ዋ̈ኒ̇ሳ 13
13
ዬሱ̈ሲ ፌ ታማራን ቶ̈ሂን ሜ̈ጪ̇ዴ
1ኣይሁዳን ፋ̈ሲጋ ባ̈ሊን ዬላ̇ናንዳቦ ጊላ̇ ቃሚ̇ ኣቲ̇ኔ። ዬሱ̈ሲ ዓና ኣላሚን ኣሻ̇ሪ ፉዳ ፌ ባ̈ባ̈ኮ ሉ̈ኪዝ ኬሊ̇ ዬሊ̇ኖን ኤሪዴ። ዓና̇ ኣላሚን ጋልዳ ዎን ፌዪ ማ̈ቂ̇ኖን ካዴ፤ ኢንታ̇ ፎቲ ካንባር ካዴ።
2ዬሱ̈ሳኬ ኢ ታማራን ዎልኣ ኢራ̈ታ ሙይርዶን ሲሞ̈ና ናኣ ኣስቆሮ̈ቶ ዪሁዶ ዬሱ̈ሳ ኣ̈ ኢማ̇ምፔን ሴ̈ጣኒ ኢ ቡዲን ጋርታ ኢ̈ታ̇ ቆፊ ጌልሲዴ። 3ዬሱ̈ሲ፥ ኢ ባ̈ባ̈ዲ ዎይ ባዝ ጋልዳ̇ ኢ̈ብ ሲልጣና ኢሚ̇ኖንዲኬ ማ ኢ ጾ̈ሳ̇̇ ቲ̈ናፖ̇ ዬይኖንዶ̇ ማ ማ̈ቃ̇ር ኢ̈ኮ ሉካ̇ዚንዶ̇ ኤሪዴ። 4ዪ̈ኮታ̇ቦ ፊ̈ሺ ሞ̈ዚምፖ̇ ዲንዳሪ ፌ ጋልዳ̇ ማኢኖ ኣፊሊን ቃ̈ሪ ጋዳ̇ሪ ፎ̈ጻ ኤካ̇ር ፌ ባንቲምባር ጊጺ̇ዴ። 5ኢናፖ ጋባታባር ዋ̈ ኤካ̇ሪ ፌ ታማራን ቶሂን ሜ̈ች ኤ̈̇ዴ፤ ፌ ጊጺኖ ፎ̈ጺምባር ኢንታ ቶሂን ቁቺ̇ ካሊ̇ሲዴ። 6ዬሱ̈ሲ ሜ̈ጪ̇ሙታ ሲሞ̈ን ጴ̈ጥሮ̈ሳክ ዬሊ̇ን ኢያር ኢ̈ኮ “ጎዳ̈ዶ! ኔ̈ኒ ቴ ቶህ ሜጫ̇̈ራ?” ጌይዴ።
7ኢያር ኢ̈ኮ “ቴ ኣብዝ ኦ̈ሙታ ዎኮ ኔ̈ኒ ዓት ኤራባሴ፤ ዓውቺ̇ን ኤራ̈ሬ” ጌይዴ።
8ጴ̈ጥሮ̈ሳር ኢ̈ኮ “ኔ ኣባካር ጌይን ቴ ቶህ ሜ̈ጫባሴ” ጌይዴ፤ ዬሱ̈ሳር ኢ̈ኮ “ቴ ኔ ቶ̈ሂን ሜ̈ጫካይ ኣቴ̇ጌይን ኔባክ ታባክ ፔቲ̇ቲ ዶኢባ̈ሴ” ጌይዴ።
9ሲሞ̈ን ጴ̈ጥሮ̈ሳሬ “ጎዳ̈ዶ! ዪዶኮ ቴ ቶሂን ሙታ̇ ጊዳካይዶን ቴ ኩሺንዳር ቴ ቆሚ̇ንዳሬ ሜ̈ጫ̇ቤ!” ጌይዴ።
10ኢያር ኢ̈ኮ “ፌ ጋሊ̇ን ሜጪ̇ኖ ኣሲ ኢ ጋሊ̇ን ዎይን ጌ̈ሽ̇ ማ̈ቂ̇ኖኮታ̇ቦ ፌ ቶሂን ሙታ̇ ሜ̈ጫ̇ንዳብ ኮሺ̇̈ሬ፤ ዪንቲ̇ ዓት ጌ̈ሼ̇፤ ዎቲናካሬ ዪንቲ̇ ዎይን ጌ̈ሽ ጊዳካ̇ዬ” ጌይዴ። 11ኢ “ዪንቲ̇ ዎይን ጌሽ ጊዳካ̇ዬ” ጌይኖንዳ ኢንታ ጋርታፖ̇ ኢያ ኣ̈ ኢሚ̇ዛ ኦ̈ኖኮ ኢ ኤራዚንኮታ̇ቦ።
12ኢንታ̇ ቶሂን ሜጪ̇ኖፖ̇ ዓኒ ፌ ኣፊሊን ማኣር ፌ ቤሲ̇ን ጋልዳ ማ̈ቂ̇ ዶኣሪ ኢንታኮ “ቴ ዪንታ̇ብ ኣብዝ ዎቲኖኮ ዪንቲ̇ ኤሪና?” ጌይዴ። 13“ዪንቲ̇ ታ̈ና ‘ኣስታማ̈ሪኬ ጎዴ’ ጌይሬ፤ ቴ ኣ̈ስታማ̈ሪክ ጎድኬ ማ̈ቂ̇ኖን ዪኖ̇ ዪንቲ̇ ጌይኖንዳ̇ ኪን። 14ዪዚ ቴ ዪንታ̇̇ቦ ጎድኬ ኣስታማ̈ሪ ማ̈ቃ̇ራ ዪንታ̇ብ ቶህ ሜ̈ጫ̇ዲኮ ዪንታ̇ሬ ዎል ዎልኣ ዪንታ̇ ቶህ ሜጫ̇ንዳብ ኮሺ̈ሬ። 15ቴ ዪንታ̇ብ ዎቲኖንዲፌ̈ኒ ዪንታ̇ር ዪና̇ ኢዝፌ̈ን ዎታምፔ̈ን ሚሳ̇ሊ ዪንታ̇ ቴ ቤይሲኔ። 16ቴ ዪንታ̇ክ ኪን ጋ̈ሬ፥ ኣይሎ ፌ ላ̈ፖ̇ ሺባ̈ሴ፤ ኪ̈ቲንቲ̇ኖ̈ዲ ኪ̈ቲ̇ዛፖ̇ ሺባ̈ሴ። 17ዓት ባዚን ዪኖ̇ ዪንቲ̇ ኤሪ̈ሬ። ዪንቲ̇ ኤሪኖ ባዚን ኦ̈ሳ̇ ጋልዳ ፌሼ̇ጌይን ኣንጂንቲ̇ኖ ማ̈ቂ̇̈ሬ።
18“ዪና̇ ቴ ሶ̈ላዚንዳ ዪንቲ ዎይንብ ጊዳካዬ፤ ቴ ማራ̇ጺ̇ኖ ኣሳን ቴ ኤራ̈ሬ፤ ዎቲናካሬ ‘ቴ ኩሽታፖ̇ ሙይኖ ኣሲ ዓኒ ታ̈ብ ጻላ̈ታ ማ̈ቂ̇ዴ’ ጋ̈ሪ ጌ̈ሻ̇ ማጻ̈ፋ ጋልዳ̇ ጻ̈ፊንቲ̇ኖ ቃ̈ሊንዳ̇ ፎቲንታ̇ንዳብ ኮሻ̈̇ሬ። 19“ዪና̇ ማ̈ቃ̇ናፖ̇ ቲ̈ን ዓት ቴ ቲ̈ኒታራ ዪንታ̇̇ብ ሶ̈ላዚን ፎቲንቲ̇ኖፖ̇ ዓኒ ቴ ኦ̈ኖኮ ዪንቲ ታ̈ና ኣማ̇ናምፔ̈ኔ። 20ቴ ዪንታ̇ክ ኪን ጋ̈ሬ፥ ቴ ኪ̈ታ̇ር ሚሺዝ ና̈ሳ ሲስኪዝ ኣሲ ታ̈ኮን ሲስኪ̈ሬ፤ ማ ታ̈ኮን ሲስኪ̇ዝ ኣሲ ታ̈ና ኪ̈ታ̇ር ሚሺኖ̈ኮን ሲስኪ̇̈ሬ” ጌይዴ።
ዬሱ̈ሲ ፌ̈ና ኣር ኢሚ̇ዛ ኦናኮ ሶ̈ሊዴ
ማ̈ቶ̈ሳ 26፡20-25፤ ማ̈ርቆ̈ሳ 14፡17-21፤ ሉቃ̈ሳ 22፡21-23
21ዬሱ̈ሲ ዪኖ̇ ሶ̈ሊኖፖ̇ ዓኒ ፌ ቡ̈ዳ ጋርታ̇ ጫና̇ቂንታ̇ሪ ኢንታ̇ኮ “ቴ ዪንታ̇ክ ኪን ጋ̈ሬ ዪንታ̇ ጋርታ̇ፖ̇ ፔታ̇ና̈ዲ ታ̈ና ኣ̈ ኢሚ̇̈ሬ” ጋ̈ሪ ፋል̇ ሶ̈ሊዴ።
22ኢ ታማ̈ራ̈ን ዪኖ̇ ኢ ኦ̈ና ጌይርኮ̇ ኤራካ̇ዮኮታ̇ቦ ዎል ዎልኣ ኣ̈ፊታ̇ ቤቂ̇ዴ። 23ዬሱ̈ሲ ኢያ ካዛ ኢ ታማ̈ራን ጋርታፖ̇ ፔታ̇ና ኢ ላፍ ዶኢኔ። 24ሲሞ̈ን ጴ̈ጥሮ̈ሲ ኢ̈ክ ኣ̈ፍ ዎሪ “ኢ ዓኖ̇ ኦ̈ና ጌይርኮ̇ ኔ ኦይጪ̇ኔ” ጌይዴ።
25ኢ ጌዳ ዴሽ ጌዪ ዬሱ̈ሳ ዋይንኮ ኡካ̇ሪ “ጎዳ̈ዶ! ኢ ኦኖ?” ጋ̈ሪ ኦይጪ̇ዴ።
26ዬሱ̈ሳሬ ኢ̈ኮ “ታ̈ኒ ዓና̇ ሶ̈ሊ̇ን ፊልኢሲን ጋርታ̇ ዱሻር ኢ̈ብ ኢሚ̇ዛ ኢያ” ጌይዴ፤ ኢ ዪኖ̇ ጋ̈ሪ ሶ̈ሊ̇ን ዱሻሪ ሲሞ̈ና ናኣ ኣስቆሮ̈ቶ ዪሁዳ ቱ̈ሲ̇ዴ። 27ዪሁዶ ሶ̈ሊ̇ን ቱ̈ቂ̇ኖንዲፌ̈ኒ ሴ̈ጣኖ ኤሊ̇ባር ኢ ቡ̈ዳ ጋርታ̇ ጌሊዴ። ዬሱ̈ሳር ኢ̈ኮ “ዪዚ ኔ ዎታንዳብ ኮዪኖ ባዚን ኤሊ̇ር ዎታቤ” ጌይዴ። 28ዬሱ̈ሲ ኣባብ ዪኖ̇ ጌይኖኮ ኢና ቡና ኡሽካ̇ንዳ ዶኢኖ ኣሳን ጋርታፖ̇ ኦ̈ባካር ጌላካ̇ዬ። 29ዪሁዶ ሚሽ ኤ̈̇ዛ ኢያ ማ̈ቂ̇ኖኮታ̇ቦ ኢ ታማራን ጋርታፖ̇ ፔታ̇ን ፔታ̇ናን ዬሱ̈ሲ “ባ̈ሊምቦ̇ ኑ̈ብ ኮሺዝ ባዝ ዎጛቤ ዎይ ዎርባያንቦ ሙጻ̈ታ ኢማ̇ቤ” ጌይዛ ኢንታ̇ክ ማይጺኔ።
30ዪሁዳሬ ሶ̈ሊ̇ን ቱ̈ቂኖፖ̇ ዓኒ ኤሊ̇ባር ኬስካ̇ሪ ሉ̈ኪ̇ዴ፤ ዪኒ̇ባራ ሳ̈ዚን ቃሜ̇።
ጴ̈ጥሮ̈ሲ ዬሱ̈ሳ ካ̈ዲዴ
ማ̈ቶ̈ሳ 26፡33-35፤ ማ̈ርቆ̈ሳ 14፡29-31፤ ሉቃ̈ሳ 22፡33-34
31ዪሁዶ ኬስካ̇ር ሉኪ̇ኖፖ̇ ዓኒ ዬሱ̈ሲ ጌይርዶሪ “ዪዚ ዓት ታ ኣሳ ናኣ̈ዲ ቦንቺ̇ንታ̇ዴ፤ ቴ ጎይባራ ጾ̈ሳ̇̇̈ዳር ቦንቺ̇ንቲ̇ኔ። 32ጾ̈ሲ̇ ቴ ጎይባር ቦንቺ̇ንቴጌይንዶ ኢያር ታ̈ና ቦንቺ̇̈ሬ፤ ኤሊ̇ባር ጋምኣካይዶር ቦንቺ̇̈ሬ።
33“ታ ናኣን! ቴ ዪንታ̇ባር ዎይሊን ዶኣባሴ። ዪንቲ̇ ታ̈ና ኮዪ̈ሬ፤ ቴ ኣይሁዳ ኣላቃንቦ ሶ̈ሊኖንዲፌ̈ኒ ዪንታ̇ባር ሶ̈ላ̈ሬ “ቴ ሉካ̇ዝ ቤሲ̇ን ዪንቲ̇ ዬ̈ንዳብ ዳንዳኢባ̈ሴ” ጌይዴ። 34ቴ ዪንታ̇ብ ኦራ ኪ̈ታ ኢማ̇̈ሬ፤ ዪንቲ̇ ዎል ዎልኣ ካብቴ̇፤ ቴ ዪንታ̇ ካኖንዲፌ̈ን ዪንቲ̇ ዎል ዎልኣ ካንቲ̇ብቴ። 35ዪንቲ̇ ዎል ዎልኣ ካንቴጌይንዶ ዪንቲ̇ ታ ታማሪ ማ̈ቂ̇ኖን ኣሲ ዎይ ኤሪ̈ሬ።
36ሲሞ̈ን ጴ̈ጥሮ̈ሲ ዬሱ̈ሳኮ “ጎዳ̈ዶ! ኔ ሉ̈ካዚን ዎይዲያ?” ጋ̈ሪ ኦይጪ̇ን ዬሱ̈ሳር ኢ̈ኮ “ቴ ሉ̈ካዝ ቤሲ̇ን ዓት ኔ ቴ ዎሂን ዬንዳ̇ ዳንዳኣባሴ ዎቲናካሬ ዎሃ ቴ ዎሂን ዬ̈ሬ” ጋ̈ሪ ኢ̈ብ ማሂዴ።
37ጴ̈ጥሮ̈ሳር ኢ̈ኮ “ጎዳ̈ዶ! ኣባብ ቴ ዓት ኔ ዎሂን ሉካንዳ ዳንዳኣባሳ? ቴ ሜላ ኣቲ̇ን ቴ ሼምፒ̇ንዳ̇ር ማ̈ቂ̇ን ኔኮታ̇ብ ኣ̈ ኢማ̇ንዳ” ጌይዴ።
38ዬሱ̈ሳሬ ኢ̈ኮ “ኔ̈ኒ ኔ ሼምፒ̇ን ቴኮታ̇ብ ኣ̈ ኢማ̇ንዳ? ቴ ኔ̈ክ ኪን ጋ̈ሬ ዓታ̇̈ቦ ኩቶ̇ ኦላ̇ካይዶ̈ን ዓይዚ̇ ቶህ ኔ ታ̈ና ካ̈ዳ̈ሬ” ጋ̈ሪ ኢ̈ብ ማሂዴ።
Zur Zeit ausgewählt:
ዋ̈ኒ̇ሳ 13: ኦጫ̈ቃማ
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
