Matthew 4
4
Jesu tari
(Mark 1:12,13; Luke 4:1–13)
1Ethi jio Thangwa aa Jesu sha tari ma, Asang Tsija piq tha shu shu haqkan thináng solkat ta. 2Saal rokbali rangwung etho saal rokbali rangpal chamtho phaksat hung ang eq Jesu rapney chamlal tita. 3Thangwa sha piq rel thináng ka eq batta, “Nang Shkewa Miqwasa ang ujo, iri long tang ri banlo angma bat u.”
4Etha otho Jesu aa thawel batta, “Asang likwit na thawit aa, ‘Miqtang banlo chen phak eq tong moq; etha otho Shkewa nung wang thalat aa thaji tung aa raaq shiwang tong aa.’”
5Ethi jio, Thangwa eq Jesu tha Jerusalem náng sol kat eq, rangnuk him thaji phey náng eq aluk thina thalangta. 6Etho piq ma batta, “Nang Shkewa Miqwasa ang ujo, iri wang nang ni nang qhat u, chammatakoi Asang likwit na bat aa,
‘Shkewa piq rangkamwa tang takat eq
nang sha lo phanu,
baja long o thabot ma kot moq angna.’”
7Jesu aa thawel batta, “Asang likwit na irimal tho thawit ang aa, ‘Teyhungwa ba Shkewa shi nak tari u.’”
8Ethi jio, Thangwa eq Jesu tha aluk haqkan thináng sol kat eq, iri mingkang thaji mung tang etho thaji aqhal tang sha takhita. 9Etho Thangwa aa batta, “Ba langku o tong eq, nga shumnuk phu jo, nga iri thaji raa nang ma kotchak phanáng.”
10Jesu aa thawel batta, “Thangwa, i rel wang chuwang u! Asang likwit na bat aa, ‘Teyhungwa ba Shkewa sha hun nang aa shumnuk ching etho piq jaksom sha hun somlo ching.’”
11Etho Thangwa piq tha shingchak eq jol chuwang ta; etho rangkamwa tang ka eq Jesu tha rimkumta.
Jesu Galilee wang jaksom lot phang somlo aa
(Mark 1:14,15; Luke 4:14,15)
12Etho John tha chuk náng sakta ta Jesu aa tat atho, piq Judea wang Galilee náng wey kata. 13Piq Nazareth samhaq náng kat hung aa, Capernaum samhaq náng kata. Capernaum samhaq Zebulun ni Naphtali mung na, Galilee shitim relna angta. 14Irimal wang rangsamal Isaiah tungkang o batta tha amay angta,
15“Zebulun ni Naphtali mung
jungshi lam shina, Jordan hangko kang shina,
Gentile tang haq Galilee!
16Rangnak mongna tongtey tang aa,
ajong wallit khina;
Etho utik mung na anak na tongtey tang kho,
wallit phang na.”
17Ethi rangham wang, Jesu aa phang phanchan ta, “Ngarey wang wel inn, chammatakoi rangmungtan rapney arelna!”
Jesu ngaqsa lottey tha hal aa
(Mark 1:16–20; Luke 5:1–11)
18Jesu Galilee shitim relna kachey atho, piq aa ngaqsa lottey sapho ni tha khita. Ning ni Simon (Peter ta tho thamiing angta) nia uno Andrew angta. Ning ni Galilee shitim na chak halcheyta. 19Jesu aa ning ni ma batta, “Nim ni ijamnáng ka shin phin, etho nga nim ni ma miq lot ma tatal kot phang náng.” 20Kalo ning ni aa chak tha shingchak eq Jesu ji phanta.
21Amaan sa jakho na ka atho sapho ni wey khita, ning ni Zebedee miqwasa James nia John angta. Ning ni waqwan na tong eq, ning ni wa jamoq chak tha taqhal chey ta. Jesu aa ning ni tha halta, 22etho kalo hun, ning ni uwa tha etho waqwan tha shingchak eq piq ji phanta.
Jesu aa phanchan, tatal etho taqhal aa
(Luke 6:17–19)
23Jesu Galilee mung thaji na qhing eq, Synagogue na tatalta etho Shkewa mungtan tungtang aqhal phanchan ta etho uphan phan tak asa tang tha taqhal ta. 24Syria mung thaji miqtang aa Jesu tha usam sey ta, etho ning aa Jesu rel thináng uphan phan thaji tak asa miqtang thok solta; chamtey tey thangwa wang lottey miqtang angta, chamtey tey wakngak tak asa angta, chamtey tey jak ajaa jin thamot moq miqtang angta; etho Jesu aa thaji tha taqhal ta. 25Daqhan miqtang Galilee mung wang etho Decapolis wang, etho Jerusalem wang etho thaji Judea mung wang etho Jordan jungku hangko kang adak kowang Jesu jiphanta.
Zur Zeit ausgewählt:
Matthew 4: Mmmm
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
CC BY-NC-ND 4.0