Smnlean 35

Pbleyaq Yakobu Meniq Beytel ka Utux Baro

1Rmengo Yakobu ka Utux Baro: “Tutui! Osa Beytel eeniq hiya. Smlaani 1 spuhan Utux Baro hiya. Kiya ka Utux Baro mntqita sunan qduriq su Esaw qbsuran su ciida.” 2Kiya de rmengo tnsapah na ka heya ma, kana gaga theyaq heya ka Yakobu: “Qdaani ka tikung utux icil qlhangan gaga ckceka namu, psbgurah ka heyi namu ma pryuxi lukus. 3Mptutui nami mosa Beytel. Mpsmalu ku 1 spuhan Utux Baro hiya. Kiya ka Utux Baro dmnayo kenan meniq ku ali mqraqil ciida, Utux Baro mtheyaq kenan mkleelu ku mkkesa ciida.” 4Dheya de sbege daha Yakobu kana ka tikung icil qlhangan gaga baga daha ma, briku gaga birac daha. Kiya de Yakobu we reesun na pusu qhuni raus Sekem hiya da.

5Prading thedil mkkesa ka dheya. Utux Baro we pkcugun na ka dseediq ssiyo alang hiya. Kiya de ini bhero lqlaqi Yakobu ka dheya. 6Betaq Luj, kiya ka Beytel dxeral Kenaan ka Yakobu ma kana dseediq mnsuupu heya. 7Smalu 1 spuhan hiya ka heya. Iru Beytel kesun na tmngayan ka dxeral kiya. Ado qduriq qbsuran na ciida we, mtqita heya meniq hiya ka Utux Baro. 8Mhuqil ka Deborah mnunuh Ribqah da. Reesun daha pusu qhuni raus tgtruma Beytel hiya. Ngayan qhuni kiya we Aharon Baku kesun daha tmngayan.

9Mpbrinah peeyah Padan Aram ka Yakobu we, mtqita heya dungal ka Utux Baro ma pbleyaq heya. 10Rmengo heya ka Utux Baro: “Bale ba ngayan su we Yakobu. Peeyah saya de iya kesi Yakobu, ngayan su we Israel kesi tmngayan da.” Kiya de Israel kesun na marah ptngayan ka heya. 11Rmengo heya ka Utux Baro: “Yaku we Utux Baro Kana Beyax. Ptnlaqi su egu riyung ka isu. Bobo na de maha peeyah isu meeyah ka 1 qnlhangan ma egu qnlhangan. Kiya uri we mpeeyah isu ka egu qbsuran paru uri. 12Quri so dxeral bnege mu Abraham ma Yijxaq we, bege mu sunan. Bege mu lqlaqi laqi su ka dxeral nii.” 13Utux Baro de mgkala baro peeyah dxeral hnyegan na hiya da. 14Yakobu de pheyu 1 eruc btunux meniq pnrngagan daha Utux Baro hiya. Yakobu de mege spuhan sino ma, hrigan na abura meniq bobo eruc btunux nii. 15Yakobu de, Beytel kesun na tmngayan ka dxeral pnrngagan daha Utux Baro hiya.

Mhuqil ka Rajie

16Kndalax peeyah Beytel mosa ka Yakobu, ida kiya theya hari ddhekan ka Eprat nana. Rajie de prading hlidun, msriqu riyung tmlaqi. 17Msriqu riyung tmlaqi ka heya ciida, rmengo heya ka mqedil mptnlaqi: “Iya kiicu, maha su niqan 1 laqi rseno dungal.” 18Mphuqil bale ma niqan biciq hengak na ciida han we, Ben Oni kesun na tmngayan ka laqi na. Kiya de Binyamin kesun na tmngayan ka tama na. 19Mhuqil ka Rajie da. Reesun daha ssiyo elu oosa Eprat hiya. Ihurac we kiya ka Betlexem. 20Pteetu btunux habung heya ka Yakobu, kiya ka habung Rajie. Kiya ida gaga habung hiya saya ka btunux nii. 21Mtutuy ma mosa nana ka Israel, pkobu paga Eder.

Lqlaqi Yakobu

(1 No 2:1-2)

22Meniq dxeral hiya ciida ka Israel we, mosa msuupu mtaqi Bilhah mqedil tama na ka Reuben. Mnbahang so noda nii ka Israel uri.

Niqan 12 ka laqi Yakobu. 23Laqi Leah we Reuben, tgqbsuran laqi Yakobu. Kiya uri we Simeon, Lewiy, Yehudah, Yisaskar ma Jebulun. 24Laqi Rajie we Yosehu ma Binyamin. 25Laqi Bilhah tnqliyan Rajie we Dan ma Naptaliy. 26Laqi Jilpah tnqliyan Leah we Gad ma Aser. Lqlaqi Yakobu dnii we kiya ka mntuting Padan Aram hiya kana.

Hnqilan Yijxaq

27Mosa Yijxaq tama na ka Yakobu, betaq Qiryat Arba kiya dxeral Mamre, kiya ka Xebron, dxeral mnoda tnooda Abraham ma Yijxaq. 28Betaq 1'80 knkawas na ka Yijxaq. 29Msdrudan bale muudus ka Yijxaq ma mhuqil da. Wada mosa ddrudan na cbeyo ka heya da. Saan smeku Esaw ma Yakobu laqi na ka heya da.

Zur Zeit ausgewählt:

Smnlean 35: Stgdaya

Markierung

Kopieren