Matie 2

Lɛgawa yɛ Zezwii bʋbɔɔ yi

1‑Mä Zwidee‑bhölɩɩ 'mö a ‑glɔ ‑bhlʋ wa laa Betelɛɛmö#2.1 Wa ‑kä Betelɛɛmö nʋʋ, 'bhlɩlowli Daviidɩ a 'bhele ma‑a., ‑mä wa gwälɩnɩɛ Zezwii. ‑Lɛ a 'tɛnyɩ 'la 'mö, 'bhlɩlowli 'kɔdɔ wa laa Eloodɩ, mɔɔ 'kämanɩ a‑a. Wa gwälɩɛ Zezwii 'wëë, 'bɔgʋyiwa 'kädɩ ‑wa 'cɩɛɛ ‑zɛlɩɩ a libhoo, wa 'bhöönɩ mää ylʋʋ 'wlʋnɩɛ glu a pɩɔ 'yli 'n wa yiɛ ‑mä Zeluzalɛɛmö yi. 2'N wa yiɛ nɩkpa nimï 'yɩbhä, wa lɛ naa: «Yuu wa gwälɩɛ 'lili 'wʋ, ‑ɔ glɩnɩɛ Zwiiföwaa a 'bhlɩlowli dɛ ɔ ‑wʋ bhä? ‑Zɛleyii ‑ɛ nyɩanyɩɛ 'dɩ nɩɩ wa kɔ gwälɩɩ, mää ylʋʋ 'wlʋnɩɛ glu a pɩɔ 'yli, ‑mä ‑a 'yɩnɛɛ 'ylɩmö, nza ‑a yiɛ ‑a 'kɔ bʋbɔ.» 3‑Maa 'bhlɩlowli Eloodɩ 'nʋä wɛlɩ 'laa, zuzu yɩ ‑sɔɔ ‑gömö ɔ ‑nyɛ Zeluzalɛɛmö a ‑nʋa 'wuë 'sɔ. 4Zaa, Zwiiföwaa 'a Lagɔbʋbɔwaa a 'kifiea 'wuë, wa ‑nyɛ Moyizɩ 'a Gböö a 'cɩawaa 'sɔ, 'n Eloodɩ yuë 'wlu 'yɩbha, ɔ lɛ naa: «Puënyɔɔ Lagɔ ‑sɛɛ ‑lɛ, ‑glɔ ‑mu 'mö wa 'kɔ bhä gwälɩnɩ?» 5Wa lɛ naa: «‑Mä Zwidee‑bhölɩɩ 'mö a ‑glɔɔ wa laa Betelɛɛmö, ‑mä wa 'kɔɔ gwälɩnɩ. Ɛ'ɛ ‑bhö nyɩasɛ, ‑maa, Lagɔ 'a 'möbhïlanɩnyɔɔ, sɛ'ɛ ɔ 'cɛlɩɛ ‑mä 'ɔ Lagɔbɔgʋʋ 'mö nɩɩ, 6Lagɔ lɛ naa:

Betelɛɛmö a nɩkpanyɩ,

'a ‑glɔɔ, wʋ yi 'tikëyi glɩnɩ ‑kë,

mʋʋ kää dɛsɛ,

mʋʋ ziɛ Zwidee‑bhölɩɩ 'mö a ‑gwlɩɩ 'wuë 'wʋ.

Ɛ'ɛ ‑bhö nyɩasɛ,

‑maa nɩkpɛ 'kɔdɔɔ ‑ɔ 'kää Yizlaɛlɩ 'a ngëyii n ‑sɛɛ ‑lɛ 'mö a ‑nʋa

'yuku ‑gänɩ ɔ 'kʋä ‑suu,

‑mä ɔ 'kää 'wlʋ.» # 2.6 Misee 5.1; Ezekiɛlɩ 34.23.

7Wa 'nyɛɛ sa'a Eloodɩ 'dɩɩ, 'bɔgʋyiwa 'kädɩ 'la 'n ɔ yuëë 'wi mö wäzɩ, 'n ɔ yuëë nimï 'yɩbhä. 'Tɛnyɩɩ wa 'yɩ a‑a yuu a ‑zɛleyii 'mö 'ylɩmö, 'n wa yonyɩɛ sʋlʋnɩ ‑kpöö. 8Wa 'nyɔɔ 'dɩ 'wëë, ɔ lɛ naa: «A nɩ mö ‑mä Betelɛɛmö, yu 'la a wɛlɩɩ, a 'kɩ sasɛ nimï 'yɩbhä. A ‑kɔɔ ‑mä ghlɩɩ, a nɩ laa 'dɩ, n 'kä'ɛ na a ‑mä mö n 'kɔ bʋbɔmö.» 9'Bɔgʋyiwa 'kädɩ 'la, 'bhlɩlowli 'nyʋää sa'a 'dɩ 'wëë, 'n wa yiɛ mö. Wa ‑wʋ mö dɔ'wʋ, ‑zɛleyii wa 'yɩ a‑a tɛkädɔ'wʋ mää ylʋʋ 'wlʋnɩɛ glu a pɩɔ 'yli 'ylɩmöö, wa lɛ zʋ a sɛ'ɛ, mɛɛ dɛ'ɛ. Ɛ ‑gënuë 'yuku. ‑Këë ‑mä Betelɛɛmö. ‑Buduu yuu ‑wʋä 'mö a ‑gömö, 'n ɛ yiɛ ‑mä 'nɩgbö. 10Wa yee 'ylɩmö ɛ 'nɩgböä ‑mä ‑buduu ‑gömöö, 'n 'mäna yuëë zinɩ. 11'N wa yiɛ ‑mä ‑budu 'la 'mö 'plɛ. Yuu ‑nyɛ ɔ ‑da Malii 'sɔ 'n wa yuëë 'ylɩmö, 'n wa yiɛ ‑kokomïladigbï glu 'pä 'n wa yoo bʋbɔ. 'N wa yiɛ 'wa 'gblukuu 'klʋ kälɩ. Wa ‑sɛ ‑mä ‑sika, wa ‑sɛ ‑mä 'wlɩ, palɩfɛɛ a 'ke ‑bhlʋ ‑ɛ pää nglɛ a nglɛ wa laa miilɩ, 'n wa ye'ɛɛ ‑mä ‑sɛ. 'N wa yoo ‑li 'la yowʋ 'nyɛ. 12Wa 'bhööä ‑lɛ, 'n Lagɔ yuëë 'yɛla 'mö 'dɩ 'nyɛ nɩɩ, wa nɩ tɩ ‑mä Eloodɩ a mä'a ghlɛnɩ, zaa käböyio wa bhliɛ 'n wa yiɛ wa 'bhele mö.

Zezwii a ‑lowluwa ‑nyɔɔ yɛ ‑mä Ezipötɩ ‑guë mö

13'Bɔgʋyiwa 'kädɩ 'la möä 'wëë, 'n Lagɔzuzukwë ‑bhlʋ yiɛ 'yɛla 'mö Zɩzɛɛfʋ 'dɩ 'nyɛ. A lɛ naa: «Zɩzɛɛfʋ, ‑sɔ 'wʋ, 'libhï yuu ‑nyɛ ɔ ‑da 'sɔ 'wʋ a 'kä ‑mä Ezipötɩ‑bhölɩɩ 'mö ‑guë mö. A nɩ glɩ ‑mä ‑këë, ‑zlɩ n ‑kamö'ɛ 'dɩ 'nyɛɛ nɩɩ a nɩ yii, a 'kä yi. Ɛ'ɛ ‑bhö nyɩasɛ, ‑maa Eloodɩ yia yuu sɛ tɛlɩ ɔ 'kɔ 'lɩbhä ɔ 'kä 'ku.» 14Sabʋ ‑bhʋlʋ ‑kpɔ 'la, 'n Zɩzɛɛfʋ yiɛ yuu ‑nyɛ ɔ ‑da 'sɔ 'wʋ 'libhï, 'n wa yiɛ Ezipötɩ ‑guë mö. 15Wa glɩ ‑mä ‑këë 'n Eloodɩ yiɛ 'ku. ‑Li 'la 'wuë, 'fʋ yɩ'ɩɛ ‑sɩbhä 'wʋ 'plɩ, ‑maa Lagɔ 'a 'möbhïlanɩnyɔɔ Ozee, wɛlɩɩ ɔ bhïla a‑a, yɩ 'kä 'yli 'wlʋnɩ a za, nza yɩ 'plɩɛ ‑sɩbhä 'wʋ. Sɛ'ɛ ɔ gbä a‑a nɩɩ: Lagɔ lɛ naa: N yɛ 'na yuu wäzɩ, ɔ 'kä ‑mä Ezipötɩ 'bhöö. #2.15 Ozee 11.1.

Wa yɛ Betelɛɛmö a yuëa jɛ ‑gömö zlʋnɩ

16 Eloodɩ yɩbhlɩnɩɛ sɛ nɩɩ, 'Bɔgʋyiwa 'la 'kɔ ylʋ nʋʋ, 'n ɔ yiɛ tenyii 'klɛ 'pä. Ɔ lɛ naa: «Tɛɛnɩ ‑mä dɛɛ 'bɔgʋyiwa 'la gbä a‑a wa 'yɩnɩ tɛkädɔ'wʋ yu 'la a ‑zɛleyii 'ylimö ‑këë zɩ'ɛ, nyɩbhɛlɩyuëa 'wuë wa gwälɩnɩɛ ‑mä Betelɛɛmö a ‑glɔ 'mö, 'n ‑mä a ‑kʋkʋyɔwʋ a ‑gligbï 'wʋʋ, ‑muë 'nɩɛ ‑bhlɛ 'ylʋbö 'sɔ ghlɩ muë, 'n ‑muë ‑kää 'ylʋbö 'sɔɔ, wa 'wuë wa nɩ ‑duë 'wlu.» 'N wa yuë 'wlu ‑dɩ. 17Lagɔ a 'möbhïlanɩnyɔ Zelemii, wɛlɩɩ ɔ 'cɛlɩ a‑a ‑mä 'ɔ Lagɔbɔgʋʋ 'möö, sa'a ‑sɩbhä yɩ 'wlʋnɩɛ 'yli. Sɛ'ɛ ɔ gbä a‑a nɩɩ:

18 ‑Mä Ghlamaa glɔ 'mö,

'lɩgbʋgëbë gbä ‑mä.

Wa wi ‑mä 'mlɩ a dila.

Ghlasɛlɩ mɔɔ wiɛ 'ɔ yuëa a za.

Ɔ'ɔɔ 'yɩbhä wa 'kɔ dɛpö.

Ɛ'ɛ ‑bhö nyɩasɛ ‑maa,

'ɔ yuëa 'wuë yɛ 'ku 'wë. # 2.18 Zelemii 31.15.

Zezwii a ‑lowluwa ‑nyɔɔ yɛ ‑mä Ezipötɩ 'bhöö

19 Eloodɩ 'kuä 'wëë, Zɩzɛɛfʋ ‑wʋ ‑bhlɛ ‑mä Ezipötɩ 'n Lagɔzuzukwë ‑bhlʋ yiɛ 'yɛla 'mö yi 'n a yoo 'dɩ 'nyɛ, a lɛ naa: 20«Zɩzɛɛfʋ, ‑sɔ 'wʋ, 'libhï yuu ‑nyɛ ɔ ‑da 'sɔ 'wʋ, a 'kä ‑mä Yizlaɛlɩ a bhlɩɩ 'mö nimï mö. ‑Maa ‑wa tɛlɩ a‑a sɛ wa 'kä yuu 'lɩbhää, wa yɛ 'ku.» 21'N Zɩzɛɛfʋ yiɛ 'wʋ ‑sɔ, 'n ɔ yiɛ yuu ‑nyɛ ɔ ‑da 'sɔ 'wʋ 'libhï, 'n wa yiɛ ‑mä Yizlaɛlɩ a bhlɩɩ 'mö nimï mö. 22‑Maa ɔ 'nʋä nɩɩ, 'bhlɩlowli Eloodɩ a yowli wa laa Akelawisɩ, mɔɔ 'plɩɛ ɔ dɩba a 'bhle 'mö, mɔɔ 'kämanɩa'aa Zwidee‑bhölɩɩ ‑gömöö, dlɩɩ libhoo ɔ ‑nyɛ yuu 'kä ‑mä glɩ a dɔ'wʋ. 'N Lagɔ yoo 'yɛla 'mö 'dɩ 'nyɛ, dɛ ɔ 'kää mö 'n ɔ yoo ‑lɛ sʋlʋnɩ. Bhlɩɩ wa laa Galilee, 'n ɔ yiɛ ‑mä mö. 23‑Mä a glɔ ‑bhlʋ wa laa Nazalɛɛtɩ, ɔ ‑nyɛ Malii 'sɔ 'n wa ‑nyɛ yuu yiɛ ‑mä glɩɛ mö. Sa'a ‑sɩbhä Lagɔ 'a 'möbhïlanɩwaa a wɛlɩɩ 'wlʋnɩɛ 'yli. Sɛ'ɛ wa gbä a‑a nɩɩ: Nazalɛɛtɩ a nɩkpɛɛ wa 'kɔɔ la.

Zur Zeit ausgewählt:

Matie 2: bet

Markierung

Kopieren

Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.

Mehr über die BdG2 erfahren

Matie 2

Beliebte Verse in
Matie 2

Höre Matie 2

Bibel:

Bété, Guiberoua

Übersetzung: BdG2 - bet

Matie 2

Matie 2

Beliebte Verse in Matie 2

Höre Matie 2

Bibel:

Bété, Guiberoua

Übersetzung: BdG2 - bet

Matie 2

Beliebte Verse in
Matie 2