Johannes 3
3
ONTOPORUA 3.
Nikodemus pu Jesus.
1Mokati kaafariseji omua ri omuntu, edina rje Nikodemus, h’omukuruntu guaajuda.
2H’okui ire ku Jesus uusiku, nde ta ti ku he: Rabbi, otu tshi tshi, nokutja oua za ku Karunga ng’omurongi; oshoka kapen’omuntu ta vuru okuronga iirongankondo ja tja ngaaka nga’nguee, Karunga nge ke ri na he.
3Jesus te mu zirire ko: Tshiri, tshiri, andi ku rombuere: Uukuaniirua ua Karunga kapena’muntu te u mono, ng’ina varururua.
4Nikodemus h’ote mu pura: Omuntu ota tshiua okuvarururua ngiini, h’a koka? Ota vuru ando okutshuna mera rja hina, opo a varururue?
5Jesus te mu jamukura mo: Tshiri, tshiri, andi ku rombuere: Omuntu ng’ina varururua itshee momeja no mOmbepo Ondjapuki, iti i mo muukuaniirua ua Karunga.#3:5 Otsho esakramente rjetshatsho tari tiua esakramente rjevarururo. #3:5 Ne . . . nokutja aafariseji aakueni’ naarongi naanongo jomambo.
6Shi tsha za monjama, otsho onjama, ndere shi tsha za mombepo, otsho tuu ombepo.
7Ino kuminua eehapu dandje, sho nda ti: Mu nokuvarururua.
8Ombepo ho tahi pepe mpo ha hara. Tu hu uvu, sho tahi pupu, ndere ku tshi nande, mpo tahi zi na mpo tahi hi. Otsho tuu pomuntu, ngu ta varururua mOmbepo.
9Nikodemus h’ota pura: Otatshi ka ningua ngiini?
10Jesus h’ota ti: Ongueje omurongi guaaisrael, ndere ku tshi tshi nani?
11Tshiri, tshiri, andi ku rombuere: Shi tu tshi, atu tshi popi uo, shi tua mona, atu tsho okorora, ndere ne itamu iteere nande ehokororo rjetu.
12Nge tandi popi ku ne mbi juujuni, nde itamu iteere, otamu ki iteera ngiini, nge te popi ku ne mbi jeguru?
13Kapen’omuntu a ronda keguru, gumuike tuu, ngu a zire keguru, nokutja Omuna guOmuntu, ngu e ri meguru.
14Ngashi Moses a jerucire ejoka mombuga, otsho ngaa ngii Omuna guOmuntu e nokujerucua.
15Opo keshe ngu a hiteera mu he, ka ka kane, ndere nani a mone omuenjo guarushe.
16Oshoka Karunga okua ri e hore uujuni shi cike mpa, nde ta gandja Omona omuvaru’oh’ike, opo keshe ngu ti iteere mu he, ka ka kane, ndere nani a mone omuenjo guarushe.
17Karunga ina tuma Omona muujuni e je e u pangure, aaue, okue mu tuma e je a hupice uujuni.
18Ngu a hiteera mu he, ita ka pangurua, ndere ngu ini iteera, okua pangurua nare, oshoka ini iteera medina rjOmuvaru’oh’ike gua Karunga.
19Epanguro orjo tuu ndika: Uujerere oue ja muujuni, ndere aantu oja ri je hore eemurema komeshe guujerere, oshoka iironga jauo oja ri iihineji.
20Oshoka keshe ngu ta rongo uuhineji, ota tondo uujerere, he ite ke ja kuujerere, iironga je kaji tarikue.
21Ndere ngu ta rongo otshiri, h’ote ke ja kuujerere, opo iironga je jo oroke, oshoka oja rongerua Karunga.
Jesus mu Judea.
22Konima ha mbjoka Jesus okue ja naarongua je motshirongo tsha Judea, he ta ka menekera mo na jo, nde ta tshatsha.
23Na Johannes uo a ri ta tshatsha mu Enon, popepi na Salim, oshoka mpaka opua ri pu nomeja ogendji. Aantu jo je ja ji itshatshice.
24Johannes okua ri ine edirirua manka modorongo.
25Aarongua ja Johannes jo taa shimbike eembata naajuda, taa patanene ehijereko.
26Taa hi ku Johannes, taa ti: Rabbi, tara, nguija a ri na nguee haandija ha Jordan, nde to mu okorora; he ota tshatsha ngaaka, ajeshe otaa hi ku he.
27Johannes h’ota jamukura, ta ti ku jo: Omuntu ita vuru okukucira tsha, ng’ine tshi peua keguru.
28Ne ojene omu tshi tshi, nokutja onda tire: Kandi shi Kristus, onda tumu’ike ndi mu tetekerere.
29Ngu e nomukadona, ohe nakujara; kuume ka ngu a jara, nge e ri po, he e mu uvite, okua njanjukua keui rja nakujara. Ngashiingika nduno enjanju rjandje ndika orja guanicua rju uda.
30He na koke, ndere ngaje nandi kuke.
31Ngu a zire mombanda, oku ri uo kombanda hajeshe; ongoka guomevi, ohe guopevi, he ta popi uo jopevi. Ngu a zire meguru, ohe e vure ajeshe.
32Shi a mona na shi a huva, h’ote tsho okorora, ndere kapena ngu ti iteere ehokororo rje.
33Ndere ngu a hiteera ehokororo, ota gana uo, nokutja Karunga omunatshiri.
34Oshoka ngu a tumua ku Karunga, ota popi uo eehapu da Karunga, oshoka Karunga ka gandja Ombepo he erekua notsheerekico.
35She oku ore Omona, h’okua tura mo ajishe miikasha je.
36Ngu ti iteere mu Karunga, oku nomuenjo guarushe, ndere ngu a tindira Omona ehiteero, h’ita ka mona omuenjo guarushe, aaue, ondjashi ha Karunga otahi ka kara kombanda he.
Zur Zeit ausgewählt:
Johannes 3: KWM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Omission Heklesia Ekatolika, 1951. Namibian Catholic Bishops Conference.
