwe. 24Nnungu pavavingangidile vanu panda bustani, nkuvivika viumbe vya kulihunde vivêle na dimapa, m'bali wa mashaliki wa Bustani ya Adeni pamo na upanga wa moto uchidinguka-dinguka nnyenje, kwa kuichunga indila ichihwena kunnandi wa umi ukee na ntululilo.
Zur Zeit ausgewählt:
Ntandiliko 3: Chimakonde
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020 Pioneer Bible Translators