Luk 1
1
1Thiofilas 'ae, wane 'oro ki kera keekeda sulia doo ki na 'e fuli 'i ma'alutamali'a. 2Kera keekeda sulia doo ki na mili rongoa fasia to'a na kera rikia mai thafalilana doo 'eki sui, ma keka ngata mai sulia si fa'arongoa le'a 'eri 'i famili'a. 3Nia bo'o neri, wane 'inoto Thiofilas 'ae, sulia 'ita mai 'ana thafalilana, ku rofe ma kwa soe la'u bo mai sulia doo 'eki na 'e fuli neri, nau ku manata mai sulia, 'e le'a ka tatha uria na kwai keekeda la'u bo'o sulia fulilana doo 'eki sui ka lae mai ka fula 'i tara'ena 'i femu. 4Nau ku keekeda sulia doo 'eki fasi 'oko thaito'omana mamanalana to'odooa na kera to'oa 'i samu.
Ensolo 'e fa'arongo 'ana futalana tha Jon Thababtis
5'Ana si manga tha Herod 'e gwaunga'i 'i fana fanua 'i Jiudia, te'e wanenifo'a thatana tha Sakaraea fasia kule'e wanenifo'a ki fulingana tha Abaeja 'e too la'u bo'o. Ma kwaina, ni Elisabet, 'e futa la'u bo'o fasia kwalafana wanenifo'a ki, 'ana kwalafaa tha 'Eron. 6Abulaladaro'a 'e le'a ma ka kokota 'i na'ofana tha God, sulia kero thai le'a sulia birangaa tha God, bia si ba'ea fiifii nia ki. 7Sui taa, 'e a'i 'adaro'a ta wela, sulia ni Elisabet 'e 'aba'ato, ma keero'a sui keko ara'i ma keko kuke'e na'a.
8Te'e fa thato, tha Sakaraea kai raa 'ana 'i laa na Bi'u Abu tha God, sulia 'e fula na'a 'ana si manga bare'e wanenifo'a ki na tha Sakaraea 'e nii biida, keki ilia na'a raa 'i laa na Bi'u Abu 'eri. 9'Ana birangana wanenifo'a ki, keka filia tha Sakaraea 'ana birangaa mala muuthangoa, uria na kai kotho 'i laa Bi'u Abu tha God, fasia kai na'area doo thasuna 'e makwa le'a. 10'Ana si manga 'eri la'u bo'o imole 'oro ki na kera nii 'i maa, keka fo'a manga na 'e na'area doo thasuna makwa le'a 'eri. 11Ma te'e 'ensolo tha Lord ka faata'i sana, maka takwe bali a'ola 'ana fuli era abu 'eri. 12Si manga tha Sakaraea 'e rikia ensolo 'eri, nia ka tona maka ma'u 'asia na'a. 13Sui, na ensolo 'eri ka ba'e 'una 'eri 'i fana, “Sakaraea, a'i 'osi ma'u la'u! Tha God 'e rongoa fo'alaa 'oe. Ma kwaimu ni Elisabet kai tharea te'e wela wane 'i femu. Ma 'oe 'oki 'alangia 'ana tha Jon. 14Se'ethaathalalaa ba'ita 'asia na'a kai fulato'omu, ma imole 'oro ki la'u bo'o keki se'ethaathalaa 'ana si manga na 'e futa! 15Ma nia tootoo kai ba'ita 'i na'ofana tha God. Nia tootoo si ku'ufia waen mada tei ku'u ki na 'e suukwa'i. Ma 'ita mai 'ana si manga 'e ni 'uu mai 'i ruuru'una thainana, Ano'edoo Abu ka funguli nia 'uu bo mai. 16Nia kai olifania mai imole 'oro ki 'i Israel 'i sana God kera. 17Nia kai lae 'i na'o 'ana tha Lord, 'ana ano'edoo ma suukwa'ia 'uria tha 'Ilaeja. Nia kai olitania la'u liothaua maka ki, ura wela kera ki. Ma nia kai bulasia to'a aburongo ki, ura toolaa sulia biranga kokota mala to'a birangada 'e kokota. Ma nia kai kwaithathai 'ana te'e kule'e imole ki 'i fana tha Lord.”
18Sui, tha Sakaraea ka sore'a 'i sana 'ensolo 'eri, “Nau kwai thaito'omana 'ufita, 'ana mamanalana si doo 'eri? Sulia nau ku ara'i na'a ma kwaiku ka kuke'e na'a la'u bo'o.”
19Ma 'ensolo 'eri 'e lu'ua ka ba'e 'una 'eri, “Nau tha Gebriel ne'e, nau ku too bia tha God 'ana si manga ki sui bana. Ma nia 'e arasi nau mai fasi kwa ba'e bii 'oe, ma kwai fa'arongo 'oe 'ana si fa'arongoa le'a ne'e. 20Sui 'oe 'osi fa'amamanea bo'o si ba'ea nau 'eki, doo kai mamana 'ana si manga na tha God 'e alua mai fasi si doo 'eki kai fuli 'ania. Ma sulia 'osi fa'amamanea ba'elaku, 'osi ba'e, ma ka a'i 'osi ba'e tafa laalae ka fula 'ana si manga na doo na ku faarongo 'oe 'ania kai mamana 'i femu.”
21'Ana si manga 'eri na imole ki na kera ma'asia tha Sakaraea, manatada ka rofe, sulia 'e too mai 'i laa na Bi'u Abu tha God ka tau 'asia na'a. 22Manga tha Sakaraea 'e kotho mai maa, fokona ka 'ato nana ma ka a'i si tala'ana kai sore'a ta si ba'ea 'i sana to'a 'eki. Si manga 'eri bo'o kera sui keka thaito'omana bona'a nia 'e rikia mai ta faatai'a 'i laa Biu Abu 'eri. Sulia fokona 'e 'ato nana, nia ka 'aruto'ona bana 'abana ura to'olanga'ilaa 'i sana to'a 'eki.
23Ma si manga 'ana raalaa nia 'i laa na Bi'u Abu tha God 'e sui, tha Sakaraea ka oli na'a ura toaa nia. 24Ma 'e a'i si tau bo'o buira si doo 'eki, kuke'e nia ni Elisabet ka too na'a 'ana wela, ma sulia lima fa madami, nia si 'akwasia bo'o luma kera. 25Ma nia ka ba'e 'una 'eri, “tha God 'e 'adomi nau na'a, ma ka lafu nau na'a fasia na se'enonia na ku too mai 'ania ma'alutana figua 'oro.”
Ensolo 'e fa'ataloa futalana tha Jisas
26Sui 'e fula 'ana ono fa madami na ni Elisabet 'e toofa 'oo'oga mai sulia, tha God ka arasia mai ensolo Gebrel ura te'e ma'e toaa 'i laa na balifanua 'i Galili, na kera 'alangia 'ana Nasaret. 27Nia 'e ngalia mai te'e si fa'arongoa fana te'e thaari na kera alufaafia fana te'e wane na kera 'alangia 'ana tha Josef. Tha Josef 'e futa 'ana kwalafaa tha Deved na king. Thatana thaari 'eri, ni Mere. 28Ma 'ensolo 'eri lae mai ka ba'e 'una 'eri 'i sana, “Laa thato le'a kau! Tha God 'e ni bii 'oe, ma le'alaa nia femu 'e ba'ita ka tatha!”
29Si manga ni Mere 'e rongoa ba'elana 'ensolo 'eri, manatana ka isifuufuli, ma ka kwaikinai sulia si fa'arongoa 'eri na 'ensolo 'eri 'e sore'a 'i sana. 30Sui na 'ensolo 'eri ka ba'e 'una 'eri la'u fana, “Mere 'ae, a'i 'osi ma'u la'u, sulia tha God 'e ade le'a 'i femu. 31Sulia 'e fili 'oe, 'oki too ana wela, ma 'oki tharea te'e wela wane, ma 'oki 'alangia 'ana tha Jisas. 32Ma nia kai 'inoto ka tatha, ma keka 'alangia 'ana Wela tha God 'i thalo. Tha God 'e alu nia fasi kai gwaunga'i, mala koko'o abu nia tha Deved. 33Ma nia kai gwaunga'i fana Jiu ki na kwalafaa tha Jakob ka tootoo si sui, ma 'inotoa nia 'e tootoo si sui!”
34Ma ni Mere ka ba'e 'una 'eri fana ensolo 'eri, “Nau kwasi too 'uu bia ta wane, sui masi fa'arongoa na 'o sore'a faku kai mamana 'ufita?”
35Ma ensolo 'eri 'e lu'ua ka 'una 'eri, “Ano'edoo Abu kai sifo mai faafi 'oe, ma suukwa'ia tha God kai too faafi 'oe. Sulia na Wela Abu 'eri, keki 'alangia 'ana Wela tha God 'i thalo. 36'O thaito'omana inalamu ni 'Elisabet. Imole ki sui kera sore'a 'e 'afeta'i na'a ura na kai too 'ana ta wela. Sui ka kuke'e mena ana, ono fa madami nia na'a ne'e. 37Sulia 'e a'i ta si doo si 'afeta'i bo'o 'ana tha God.”
38Ni Mere ka ba'e 'una 'eri, “Nau kini ni raa tha Lord, kai mamana 'ana faku mala 'o sore'a neri.” Sui 'ensolo 'eri ka lae bona'a.
Ni Mere 'e maakelea ni Elisabet
39Si tau bo'o buira, ni Mere ka kwaithathai, ka laefoofo'a bona'a ura te'e ma'e toaa 'i laa tolo 'ana balifanua 'i Jiudia. 40Si manga 'e fula, nia ka kotho na'a kau laa toaa tha Sakaraea, ma ka 'arata'i le'a kau 'ana ni 'Elisabet. 41Ma si manga ni Elisabet 'e rongoa 'arata'i le'alaa 'eri fasia ni Mere, na wela 'eri 'i rakena ka thaka 'ala'a. Ma Ano'edoo Abu ka fungulia na'a ni 'Elisabet, 42ma nia 'e ba'e ba'ita ka 'una 'eri, “Le'alaa ba'ita 'e ni bii 'oe ka talua kini ki sui, ma 'e le'a ka tatha fana wela na 'oki fa'afutaa. 43'Ufita fata'i na si doo ba'ita le'a 'una 'eri kai fuli 'ieku, na thainana Lord nau ka fulato'oku? 44Sulia si manga ku rongoa ngatalamu, wela ne'e 'i rakeku ka thaka 'ala'a 'ana se'ethathalalaa. 45Ma 'e le'a 'asia na'a femu sulia 'o fa'amamanea ba'elana tha God kai mamana 'i femu.”
Ni Mere 'e fa'aba'itaa tha God
46Ma ni Mere ka ba'e 'una 'eri,
“Mangoku 'e fa'aba'itaa tha God, 47ma manataku 'e se'ethaathala sulia tha God na thuufaa nau,
48uri nia 'e manatato'oku, nau kela'afe kini ni raa nia.
'E 'ita 'i tara'ena, imole ki sui keki sore'a le'alaa 'i faku, 49sulia si doo ba'ita ki na God na 'e sukwa'i 'e ilia 'i faku. Ma
thatana tha God 'e abu.
50Fasi te'e uni'i wane ka fula 'ana ruana uni'i wane, nia 'e faatania tatakomia nia fana imole ki sui na kera faare'inoto 'ani nia.
51Nia 'e ilifania suukwa'ia ba'ita 'ana 'abana, ma ka tagalongania wane ki na kera fafaka'o kera 'i tala 'ada.
52Nia 'e sifolongania wane 'inoto ki fasia 'inotoa kera, ma ka fa'a'inotoa wane ki na kera kelowane'a.
53Ma wane ki na kera thaofa, nia 'e thareda 'ana doo le'a ki, ma ka arasia wane riki'i doo ki bia 'abe'e doo gwa'u.
54-55Nia 'e betaa alanga'ia#1:54-55 Alanga'ia Tha God 'e thafali ba'e 'uu mai sulia fana tha Abraham laa na buka 'ana Jenesis 17:7. na 'e ilia fana koko'o abu kulu ki, maka 'adomia na wanenira nia tha Israel.
Nia 'e manatato'ona faata'ilana tatakomia nia 'i fana tha Abraham, ma 'i fana kwalafaa nia ka fula 'ana susuilaa!”
56Ni Mere 'e too bia ni 'Elisabet sulia ulu fa madami, sui nia ka bi'i oli ura ma'e toaa nia.
Futalana tha Jon Thababtis
57'E fula na'a 'ana si manga fasi ni 'Elisabet kai fa'afuta, ma nia ka tharea te'e wela wane. 58Ma imole kaakali ki bia inalana ki keka rongoa si doo le'a na tha God 'e ilia fana, ma keka se'ethaathala 'asia na'a sulia.
59Kwaula#1:59 Kwaula Kwaula fa thato na te'e fa wiki 'ana biibirangaa na Jiu ki fa thato buira wela 'eri 'e futa, keka lae ura kwa'ikaakali 'ana se'ena sulia biibirangaa kera. Ma keka thathamia fasi keka 'alangia 'ana maka nia tha Sakaraea. 60Sui ma thainana 'e lu'uda ka 'una 'eri, “'e a'i musi 'alangia 'ana thata 'eri! Thatana tha Jon.”
61Ma imole ki sui kera lu'ua keka 'una 'eri, “'e a'i ta wane 'ana kwalafaa kamaro'a si too bo'o mai 'ana thate'e doo 'eri.”
62Sui keka to'olanga'i 'ana 'abada, ma keka soeto'ona maka nia uria thate'e doo taa na 'e thathamia keki 'alangia 'ana wela 'eri.
63Ma tha Sakaraea ka to'olanga'i la'u bo'o, maka gani ura ta si rebe'e doo ura keekedalaa, ma ka kedaa, “Thatana tha Jon.” Ma imole 'eki sui keka kwele 'asia na'a. 64Ma 'ana si manga 'eri la'u bo'o, tha Sakaraea ka ba'e la'u bana, ma nia ka tangoa tha God. 65Ma imole 'eki sui bo'o na kera ofu mai 'i kula 'eri, keka kwele 'asia na'a, ma si fa'arongoa sulia doo 'eki sui ka talofia laa tolo 'ana balifanua 'eri 'i Jiudia. 66Ma imole ki sui na kera rongoa doo 'eki, keka manata sulia ma keka soe 'una 'eri, “Ma kwa'i wane 'ufita na wela ne'e kai ba'ita mai kai 'uria?” Sulia kera thaito'omana na suukwa'ia tha God 'e ni biia wela 'eri.
Tha Sakaraea 'e fa'aba'itaa tha God
67Ma maka tha Jon, tha Sakaraea, 'e fungu 'ana An'oedoo Abu tha God ka fa'ataloa ba'elana tha God, ka sore'a,
68“Kulu fa'aba'itaa Lord, na God ne'e 'i 'Israel.
Nia 'e lae mai ura 'adomilana imole nia ki, ma ura tafalanga'iladalaa.
69Nia kai falea mai te'e thuufaa na 'e suukwa'i ka tatha,
fasia kwalafaa wanenira nia tha Deved,
70'uria nia 'e alangania mai doo ne'e ki 'i na'o, 'ana profet abu nia ki,
71nia kai fa'amaruki kulu fasia ma'alimae kulu ki
ma fasia suukwa'ilana wane ki na kera riki kulu ka ta'aa.
72Nia 'e sore'a kai faatania kwaiofea nia fana koko'o kulu ki,
ma nia kai manatato'ona alaofua abu nia bii kera.
73Nga alaofua abu na 'e ilia bia koko'o kulu tha Abraham:
74'e alangania kai tafalanga'i kulu fasia ma'alimae kulu ki
fasi kuka raa 'i fana ma kusi ma'u la'u,
75ma fasi kuka too 'ana abulaa ma kokotolaa 'i na'ofana 'ana fa thato kulu ki na kuki maruki sulia,
76Ma 'oe wela nau, keki 'alangi 'oe 'ana profet tha God na 'e 'inoto faafia doo ki sui.
Ma 'oki tatha 'i na'o 'ana Lord, fasi 'oko kwaithathai 'ana tala nia 'i fana,
77ma 'oko fa'arongoa imole nia ki, na keki too 'ana marukia
si manga tha God kai manatalubea ta'aalaa kera ki.
78Sulia nia na God 'ana tatakomia,
na laala'aa loo 'i thalo kai afurangga mai faafi kulu mala ta'elana thato 'i 'u'usungedi,
79kai la'a mai fasia 'i thalo loo faafia imole ki na kera too 'i laa ma'erodo
ma nununa maea,
uria kai talai kulu 'i laa na tala 'ana enenoa.”
80Ma wela 'eri ka ba'ita 'ala'a mai 'ana se'edoo, ma manatalana ka rafo la'u bo'o. Ma si manga 'e ba'ita mai, nia 'e lae ka too 'i laa na fanu kwasi laalae ka fula 'ana si manga na 'e thafalia raa nia 'i fana imole ki 'i Israel.
Zur Zeit ausgewählt:
Luk 1: MLU
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024, SITAG
Luk 1
1
1Thiofilas 'ae, wane 'oro ki kera keekeda sulia doo ki na 'e fuli 'i ma'alutamali'a. 2Kera keekeda sulia doo ki na mili rongoa fasia to'a na kera rikia mai thafalilana doo 'eki sui, ma keka ngata mai sulia si fa'arongoa le'a 'eri 'i famili'a. 3Nia bo'o neri, wane 'inoto Thiofilas 'ae, sulia 'ita mai 'ana thafalilana, ku rofe ma kwa soe la'u bo mai sulia doo 'eki na 'e fuli neri, nau ku manata mai sulia, 'e le'a ka tatha uria na kwai keekeda la'u bo'o sulia fulilana doo 'eki sui ka lae mai ka fula 'i tara'ena 'i femu. 4Nau ku keekeda sulia doo 'eki fasi 'oko thaito'omana mamanalana to'odooa na kera to'oa 'i samu.
Ensolo 'e fa'arongo 'ana futalana tha Jon Thababtis
5'Ana si manga tha Herod 'e gwaunga'i 'i fana fanua 'i Jiudia, te'e wanenifo'a thatana tha Sakaraea fasia kule'e wanenifo'a ki fulingana tha Abaeja 'e too la'u bo'o. Ma kwaina, ni Elisabet, 'e futa la'u bo'o fasia kwalafana wanenifo'a ki, 'ana kwalafaa tha 'Eron. 6Abulaladaro'a 'e le'a ma ka kokota 'i na'ofana tha God, sulia kero thai le'a sulia birangaa tha God, bia si ba'ea fiifii nia ki. 7Sui taa, 'e a'i 'adaro'a ta wela, sulia ni Elisabet 'e 'aba'ato, ma keero'a sui keko ara'i ma keko kuke'e na'a.
8Te'e fa thato, tha Sakaraea kai raa 'ana 'i laa na Bi'u Abu tha God, sulia 'e fula na'a 'ana si manga bare'e wanenifo'a ki na tha Sakaraea 'e nii biida, keki ilia na'a raa 'i laa na Bi'u Abu 'eri. 9'Ana birangana wanenifo'a ki, keka filia tha Sakaraea 'ana birangaa mala muuthangoa, uria na kai kotho 'i laa Bi'u Abu tha God, fasia kai na'area doo thasuna 'e makwa le'a. 10'Ana si manga 'eri la'u bo'o imole 'oro ki na kera nii 'i maa, keka fo'a manga na 'e na'area doo thasuna makwa le'a 'eri. 11Ma te'e 'ensolo tha Lord ka faata'i sana, maka takwe bali a'ola 'ana fuli era abu 'eri. 12Si manga tha Sakaraea 'e rikia ensolo 'eri, nia ka tona maka ma'u 'asia na'a. 13Sui, na ensolo 'eri ka ba'e 'una 'eri 'i fana, “Sakaraea, a'i 'osi ma'u la'u! Tha God 'e rongoa fo'alaa 'oe. Ma kwaimu ni Elisabet kai tharea te'e wela wane 'i femu. Ma 'oe 'oki 'alangia 'ana tha Jon. 14Se'ethaathalalaa ba'ita 'asia na'a kai fulato'omu, ma imole 'oro ki la'u bo'o keki se'ethaathalaa 'ana si manga na 'e futa! 15Ma nia tootoo kai ba'ita 'i na'ofana tha God. Nia tootoo si ku'ufia waen mada tei ku'u ki na 'e suukwa'i. Ma 'ita mai 'ana si manga 'e ni 'uu mai 'i ruuru'una thainana, Ano'edoo Abu ka funguli nia 'uu bo mai. 16Nia kai olifania mai imole 'oro ki 'i Israel 'i sana God kera. 17Nia kai lae 'i na'o 'ana tha Lord, 'ana ano'edoo ma suukwa'ia 'uria tha 'Ilaeja. Nia kai olitania la'u liothaua maka ki, ura wela kera ki. Ma nia kai bulasia to'a aburongo ki, ura toolaa sulia biranga kokota mala to'a birangada 'e kokota. Ma nia kai kwaithathai 'ana te'e kule'e imole ki 'i fana tha Lord.”
18Sui, tha Sakaraea ka sore'a 'i sana 'ensolo 'eri, “Nau kwai thaito'omana 'ufita, 'ana mamanalana si doo 'eri? Sulia nau ku ara'i na'a ma kwaiku ka kuke'e na'a la'u bo'o.”
19Ma 'ensolo 'eri 'e lu'ua ka ba'e 'una 'eri, “Nau tha Gebriel ne'e, nau ku too bia tha God 'ana si manga ki sui bana. Ma nia 'e arasi nau mai fasi kwa ba'e bii 'oe, ma kwai fa'arongo 'oe 'ana si fa'arongoa le'a ne'e. 20Sui 'oe 'osi fa'amamanea bo'o si ba'ea nau 'eki, doo kai mamana 'ana si manga na tha God 'e alua mai fasi si doo 'eki kai fuli 'ania. Ma sulia 'osi fa'amamanea ba'elaku, 'osi ba'e, ma ka a'i 'osi ba'e tafa laalae ka fula 'ana si manga na doo na ku faarongo 'oe 'ania kai mamana 'i femu.”
21'Ana si manga 'eri na imole ki na kera ma'asia tha Sakaraea, manatada ka rofe, sulia 'e too mai 'i laa na Bi'u Abu tha God ka tau 'asia na'a. 22Manga tha Sakaraea 'e kotho mai maa, fokona ka 'ato nana ma ka a'i si tala'ana kai sore'a ta si ba'ea 'i sana to'a 'eki. Si manga 'eri bo'o kera sui keka thaito'omana bona'a nia 'e rikia mai ta faatai'a 'i laa Biu Abu 'eri. Sulia fokona 'e 'ato nana, nia ka 'aruto'ona bana 'abana ura to'olanga'ilaa 'i sana to'a 'eki.
23Ma si manga 'ana raalaa nia 'i laa na Bi'u Abu tha God 'e sui, tha Sakaraea ka oli na'a ura toaa nia. 24Ma 'e a'i si tau bo'o buira si doo 'eki, kuke'e nia ni Elisabet ka too na'a 'ana wela, ma sulia lima fa madami, nia si 'akwasia bo'o luma kera. 25Ma nia ka ba'e 'una 'eri, “tha God 'e 'adomi nau na'a, ma ka lafu nau na'a fasia na se'enonia na ku too mai 'ania ma'alutana figua 'oro.”
Ensolo 'e fa'ataloa futalana tha Jisas
26Sui 'e fula 'ana ono fa madami na ni Elisabet 'e toofa 'oo'oga mai sulia, tha God ka arasia mai ensolo Gebrel ura te'e ma'e toaa 'i laa na balifanua 'i Galili, na kera 'alangia 'ana Nasaret. 27Nia 'e ngalia mai te'e si fa'arongoa fana te'e thaari na kera alufaafia fana te'e wane na kera 'alangia 'ana tha Josef. Tha Josef 'e futa 'ana kwalafaa tha Deved na king. Thatana thaari 'eri, ni Mere. 28Ma 'ensolo 'eri lae mai ka ba'e 'una 'eri 'i sana, “Laa thato le'a kau! Tha God 'e ni bii 'oe, ma le'alaa nia femu 'e ba'ita ka tatha!”
29Si manga ni Mere 'e rongoa ba'elana 'ensolo 'eri, manatana ka isifuufuli, ma ka kwaikinai sulia si fa'arongoa 'eri na 'ensolo 'eri 'e sore'a 'i sana. 30Sui na 'ensolo 'eri ka ba'e 'una 'eri la'u fana, “Mere 'ae, a'i 'osi ma'u la'u, sulia tha God 'e ade le'a 'i femu. 31Sulia 'e fili 'oe, 'oki too ana wela, ma 'oki tharea te'e wela wane, ma 'oki 'alangia 'ana tha Jisas. 32Ma nia kai 'inoto ka tatha, ma keka 'alangia 'ana Wela tha God 'i thalo. Tha God 'e alu nia fasi kai gwaunga'i, mala koko'o abu nia tha Deved. 33Ma nia kai gwaunga'i fana Jiu ki na kwalafaa tha Jakob ka tootoo si sui, ma 'inotoa nia 'e tootoo si sui!”
34Ma ni Mere ka ba'e 'una 'eri fana ensolo 'eri, “Nau kwasi too 'uu bia ta wane, sui masi fa'arongoa na 'o sore'a faku kai mamana 'ufita?”
35Ma ensolo 'eri 'e lu'ua ka 'una 'eri, “Ano'edoo Abu kai sifo mai faafi 'oe, ma suukwa'ia tha God kai too faafi 'oe. Sulia na Wela Abu 'eri, keki 'alangia 'ana Wela tha God 'i thalo. 36'O thaito'omana inalamu ni 'Elisabet. Imole ki sui kera sore'a 'e 'afeta'i na'a ura na kai too 'ana ta wela. Sui ka kuke'e mena ana, ono fa madami nia na'a ne'e. 37Sulia 'e a'i ta si doo si 'afeta'i bo'o 'ana tha God.”
38Ni Mere ka ba'e 'una 'eri, “Nau kini ni raa tha Lord, kai mamana 'ana faku mala 'o sore'a neri.” Sui 'ensolo 'eri ka lae bona'a.
Ni Mere 'e maakelea ni Elisabet
39Si tau bo'o buira, ni Mere ka kwaithathai, ka laefoofo'a bona'a ura te'e ma'e toaa 'i laa tolo 'ana balifanua 'i Jiudia. 40Si manga 'e fula, nia ka kotho na'a kau laa toaa tha Sakaraea, ma ka 'arata'i le'a kau 'ana ni 'Elisabet. 41Ma si manga ni Elisabet 'e rongoa 'arata'i le'alaa 'eri fasia ni Mere, na wela 'eri 'i rakena ka thaka 'ala'a. Ma Ano'edoo Abu ka fungulia na'a ni 'Elisabet, 42ma nia 'e ba'e ba'ita ka 'una 'eri, “Le'alaa ba'ita 'e ni bii 'oe ka talua kini ki sui, ma 'e le'a ka tatha fana wela na 'oki fa'afutaa. 43'Ufita fata'i na si doo ba'ita le'a 'una 'eri kai fuli 'ieku, na thainana Lord nau ka fulato'oku? 44Sulia si manga ku rongoa ngatalamu, wela ne'e 'i rakeku ka thaka 'ala'a 'ana se'ethathalalaa. 45Ma 'e le'a 'asia na'a femu sulia 'o fa'amamanea ba'elana tha God kai mamana 'i femu.”
Ni Mere 'e fa'aba'itaa tha God
46Ma ni Mere ka ba'e 'una 'eri,
“Mangoku 'e fa'aba'itaa tha God, 47ma manataku 'e se'ethaathala sulia tha God na thuufaa nau,
48uri nia 'e manatato'oku, nau kela'afe kini ni raa nia.
'E 'ita 'i tara'ena, imole ki sui keki sore'a le'alaa 'i faku, 49sulia si doo ba'ita ki na God na 'e sukwa'i 'e ilia 'i faku. Ma
thatana tha God 'e abu.
50Fasi te'e uni'i wane ka fula 'ana ruana uni'i wane, nia 'e faatania tatakomia nia fana imole ki sui na kera faare'inoto 'ani nia.
51Nia 'e ilifania suukwa'ia ba'ita 'ana 'abana, ma ka tagalongania wane ki na kera fafaka'o kera 'i tala 'ada.
52Nia 'e sifolongania wane 'inoto ki fasia 'inotoa kera, ma ka fa'a'inotoa wane ki na kera kelowane'a.
53Ma wane ki na kera thaofa, nia 'e thareda 'ana doo le'a ki, ma ka arasia wane riki'i doo ki bia 'abe'e doo gwa'u.
54-55Nia 'e betaa alanga'ia#1:54-55 Alanga'ia Tha God 'e thafali ba'e 'uu mai sulia fana tha Abraham laa na buka 'ana Jenesis 17:7. na 'e ilia fana koko'o abu kulu ki, maka 'adomia na wanenira nia tha Israel.
Nia 'e manatato'ona faata'ilana tatakomia nia 'i fana tha Abraham, ma 'i fana kwalafaa nia ka fula 'ana susuilaa!”
56Ni Mere 'e too bia ni 'Elisabet sulia ulu fa madami, sui nia ka bi'i oli ura ma'e toaa nia.
Futalana tha Jon Thababtis
57'E fula na'a 'ana si manga fasi ni 'Elisabet kai fa'afuta, ma nia ka tharea te'e wela wane. 58Ma imole kaakali ki bia inalana ki keka rongoa si doo le'a na tha God 'e ilia fana, ma keka se'ethaathala 'asia na'a sulia.
59Kwaula#1:59 Kwaula Kwaula fa thato na te'e fa wiki 'ana biibirangaa na Jiu ki fa thato buira wela 'eri 'e futa, keka lae ura kwa'ikaakali 'ana se'ena sulia biibirangaa kera. Ma keka thathamia fasi keka 'alangia 'ana maka nia tha Sakaraea. 60Sui ma thainana 'e lu'uda ka 'una 'eri, “'e a'i musi 'alangia 'ana thata 'eri! Thatana tha Jon.”
61Ma imole ki sui kera lu'ua keka 'una 'eri, “'e a'i ta wane 'ana kwalafaa kamaro'a si too bo'o mai 'ana thate'e doo 'eri.”
62Sui keka to'olanga'i 'ana 'abada, ma keka soeto'ona maka nia uria thate'e doo taa na 'e thathamia keki 'alangia 'ana wela 'eri.
63Ma tha Sakaraea ka to'olanga'i la'u bo'o, maka gani ura ta si rebe'e doo ura keekedalaa, ma ka kedaa, “Thatana tha Jon.” Ma imole 'eki sui keka kwele 'asia na'a. 64Ma 'ana si manga 'eri la'u bo'o, tha Sakaraea ka ba'e la'u bana, ma nia ka tangoa tha God. 65Ma imole 'eki sui bo'o na kera ofu mai 'i kula 'eri, keka kwele 'asia na'a, ma si fa'arongoa sulia doo 'eki sui ka talofia laa tolo 'ana balifanua 'eri 'i Jiudia. 66Ma imole ki sui na kera rongoa doo 'eki, keka manata sulia ma keka soe 'una 'eri, “Ma kwa'i wane 'ufita na wela ne'e kai ba'ita mai kai 'uria?” Sulia kera thaito'omana na suukwa'ia tha God 'e ni biia wela 'eri.
Tha Sakaraea 'e fa'aba'itaa tha God
67Ma maka tha Jon, tha Sakaraea, 'e fungu 'ana An'oedoo Abu tha God ka fa'ataloa ba'elana tha God, ka sore'a,
68“Kulu fa'aba'itaa Lord, na God ne'e 'i 'Israel.
Nia 'e lae mai ura 'adomilana imole nia ki, ma ura tafalanga'iladalaa.
69Nia kai falea mai te'e thuufaa na 'e suukwa'i ka tatha,
fasia kwalafaa wanenira nia tha Deved,
70'uria nia 'e alangania mai doo ne'e ki 'i na'o, 'ana profet abu nia ki,
71nia kai fa'amaruki kulu fasia ma'alimae kulu ki
ma fasia suukwa'ilana wane ki na kera riki kulu ka ta'aa.
72Nia 'e sore'a kai faatania kwaiofea nia fana koko'o kulu ki,
ma nia kai manatato'ona alaofua abu nia bii kera.
73Nga alaofua abu na 'e ilia bia koko'o kulu tha Abraham:
74'e alangania kai tafalanga'i kulu fasia ma'alimae kulu ki
fasi kuka raa 'i fana ma kusi ma'u la'u,
75ma fasi kuka too 'ana abulaa ma kokotolaa 'i na'ofana 'ana fa thato kulu ki na kuki maruki sulia,
76Ma 'oe wela nau, keki 'alangi 'oe 'ana profet tha God na 'e 'inoto faafia doo ki sui.
Ma 'oki tatha 'i na'o 'ana Lord, fasi 'oko kwaithathai 'ana tala nia 'i fana,
77ma 'oko fa'arongoa imole nia ki, na keki too 'ana marukia
si manga tha God kai manatalubea ta'aalaa kera ki.
78Sulia nia na God 'ana tatakomia,
na laala'aa loo 'i thalo kai afurangga mai faafi kulu mala ta'elana thato 'i 'u'usungedi,
79kai la'a mai fasia 'i thalo loo faafia imole ki na kera too 'i laa ma'erodo
ma nununa maea,
uria kai talai kulu 'i laa na tala 'ana enenoa.”
80Ma wela 'eri ka ba'ita 'ala'a mai 'ana se'edoo, ma manatalana ka rafo la'u bo'o. Ma si manga 'e ba'ita mai, nia 'e lae ka too 'i laa na fanu kwasi laalae ka fula 'ana si manga na 'e thafalia raa nia 'i fana imole ki 'i Israel.
Zur Zeit ausgewählt:
:
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024, SITAG