If you have would like a copy of this version please contact info@davaraudiobibles.org

The Dawro Bible, CC-BY-SA-4.0, The Word for the World International and The Word for the World Ethiopia (Text). Dawro Audio Bible, CC-BY-SA-4.0, Davar Partners International, 2018. (Audio).

ጌሻ ማጻፋ

አሳይ ሳኣ ቦላን ዳሬዳ ዎደ፥ ኡንቱንቶ ማጫ ናናይ የለቴድኖ፤ “ሳሉዋ መታቱዋ” ጌተትያዋንቱ ሀ አሳ ማጫ ናናይ ማላ ሎአ ግድያዋ በኤድኖ፤ ያቲደ ኡንቱንቱፐ ባረንቶ ዶሬዳዋንታ አኬድኖ። መና ጎዳይ፥ “ታ አያናይ አሳን መናዉ ደኤና፤ አያዉ ጎፐ፥ አሳይ ሀይቂያዋ፤ አ ላይቱካ እት ጼታነ ላታማ ግዳና” ያጌዳ። ሄ ዎደነ ሄዋፐ ጉየ ሳሉዋ መታቱ አሳ ማጫ ናና አክና፥ ናናይ የለቴዳ ዎደ፥ ዎጋ አዱሳ አሳቱ ሳኣ ቦላን ደኤድኖ። ኡንቱንቱነ በን ዎደ ኦላዉ ምናነ ኤረቴዳ አሳ።
መና ጎዳይ ሄ ዎደ ሳኣ ቦላን ደእያ አሳ ኢታተይ ዳሬዳዋነ ኡንቱንቱ ዎዛናይ ቆፕያባይ ኡባይ ኡባ ዎደካ ኢታ ጻላላ ግዴዳዋ በኤዳ፤ መና ጎዳይ አሳ ሀ ሳኣ ቦላን መዳዎ ካዮቴዳ፤ ባረ ዎዛናን ሎይ ሴለቴዳ። ሄዋ ድራዉ መና ጎዳይ፥ “ታን መዳ አሳ ሀ ሳኣ ቦላፐ ሙለ ይሳና፤ አሳ፥ መህያ፥ ዶኣ፥ ቢታና ጎሸትያ መታቱዋነ ሳሉዋ ካፎቱዋ ይሳና፤ አያዉ ጎፐ፥ ታን ኡንቱንታ መዳዎ ካዮታድ” ያጌዳ። ሽን ኖሄ መና ጎዳ ስንን ናሸቴዳ።

ኖሄ ሀኔዳባይ ሀዋፐ ካሊደ ጻፈቴዳ። ኖሄ ጽሎ አሳ፤ እ ባረ ዎድያን ደኤዳ አሳ ግዶን ሱረ አሳ፤ ኖሄ ጾሳና ሀመቴዳ። ኖሄ ሴማ፥ ካማነ ያፌታ ግያ ሄዙ አቱማ ናና የሌዳ።
ሄ ዎደ ቢታይ ሳአይ ጾሳ ስንን ቱኔዳ፤ ሳአይ ኡባይ ማካላን ኩሜዳ። ጾሳይ ሀ ሳኣ ጼሌዳ፤ ሳአይ ቱኔዳዋ በኤዳ፤ አያዉ ጎፐ፥ ሳኣን ደእያ አሳይ ኡባይ ባረ ኦግያ ቱንስ ዎዳ።
ሄዋ ድራዉ፥ ጾሳይ ኖሀ ሀዋዳን ያጊደ አዛዜዳ፤ “ታን አሳ ኡባ ይሳና ሀናይ፤ ኡንቱንቱ ጋሱዋን ሳአይ ማካላን ኩሜዳ ድራዉ፥ ታን ቱሙፐ አሳካ ሳኣካ ይሳና። ሄዋ ድራዉ፥ ምኖ ምፐ ነዉ ማርካብያ ኬጻ፤ ሄ ማርካብያ ግዶን ጮራ ቆልኦቱዋ ከሳ፤ ያታደ ሶናነ ካረና ሽድያን ባራ። ማርካብያ ሀዋዳን ያታደ ኬጻ፤ አዱሳተ ሄዙ ጼቱ ዋ፥ ጎምፓ እሻታሙ ዋ፥ ጌሳ ሀታሙ ዋ ኦ፤ ማርካብያዉ ካራ መ፤ ካራፐነ ጎዳፐ ግዱዋን እት ዋ ግድያ ሳ ካሎ አጋ ባሻ፤ ፐንግያ ማርካብያዉ ምይያና ከሳ፤ ማርካብያ ሄዙ ፖቅያ ከሳደ ኬጻ።
“ታን ሳሉዋፐ ጋርሳን ደኡዋ ሸምፑዋና ደእያ መታ ኡባ ይሳናዉ፥ ሀ ሳኣ ቦላን ባሻ ሃ የዳና፤ ሀ ሳኣን ደእያባይ ኡባይ ያና። ሽን ታን ታ ቃላ ጫቁዋ ኔናና ጫቀታና። ኔን ነ ማቻቶ፥ ነ አቱማ ናናነ ነ አቱማ ናና ማቻቱዋ ኔናና አካደ ማርካብያ ግዶ ገላ። ኡንቱንቱ ኔናና ሸምፑዋና አታና ማላ፥ ሸምፑ ደእያ መታ ኡባፐ ቆሙዋን ቆሙዋን አቱማዋነ ማጫዋ ላኡዋ ላኡዋ አካደ፥ ማርካብያ ግዶ ገልሳ። ዱማ ዱማ ቆሞ ካፉዋፐ፥ ዱማ ዱማ ቆሞ መህያፐነ ቢታና ጎሸትያ ዱማ ዱማ ቆሞ መታቱዋ ኡባፐ ላኡዋ ላኡዋ ግዲደ፥ ሸምፑዋና አታና ማላ ኔኮ ያና። ቃይ ኔንነ ኔናና ደእያዋንቱ ማናዉ፥ ዱማ ዱማ ቆሙ ምያ ካ አፋደ፥ ማርካብያ ግዶን ቆላ” ያጌዳ።
ኖሄ ኡባባካ ጾሳይ አዛዜዳዋዳን ኦዳ።

Ακρόαση ዶመ 6