Fúcihum 4
4
Kayin namuk atiool Abel
1Jow bo jow, Adam bugo nꞌakoñaool Ewa nguñuuho, naŋar búteb, nabaj aleeh amaañen. Ewa narok : « Acehériit mee narandenanranden nibaj aleeh amaañen, nikaanool gajow irogool Kayin. » 2Nábajul Kayin atiaay, narogool Abel. Nan gújalakoulo mee, Abel nakaan amaha sísaaja min Kayin akaan anaafa.
3Funak fucee, Kayin nátebul dó nꞌwan anaaf mee be éjii Acehériit mee. 4Abel may nátebul dó mꞌbabajer bútiyaara bara sísaajaool min ájii Acehériit mee gupeet gareg mee bajak. Acehériit mee búyegehool mbon nꞌAbel son wan ájiiool mee 5bare añeerut wan Kayin ájiool mee. Kayin fiiñool nfutiñ máamak, nabaañen gawooyool. 6Acehériit mee narok Kayin : « Waa fiiñi futiñe ? Waa nubaañene gawooyi ? 7Néeni ukaan jak, aw bu gáraahulo. Néeni ukaanut jak, júnube yaayu uyu to nꞌgápeegumi naŋ énunkureŋ yásalenie yan ngakobeni mara necameni ejok. Uhanken min uheek yo. »
8Bare Kayin narok atiool Abel : « Ujaa bu futaŋaat. » Nan gútiiŋ bo mee, Kayin náñag aroop atiool Abel namugool. 9Ñeer Acehériit mee nasonken Kayin arogool : « Taŋ ati'i Abel úmey ? » Násuupool arogool : « Iñowutool. Teer ínje emmee apooya atiom ? » 10Acehériit mee narogool : « Waa nulaare ? Fúsim ati'i fan úyuh mee nꞌetaam, nijame bahuer fo kábiriŋ nꞌetaam káŋ bu baabe nꞌínje, fukaaw nak furogom ilugen. 11Maareer idankaidanka, aw be éwuy kuhi etaam yarem mee fúsim ati'i han umuk mee. 12Aw be enaaf manooman mat ubaj, ban aw bu galilioor bo ñeer nꞌdúniya. » 13Kayin narok Acehériit mee : « Yaayu etek erehut nꞌínje. 14Jaat ekamom nꞌetaam yajak maa maa ? Yo ecile nibil ekoop jambil uñowom. Ban iñum mee galilioor, éeni an añowom ho be emugom. »
15Acehériit mee narogool : « Muk ! Anooan amuge aw Kayin, bu galugeni ñoono futok nꞌñáruba. » Ñeer Acehériit mee nakaan érangamaasi nꞌKayin mbil anooan ngurehoore jambil agorool.
16Ñeer Kayin nápur to nꞌAcehériit mee min ajow acin mꞌmof mara Nod (yo yommee : galilioor) nꞌgápurum tinak Eden.
Fiil fara Kayin
17Kayin nanap nꞌakoñaool, naŋar búteb nabaj aleeh amaañen narogool Henok. Kayin nayihen ésuk, naŋar gajow aleehool Henok akaan yo. 18Henok nabaj Irad, Irad nabaj Muhuyael, Muhuyael nabaj Metusael min Metusael abaj Lemek. 19Lemek nayab ukoña gúruba : aahu gurogool Ada, aahu Sila. 20Ada nabaj Yabal. Bugara sikoore gacin mee nꞌubaas wan guyihene mee naŋ síguut, Yabal ammee paayiil afaan. 21Atiool gajawool Yubal. Bugo gatege mee ekontiŋ ngurok eyille, Yubal ammee paayiil afaan. 22Sila may nabaj Tubal-Kayin, ho arapa hara mañ mújuugak son muñuget. Alíinool gajawool Naama. 23Funak fucee, Lemek narok ukoñaool :
« Ada buguul nꞌSila, jíyenten furimom,
njibaŋ úyegehuul nꞌwan emmee néjool be elobuul :
Eéni gutegom, be emuk amaañen
min gucoocom, nimuk aleeh.
24Gurorok be emuk bugan futok nꞌgúruba
bu galugen Kayin,
Bare an agor mee ínje Lemek,
niroge bu galugen ñoono gafaŋ gúfaajiir nꞌguñen gaat nꞌñúruba (77). »
Fiil fara Seet
25Adam nabaañ anap nꞌakoñaool, nabaj aleeh amaañen. Akoñaool narok : « Atúuha asenansen aleeh bindum Abel han Kayin amuk mee. » Yo ecil mee nakaanool gajow arogool Seet (yo yommee : esen.) 26Seet may nabaj aleeh amaañen narogool Enos. No unu ngujook mee éciin Acehériit mee#4.26 Gucee ngúlowul gurok : No unu ngujook mee éciin Atúuha nꞌgajow gara Acehériit mee..
Zur Zeit ausgewählt:
Fúcihum 4: gsl
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023 (Active), Wycliffe Bible Translators, Inc. All rights reserved.