ཡུ་ཧན་ན། 4

ཡི་ཤུ་དང་ས་མ་རི་པ་མེ་ཝག་ཙ།

1ཡུ་ཧན་ན་གེ་ལག་ཉི་ ཡི་ཤུ་གི་ སློ་མ་བ་ཅོད་ཉི་ ཁྲུས་གསོར་གནང་ལ་དག་ཉི་ ཕ་རི་སི་པ་བ་ཀི་ ན་ཐ་ཝ༌ལ། 2(མ་པ་ཁྲུས་གསོར་གནང་ཁཱན་ཁེ་པ་ ཡི་ཤུ་མང་གི་ཝ་ རོ་ཀ་སློ་མ་བ་གི་ཝ་ཆོ་ཝ༌ལ།) 3ཨོ་ཐ་ཀོར་གེ་ གཙོ་བོ་གི་མཁྱེན་དེན་གེ་ རོ་ཀི་ཡ་ཧུ་དི་ཡ་ ཐུབ་ཐཱན་ཐཱན་ལོག་ཉི་རང་ ག་ལིལ་ག་ཏཱན་བྱོན་མ༌ལ།

4ཉི་ཨོམ་ རོག་ ག་ལིལ་ག་ཏཱན་བྱོན་ཅ་ཨ་ཉི་ ས་མ་རི་ཡ་གེ་ཨ་ཉི་ བྱོན་མེ་ཁེ་ཝ༌ལ། 5ཉི་ཨོམ་ རོག་ས་མ་རི་ཡ་ག་ ཁྲོམ་སུ་ཁར་དག་ས་ག་ ཕེབས་པ༌ལ། སུ་ཁར་ཤོ་ ཡ་ཀུབ་གི་ རོ་ཀ་ཟ་ ཡོ་སེཕ་ག་གནང་ཁཱན་ ས་ར་ག་ཅ་གི་ཝ༌ལ། 6ཨོ་ཉ་ག་ ཡ་ཀུབ་ག་རི་ཙང་ཅ་གི་ཝ༌ལ། ཉི་ཡི་ཤུ་དང་ཉི་ འོ་བརྒྱལ་བ་ཨ་དེན་གེ་ ཨོ་ཉ་རི་ཙང་ར་ག་བཞུགས་པ༌ལ། ཉི་ཨུ་ཉུ་གང་ཀ་ ངབ་ཀ་ཆུ་ཚོད་ སོང་ཉིག་ཙིང་ཕང་ དུང་མ་ཅ་གི་ཝ༌ལ།

7ཉི་ས་མ་རི་པ་མེ་ཝག་ཙ་ རི་ཕ་ལེ་ག་ཤེག་པ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ནཱན་གི་ ཇ་ག་རི་ད་སུར་ ཇ་མེ་ག་གེ་དག༌ཉི། 8(རོ་ཀ་སློ་མ་བ་ཤོ་ ཁྲོམ་ག་ལྟོ་ངོ་ཉི་ཕ་ལེ་ག་ དི་ཝ་ཆོ་ཝ༌ལ།)

9ཨོ་ཉ་མེ་ཝག་ཙ་གི་ཞུ་ཝ་ལ་ ནཱན་ལ་ ཡ་ཧུ་དི་པ་གི༌ལ། ཉི་ཇང་ས་མ་རི་པ་གི༌ལ། ཉི་ནཱན་གི་ ཇང་གེ་ཧང་ཏེན་ རི་ཕུན་ཅ་ཡ་དག༌ཉི། (ཧང་ཡ་དག་ནེ་ལ་ ཡ་ཧུ་དི་པ་བ་ཀི་ ས་མ་རི་པ་བ་ཀབ་ཉི་ ཧང་རང་མ་ཨན་ཅ་གི་ཝ༌ལ།)

10ཡི་ཤུ་གི་ རོ་ཀ་ལན་གནང་ཉི་གསུངས་མ་ལ་ ནཱན་གི་ ན་ག་དེན་གེ་ཆོ་ཁཱན་ དཀོན་མཆོག་ག་ སེ་རབ་ཁེ་པ་སེ་ཉི་ ནཱན་གེ་རི་ཕུན་ཁཱན་ཁེ་པ་ གུམ་ཡེན་ཐཱན་ཨ་ནེ་ལ་ ནཱན་གི་ རོ་ཀེ་ཕུན་མེ་ཆོ༌ཝ། ཉི་རོ་ཀི་ ན་ག་ཚེ་ག་རི་ བི་ལེ་ཆོ་ཝ་དག༌ཉི།

11མེ་ཝག་ཙ་གི་ཞུ་ཝ་ལ་ སློབ་དཔོན་ ན་ག་ཕྱག་ཀ་ རི་ཁོག་ཙམ་ ཧང་རང་མ་ཝ༌ལ། ཉི་རི་ལ་གནམ་མེད་ས་མེད་ ཏིང་ག༌ལ། ཨོ་ཐ་ཚེ་ག་རི་ཤོ་ ནཱན་གི་ ཨོ་གེ་ཕ་ལེ་ཡ། 12ཧང་ནཱན་ཤོ་ ཨ་ཧ་ཕ་མ་ ཡ་ཀུབ་གེ་ཆི་ལུ་གི་ལ་སྨོ། རོ་ཀི་ ཨ་ཧ་རི་ཙང་ཇེག་ཉི་གནང༌མ། རོག་རོག་ཏེན་བུ་ ཨོ་ཐ་རི་ཙང་གེ་ཇ༌མ། ཉི་རོ་ཀ་ཝག་ཙ་བ་དང་ ནོར་སེམས་ཅན་བ་བུ་ ཨོ་ཐ་རི་ཙང་གེ་རང་ ཇ་མ་དག༌ཉི།

13ཡི་ཤུ་གི་ རོ་ཀ་གསུངས་མ་ལ་ ཨོ་ཐ་རི་ཇམ་ཁཱན་བ་ ལོག་ཉི་རང་རི་ནང་སོ་ཕེ། 14དག་པ་ཀབ་ཉི་ ཇི་གི་བི་ཁཱན་རི་གེ་ ཇམ་ཁཱན་སོ་ངོ་ཁེ་པ་ལོག་ཉི་ ཧ་ལ་རང་ རི་ནང་མ་སོ་ཕ། ཇི་གི་བི་ཁཱན་རི་ཁེ་པ་ རོ་ཀ་ནང་ཀ་རི་མུང་རི་ཉི་ ཨོ་ཉེ་གི་ རོག་ཏེ་བ་ཀ་ ཚེ་མ་འགྱུར་བརྟན་པ་བི་ལེ་དག༌ཉི།

15མེ་ཝག་ཙ་གི་ཞུ་ཝ་ལ་ སློབ་དཔོན་ ནཱན་གི་ ཇ་ག་ཨོ་ཉ་རི་གནང༌ཤོ། ཧང་ཡ་དག་ནེ་ལ་ ཇང་ལོག་ཉི་ ཧ་ལ་རང་རི་ནང་མ་སོབ་ཅེན། ཉི་རི་ཕ་ལེ་དེན་གེ་ ཇང་ཨོ་ཐ་རི་ཙང་ག་ ཨོ་ཕེ་མ་ཁེན་ཆེན་དག༌ཉི།

16ཡི་ཤུ་གི་ རོ་ཀ་གསུངས་མ་ལ་ དིན་ཐཱན་ ན་ག་ཕེ་ཝག་ཙ་ རིག་ཉི་ཕའི་དག༌ཉི།

17ཇ་ག་ཕེ་ཝག་ཙ་མཱན་ཅ་དག་ཉི་ རོ་ཀི་ཞུ་ལ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ནཱན་གི་ དེན་མ་རང་ ན་ག་ཕེ་ཝག་ཙ་མཱན་ཅ་དག་ཉི་ ཡེག༌ལ། 18ནཱན་གི་ ཕེ་ཝག་ཙ་ལྔ་ཀབ་ཉི་ གཉེན་ཕི་ཉི་ཆུ་མ༌ཅ། ཉི་ཨོམ་ ནཱན་ཀབ་ཉི་ཆོ་ཁཱན་སོ་ངོ་བུ་ ན་ག་ཕེ་ཝག་ཙ་མང་གི། ནཱན་གི་ ཇ་ག་དེན་པ་ཡེག་པ་དག༌ཉི།

19མེ་ཝག་ཙ་གི་ རོ་ཀ་ཞུ་ཝ་ལ་ སློབ་དཔོན་ ཇི་གི་གོད་པ་ཀབ་ཉི་ ནཱན་ཤོ་ ལུང་བསྟན་པ་གི་ཝ་ཨོ་ཕེ༌ལ། 20དང་པོ་ག་ ཇ་ག་ཕ་མ་བ་ཀི་ ཨོ་ཐ་ཕུ་ཐུང་ཀ་ གསོལ་ཝ་ཏབ་ཆོ༌ཝ། དག་པ་ཀབ་ཉི་ ནའི་ཡ་ཧུ་དི་པ་བ་ཀི་ཡེག་ལ་ གསོལ་ཝ་ཏ་པེ་ག་བཱརང་ཤོ་ ཡ་རུ་ཤ་ལེམ་ཐུར་ཤ་གི་ལ་དག༌ཉི།

21ཡི་ཤུ་གི་ རོ་ཀ་གསུངས་མ་ལ་ ཇི་གི་ཡེག་ཁཱན་ག་ལོ་དི། ཡབ་ག་གསོལ་ཝ་ཏབ་ཅ་ཨ་ཉི་ ཨོ་ཐ་ཕུ་ཐུང་ཀ་བུ་མ་ཏ་པ་ ཉི་ཡ་རུ་ཤ་ལེམ་ག་བུ་མ་ཏ་པེ་ག་ དུས་ཐུར་ཤར༌བེ། 22ནའི་ས་མ་རི་པ་བ་ཀི་ ན་ཤི་གུམ་མ་ཡེ་ཁཱན་ག་ གསོལ་ཝ་ཏབ༌ལ། དག་པ་ཀབ་ཉི་ ཨའི་ཡ་ཧུ་དི་པ་བ་ཀི་ གསོལ་ཝ་ཏབ་ཁཱན་ཁེ་པ་ ཨ་ཤི་གུམ་ཡེན༌ཅ། ཧང་ཡ་དག་ནེ་ལ་ ཐར་པ་ཁེ་པ་ ཡ་ཧུ་དི་པ་བ་ཀེ་ཨ་ཉི་ ཉོང་པེ་གི༌ལ། 23ཨོ་ཉེ་རང་གི་ནེ་བུ་ དུས་ཙུན་ཐུར་ཤར༌བེ། ཉི་ཨོ་ཉ་དུས་ཙུན་ཁེ་པ་ རེན་པ༌ཅ། དེན་པ་ཨ་ཉི་ ཡབ་ག་ གསོལ་ཝ་ཏབ་ཁཱན་བ་ཀི་ ཐུགས་ཉིད་དང་ དེན་པ་ཨ་ཉི་ གསོལ་ཝ་ཏ་པེ་ཁེ༌ལེ། ཧང་ཡ་དག་ནེ་ལ་ རོ་ཀི་ཨུ་ཉུ་ད་བུ་ གསོལ་ཝ་ཏབ་ཁཱན་བ་ལམ༌ཅ། 24དཀོན་མཆོག་ཤོ་ ཐུགས་ཉིད་གི༌ལ། ཉི་རོ་ཀ་གསོལ་ཝ་ཏབ་ཁཱན་བ་ཀི་ ཐུགས་ཉིད་དང་ དེན་པ་ག་ཐུང་ཀེ་ཨ་ཉི་ གསོལ་ཝ་ཏ་པེ་ཁེ༌ལེ།

25ཨོ་ཉ་མེ་ཝག་ཙ་གི་ཞུ་ཝ་ལ་ ཁིརིས་དག་ཉི་ཞུ་ཁཱན་ མོ་ཤི་བྱོན་མེ་གི་ལ་དག་ཉི་ ཇི་གི་སེན༌ཅ། ཉི་རོག་བྱོན་དེན་གེ་ རོ་ཀི་ ཨ་ཧ་ཐམས་ཅན་རང་ གསུངས་ཉི་གནང་མེ་དག༌ཉི།

26ཉི་ཡི་ཤུ་གི་ རོ་ཀ་གསུངས་མ་ལ་ ནཱན་ཀབ་ཉི་ཆཱས་ཨ་ཁཱན་ ཇང་ཤོ་ རོག་གི་ལ་དག༌ཉི།

27ཨུ་ཉུ་གང་ཀ་ སློ་མ་བ་ལོག་ཉི་ཤེག་པ༌ལ། ཉི་ཡི་ཤུ་ མེ་ཝག་ཙ་ཐུར་ཀབ་ཉི་ གསུང་གྲོས་མཛད་པ་ག་གོད་ཉི་ རོག་ཏེ་བ་ ཡིད་ཆི་ཝ༌ལ། དག་པ་ཀབ་ཉི་ ཐུར་གི་བུ་ རོ་ཀ་ཏཱན་ ནཱན་གི་ ཨོ་ཐ་མེ་ཝག་ཙ་གེ་ ཧང་ཚཱས་པེ་ཡ། ཉི་ནཱན་ རོག་ཀབ་ཉི་ ཧང་ཨ་ཉི་གསུང་གྲོས་མཛད་ཅ་ཡ་དག་ཉི་ ཇི་མེ་མར་བ༌ལ། 28ཉི་གེ་ ཨོ་ཉ་མེ་ཝག་ཙ་གི་ རོ་ཀ་རི་ཁོག་ཙམ་ ཐུབ་ཐཱན་ཐཱན་ ལོག་ཉི་རང་ ཁྲོམ་ག་ཏཱན་དི་ཉི་ སོ་ངོ་བ་ཀ་ཡེག་པ༌ལ། 29ཨུན་ཐཱན་ ཇི་གི་ཨ་ཁཱན་བ་ ཐམས་ཅན་རང་ གསུངས་ཉི་གནང་ཁཱན་ སོ་ངོ་ཁེ་པ་རུམ༌ཤོ། རོག་རང་ཁིརིས་མང་གི་སྨོ་དག༌ཉི། 30ཉི་སོ་ངོ་བ་ ཁྲོམ་གེ་ཕིས་ཀ་ཏཱན་ ཡི་ཤུ་མཇལ་བེ་ག་ དི་ཝ༌ལ།

31ཨུ་ཉུ་གང་ཀ་ ཡི་ཤུ་ག་སློ་མ་བ་ཀི་ རོ་ཀ་ཞུ་ཝ་ལ་ སློབ་དཔོན་ ཧང་ཐུར་ཏ་བཞེས་དག༌ཉི།

32དག་པ་ཀབ་ཉི་ ཡི་ཤུ་གི་ རོག་ཏེ་བ་ཀ་གསུངས་མ་ལ་ ཇ་ག་ཟ་ལེ་ག་ལྟོ༌ཅ། ཉི་ན་ཤི་ ཨོ་ཉ་ཀོར་གེ་ ཧང་རང་མ་སེ་ལ་དག༌ཉི།

33རོ་ཀ་སློ་མ་བ་ཀི་ རོག་ཏེ་བ་ནང་དོ་ ཐུར་གི་ཐུར་ག་ཇིམ་ཉི་ ཡེག་པ་ལ་ སོ་ངོ་ཐུར་ཕང་གི་ རོ་ཀ་ལྟོ་ཕ་ཉི་ དྲང་མ་གི་ས་དག༌ཉི།

34ཡི་ཤུ་གི་ རོག་ཏེ་བ་ཀ་གསུངས་མ་ལ་ ཇ་ག་ལྟོ་ཤོ་ ཇང་ཀུན་ཏི་ཁཱན་ག་ ཐུགས་བཞེད་ཁེ་པ་ཨ་ཉི་ རོ་ཀ་ལའི་འགྲུབ་ཕེ་དེན་གེ་གི༌ལ། 35ན་ཤི་ཡེག་ཏུ་ ཐོག་དུང་མེ་དེན་གེ་ ཨོམ་ཆང་རང་ ལ་ཉི་ཕིཤི་ཅ་དག༌ཉི། དག་པ་ཀབ་ཉི་ ཇི་གི་ ན་ཧ་ཡེག་པེ་ ན་ཧ་མིང་ཏིན་ཐཱན་ ཨུང་ག་ཏཱན་གོད༌ཅོ། ཐོག་དུང་མེ་ག་རེན་པ༌ཅ། 36ཨོ་མ་ བུ་དང་དུང་ཁཱན་ག་ཉི་བི་ཉི་ ཚེ་མ་འགྱུར་བརྟན་པ་ག་དེན་གེ་ ཐོག་དུང་མེ་གོ་ཙུག༌ཅ། ཉི་ཐོག་ཡབ་ཁཱན་དང་ ཐོག་དུང་ཁཱན་ཉིག་ཙིང་རང་ ཏབ་ཐུར་ངལ་རངས་པེ་རེ༌བེ། 37ཨོ་ཉི་ཨ་དེན་གེ་ ཡེག་ཐང་ཐུར་ཅ་ ཚེ་བང་གི་ཐོག་ཡབ༌ཅ། ཉི་ཚེ་བང་གི་ ཐོག་དུང་ཅ་དག༌ཉི། ཨུ་ཉུ་ཤོ་ དེན་པ་གི༌ལ། 38ན་ཤི་ལའི་མ་ཨ་ཁཱན་ ཨུང་ག་ཏཱན་ ཇི་གི་ ན་ཧ་བ་ ཐོག་དུང་མེ་དེན་གེ་ ཀུན་ཏིན༌ཅ། བཱརའ་གི་གནམ་མེད་ས་མེད་ ནང་དོག་ཉི་ ལའི་ཨ་ཝ༌ཅ། ཉི་བཱརའ་གི་ ནང་དོག་ཁཱན་ག་ འབྲས་བུ་ཤོ་ ན་ཤི་དུང་ཅ་གི་ལ༎

ས་མ་རི་པ་མང་པུ་ཐུར་གི་ དད་པ་ཨ་ཝ༌ལ།

39ཇི་གི་ཨ་ཁཱན་བ་ ཐམས་ཅན་རང་ རོ་ཀི་གསུངས་ཉི་གནང་མ་དག་ཉི་ ཨོ་ཉ་མེ་ཝག་ཙ་གི་ ཡེག་པ་ཨ་དེན་གེ་ ས་མ་རི་པ་མང་པུ་ཐུར་གི་ དད་པ་ཨ་ཝ༌ལ། 40ཉི་རོག་ཏེ་བ་ཨུན་ཐཱན་ རོག་ཏེ་བ་ཀ་ཁྲོམ་ག་ བཞུགས་ཅོ་དག་ཉི་ ཞུ་ཝ༌ལ། ཉི་ཡི་ཤུ་ རོག་ཏེ་བ་ཀབ་ཉི་ ནོང་ཉིག་ཙིང་བཞུགས་པ༌ལ། 41རོ་ཀི་གསུང་གནང་མ་ཨ་དེན་གེ་ ཨོམ་ཆང་རང་མང་པུ་ཐུར་ དད་པ་ཨ་ཁཱན་རི་ཝ༌ལ།

42རོག་ཏེ་བ་ཀི་ མེ་ཝག་ཙ་ག་ཏཱན་ཡེག་པ་ལ་ ཨོམ་གི་ནེ་ལ་ ནཱན་གི་ཡེག་པ་ཐུར་གི་ ཨ་ཤི་དད་པ་ཨ་ཝ་མང་གི་ཝ་ ཨའི་ཏེན་གི་ ན་ཐ་ལེ་རེ་བ་ཨ་དེན་གེ་ དད་པ་ཨན༌ཅ། རོག་གི་ནེ་ལ་ཏེན་ཏེན་རང་ འཛམ་གླིང་ག་ སྐྱབས་མགོན་གི་ཝ་ལ་དག༌ཉི༎

ཡི་ཤུ་གི་འགོ་དཔོན་ཐུར་ག་ཟ་ དྲག་ཉི་གནང་མ༌ལ།

43ཡི་ཤུ་ ནོང་ཉིག་ཙིང་ག་ཚི་ངེ་ ག་ལིལ་ག་ཏཱན་བྱོན་མ༌ལ། 44རོ་ཀི་གོ་མ་རང་ གསུངས་མ་ཆོ་ཝ་ལ་ ལུང་བསྟན་པ་ཤོ་ རོག་ཏེན་ག་ས་ཆ་ག་མ་ཏོག་པ་ བཱརའ་ཨོ་ག་རང་གི་ནེ་བུ་ གུས་ཞབས་ཉོང་ཅ་ཨ༌ཉི། 45རོག་ ག་ལིལ་ག་ཕེབས་པ་ཀབ་ཉི་ ག་ལིལ་ག་སོ་ངོ་བ་ཀི་ ཞུ་ཝ༌ལ། གོག་ཉི་དི་ཁཱན་ག་དུས་ཆེན་ ཙི་ལེ་གང་ཀ་ རོག་ཏེ་བ་བུ་ ཡ་རུ་ཤ་ལེམ་ག་ཆོ་ཝ་ཨ་དེན་གེ་ རོ་ཀི་མཛད་ཁཱན་ ཐམས་ཅན་རང་ རོག་ཏེ་བ་ཀི་ ཐོང་མ་ཆོ་ཝ༌ལ།

46རོ་ཀི་གོ་མ་ རི་གེ་ཞུ་འགྱུར་ཁཱན་ ག་ལིལ་ག་ཆ་འོག་ག་ཆོ་ཁཱན་ ཁྲོམ་ཀ་ན་དག་ས་ག་ ལོག་ཉི་རང་བྱོན་མ༌ལ། ཉི་ཨོ་ཉ་ག་ གཞུང་ཀ་འགོ་དཔོན་ཐུར་ཆོ་ཝ༌ལ། ཉི་རོ་ཀ་ཟ་ཤོ་ ཁྲོམ་ཀ་ཕར་ན་ཧུམ་ག་ མར་ཉི་ཅ་གི་ཝ༌ལ། 47ཡི་ཤུ་ ཡ་ཧུ་དི་ཡ་གེ་ ག་ལིལ་ག་བྱོན་མ་ཅ་དག་ཉི་ རོ་ཀི་ན་ཐ་ལ་ཀབ་ཉི་ རོག་ཡི་ཤུ་ག་ སྐུན་མདུན་ག་བཅག་ཐཱན་ ཞུ་ཝ་ལ་ ཡི་ཤུ་བྱོན་ཐཱན་ རོ་ཀ་ཟ་ མར་ཉི་ཤི་ལེ་ཅམ་ཁཱན་ཁེ་པ་ དྲག་ཉི་གནང་ཤོ་དག༌ཉི།

48ཡི་ཤུ་གི་ ཨོ་ཉ་འགོ་དཔོན་ག་གསུངས་མ་ལ་ རྫུ་འཕྲུལ་དང་ ཡིད་ཆི་ཝ་ག་ལའི་བ་ མ་ཐོང་མ་སག་པུ་ ན་ཤི་དད་པ་མ་ཨ་ལ་དག༌ཉི།

49དག་པ་ཀབ་ཉི་ འགོ་དཔོན་གི་ཞུ་ཝ་ལ་ གཙོ་བོ་ ཇ་ག་ཟ་མ་ཤི་ལེ་གོ་མ་ བྱོན་ཉི་གནང་ཤོ་དག༌ཉི།

50ཡི་ཤུ་གི་ རོ་ཀ་གསུངས་མ་ལ་ ནཱན་ཕའི་ག་ཏཱན་དི་ ན་ག་ཟ་མ་ཤི་ལ་དག༌ཉི།

ཡི་ཤུ་གི་གསུངས་ཁཱན་ག་ འགོ་དཔོན་གི་ དད་པ་ཨ་ཉི་ ཉ་གེ་དི་ཝ༌ལ། 51རོག་ལམ་ཁོན་དི་ལེ་གང་ཀ་ རོ་ཀ་གཡོག་པ་བ་ འཐེན་ཕ་ཉི་ཤེག་པ་ལ་ ན་ག་སྲས་དྲག་པ་ཅ་དག༌ཉི། 52རོ་ཀི་ རོ་ཀ་ཟ་ ཆུ་ཚོད་ཧབ་ཏུར་ག་ དྲག་པ་ཡ་དག་ཉི་ ཇི་མ་ཀབ་ཉི་ རོག་ཏེ་བ་ཀི་ཞུ་ཝ་ལ་ ཨི་ཉིང་ངབ་ཀ་ཆུ་ཚོད་ཐུར་ག་ ཁུར་ཆང་པུ་ཨོ་ཕེ་ག་ ནོར་བ་དག༌ཉི།

53ཕྲིག་ཀིན་ཨོམ་ཏུར་ག་ ཡི་ཤུ་གི་ རོ་ཀ་ ན་ག་ཟ་མ་ཤི་ལ་དག་ཉི་ གསུངས་མ་གི་ལ་དག་ཉི་ ཨ་པ་གི་ཡིད་ཀ་ཨ་ཝ༌ལ། ཨོ་ཉི་ཨ་དེན་གེ་ རོག་དང་ རོ་ཀ་ཕའི་ག་ སོ་ངོ་ཐམས་ཅན་གི་ དད་པ་ཨ་ཝ༌ལ།

54ཡ་ཧུ་དི་ཡ་གེ་ ག་ལིལ་ག་བྱོན་དེན་གེ་ ཨུ་ཐུ་ཤོ་ ཡི་ཤུ་གི་མཛད་ཁཱན་ རྫུ་འཕྲུལ་ཉིག་ཙིང་པ་གི་ཝ༌ལ༎

Zur Zeit ausgewählt:

ཡུ་ཧན་ན། 4: TNTB

Markierung

Kopieren