Ripimae Agaa 13
13
Abram-para Lot Lapo Kanan Apupaisipi
1Go rabu Abram Isip awa wala Negep pisa. Ore-para nipuna oyae rayo page mea pisa. Lot page nipu rapu pisa. 2Go raburi Abram-re gawana page gol silpa lapona page amonaki meda asa.
3Oropere Negep gimoa Abram nipu sumeda-para puamama pua Betel epa opapasa. Nipumi abaripia sele ada Betel-para Ai lapona rikirana pisaya. 4Go parere aana reke meda ririnane warisade pare. Gore Abram-me go pare Adaa Aa-na bi loa lotu sa.
5Lot nipuna ruru-para nipuna kogono onaanu page Abram rapu pamisimi. Nipumi page gawa sipisipi meme menanu page adapu punisa. 6Su regepesa pulu nipu lapo padane-para ape awi naisa. 7Go su-parare Kenan ruru-para Peris ruru page asimi. Go rabu Abram-para Lot lapona mena surube aanumi ratu yawala-pasimi.
8Go rabu Abram-me Lot-para lalo: Sana rikirana ratu nayawapana, sare aaraya yapulu sana kogono aanumi page ratu nayawena. 9Suri dina apo iyada, abia sare apupapana rana-paliade nanere meania. Medane ne palidare gore medanere ni pono.
10Lot-me adamonisa pare mo Jordan suri paune ipa segene su epe meda isa. Adaa Aa-na maapumi adesa. Go suri Soar regepea isapulu Isip sumi adesa. Go raburi Adaa Aa-me Sodom Gomora lapo ambi natiaina. 11Mo aa lapo apupaisipi pulu Lot-re nare ipulanane isa Jordan awaro paune suna pisa. 12Abram Kenan su-para aisa raburi Lot-re Sodom ada kagure regepea nipuna sele ada mo Sodom awaro paune suna pisa. 13Go rabu Sodom onaanumi waeanu waru pisimi, goa pua Adaa Aa-para page waea waru pisimi.
14Lot aba penaloa Adaa Aa-me Abram-para lalo: Apo ayepare awa iniminipa, goa pua nare opea nane page, pabea nane page sula popea lapona page ada. 15Apo adae su rayo, ne para nena madu maralalide ruru repara gudiayato. 16Neme nena maralalide onaare, dorupa maralalua. Goa pua dipiaperupa page maralimi. 17Apo surayo abi pua ada, go nepamuae su rayo ne gialo.
18Gore Abram-me nipuna sele ada yokoria Hebron pua, mo Mamre repena oak puti regepea pua pisa. Goa pua Adaa Aa-na aana reke meda warisa.
Zur Zeit ausgewählt:
Ripimae Agaa 13: kew
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2004, Wycliffe Bible Translators, Inc. All rights reserved.