YA-SFADOCI JRNE 5
5
1Hvhkuwihi ina yolumv wiahi ntvsi vhdawi u wihfanciga-wanwv nihki Josvki; macimi Jesise Culosalamegi si kuqicsinwv.
2Huwa ntvsi Culosalamegi vhdawi pahqrkvmigi pvkvci ini magefiwi sqrta, Pafasta sidota Heblo-wrtuwawa-nagi, nyrlvnwa-lanv spvhqigrni. 3Betiga yolumv saxinoki msaloki ya-qilugacki, ga-gabeqacki, na-nagificki, yrbwawaficki. 5Chena nr-nakuti ilani nfwrpitvgi-gita-nfwrsigfwi gikvtu uci ntvsi vpiwv u kvtunawa-nagi. 6Jesise iah nawrci nili bami saxinalici, macimi u wrkutv yasi nili uwa mahci asvia uci ini ilafilici, Hv gih mafafihagopi gi tasi taha? u talrli. 7Inv vhqilugawi-lani ud rpvtvwrli nili.
Yalaniwivni, mvtv ni bonv ilani ini pahqrkvmigi wvh si bonitv ina iah bokvmdodagi ini napi : wakv iahaiahi nhriv kutvkv wiyafv yalvhfvmeiv svhgigi yrlkvmwv, isiwa. 8Hunsgrlu, mvmalu gi tfvni, macimi pamfalu, u talrli Jesise. 9Chena waianv inv ilani mafafihofu, macimi u mvma u tfvni macimi pamfa.
Huwa ini vlwrkvhsiwewa ina grsagigi. 10Waciganvhi nihki Josvki, Ca hini vlwrkvhsiwewa ini, macimi ini mvtv mvyrwvtwi kutaladewa-nagi wvhsi mvmaivni gi tfvni, u talrwrli nili ga-gegahofulici. 11Pvyaqv inv ud rpvftvwvhi, Inv ma-mafafihitv, Mvmalu gi tfvni, macimi pamfalu, ni taqv, u talvhi. 12U nvtuhtvwr-wrli nihki, Nafvwa inv ilani, Mvmalu gi tfvni macimi pamfalu ya-lahkv? 13Pvyaqv inv ga-gegahofutv mvtv u wrkumrli si wiyafvli nili : xvga Jesise pvivgilv u mahci si wado weiv, dawvhi mahsalakv ntvsi. 14Mviuhqrci Jesise u mkvwrli nili mi mvmrtumawi-kvmikugi, macimi, Wrpvtvnu, gi mafafiha-gopi : tagi gidani mvjesi lvwelu, belapa vlikv si mvci wiahi ga ipana, u talrli. 15Hinv ilani wapfa, macimi u wetvmvwvhi nihi Josvhi yasi ini Jesisewilici nili mviahci mafafihakuci. 16Chena yomv uci nihki Josvki nochrlrwrli Jesiseli, xvga inv yolumv wiahi si lvwi tv hvlwrkvhsiwigi. 17Pvyaqv nihi ud rpvftvwvhi Jesise, N’Uhfv pakvtafi datapilvhi brlu’ hinugi, macimi nelv ni pakvtafi, u talvhi. 18Yomv uci waciganvhi nihki Josvki ini vlikv u tasi nvtunahr-nrwv wvhsi nfrwrci nili, xvga inv mvtv ini vlwrkvhsiwewa pahi u puskunv, wakv nahfrpi n’ Uhfv u ta sinrli Mvnadoli, u jajasdo weiv Mvnadoli.
19Waciganvhi Jesise rpvfsa, macimi, Tapilo, tapilo, gi talapwv nelv, Inv Uqihfimv mvtv-wiahi ivh kvtvwi si lvwi pasiqi weiv, wakv wiahi na-namagi inv nili Ufimrli bami si lvwelici : xvga goqa-nahi-grci si wiahi inv si lvwi, yoloni nahfrpi inv Uqihfimv si lvwi ufapi ivskv ini. 20Xvga inv Ufimv ut vhqalamrli nili Uqihfimrli, macimi u wrpvtalrli nili jrivhki wiahi weiv yrsi lvweci : chena vlikv si pakvtafewanv notv yolumv wiahi wa hinv wrpvtalrli nili, wvhsi gelvwv manvwvhi qvqahdrni tahayaqa. 21Xvga yasi inv Ufimv unsgrnrci nihi na-palici macimi melrci nihi lanvwawewa, datapilvhi yoni inv Uqihfimv nahfrpi melrci lanvwawewa wiyafvli yonv ya-lalamrci. 22Xvga mvtv nuhgi inv Ufimv wiah’ huta lvhkuwrlrli wiahsi ilaneli, wakv inv naiahkv u melrli jrivhgi wiah’ lvhkuwawa nili Uqihfimrli; 23wvhsi jrivhki manvwvhi utvgalamrwrci nili Uqihfimrli, datapil-vhi yasi nihki utvgalamr-wrci nili Ufimrli. Hinv ba-bur utvgalamrtv nili Uqihfimrli mvtv utvgalamrli nili Ufimrli wa-wrwenaskvwrtv nili. 24Tapilo, tapilo, gi talapwv nelv, Inv ba-fatvkv ni kvlvwewa, macimi dapwahsa nili wa-wrwenaskvwilici, u bonv goqa-lrqvsi lanvwawewa, macimi mvtv mahtvku wrfo wa-il agi si biawv, wakv mahci luhfi pamfa nabowa lanvwawewa-nagi si. 25Tapilo, tapilo, gi talapwv nelv, Ini yrtafvgi biaiv, macimi inugi uwa, ina nihki na-pagiki wah nodrnrwv ini u ta sihsimowa inv u Qihfvli Mvnatu; macimi nihki na-notvgiki wah lanvwa-weki. 26Xvga yasi inv Ufimv bonvgi lanvwawewa weyrgi, yone datapilvhi u tasi melrli nili Uqihfimrli nahfrpi wvhsi bonvmalici lanvwawewa u weyrwilici : 27chena u melrli simakufewa wvhsi gicitvskvmalici mahtvh-kuwawa, xvga inv ilani u qihfvli. 28Tagi qvqahdrna latvmuku yomv : xvga ini yrtafvgi biaiv, ina jrivhki ya-picki nili nabowrlvku wah nodrnrwv uta sihsimowa, 29macimi wah biaci luhfaki; nihki mviahci lvweci wawasrgi, ini rpafewi-unsgrwi lanvwawewa-nagi haki; macimi nihki mviahci lvwecki majrfigi, ini rpafewi unsgrwi mahtvh-kuwrfowa-nagi haki.
30Mvtv-wiahi pasiqi ni tvh kvtvwi si lvwi : yasi nodrgaiv, ni talvhkuwa : macimi ni talvhkuwawa tapvsvwvtwi; xvga mvtv nelv ni tasi tahawa ni nvtunahv, wakv inv u tasi tahawa wa-wrwenaskvwitv. 31Qahqi nelv pvh-nemaiv pasiqi ni dabwawani-wewa, ni dabwawaniwewa mvtv mvyrwvtwi. 32Kutvkv inv ba-pvh-nemvwitv dabwawaniwewa; macimi ni wrkutv yasi ini dabwawaniwewa da-dabwawanhici mvyrugi. 33Gelvwv ki mahci Jrne si wrwengapwv, macimi inv u mahci ini si pvh-nema dabwawa-nagi. 34Pvyaqv ini dabwawaniwewa wa-utfakuiv mvtv ilani uciweiv : pvyaqv ni taiu yolumv wiahi, wvhsi gelvwv manvwvhi wrpvnashofuyaqa. 35Henv inv netvwrkv fa-fvgfutv chena wvhfafiga; macimi ki manwi tahapwv wvhsi usvsilabwr-yaqa mrlrqvsi u wvhfayrmigi. 36Pvyaqv ini dabwawa ba-bonvmv vlikv inwi yanwilici Jrne; xvga nili pakvtafewanv mviahci melici inv Ufimv wvhsi mahci-lutvmv, nili tapilo pakvtafewanv yrsi lvweiv, ni dabwawanhakunv, yasi inv Ufimv mahci w T rwenaskvwici. 37Macimi inv Ufimv wa-wrwenaskvwitv, ni mahci dabwawan-haqv inv. Gelvwv mvtv ki mah’ nodrnrwv u ta sihsimowa nahcipah’ Irqv, mvtv nuhgi ki mah’ namanrwv yalyawaci. 38Chena mvtv ki bonrnrwv u kvlvwewa geyrwrgi : xvga nili wa-wrwenaskvwrci, mvtv ki dapwahtv-mvwrwv nili. 39Nili ki tah nvtunahigapwv tapilo awigrdawvli, xvga ki tasi tahapwv gelvwv yasi nili betiga bonvmaqa goqa-lrqvsi lanvwa-wewa; macimi yoloni nili ba-pvh-nemakuiv dabwawaniwewa; 40macimi gelvwv mvtv gesv bialutvwipwv, wvhsi manvwvhi bonvmaqa lanvwawewa. 41Mvtv ilani ni uci utfaku ini wvhfrci-makufewa. 42Pvyaqv gi wrkumalapwv gelvwv, yasi bur bonvmaqa geyrwrgi ini ut vhqaladewa Mvnatu. 43N’, Uhfv u wefowa-nagi ni bir nelv, macimi mvtv k’ utvhpanipwv : qahqi kutvkv wah biawv nahvlwrkv u wefowa-nagi, gelvwv inv ga hutvhpanrwv. 44Nahiwa gelvwv gahsi kvtvwi dapwahsapwv, luhkumv pasiqi wa-tvhpanv-mrticki wvhfrci-makufewa, chena ini wvhfrci-makufewa inv Mvnatu pahi wa-moyrgi mvtv ki nvtunahrnrwv? 45Wvhsi inv Ufimv si masdrwimalvku, tagi si tahaku : ntvsi vpiwv nakuti ma-masdrwimal-wrqa, datapilvhi Mosise, usgici inv ki mahci si bonrnrwv ki nvnrci-tahawanwv. 46Xvga qahqi gelvwv dapwahtvwaqa Mosise, kih dapwahtv-wipwv nelv; xvga inv ni tvlvwigrlaqv nelv. 47Wakv qahqi gelvwv bur dapwahtv-maqa ya-lvwigaci, nahiwa gahsi dapwah-drnrwv ni kvlvwewa? u talvhi.
Zur Zeit ausgewählt:
YA-SFADOCI JRNE 5: SJW
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Published for Thomas Wildcat Alford in 1929
