These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᒋ ᐅᑎᒋᐱᔪᐤ ᒐᒃ ᐊᓐᑕ ᑲᒋ ᒥᑯᓴᒡ ᒍᐤ ᐃᔪᒡ ᐊᓐᑕ ᒋᕈᓯᓕᒥᒡ, ᐊᑯᑕ ᒪᒃ ᐊᓐᑕ ᑲ ᐃᑐᑕᑦ ᒋᓴᔅ᙮ ᐊᓐᑕ ᒪᒃ ᒋᕈᓯᓕᒥᒡ ᒋ ᑎᑯᓐ ᐊᓐᑕ ᐊ ᐅᒋ ᐱᒐᓄᐅᒡ ᒪᔭᑕᓂᔅ ᒋᐱᔎᐤ ᐊ ᐃᓯᓂᐧᑲᑕᒡ᙮ ᒥᒋᒪ ᒪᒃ ᐊᓐᑕ ᒋ ᑎᑯᓐ ᐊ ᐱᑲᓯᒧᓇᓄᐅᒡ, ᐸᑎᔅᑕ ᒋ ᐃᓯᓂᐧᑲᑕᐤ ᐃᑉᕈᐤ ᐊ ᐃᓯ ᐃᔨᒥᓇᓄᐅᒡ᙮ ᐱᑕᑕᒡ ᒋ ᑕᑎᓇ ᐱᑐᔎᐛ ᐊ ᑎᒂᒋ ᐊᓐᑕ᙮ ᒥᒐᑦ ᐊᐛᓐᒋ ᑲ ᐊᐧᑯᓯᒡ ᐊᑯᑕ ᐊᓐᑕ ᐱᑐᔎᒡ ᑲ ᐱᒥᓯᓂᒡ, ᐊᓐᒡ ᐊᑲ ᐛᐸᑕᒡ, ᑭᔭ ᐊᓐᒡ ᐊᑲ ᒋ ᐱᒧᑕᒡ ᑭᔭ ᐊᓐᒡ ᐊᑲ ᓂᔅᑐᓯᒡ ᐎᔭᐛᒡ, ᐊ ᐊᓱᐛᐸᑕᒡ ᐊᓂᔭ ᓂᐱᔪᐤ ᒐ ᐃᔅᐱᔅ ᐊᑕᑭᒥᐱᔨᒡ᙮ ᐛᔅ ᒋᓴᒪᓂᑐᐤ ᒋ ᐸᒋ ᐃᑎᓴᐛᐤ ᐅᑦ ᐊᓐᒋᓂᒪ ᒐᒋ ᐃᑕᑭᒥᐊᒥᔨᒋ ᐊᓂᔭ ᓂᐱᔪᐤ ᒐᒋ ᐊᑕᑭᒥᐱᔨᒡ᙮ ᐅᔭ ᒪᒃ ᐊ ᐃᔅᐱᔨᒋ ᐊᓂᔭ ᓂᐱᔪᐤ, ᐊᓐ ᐊᐛᓐ ᑕᓐ ᒥᒄ ᐊ ᐃᑕᔅᐱᓇᒂ ᓂᔅᑎᒻ ᐊ ᐱᑭᔅᑐᐛᑕᑦ ᒋ ᒥᓏᒋᐊᑭᓄᐤ᙮ ᒋ ᑕᐤ ᒪᒃ ᓇᐸᐤ ᓂᔅᑐᔪᐤ ᐊᓱ ᔭᓇᐤ ᑕᑐᐳᓇ ᐊᒋ ᐃᔅᐱᔅ ᐊᐧᑯᓯᑦ᙮ ᐃᔅᐱ ᒋᓴᔅ ᐎᔭᐱᒪᑦ ᐊᓂᔭ ᓇᐸᐛ ᐊᓐᑕ ᐊ ᐱᒥᓯᓂᔨᒋ, ᒋ ᒋᔅᒐᔨᒪᐤ ᓴᔅ ᐛᔅᑭᒡ ᐊᒋ ᐊᐧᑯᓯᔨᒋ, ᐊᑯ ᑲ ᑯᒂᒋᒪᑦ ᐊ ᐃᑕᑦ, “ᒋ ᐎ ᒥᓏᒋᐃᑯᓯᓐ ᐊ ?”
ᐊᑯ ᐊᓐ ᓇᐸᐤ ᑲ ᐊᐧᑯᓯᑦ ᒂ ᐃᔅᒋᔄᑦ, “ᓇᒪ ᑕᐤ ᐊᐛᓐ ᒐᒋ ᐸᒋ ᐃᑐᑕᐃᑦ ᐊᓐᑕ ᒪᒂᒡ ᐊ ᐊᑕᑭᒥᐱᔨᒡ ᐊᓂᔭ ᓂᐱᔪᐤ᙮ ᒪᒂᒡ ᐊ ᐃᔅᐱᓯᐧᑲᓱᔭᓐ ᐊᓐᑕ ᐊ ᐎ ᐃᑐᑕᔭᓐ ᓴᔅ ᑕᐤ ᒪᓐ ᐊᐛᓐ ᐊ ᐸᒋ ᐊᑯᔅᑯᐅᑦ᙮”
ᐊᑯ ᒋᓴᔅ ᒂ ᐃᑕᑦ ᐊᓂᔭ ᓇᐸᐛ, “ᐱᓯᑯ, ᐅᑎᓇ ᒋᑦ ᐊᔅᐱᓯᒧᓐ ᒐ ᐱᒧᑕᔨᓐ᙮” ᑎᐛᒡ ᒪᒃ ᒋ ᐅᒋ ᒥᓏᑎᓯᐤ ᐊᓐ ᓇᐸᐤ᙮ ᒋ ᐅᑎᓂᒻ ᐅᑦ ᐊᔅᐱᓯᒧᓐ ᐊᑯ ᒂ ᔅᑐᑕᑦ᙮ ᒋ ᐊᔭᒥᐊᐅᒋᓯᑲᐤ ᒪᒃ ᐅ ᑲ ᐃᔅᐱᔨᒡ᙮ ᐊᑯ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒂ ᐃᑕᒡ ᐊᓂᔭ ᓇᐸᐛ ᑲ ᒥᓏᒋᐊᑭᓄᔨᒋ, “ᐊᔭᒥᐊᐅᒋᓯᑲᐤ ᐊᓄᒡ ᓇᒪ ᐃᑎᔅᑕᐤ ᓂᐎᓱᐛᐅᓇᒡ ᒐᒋ ᑕᐧᑯᓂᒥᓐ ᒋᑦ ᐊᔅᐱᓯᒧᓐ ᐊ ᐊᔭᒥᐊᐅᒋᓯᑲᒡ᙮”
ᐊᑯ ᐊᓐ ᓇᐸᐤ ᑲ ᒥᓏᒋᐊᑭᓄᐅᑦ ᒂ ᐃᔅᒋᔄᑦ, “ᐊᓐ ᐊᐛᓐ ᑲ ᐸᒋ ᒥᓏᒋᐃᑦ, ᐊᐅᒄ ᐊᓐ ᑲ ᐸᒋ ᐃᓯᑦ, ‘ᐅᑎᓇ ᒋᑦ ᐊᔅᐱᓯᒧᓐ ᑭᔭ ᐱᒧᑕ᙮’ ”
ᐊᓐᒡ ᒪᒃ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒋ ᑯᒂᒋᒪᐅᒡ ᐊᓂᔭᔪᐛ ᓇᐸᐛ ᐊ ᐃᑕᒡ, “ᒐᒄ ᓇᐸᐤ ᐅ ᑲ ᐃᑎᔅᒃ ᒐᒋ ᐅᑎᓂᒧᑦ ᒋᑦ ᐊᔅᐱᓯᒧᓂᔪᐤ ᑭᔭ ᒐᒋ ᐱᒧᑕᐅᑦ ?”
ᐊᑯ ᐊᓐ ᓇᐸᐤ ᓇᒪ ᐅᒋ ᒋᔅᒐᔨᒪᐤ ᐊᐛᔪᐛ ᐊᓂᔭ ᑲ ᒥᓏᒋᐃᑯᑦ ᐛᔅ ᓴᔅ ᒋ ᔅᑐᑕᔪᐛ ᒋᓴᓴ ᐛᔅ ᐊᒋ ᒥᒐᑎᓇᓄᐎᒡ ᐊᓐᑕ᙮
ᐸᑎᒪ ᒪᒃ ᐊᓐᑕ ᒋᓴᐊᔭᒥᐊᐅᒋᐛᐱᒡ ᒋᓴᔅ ᒋ ᓂᒋᔅᑯᐛᐤ ᐊᓂᔭ ᓇᐸᐛ ᑲ ᒥᓏᒋᐊᑦ ᐊᑯ ᒂ ᐃᑕᑦ, “ᓂᑐᑐᐎ, ᓴᔅ ᒋ ᒥᓏᑎᓯᓐ᙮ ᐊᑲᐎᔾ ᒥᓐ ᒥᒋᑐᑕ, ᐊᑲ ᓇᑐᐛᔨᑎᒧᐎᓇ ᐊᑐᐎᔅ ᐊ ᒪᔭᑎᒡ ᒐᒂᓐ ᒐᒋ ᐃᔅᐱᔨᓐ᙮”
ᐊᓐ ᒪᒃ ᓇᐸᐤ ᑲ ᒥᓏᒋᐊᑭᓄᐅᑦ ᒋ ᔅᑐᑕᐤ ᐊ ᐎᑎᒧᐛᑦ ᐊᓂᔭᔪᐛ ᒍᐤ ᑲ ᓂᑲᓂᔅᑯᐛᔨᒋ ᒋᓴᓴ ᐊᒋ ᒥᓏᒋᐃᑯᑦ᙮ ᐊᓐᒡ ᒪᒃ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᐊᑯᑕ ᒂ ᐅᒋ ᒋᒋᐱᔨᒡ ᐊ ᒪᔭᔨᒪᒡ ᒋᓴᓴ ᐊᓂᔭ ᐅᒋ ᐊᒋ ᒥᓏᒋᐊᔨᒋ ᐊᓂᔭ ᓇᐸᐛ ᐊ ᒍᐤ ᐊᔭᒥᐊᐅᒋᓯᑲᔨᒡ᙮ ᐊᑯ ᒂ ᐃᑎᑯᒡ ᒋᓴᓴ, “ᓄᑕᐎᔾ ᒧᔅ ᒥᔪᑐᑎᒻ ᐊᑎ ᐊ ᐊᔭᒥᐊᐅᒋᓯᑲᔨᒡ, ᑭᔭ ᓂᔾ ᒪᒃ ᐊᐅᑯᓐ ᒐ ᐎ ᐃᑎᔭᓐ᙮”
ᐅᔭ ᒋᓴᓴ ᑲ ᐃᔅᒋᔄᔨᒋ, ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒋ ᐃᑕᐅᒡ, “ᓂᔅᑎᒻ ᓇᒪ ᐅᒋ ᒋᔅᑕᔨᑎᒻ ᐊ ᒍᐤ ᐊᔭᒥᐊᐅᒋᓯᑲᔨᒡ ᐊᑯ ᒥᓐ ᒂ ᐃᔅᒋᔄᑦ ᒋᓴᒪᓂᑐᐛ ᐊ ᐅᑕᐎᑦ᙮ ᑭᔭ ᒧᔭᒻ ᑕᓐ ᐊᔅᐱᔅ ᒋᔅᑕᔨᑕᑯᓯᔨᒋ ᒋᓴᒪᓂᑐᐛ ᐊᐅᑯᓐ ᒂ ᐃᑕᔨᒥᓱᑦ᙮ ᐊᐅᒄ ᒪᒃ ᐅᔭ ᐛᒋ ᐊᑐᐎᔅ ᓂᑐᐛᔨᒪᒡ ᒐᒋ ᓂᐸᐊᑭᓄᔨᒋ᙮”

ᒋᓴᔅ ᒪᒃ ᒋ ᐃᑕᐤ, “ᑯᐃᔅᒄ ᒋ ᐎᑎᒪᑎᓇᐛᐤ, ᐅᑯᓯᓯᒪᐤ ᓇᒪ ᒥᒄ ᐎᔾ ᒋᑭ ᒋ ᐃᑐᑎᒻ ᒐᒂᔪᐤ᙮ ᐅᑕᐎᒪᐛ ᑭᓄᐛᐱᒪᐤ ᒐᒂᔪᐤ ᐊ ᐃᑎᔨᒋ ᑭᔭ ᐎᔾ ᒪᒃ ᐊᐅᑯᓐ ᐊ ᐊᑎ ᐃᑎᑦ᙮ ᒥᒄ ᑕᓐ ᐊ ᐃᑎᔨᒋ ᐅᑕᐎᔭ ᐊᐅᑯᓐ ᐊ ᐃᑎᑦ ᑭᔭ ᐎᔾ ᐅᑯᓯᓯᒪᐤ᙮ ᐛᔅ ᐅᑕᐎᒪᐤ ᓴᒋᐊᐤ ᐅᑯᓯᓯᒪᐛ ᑭᔭ ᐛᐸᑎᔭᐤ ᒥᓯᐛ ᑕᓐ ᐊ ᐃᑎᑦ᙮ ᒋᑭ ᐎᒋᐊᐤ ᐊᑐᐎᔅ ᒐᒋ ᒪᒥᔅᑲᒡ ᐃᑎᔨᒋ᙮ ᐊᑯ ᒪᒃ ᒐ ᒪᒥᔅᑲᑕᔨᑎᒪᒄ᙮ ᐅᑕᐎᒪᐤ ᐅᓂᔅᑲᓇᐤ ᐊᐛᔪᐛ ᓂᐳᐅᓂᒡ ᐅᒡ ᑭᔭ ᒪᔭᑦ ᐱᒪᑎᓯᐅᓂᔪᐤ, ᐊᐅᑯᓐ ᑭᔭ ᐊᓐ ᐊ ᐃᑎᑦ ᐅᑯᓯᓯᒪᐤ, ᒥᔭᐤ ᐊᐛᔪᐛ ᐱᒪᑎᓯᐅᓂᔪᐤ ᐊᓂᔭ ᐛ ᒥᔭᑦ᙮ ᐅᑕᐎᒪᐤ ᓇᒪ ᑎᐸᔅᑯᓇᐤ ᐊᐛᔪᐛ᙮ ᐎᔾ ᓇᔅᒡ ᒋ ᒥᔭᐤ ᐅᑯᓯᓯᒪᐛ ᒐᒋ ᑎᐸᔅᑯᓂᒐᔨᒋ᙮ ᐊᑯ ᒪᒃ ᒥᓯᐛ ᐊᐛᓐ ᒐ ᒋᔅᑕᔨᒪᑦ ᐅᑯᓯᓯᒪᐛ ᒧᔭᒻ ᐊ ᐃᓯ ᒋᔅᑕᔨᒪᑦ ᐅᑕᐎᒪᐛ᙮ ᐊᓐ ᐊᐛᓐ ᐊᑲ ᒋᔅᑕᔨᒪᑦ ᐅᑯᓯᓯᒪᐛ ᓇᒪ ᒋᔅᑕᔨᒪᐤ ᑭᔭ ᐅᑕᐎᒪᐛ ᐊᓂᔭ ᑲ ᐸᒋ ᐃᑎᓴᐅᑯᔨᒋ᙮”
“ᑯᐃᔅᒄ ᒋ ᐎᑎᒪᑎᓇᐛᐤ, ᐊᓐ ᐊᐛᓐ ᒐ ᐸᒋ ᓂᑐᑎᒧᒂ ᑕᓐ ᐊ ᐃᔅᒋᔄᐅᒡ ᑭᔭ ᑕᑈᑐᐛᒐ ᐊᓂᔭ ᑲ ᐸᒋ ᐃᑎᓴᐅᔨᒋ ᑲᒋᒡ ᒋᑭ ᐱᒪᑎᓯᐤ᙮ ᓇᒪ ᒋᑭ ᐅᒋ ᑎᐸᔅᑯᓇᑭᓄᐤ ᐛᔅ ᓂᐳᐅᓂᒡ ᒋ ᐅᒋ ᐅᑎᓇᑭᓄᐤ ᐊᑯ ᐱᒪᑎᓯᐅᓂᒡ ᑲ ᐃᓯ ᐱᔅᑎᓇᑭᓄᐅᑦ᙮ ᑯᐃᔅᒄ ᒋ ᐎᑎᒪᑎᓇᐛᐤ ᓴᔅ ᐊ ᐅᑎᒋᐱᔨᒡ ᐊᓐ ᑎᐸᐃᑭᓐ ᐅ ᒐ ᐃᔅᐱᔨᒡ, ᓴᔅ ᒪᒃ ᐃᔅᐱᔪᐤ, ᐊᓐᒡ ᑲ ᓂᐱᒡ ᒋᑭ ᐸᑎᒺᐅᒡ ᒋᓴᒪᓂᑐᐛ ᐅᑯᓯᔪᐛ ᐅᐸᑕᑯᓱᐅᓂᔪᐤ᙮ ᐊᓐᒡ ᒪᒃ ᑲ ᐸᑎᒺᒡ ᒋᑭ ᐱᒪᑎᓯᐅᒡ᙮ ᐛᔅ ᐎᔾ ᐅᑕᐎᒪᐤ ᐊ ᑕᑦ ᐅᒋᐱᔪᐤ ᐱᒪᑎᓯᐅᓂᔪᐤ, ᒥᔭᐤ ᒪᒃ ᐅᑯᓯᓯᒪᐛ ᑭᔭ ᐎᔾ ᐊ ᑕᔨᒋ ᒐᒋ ᐅᒋᐱᔨᒡ ᐱᒪᑎᓯᐅᓂᔪᐤ᙮ ᒋ ᒥᔭᐤ ᑭᔭ ᐅᑯᓯᓯᒪᐛ ᑎᐸᔨᒋᒐᐅᓂᔪᐤ ᒐᒋ ᑎᐸᔅᑯᓂᒐᔨᒋ ᐛᔅ ᐎᔾ ᐊᐅᒄ ᐃᔪᐤ ᐅᑯᓯᓴᓐ᙮”
“ᐊᑲᐎᔾ ᑯᔅᑯᐱᔨᒄ, ᐛᔅ ᓴᔅ ᐸᓱᓇᑯᓐ ᒥᓯᐛ ᐊᓐᒡ ᑲ ᓂᒂᔅᑲᑕᑭᓄᐅᒡ ᒐᒋ ᐸᑎᒺᒡ ᐅᑯᓯᓯᒪᐛ ᐅᐸᑕᑯᓱᐅᓂᔪᐤ, ᐊᑯ ᒪᒃ ᒐ ᐅᓂᔅᑲᒡ ᓂᐳᐅᓂᒡ ᐅᒡ᙮ ᐊᑯ ᐊᓐᒡ ᑲ ᑯᐃᔅᑯᑕᑎᓯᒡ ᑲᒋᒡ ᒋᑭ ᐱᒪᑎᓯᐅᒡ᙮ ᐊᑯ ᐊᓐᒡ ᑲ ᒥᒐᑎᓯᒡ ᒋᑭ ᐅᓂᔅᑲᓇᐊᑭᓄᐎᒡ ᓂᐳᐅᓂᒡ ᐅᒡ ᒐᒋ ᑎᐸᔅᑯᓇᑭᓄᐎᒡ᙮”

“ᓂᔾ ᒪᒃ, ᓇᒪ ᓂ ᐅᒋ ᒥᔨᑯᐅᓐ ᓂᔾ ᐛ ᐃᑎᔭᓐ ᒐᒋ ᐃᑎᔭᓐ, ᐃᔅᐱ ᐊ ᑎᐸᔅᑯᓂᒐᔭᓐ ᑕᓐ ᐊ ᐃᑎᓱᒥᑦ ᒋᓴᒪᓂᑐᐤ ᐊᐅᑯᓐ ᐊ ᐃᑎᔭᓐ᙮ ᑯᐃᔅᑯᓇᑯᓐ ᒪᒃ ᐊᓐ ᐊ ᑎᐸᔅᑯᓂᒐᔭᓐ ᐛᔅ ᑕᓐ ᐊ ᐃᑎᓱᒥᑦ ᐊᓐ ᑲ ᐸᒋ ᐃᑎᓴᐅᑦ ᐊᐅᑯᓐ ᐊᓐ ᐛ ᐃᑎᔭᓐ᙮”
“ᓂᔾ ᒪᒃ ᒥᒄ ᑎᐸᒋᒥᓱᔭᓐ ᐊ ᐃᔅᒋᔄᔭᓐ ᐊ ᐊᐎᔭᓐ ᙭ ᓇᒪ ᓂᐸ ᐅᒋ ᑕᑈᑕᑯᐅᓐ᙮ ᑯᑎᒃ ᐊᐛᓐ ᑕᐤ ᐊ ᐸᒋ ᑎᐸᒋᒥᑦ ᐊ ᐃᔅᒋᔄᑦ ᐊ ᐊᐎᐅᒡ ᙭ᑕ, ᓂ ᒋᔅᒐᔨᑕᓐ ᒪᒃ ᐊ ᑕᑈᒥᑭᓂᔨᒡ ᐊᓂᔭ ᑲ ᐃᑕᒋᒥᑦ᙮”
“ᔅᒋ ᐃᑎᓴᐛᐛᐅᒡ ᐊᐛᓐᒋ ᐊᓐᑕ ᒠᓇ ᐊ ᑕᔨᒋ ᒐᒋ ᓂᑐ ᒋᔅᒐᔨᒥᒡ ᑕᑈ ᐊ ᐊᐎᔭᓐ ᙭᙮ ᒋ ᑕᑈᐤ ᒪᒃ ᑕᓐ ᑲ ᐃᓯ ᑎᐸᒋᒥᑦ ᒠᓐ ᑲ ᐃᔅᒋᔄᑦ ᐊ ᐊᐎᐅᒡ ᐊᓂᔭᔪᐛ ᑲ ᐸᒋ ᐃᑎᓴᐛᑦ ᒋᓴᒪᓂᑐᐤ᙮ ᓇᒪ ᐃᑕᔨᑕᑯᓐ ᒐᒋ ᐸᒋ ᐎᑎᒧᐅᑦ ᐊᐛᓐ ᙭ ᐊ ᐊᐎᔭᓐ, ᐛᔅ ᓂ ᒋᔅᒐᔨᒥᓱᓐ ᐊᐛᓐ ᓂᔾ᙮ ᒥᒄ ᐊᐅᑯᓐ ᐅ ᐊ ᐃᔅᒋᔄᔭᓐ ᒐᒋ ᐱᒪᒋᐅᔭᒄ᙮ ᒧᔭᒻ ᐛᔅᑕᓂᐱᒪᑭᓐ ᐊ ᒋᐧᑲᔭᔅᑐᐛᑦ ᐊᐅᒄ ᑲ ᐃᓯᓇᑯᓯᑦ ᒠᓐ ᑕᐸᒋᒥᑦ᙮ ᔅᒋ ᓇᐊᔨᑕᓇᐛᐤ ᒥᒄ ᐛᐃᐱᔅᒋᔅ ᒐᒋ ᒧᒋᒐᔨᑎᒪᒄ ᐊᓐᑕ ᐅᐛᔅᑐᐛᐅᓂᒡ᙮”
“ᒋ ᑕᑈᐤ ᒠᓐ ᑕᓐ ᑲ ᐃᑕᒋᒥᑦ, ᒥᒄ ᒪᒃ ᓂᔾ ᑕᓐ ᐊ ᐃᓯ ᒪᒥᔅᑲᒡ ᐃᑎᔭᓐ ᐊᔭᔅᒃ ᒋᐧᑲᓇᑯᓂᔪᐤ ᓄᑕᐎᔾ ᐊᒋ ᐸᒋ ᐃᑎᓴᐅᑦ᙮ ᐛᔅ ᓄᑕᐎᔾ ᓂᒋ ᒥᔨᒄ ᓱᐧᑲᑎᓯᐅᓂᔪᐤ ᒐᒋ ᒪᒥᔅᑲᒡ ᐃᑐᐅᒡ ᒐᒋ ᐅᒋ ᒋᔅᒐᔨᒥᑯᐅᔭᓐ ᓂᔾ ᐊ ᐊᐎᔭᓐ ᙭, ᐎᔾ ᓄᑕᐎᔾ ᐊᒋ ᐸᒋ ᐃᑎᓴᐅᑦ᙮ ᐅᑕᐎᒪᐤ ᐊᓐ ᑲ ᐸᒋ ᐃᑎᓴᐅᑦ ᑭᔭ ᐎᔾ ᓂ ᐸᒋ ᑎᐸᒋᒥᒄ᙮ ᓇᒪ ᒪᒃ ᓂᑕ ᒋ ᐅᒋ ᐸᑎᒺᓇᐛᐤ ᐅᐸᑕᑯᓱᐅᓐ ᑭᔭ ᓇᒪ ᓂᑕ ᒋ ᐅᒋ ᐛᐱᒪᐛᐤ᙮ ᐊᓂᔭ ᐅᑦ ᐃᔨᒧᐅᓐ ᓇᒪ ᒋ ᐎ ᑭᓄᐛᔨᑎᒺᓇᐛᐤ ᒋᑕᐃᐛᒡ ᐛᔅ ᓇᒪ ᒋ ᑕᑈᑕᓇᐛᐤ ᐎᔾ ᐊᒋ ᐸᒋ ᐃᑎᓴᐅᑦ᙮ ᐃᔭᒂ ᒋ ᓇᓂᑐ ᒋᔅᒐᔨᑕᓇᐛᐤ ᒋᓴᒪᓂᑐᐤ ᐅᑦ ᐃᔨᒧᐅᓐ ᐊ ᐃᑕᔨᑎᒪᒄ ᐊᑯᑕ ᐊᓐᑕ ᒐᒋ ᐅᒋ ᒋᔅᒐᔨᑎᒪᒄ ᑕᓐᑕ ᒐᒋ ᐅᒋ ᐊᔭᔭᒄ ᑲᒋᒡ ᐱᒪᑎᓯᐅᓐ᙮ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐊᑯᑕ ᑕᐸᒋᒥᑯᐅᔭᓐ ᓂᔾ ᐊ ᐊᐎᔭᓐ ᙭᙮ ᒥᒄ ᒪᒃ ᓇᒪ ᒋ ᐎ ᐸᒋ ᓇᓯᓇᐛᐤ ᒐᒋ ᐅᒋ ᐊᔭᔭᒄ ᐱᒪᑎᓯᐅᓐ᙮”
“ᓇᒪ ᓂ ᐃᑐᑕᓐ ᒐᒂᓐ ᓇᐸᐤ ᒐᒋ ᐅᒋ ᐸᒋ ᒋᔅᑕᔨᒥᑦ᙮ ᐛᔅ ᒋ ᒋᔅᒐᔨᒥᑎᓇᐛᐤ ᑕᓐ ᐊ ᐃᑕᔨᑕᑯᓯᔭᒄ᙮ ᓇᒪ ᒋᓴᒋᐊᐛᐤ ᒋᓴᒪᓂᑐᐤ ᐊᓐᑕ ᒋᑕᐃᐛᒡ᙮ ᓂᒋ ᑎᑯᓯᓐ ᐅᑕ ᐊᔅᒋᒡ ᓄᑕᐎᔾ ᐊᒋ ᐸᒋ ᐃᑎᓴᐅᑦ ᐃᔭᐱᒡ ᒪᒃ ᓇᒪ ᒋᑦ ᐊᐱᑕᔨᒥᓇᐛᐤ᙮ ᑯᑎᒃ ᐊᐛᓐ ᒋ ᑎᑯᓯᓂᑦ ᐊᑲ ᒋᓴᒪᓂᑐᐤ ᐅᒋ ᐸᒋ ᐃᑎᓴᐛᑦ ᐎᔾ ᒋᐸ ᓂᑐᑐᐛᐛᐤ᙮ ᑕᓐᑕ ᒐᒋ ᐅᒋ ᑕᑈᑎᒪᒄ ᒥᒄ ᓇᐸᐤ ᐊ ᐎ ᓂᓇᐃᑎᒪᐊᒄ ᐊᑲ ᐎ ᓂᓇᐃᑎᒪᐊᒄ ᒋᓴᒪᓂᑐᐤ ?”
“ᐊᑲᐎᔾ ᐃᑕᔨᑎᒧᒄ ᒐ ᒪᒥᓯᒥᑎᑯᒡ ᐊᓐᑕ ᐅᑕᐎᒪᐤ ᐊ ᑕᑦ᙮ ᒧᓱᔅ ᐊᐅᒄ ᒐ ᒪᒥᓯᒥᑕᒄ ᐊᑎ ᐊ ᐃᑕᔨᑎᒪᒄ ᓂᒥᔪᑐᑕᓇᓐ ᒥᒄ ᒧᓱᔅ ᐅᐎᓱᐛᐅᓐ ᐊ ᓂᓇᐃᑎᒺᒄ᙮ ᑕᑈ ᑲ ᑕᑈᑐᐛᐛᒂ ᒧᓱᔅ ᑭᔭ ᓂᔾ ᒋᐸ ᐸᒋ ᑕᑈᑐᐅᓇᐛᐤ ᐛᔅ ᓂᔾ ᐊᓂᔭ ᑲ ᐸᒋ ᑎᐸᒋᒥᑦ ᑲ ᒥᓯᓇᐃᒐᑦ᙮ ᐊᑯ ᒪᒃ ᐊᑲ ᑎᔭᑈᑎᒧᐛᒂ ᐊᓂᔭ ᒧᓱᔅ ᑲ ᐃᑎᓯᓇᐃᒐᑦ, ᑕᓐᑕ ᒐᒋ ᐅᒋ ᑕᑈᑎᒪᒄ ᓂᔾ ᓂᑦ ᐃᔨᒧᐅᓐ ?”

Ακρόαση ᒠᓐ 5