Smnlean 29
29
Dehuk Sapah Rapan ka Yakobu
1Mosa ka Yakobu, dehuk dxeral seediq nklaan hido. 2Mita ka hiya, tai, ga niqan 1 kbbulan qsiya ka ckceka qnpahan. Tai, niqan 3 qpuruh miric ga meniq ssiyo kbbulan qsiya. Paru bale ka btunux ga bobo quwaq kbbulan qsiya. 3Msseli hiya kana ka miric, seediq de hrigun daha siyo ka btunux de bubul qsiya pmahan daha qsiya ka miric. Kiya ka btunux de psaun daha nniqan na quwaq hghugan qsiya dungal.
4Rmengo dheya ka Yakobu: “Mtswai, Pneyah namu inu ho?” Rmengo ka dheya: “Pneyah miyan Xaran.” 5Rmengo dheya ka hiya: “Klaun namu ka Rapan lqlaqi laqi Nahor ho?” Rmengo ka dheya: “Klaun miyan.” 6Rmengo dheya ka Yakobu: “Gaga malu ka hiya ho?” Cmiyuk ka dheya: “Malu bale. Tai, gisu msuupu meyah ka Rajie weewa na ma miric.” 7Rmengo ka Yakobu: “Tai, gisu mtilux ka hido, ini dehuk psseli tnbugan na. Bbuli ka qsiya pmahi ka miric de, adis tbugan dungal ho?” 8Cmiyuk ka dheya: “Ini nami tduwa so kiya. Asi miyan ka tmara msseli kana ka miric, hrigun daha peeyah quwaq kbbulan qsiya ka btunux de, kiya ka tduwa nami bubul qsiya piimah miric da.”
9Gisu mpprengo dheya ciida ka Yakobu, gisu nii ka Rajie ma miric tama na. Ado Rajie we mdudul miric ka hiya. 10Yakobu we taan na ka Rajie weewa Rapan qbsuran bubu na ma miric Rapan de, mosa berah hmeruy btunux ga quwaq hghugan qsiya. Hghugan na ka qsiya piimah miric Rapan qbsuran bubu na. 11Mhedu tmunguh Rajie ka Yakobu de lmingis paru da. 12Rmengo Rajie ka Yakobu, hiya we dadal tama na, kiya ka laqi Ribqah. Rajie de tmalang mosa rmengo tama na ka hiya.
13Mbahang gisu hini ka Yakobu mesa ka Rapan de, tmalang mosa smterung hiya. Hiya we qrapun na ma tmunguh hiya de, desun na sapah na. Srengo na Rapan kana ka ndaan na ka Yakobu. 14Rmengo hiya ka Rapan: “Isu we bale ba ita nanak.” Kiya de msuupu heya 1 idas ka Yakobu.
Yakobu Ririh Rajie ma Leah Qmeepah Rapan
15Rmengo Yakobu ka Rapan: “Ani su mu kesun mslutuc ba ka isu we, hmuwa kiya da uka ngngalun su meepah kenan da ho?” 16Rapan we niqan 2 ka weewa na. Ngayan tgqbsuran we Leah, ngayan mtswai we Rajie. 17Doriq Leah we msurung uka beyax. Rajie de mbtunux ba taan. 18Smkuxul Rajie ka Yakobu, kiya de rmengo: “Mpsruwa ku meepah 7 knkawas isu ririh Rajie tgswai weewa su.” 19Rmengo ka Rapan: “Mgkala sbege mu seediq icil ka sbege mu isu. Eyah theyaq meniq yaku ka isu wa!” 20Yakobu de ririh Rajie de mpqeepah 7 knkawas ka heya. Ado smkuxul riyung Rajie ka heya de, ngalan na mntena ini kpiya ali ka 7 knkawas.
21Rmengo quri Rapan ka Yakobu: “Dehuk ka ali da, braho su biqi kenan ka mqedil mu da. Klaun mu msuupu heya mtaqi.” 22Kiya de psramal rayi ka Rapan ma qdalun na kana ka seediq alang hiya. 23Betaq keeman de, madis Leah ka heya sbege na Yakobu. Yakobu de mtheyaq heya mtaqi da. 24Rapan we sbege na Leah ka Jilpah tnqliyan na mqedil mptnqliyan Leah. 25Betaq mgrebu caman de, tai, heya we Leah. Rmengo Rapan ka Yakobu: “Maanu ka ndaan su yaku ho? Meepah ku isu we uxe ririh Rajie peni? Ma su mberiq yaku da ho?” 26Cmiyuk ka Rapan: “Ini mu pstrengi seediq ka qbsuran weewa ma psterung ka tgswai weewa we, uka so nii ka gaya miyan hini. 27Pdheqi 7 ali ka nii han, kiya de bege nami isu ka heya uri da. Kiya de, asi su ka meepah 7 knkawas dungal ka isu.” 28So kiya moda ka Yakobu. Mttuku ka 7 ali Leah de, Rapan we sbege na mpqedil Yakobu ka Rajie. 29Rapan we sbege na Rajie ka Bilhah tnqliyan mqedil na mptnqliyan Rajie. 30Yakobu we msuupu mtaqi Rajie uri ka heya. Kiya uri we mgkala gnaalu na Rajie ka Leah. Kiya de meepah Rapan 7 knkawas dungal ka heya.
Lqlaqi Yakobu
31Utux Tmninun we qtaan na ini glaani ka Leah de, sbleqan na ptuting laqi. Rajie we kdungean ini tnlaqi. 32Mchedil ma tmlaqi rseno ka Leah, Reuben kesun na tmngayan ka heya. Ado rmengo ka heya: “Qmita pngqraqil mu ka Utux Tmninun, saya de maha mgaalu kenan ka rseno mu da.” 33Kiya de mchedil ma tmlaqi rseno dungal, Simeon kesun na tmngayan. Rmengo: “Utux Tmninun we mnbahang ini glaani ka yaku de, mege laqi nii dungal ka heya.” 34Heya we mchedil ma tmlaqi rseno dungal ka heya, rmengo: “Mntuting ku 3 laqi rseno mu ka yaku da. Saya de, ida meyah smdaling yaku ka heya da.” Kiya de Yakobu we Lewiy kesun na tmngayan ka heya. 35Mchedil ma tmlaqi dungal ka heya, rmengo: “Nii de mptmdahu ku Utux Tmninun.” Kiya de Yehudah kesun na tmngayan ka heya. Bobo na nii de msange tmlaqi ka heya da.
Zur Zeit ausgewählt:
Smnlean 29: Stgdaya
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society in Taiwan, 2020
© 台灣聖經公會版權所有，2020