Smnlean 20
20
Abraham ma Abimeleq
1Abraham we peeyah hiya theruy Negeb, tnooda meniq Gerar cenga Qades ma Sur. 2Abraham we, ngalun na mtswai na kesun mlawa ka mqedil na Sarah. Abimeleq qbsuran paru Gerar smkagul seediq mosa madis Sarah. 3Keeman ciida, Utux Baro we meyah ckceka sepi Abimeleq hiya ka heya. Rmengo heya: “Tai, mphuqil su ka isu da. Ado mqedil nadis su we mqedil niqan rseno ka heya!” 4Ini suupu mtaqi Sarah nana ka Abimeleq. Rmengo ka heya: “Bukung! Ani kknsderux qnhlangan we, sgliqun su uri ho? 5Seediq kiya we uxe rmnengo kenan: ‘Heya we mtswai mu’ peni? Ani mqedil nii uri we rmnengo mesa: ‘Heya we qbsuran mu.’ Noda mu nii we msderux ka lhebun mu ma uka rutiq ka baga mu.” 6Rmengo heya meniq ckceka pnspiyan ka Utux Baro: “Mkela ku uri, noda su nii we msderux ka lhebun su. Yaku ka meyah hmetur sunan. So su uxe moda mqnuuqu yaku. Maanu so kiya de, ini ku sruwa mosa su tmelung heya. 7Saya ka isu we bqani nanak heya ka mqedil seediq nii. Ado heya we mpgeela kari, mpdudul sunan ka heya, so su mpkuudus. Netun su ini bqani de, maha su klaun, isu ma kana seediq su we mphuqil kana.”
8Mtutuy mgrebu ka Abimeleq de, plaanun na ka tnqliyan na. Pqbhangun na tmgesa dheya kana ka noda nii. Dheya de miicu riyung. 9Mlawa Abraham ka Abimeleq, rmengo heya: “Ma su mchaya kenan, maanu ka wada mu sqnaqah sunan, betaq su so nii peeniq paru qnquwan noda ka qlhangan mu ho? Isu we wada su qmeepah uxe ba ddaun wa!” 10Rmengo Abraham ka Abimeleq: “Maanu ka wada su qtaan betaq su so nii ka noda su ho?” 11Rmengo ka Abraham: “Lnglungan mu we dseediq hini we ini kiicu Utux Baro, ririh mqedil mu mphuqil kenan ka dheya. 12Bale ba mtswai mu ka heya uri. Heya we mntena tama nami ma ini pntena ka bubu. Bobo na de wada miyan msterung mqedil mu di. 13Utux Baro we mnlawa kenan mlatac sapah tama mu, mtnooda nami meniq nganguc ciida, yaku ka rmengo heya: Ani ta moda ani inu, isu we rngagi ka seediq: ‘Heya we qbsuran mu’ kesa. Kiya de pgkela ggaalu su kenan knesa mu.” 14Abimeleq de, sbege na Abraham ka dapa, miric, tnqliyan, tnqliyan mqedil. Sarah mqedil na uri we sbege na heya uri. 15Rmengo ka Abimeleq: “Tai, ga berah su kana ka dxeral. Kenu ka qntaan su malu de eniq hiya da.” 16Rmengo Sarah ka heya: “Tai, biqun mu 10'00 demux ging ka qbsuran su. Tai, gisu ku mubung qnsiqa mu meniq berah tnsapah su ka nii. Mquri dseediq, pgkela isu we uka qnquwan su.” 17Dmurun Utux Baro ka Abraham de wada pkmalu knnarux Abimeleq ma mqedil na ma, dtnqliyan na mqedil ka Utux Baro. Kiya de tmlaqi ka dheya di. 18Ado Utux Tmninun we ririh Sarah mqedil Abraham, wada na asi ini pniqi laqi kana ka ddmqedil sapah na Abimeleq.
Zur Zeit ausgewählt:
Smnlean 20: Stgdaya
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society in Taiwan, 2020
© 台灣聖經公會版權所有，2020