Matyo 12
12
Jesu la ɗa̰y tɨ saaw bɛ la
Mrk 2.23-28; Luk 6.1-5
1Na lula sul ɗay, Jesu ɗən gembe worgɨ hul na ɗa̰y tɨ saaw bɛ#12.1 Tɨ ɗa̰y ne juyb-a jul a kay na ji tɨ saaw bɛ tuna a wag.. Ər bi ɗolɔ tɨ ya sul sima tudi kəysul ndula ka a. 2Gorne Parisyḛ-a ləg wa̰y ne a ka gɨna, a ja gɨ Jesu ɓə: «Ləg wa̰y ne a kway kar na ɗa̰y tɨ saaw bɛ jo əm bi ka.» 3Lɛ Jesu duga gɨ a: «Pay yḭ edɨ wa̰y ne Dabid ka ɗa̰y ne ndula ka ər na ər bi lo a? 4Ər wur tɨ Ndɨla li hul na ər bi la a twi mapa ne a naa gɨ Ndɨla. A na ul mu tɨ mapa ne tudi lo. Lɛ tɨ bi tɨ hima ɓina ngoy jo a na ul mu tɨ mapa ne tudi. 5Ɓee yḭ edɨ Moys na gṵ hul lo a? Na ɗa̰y tɨ saaw bɛ bi tɨ hima ɓina ne wo cida kar tɨ Ndɨla li hul, a ka mum ne ul lo, lɛ kuna ne kaw, Ndɨla tung jaa tɨ a sul lo. 6Lɛ ka ən ja gɨ i, wa̰y ne ura Ndɨla li hul wo le! 7Jo yḭ una jaa ne a ja ɓə: “Ən taam ɓə i ka hul bor gɨ peer, lɛ ən taam i hima tɨ ɓina lo!” Gɨna yḭ ɓə jaa ɗula tɨ bi ton sul lo. 8Kəysul yin, Wo Ɓa̰ kaw ən tɨ ɗa̰y tɨ saaw bɛ na Baali.»
Wo daa taal ɓudu uy
9Jesu o̰ tɨ un ne si tɨ Juyb-a na li tɨ peer tay hul. 10Wo ne daa taal ɓudu uy wo tɨ nin. Parisyḛ-a taam jaa ɗula tɨ Jesu sul, gɨna a ɓiri ər: «Pay yini gṵ hul naa ul mu tɨ wo nina tɨ ɗa̰y tɨ saaw bɛ a?» 11Jesu duga gɨ a: «Jaa jo tɨ i daan na ham ɓudu ngoy, lɛ ham ne tɨba tɨ tulɔ hul na ɗa̰y tɨ saaw bɛ ər ɓə saal ər sula na wag lo a? 12Wo ɓari ura ham lo a! Tɨ nejo gṵ hul naa ul mu tɨ gɨ woɓari, ɓari kar na ɗa̰y tɨ saaw bɛ.» 13Gɨna Jesu ja gɨ ɓər ne daa taal ɓudu uy: «Nay əm daa.» Ɓər nay ər daa la ər daa duga ndini kuna paa la. 14Parisyḛ-a wag a si a ten peer a taam ul mu tɨ Jesu humna.
Wo tɨ cida ne Ndɨla ɛr
15Gorne Jesu una jaa ne gɨna, ər nɨm un ne la bi dɨbla so ul tɨ ər lɔ la. Ər jul mo̰y tɨ bi sul. 16Lɛ ər ja gɨ a jaa na gṵ sɨgra ɓə: «I ka ən ɓla gɨ bi ɓə yin tɨ Ndɨla na ɓa̰ lo.» 17Jaa ne nebi Esay ja toni ɓagcagri tɨ kuri. ər ja ɓə:
18«Ən wo tɨ cida kar ne ən ɛr ər jo le,
tɨ wo ne ən ka ər kum la ən ndula laar
gun wo ər tɨ ndɔ la
ən ɓə ən Lal kay tɨ ər sul
la ər ɓə gɨ bi ul ne tugla ɓla la.
19A na wo a ɓə paa gaglə lo la,
ər ɓə ngɔr kar lo la,
Wo ɓə ər gṵ laa na jaa jura tɨ ul daan lo la.
20Ər ɓə uun ne gṵra ha̰w teni lo la,
ər ɓə lampa ne laa gaw humna lo la,
ər ɓə kar kuna paa ne
marway mum tugla ɓə ɓijim sal ha̰w,
21la bi gun ɓə a hul kay tɨ ər sul la.»
Jesu kun Sidan
22Gɨna a hina na wo ne jinsə nina ər ji la ɓəw ər mu la tɨ Jesu ndɔ. Ər nen ər nɨ ər ja jaa la ər ji ləg un la. 23Ɓɔr bi ji la a ja ɓə: «Ər ɓə tɨm Dabid kaa lo a?» 24Gorne Parisyḛ-a laa jaa ne gɨna, a ja ɓə: «Jo ɓər ne kun Sidan gɨna, ər tɨ Beljebul, kəysul jinsə wa̰ay jo naa ər dwari!» 25Lɛ Jesu una a ilgɨ la ər ja gɨ a: «Jo bi tɨ waan ɓudu moon peer a, a waan ɓə tɨm lo. Bi tɨ lɔr ɓudu hul ɓee tɨ nimni hul, jo a moon peer gɨna, a lɔr ɓə tɨm lo la. 26Jo Sidan kun Sidan gɨna, yḭrmar moon ər ndɔ. Ər waan ɓə tɨm waa a? 27Jo ən kun jinsə na Beljebul dwari gɨna, i bi kun a na kəy dwari a? Tɨ ya̰ jo a ɓə jaa tungni tɨ i sul. 28Lɛ kuri, jo na Ndɨla na Lal jo ən kun na jinsə-a gɨna, i una ɓə Ndɨla na waan hina marway tɨ i ndɔ teni.
29«Wo ɓə lɛm wur tɨ wo tɨ dwari li hul tɨ ər mum to lo, lɛ gorne ər ɓəw wo tɨ dwari ne barita. Lɛ jo ər ɓəw ər gɨna, ər ɓə ər mum to gun bla. 30Wo ne kay ndɔ na ən lo, tɨ ən paa tɨ pɛni, la wo ne yar ən na bi sul dula tɨ paa lo, ər tɨ wo tɨ bi bra. 31Nejo ən ja gɨ i tɨ bayri: Ndɨla hul ɓə ər ɗina tɨ ɓijim gun sul la tɨ bi gun ne ɓurum ər sul lɛ, jo wo ɓurum Ndɨla na Lal gɨna, Ndɨla hul ɓə ər ɗina tɨ ər ɓijim sul lo. 32Ndɨla hul ɓə ər ɗina tɨ wo ne ja jaa ɓijim tuna yin Wo Ɓa̰ sul, lɛ wo ne ja jaa ɓijim tɨ Ndɨla Lal sul, Ndɨla hul ɓə ɗina tɨ ər sul tɨ dunya̰ ne kakam lo la, ne wo hina gaana lo la.»
Tɨla ji
Luk 6.43-45
33«Jo gorne tɨla ndini gɨna, ər ji kaw ɓə ndini la. Lɛ jo tɨla tɨ ɓijim gɨna, ər ji kaw ɓə tɨm ɓijim la. Kəysul a una tɨla na ər ji tɨ twila. 34Yḭ ngɔl kur! Ka waa ta Jaa Ndinimani ɓə wag tɨ i mu a? Yḭ tɨ bi ɓijim. Kəysul jaa ne wag tɨ woɓari mu, tɨ jaa ne sir ər hul jo wag tɨ ər mu. 35lɛ jo wo nirimu tɨ ɓijim gɨna, mum ɓijim jo wag tɨ ər mu la. Kəysul jaa ne wag tɨ woɓari mu, tɨ jaa ne sir ər hul jo wag tɨ ər mu. 36Jesu ja: Ən ja gɨ i tɨ bayri, na ɗa̰y tɨ jaa tungni, bi gun ɓə gɨ Ndɨla jaa ɓəji ne wag tɨ mu lɔ jul gun. 37Kəysul tɨ jaa ne wag tɨ əm mu jo Ndɨla ɓə na jaa jul tɨ əm sul la, tɨ jaa ne wag tɨ əm mu jo Ndɨla ɓə na jaa ɗula tɨ əm sul la.»
Bi ɓiri wa̰y ne ɓɔrji
Mrk 8.11-12
38Gɨna bi tɨ gṵ hul ɓla tapeer la Parisyḛ-a la a ja gɨ Jesu ɓə: «Wo tɨ wa̰y ɓla, ka gɨ i wa̰y paa ne ɓə gɨ i ɓla ɓə yim, tɨ Ndɨla jo toon əm kuri!» 39Jesu duga gɨ a: «Bi kalɔ ɓijim la bi tɨ juna kar ne ndogle, a ɓiri ən ka ən ka gɨ a wa̰y ne ɓɔrji lɛ, ən ɓə gɨ a wa̰y ne ɓɔrji ɓudu in kar lo. Dɨbla nari gɨna wa̰y ne wag tɨ Jonas sul ɓudu ngoy jo ɓə tɨm wa̰y tɨ ji ɓɔr tɨ a maan. 40Kuna Jonas ka tili tɨ tedi la syɛl tɨ tedi la tɨ kaa ɗəng hul, yin, Wo Ɓa̰ kaw ən ɓə tɨm tili tɨ tedi la syɛl tɨ tedi la tɨ nəgri lɔ la. 41Na ɗa̰y tɨ sarya kar, bi tɨ lɔr ɗəng tɨ Ninibe ne tɨ bi tɨ ɓijim kar dɨbla ɓə o̰ jaa kay tɨ bi tɨ ndogle sul, kəysul ya̰ a nɨm a ɓijim tɨ kar gorne Jonas ɗo gɨ a beel. Lɛ kakamle, Wo ɗəng ne ura Jonas wo le. 42Na ɗa̰y tɨ sarya kar, Wa̰ay ne ii ɓə o̰ tɨ kɔ ər ɓə jaa kay tɨ bi kalɔ ne sul. Kəysul ər o̰ tɨ nəgri mu tɨ tong ər hina wa̰ay Salomo̰ na jicina ləg. Lɛ kakamle gɨna, wo ɗəng ne ura wa̰ay Salomo̰ wo le.
Sidan na duga tɨ gur
Luk 11.24-26
43«Gorne jinsə wag tɨ wo ndɔ gɨna, ər yang tɨ tap hul, ər taam un tɨ saaw bɛ lɛ ər ten lo. 44Ər ja tɨ ər hul “golgo ne ən ɓə duga tɨ ən gor tɨ toni.” Gorne ər an tɨ un ne gɨna li hul ley bla, ər ten un ne ti tɨ kerɨm ndinimani la a kaaw mum na ɗa̰ygor la. 45Ər duga ər si ər taam ər peer jinsə-a lwɔngɔ ne ɓijim ura ər. A duga a hina tɨ li hul, a ti tɨ nin. Gɨna wo ne na jindemni ura ne tɨ toni mani. Bi kalɔ ɓijim ne kakam kaw a jindemni maan ɓə tɨm kuna ɓər ne maan la.»
Jesu na na̰ la ər ɓungɨ la
Mrk 3.31-35
46Gorne Jesu wo bi ja jaa ɗang, ər na̰ la ər ɓungɨ la a hina. A lor tɨ bayri. A taam ul mu tɨ gɨ ər jaa ja. 47Wo paa hina ja gɨ Jesu ɓə: «Ləg! Əm na̰ la əm ɓungɨ la, a lor wo tɨ bayri, a taam gɨ əm jaa ja.» 48Lɛ Jesu duga gɨ ər: «Jajo tɨ ən na̰ la ən ɓungɨ la a?» 49La ər ɓla ər daa tɨ ər bi tɨ wa̰y edɨ sul le ər ja ɓə: «Ən na̰ jo le la, ən ɓungɨ jo le la. 50Kəysul wo ne ka wa̰y ne ən Ba ne wo tɨ ndɨlasul hul taam a, tɨ wo ne jo tɨ ən ɓun tɨ ɓər la ən ɓun tɨ ii ta ən na̰ la.»
Zur Zeit ausgewählt:
Matyo 12: nie
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, ATALTRAB