Δημοφιλή Βιβλικά εδάφια από ILOOWALI 27

Κοινοποίηση

Hinta Allahu Taa̒ala mongohi mai olemu wambulo monto hulungo, wau mohutu mai hahaa-labolumu molomiodu! Hinta Tio mongohi mai olemu pale wau angguru dadaata daa̒! Hinta babaa-ngusawalo mowali watomu, wau susuu-kuwaalo bangusa taa̒luku to olemu. Hinta yio̒ motolo kawasa mao̒ ngoa̒amila mongo ilaatamu, wau wali mai li maamamu mosujudu totalumu. Hinta laa̒-laa̒natilo ngoa̒amila taa u molaa̒nati olemu wau bala-balakatilo ngoa̒amila taa u mobalakati olemu.”

Ualei Esau, “uti-utieelo u oluolio tio helo himbulo olaatia. Tuhetaa olo tanggulio tei Yako. Tio malohama haku lowatia odelo walao̒ tamohuhula, wau botia tio luli lohama poli balakati lowatia. Wolo ti Paapa diila obalakati wewo ode laatia?”

Lapatao̒ tei Isihaka loloi̒ya mao̒ olio, “Madiduu̒ wambulo monto hulungo olemu, madiduu̒ halabolu u molomiodu olemu. Yio̒ matumumulo monto wamilumu, bo debo mowali wato lo tawali-yaliimu, bo wonu yio̒ momintaa̒ tingolo, yio̒ mamo lopato monto kawasaalio.”

Tei Esau diila lohuto lohuheli lomolohone odeli paapalio, “Wolo ti paapa bo obalakati tuwau wambao̒? Balakatiyalo mai watia olo, paapa!” Tulusi tio mahilu moyonga poli.