Matyo 13
13
Jaa lar tuna wo tɨ wa̰y ndulu sul
Mrk 4.1-9; Luk 8.4-8
1Na ɗa̰y ɗay, Jesu wag tɨ gə̰y si tɨ larɨm ɓɔ mu. 2Bi dɨbla tay peer tɨ ər sul, ər ɗɔl ər ti tɨ kwa̰r ɗəng hul la bi lor tɨ larɨm ɓɔ mu la. 3Ər ɓla gɨ a mum dɨbla na lar, ər ja gɨ a ɓə: «Ɗa̰y paa wo tɨ waal wag si ndulu. 4Gorne ər ɗɨga nduri gɨna, nduri tapeer tɨba tɨ ul taal. Tɨ daamu, ɗḭ hina twi. 5Nduri tapeer tɨbɨn tɨ kərgɨ sul tɨ un ne nəgri gaw. A huga tɨ daamu kəysul nəgri tɨ dɨbla lo. 6Gorne lula sila, a pel la a oli la, kəysul a ndeem tɨ dɨbla lo. 7Nduri tapeer tɨbɨn tɨ umi daan. A o̰, umi kubgɨ a sul, kway gɨ a un tɨ tuni. 8Lɛ nduri tapeer tɨbɨn tɨ nəgri hɔl sul, a wag sul. La tapeer toy ji dugmika la peer jak toy dugmɨta la.» 9Gɨna Jesu ja gɨ a: «Wo ne na tori tɨ jaa laa a, ka ər laa jaa.»
Kəyjaa Jesu ja jaa na lar a?
10Jesu na bi tɨ wa̰y edɨ hina tɨ ər ndɔ. A ɓiri ər jaa: «Kəyjaa jo əm ja gɨ a jaa na lar a?» 11Ər duga gɨ a ɓə: «Ndɨla naa gɨ yḭ ul mu tɨ mum kuru una tuna ər waan sul, lɛ ər naa gɨ ya̰ ul mu tɨ mum ne una lo.» 12Kəysul wo ne na wa̰y tɨ daa, a ɓə gɨ ər paa naa tɨ sul nɨ ər ɓə tɨm tɨ wani daan lɛ, wo ne na wa̰y lo, a ɓə ne ɓa̰ ndḛ tɨ ər daa kula teni. 13Tɨ ne ja jo ən ja gɨ a jaa na lar. Kəysul a ji lor tɨ a sul tɨ un ləg lɛ a ləg un lo, a naa tulɔ tɨ jaa laa lɛ, a laa jaa lo bad la. 14Tuna ya̰ sul gɨna, jaa ne Ndɨla jaa na nebi Esay mu toni ɓə tɨm kuri. Ndɨla jaa ɓə:
Yḭ ɓə jaa laa ɓari lɛ i ɓə ji una lo
Yḭ ɓə un ləg ɓari lɛ, i ɓə wa̰y ləg lo la.
15Kəysul bi ne a nirimu sɨgra la
a ɗɔri a tulɔ la
a waal ji,
a kway a ji gor tɨ un ləg la,
a kway a tulɔ ul mu tɨ jaa laa la,
a kway gɨ a nirimu gor tɨ Jaa Ndinimani ilgɨ la,
ta a ɓini a hul sula nɨ ən ɓə a nina la.
16«Lɛ tuna yḭ sul gɨna, ndula laar tɨ i maan kəysul i ji ləg un la, i tulɔ laa jaa la! 17Kuri, ən ja gɨ i tɨ bayri, nebi dɨbla la bi tɨ mum kar tugla dɨbla a taam mum ne yḭ ləg, ləg lɛ, a ləg lo la, a taam jaa ne yḭ laa, laa la, lɛ a laa lo la.»
Jaa lar na ji
Mrk 4.13-20; Luk 8.11-15
18«Yḭ laa jaa lar ne tuna wo tɨ wa̰y ndulu sul na ji jo le: 19Gorne wo laa jaa tuna Ndɨla waan sul lɛ ər so ər ka na wa̰y lo gɨna, tɨ Sidan jo jul jaa ne tɨ ər nirimu. Nejo tɨ nduri ne tɨba tɨ ul taal. 20Nduri ton tɨbɨn tɨ kərgɨ sul, tɨ wo ne laa Ndɨla jaa la ko na ndula laar tɨ daamu. 21Lɛ ər ndeem wur lo. Wo kuna paa ne par Ndɨla jaa si na ɓag lo. Gorne pɛw ten ər tuna Ndɨla jaa sul gɨna, ər tɨba tɨ daamu. 22Nduri ton tɨbɨn tɨ ummi daan, tɨ wo ne laa Ndɨla jaa lɛ mum ngur tɨ dunya̰ la mum tina tɨ dunya̰ la kubgɨ-ər sul kway gɨ ər un tɨ twila. 23Nduri ne tɨbɨn tɨ nəgri hɔlum sul, tɨ wo ne laa Ndɨla jaa la ər una ər ji la, ər toy ji tapeer aru la, dugmika la, dugmɨta la.»
Jaa lar tuna suni sul
24Jesu ja gɨ a jaa lar jak cam. Ər ja ɓə: «Ndɨla waan ti kuna ɓər ne ndu nduri ndinimani tɨ ər waal hul. 25Gorne bi gun ley lom, ər paa tɨ pɛni hina ndu suni tɨ ya hul lɛ ər ɗo ər sul ər si. 26Gorne ya tuni la toy sul la gɨna, suni kaw wag sul la. 27Baali na bi tɨ cida hina, a ɓiri ər: “Baali, əm ndu nduri ndinimani tɨ əm waal hul lɛ suni ne wag tɨ ɓay a?” 28Ər duga gɨ a ɓə: “Tɨ ən paa tɨ pɛni jo ka wa̰y ne.” Gɨna ər bi tɨ cida ɓiri ər: “Pay əm taam ɓə i si i ko̰on suni teni a?” 29Ər duga gɨ a: “M-m! Yḭ ka a jul lo kəysul jo yḭ wo a jul gɨna, i daa ɓə ɗira ya jul la. 30Yḭ nɨm a ka a tooni ɓudu marway tɨ ɗa̰y tɨ ya ɓina. Na ɗa̰y ɗay ən ɓə gɨ bi tɨ ya ɓina Ja̰: I jul suni toni la i ɓobɨn-a tɨ laa wur tɨ sul barita yḭ to ya tɨ dawlu hul.”»
Jaa lar tuna Mutardə ji sul
Mrk 4.30-32; Luk 13.18-19
31Jesu ja gɨ a jaa lar jak cam: «Ndɨla na waan ti kuna tɨla ne a soon ɓə mutardə ji ne ɓər paa so ndu tɨ waal hul. 32Tɨ nduri ne ɓḭ ura peer nduri gun lɛ gorne ər wag gɨna, ər tooni ər ti kuna tɨla, la ər tooni ər ura ɔri tɨ ndog gun. Ɗḭ hina kaaw a li tɨ ər dəgɨ.»
Jaa lar tuna ham ho̰ni sul
Luk 13.20-21
33Jesu duga ja gɨ a jaa lar paa cam. Ər ja ɓə: «Ndɨla na waan ti kuna ham ho̰ni ne ii so wur tɨ hum tɨ lɛmni wa̰y hul tɨ tedi daan la, hum gun o̰.» 34Jaa ton gun Jesu ja gɨ bi na lar. Ər ja gɨ a jaa bla lar lo. 35Ər ja jaa na lar ka jaa ne nebi ja toni ti kuri. Ər ja ɓə:
«Ən ɓə ən mu təng gɨ a jaa ja na lar la,
ən ɓə gɨ a beel ɗula tuna mum kuru ne ley ɓagcagri tɨ dunya̰ lɔ ɗula.»
Jesu jul gɨ ər bi tɨ wa̰y edɨ jaa lar tuna suni sul
36Gɨna Jesu nɨm bi lɛ ər si tɨ gə̰y. Ər bi tɨ tomni kori tɨ ər ndɔ ɓiri ər jaa ɓə: «Jul gɨ i jaa lar tuna suni ne ba ndu tɨ waal hul sul.» 37Jesu duga gɨ a kuna paa ne: «Wo ne ndu nduri ndinimani tɨ yin, Wo Ɓa̰. 38Waal tɨ dunya̰, nduri tɨ bi ne wur sul tɨ Ndɨla waan lɔ, suni gɨna, tɨ bi ne wur sul tɨ Sidan lɔ la. 39Paa tɨ pɛni ne ndu suni tɨ ya daan tɨ Sidan. Lula sul tɨ ya ɓina tɨ dunya̰ mu tɨ tong la, bi tɨ ya ɓina tɨ malayka-a la. 40Kuna a to na suni a bay tɨ laa, ɓə tɨm kuna paa ne na dunya̰ mu tɨ tong la. 41Wo Ɓa̰ ɓə ər malayka-a tomni, a ɓə bi ton din a peer lɔ tɨ ɓijim hul la bi tɨ ɓijim kar to jigɨn tɨ Ndɨla waan jaal ɓəgri teni. 42A ɓə a jigɨn tɨ laa womi ɗəng daan. Tɨ un ne bi dɨbla ɓə cḛy la a ɓə a ɗəngni lɔ tudi ngɛrɛ-ngɛrɛ tɨ nin. 43Lɛ bi tugla gɨna, a ɓə ndeeri kuna lula tɨ a Ba na waan hul. Ka wo ne naa tori ka ər laa jaa ne ɓari.»
Jaa ne tuna bra̰ kuru la pɛri sul
44«Ndɨla na waan ti kuna wa̰y tɨ tina ne wal ndɔ tɨ waal hul nɨ wo paa wag tɨ sul. Ər so wa̰y tɨ tina ne ər duga ər si ər wal cam. Ər ndula laar ər, la ər si ər ka kingɨ na ər wa̰y ne ər teen gun la ər so waal ər huna teni.
45«Ndɨla waan ti kuna wo tɨ kingɨ kar ne taam pɛri ndinimani ne towol dɨbla. 46Gorne ər ten pɛri ndinimani ne towol dɨbla gɨna, ər si ər ka ər mum tɨ tina kingɨ gun la ər hina ər huna na pɛri ndinimani ne towol dɨbla.»
Jaa lar tuna maan sul
47«Ndɨla waan ti kuna maan ne a ɗo tɨ larɨm ɗəng hul nɨ par kaa kalɔ gun. 48Gorne kaa sir man hul gɨna, ndɛb-a ten a hina na tɨ ko̰r mu la a ti, a yɛr ka ndinimani a bɛ tɨ krang hul lɛ ne ɓijim gɨna a burum. 49Dunya̰ mu tɨ tong kaw ɓə tɨm kuna paa ne la. Malayka-a wo hina, a ɓə bi tɨ hul ɗoyri ɓaan na bi tugla. 50A ɓə a jigɨn tɨ laa womi ɗəng daan. Tɨ un ne bi dɨbla ɓə cḛy la a ɓə a ɗəngni lɔ tudi ngɛrɛ-ngɛrɛ tɨ nin.»
Mum tina ne ɓaani la hiin la
51Jesu ɓiri ər bi tɨ wa̰y edɨ: «Pay yḭ una mum gun ne ji a?» A duga gɨ ər: «M, yini una ji.» 52Gɨna ər ja gɨ a: «wo tɨ Moys na gṵ hul ɓla ne una jaa tɨ Ndɨla na waan ɓari ti kuna Baali tɨ gə̰y ne na mum tina dɨbla. Tɨ ər mum tɨ tina ne daan ər ten ər mum ɓaani la mum hiin la.»
Bi tɨ Nasarɛt ɓini Jesu
Mrk 6.1-6; Luk 4.16-30
53Gorne Jesu tong gɨ a jaa lar ne ja gɨna, ər nɨm un ne. 54La ər si tɨ lɔr tɨ Nasarɛt ne ər toni tɨ nin. Ər ɗolɔ tɨ gɨ bi wa̰y ɓla tɨ Juyb-a na li tɨ paa tay. Ər wa̰y tɨ ɓla ɓɔr bi gun ne ti tɨ un ne ji nari. A ja ɓə: «Ja jo naa gɨ ər jicina ne la dwari tɨ mum ne ɓɔrji kar a? 55Yḭr tɨ wo tɨ tɨla cida kar na ɓa̰ lo a? Ər na̰ ndil ɓə Mari lo a? Ər tɨ Jak la, Josep la, Simo̰ la, Jud la a ɓun lo a? 56Ər ɓungɨ tɨ aa gun wo tɨ i daan lo a? Ja jo naa gɨ ər dwari tɨ mum ne kar a?» 57Tɨ a hul dugun jo kway gɨ a ul mu tɨ ər hul kula. Gɨna Jesu ja gɨ a: «Toni ca kaw bi ka nebi hormo̰ tɨ ər lɔr nəgri sul lo la tɨ ər gə̰y lo la.» 58Jesu ka mum ne ɓɔrji dɨbla tɨ ɗay lo, kəysul bi tɨ Nasarɛt ko ər hul lo.
Zur Zeit ausgewählt:
Matyo 13: nie
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, ATALTRAB