Smnlean 22
22
Mege Yijxaq ka Abraham
1Bobo na noda nii, Utux Baro we pseung Abraham. Rmengo heya: “Abraham!” Cmiyuk ka heya: “Nii ku hini.” 2Rmengo ka Utux Baro: “Desi ka laqi su, kiya ka 1 ba laqi su Yijxaq sgaalu su. Psquri dxeral Moriyah, osa bobo 1 dgiyaq tniyu misu hiya ma, ngali spuhan psqama ka hiya.” 3Mtutuy mgrebu ka Abraham, psramal dapa roba de, spuwan na madis ka 2 tnqliyan na ma laqi na Yijxaq. Mhedu cmeyax qhuni pthuun na smapuh de mosa mquri dxeral tniyu Utux Baro di. 4Mk3 ali de Abraham ge sthyaun na dmeeda ka dxeral kiya. 5Rmengo tnqliyan na ka Abraham: “Eniq hini suupu dapa roba ka yamu. Yaku ma laqi mu we maha nami thmuku hiya, kiya de meeyah miyan yamu hini dungal.” 6Abraham we spaapa na Yijxaq laqi na ka qhuni ssapuh, baga na we dmoi puniq ma yayu, kiya de msuupu mosa ka 2 heyi. 7Rmengo tama na Abraham ka Yijxaq: “Tama!” Cmiyuk ka Abraham: “Laqi mu gisu ku hini.” Rmengo ka Yijxaq: “Tai, niqan kana ka puniq ma qhuni di, gaga inu ka wawa miric ssapuh ta?” 8Rmengo ka Abraham: “Laqi mu, mpsramal nanak wawa miric ssapuh ka Utux Baro.” Kiya de msuupu mosa ka 2 heyi nii.
9Dehuk dxeral tniyu Utux Baro ka dheya, smalu spuhan ka Abraham, psaun na bobo hiya ka qhuni. Bkean na ka Yijxaq laqi na, psaun na bobo qhuni sspuhan. 10Kiya de mangal yayu ka Abraham, mphuqil laqi na. 11Peeyah karac baro mlawa heya ka snkgulan Utux Tmninun: “Abraham! Abraham!” Cmiyuk ka heya: “Nii ku hini!” 12Rmengo ka snkgulan baro: “Iya psquri heyi laqi nii ka baga su! Iya bale pqluqah heya! Saya du we klaun mu, isu we miicu su Utux Baro ka isu. Ado ini su krwahi mege yaku ka ani 1 ba laqi su.” 13Mttqiri dmeeda qmita ka Abraham. Tai, gaga pqeya ckceka kubuy qhuni ka 2 urung na ka kingal baus miric rudu. Saun na mangal ka baus miric de kiya ka sbege na psqama smapuh pririh laqi na. 14Abraham we “Utux Tmninun Ire” kesun na tmngayan ka dxeral kiya. Ani betaq saya gaga rmengo ka dseediq na: “Ida niqan pnsramal na ka dgiyaq Utux Tmninun.”
15Mndaha mlawa Abraham peeyah karac baro ka snkgulan Utux Tmninun. 16Rmengo: “Rmengo ka Utux Tmninun: ‘Wada su moda so nii, ini su krwahi ka laqi su, kiya ka 1 ba laqi su. Kiya de mptiyu ku nak yaku ma mpsdehu ku: 17Mbege ku egu smbleyaq isu, ltlutuc lqlaqi su we maha mrana riyung. Mntena so pngerah karac baro ma so bnaquy ssiyo rcilung. Ltlutuc lqlaqi su we maha mangal dlualang pais. 18Ririh ltlutuc laqi su maha mangal snbleqan ka kana qnlhangan bobo dxeral, ado isu we muyu su kari mu.’” 19Kiya de mbrinah tnqliyan na hiya ka Abraham. Msuupu mosa ka dheya, mosa mquri Beerseba. Kiya de meniq Beerseba ka Abraham.
Lqlaqi Nahor
20Bobo na noda dnii, niqan seediq meyah rmengo Abraham: “Tai, Milkah we tnlaqi duma laqi rseno Nahor mtswai su ka heya: 21Qbsuran na we Uc, mtswai na we Buj ma Qemuel tama Aram. 22Kesed, Xajo, Pildas, Yidlap ma Betuel.” 23Tmlaqi Ribqah ka Betuel. 8 heyi nii we kiya ka Milkah tnlaqi na Nahor mtswai Abraham. 24Reumah mqedil Nahor we pntuting Tebax, Gaxam, Taxas ma Maakah.
Zur Zeit ausgewählt:
Smnlean 22: Stgdaya
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society in Taiwan, 2020
© 台灣聖經公會版權所有，2020