Chhóng-sṳ Ki 6

Ngìn-lui ke Sià-ok

1Ngìn-lui chhai thi-song khôi-sṳ́ chen-kâ ke sṳ̀, ya yû kiung moi-é. 2Ke-têu chhṳ̂n-cho Song-ti lai-é ke khon-tó ngìn-lui ke moi-é chhin-chiâng, chhiu sùi-yi tho̍k-hi cho pû-ngiòng. 3Song-chú kóng: “Ngìn ki-yèn su̍k ngiuk-thí, Ngài ke Lìn chhiu m̀-voi yún-yén chhai kì tî-poi, só-yî kì ke su-miang khó-yî to yit-pak ngi-sṳ̍p se.” 4Ke-sṳ̀ yî-heu, chhai thi-song yû kô-thai ke ngìn; kì-têu he chhṳ̂n-cho Song-ti ke lai-é lâu ngìn-lui ke moi-é só-kiung ke heu-thoi, he kú-sṳ̀-thoi ke yîn-hiùng lâu miàng-ngìn.

5Song-chú khon-tó ngìn-lui chhai thi-song chhui-ok mân-mân, ngìn-ngìn sîm-chûng kûi-ngit só-sióng ke chhiòn-he sià-ok. 6Song-chú tho-than Kì chho-ngìn chhai thi-song, sîm-chûng yù-sông. 7Song-chú kóng: “Ngài oi tui thi-song sêu-me̍t Ngài chho ke ngìn-lui, ya oi chhù-me̍t chhu-lui, phà-chhùng lâu fî-niâu, yîn-vi Ngài heu-fí chho kì-têu.” 8Chúng-he Song-chú fôn-hí Nò-â.

Nò-â ke Ku-sṳ

9Nò-â ke heu-thoi ki chhai hâ-poi: Nò-â he chṳn-chhṳ̍t ngìn, he tông-sṳ̀ yit-ke mò-hó hiàm ke ngìn; kì lâu Song-ti yû chhîn-me̍t ke kâu-vông. 10Nò-â kiung sâm-ke lai-é, chhiu-he Sám, Hàm lâu Ngâ-fut. 11Khì-thâ ke ngìn chhai Song-ti khon-lòi he sià-ok ke, chhiòn-thi chhûng-mân hiûng-phau. 12Song-ti khon chhiòn sṳ-kie yí-kîn phai-fái, só-yû ke ngìn chhai thi-song só-hàng ke fî-sòng sià-ok.

13Song-ti tui Nò-â kóng: “Ngài kiet-thin oi me̍t-thet só-yû ke ngìn, yîn-vi sṳ-kie chhûng-mân kì-têu ke hiûng-phau; Ngài oi chiông kì-têu lâu liá sṳ-kie khiung-ha sêu-me̍t. 14Ngì oi tho̍k chhiùng-pak su-liau cho yit-chak thai-sòn; tî-poi oi yû tông-tô kiên-fòng, ngoi-poi, tî-poi chhiòn-phu chhit chhiùng-hiông. 15Liá thai-sòn oi án-ngiòng cho: chhòng yit-pak sâm-sṳ̍p sâm kûng-chhak, fat ngi-sṳ̍p ngi kûng-chhak, kô sṳ̍p-sâm kûng-chhak. 16Si-vì oi cho chhûng-mùn chiap-to sòn-táng, kô si-sṳ̍p si kûng-fûn#6:16 “Si-vì oi cho ... kûng-fûn” ya-he yi̍t-cho “Oi cho thiên-chhûng, si-sṳ̍p si kûng-fûn thai”.. Mùn oi ôn chhai sùn-thèu. Thai-sòn oi yû song, chûng, hâ sâm-chhèn. 17Khon â! Ngài oi pûn thai-súi fam-lam thai-thi, sêu-me̍t thiên-ha yit-chhiet yû sâng-miang, yû hiet-hi ke sâng-vu̍t; só-yû chhai thi-song ke lûng-chúng oi me̍t-thet. 18Chúng-he Ngài lâu ngì li̍p-yok. Ngì lâu ngiâ pû-ngiòng, lai-é, sîm-khiû oi ngi̍p-hi thai-sòn. 19Yit-chhiet yû sâng-miang ke thung-vu̍t kok yit-tui, yit kûng yit mà, ngì oi tai-ngi̍p thai-sòn, cho-tet chhai ngì ke-vi pó-chhiòn kì-têu ke sâng-miang. 20Kok-chúng fî-niâu, thèu-sâng, thi-song ke phà-chhùng, tak-yong yit-tui, oi to ngì ke-vi lòi pó-chhiòn sâng-miang. 21Ngì oi chit-chhùn kok-chúng sṳ̍t-vu̍t, lòi-cho ngì lâu kì-têu ke sṳ̍t-vu̍t.” 22Nò-â chhiu vàn-chhiòn cheu Song-ti só fûn-fu ke hi-cho.

Zur Zeit ausgewählt:

Chhóng-sṳ Ki 6: THV12Rdb

Markierung

Kopieren

Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.

Mehr über die HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) erfahren