Mātaio Nō runga i tēia puka
Nō runga i tēia puka
Ko ngā tumu manako mama'ata tēia i roto i tēia puka nei: te ako'anga i runga i te maunga (5.1—7.28), te pure a te 'Atu (6.9-13), ē te ture meitaki rava (7.12): “Ē te au mea katoa tā kōtou e 'inangaro i te tangata kia rave ki a kōtou, ka 'akapērā katoa atu kōtou ki a rātou.” Ko te puka rongonui roa atu pa'a tēia ē te tā'iku putuputu'ia i roto i te au puka kātoatoa tei tātā'ia nō runga i a Iēsū. Ko tēta'i tumu 'oki ia i tukuna'ia ai a Mātaio nā mua i ngā puka e 'ā tei tātā'ia nō Iēsū tei karanga'ia ē, ko te au 'ēvangelia.
Ko tēta'i manako pu'apinga rava atu tei kitea'ia mai i roto i tēia puka nei, koia 'oki, te anoano o te Atua i te 'iti tangata kia kauraro atu rātou i aia, ē ko te 'āite'anga tēia o te kupu Eleni e puta mai ana i roto i te au 'akataka'anga tuatua 'e mānganui ē, 'e tuatua tika. Mei te 'itu taime i te tā'iku'anga'ia e Mātaio, 'okota'i rāi taime o Luka, ē kāre rava a Māreko i tā'iku ana. Ē nō reira, 'e mea pu'apinga ma'ata tēia tā Mātaio e 'inangaro ra i tōna aronga tatau kia mārama rātou nō runga i te 'āpi'i'anga a Iēsū. Kua tuatua i mua atu ana a Iēsū i tēia kupu nei, i kō rāi i tōna bāpetīto'anga, i tōna karanga'anga atu ki a Ioane Bāpetīto ē, “'E mea tau 'oki kia pērā tāua kia tupu te au tuatua tika kātoatoa” (3.15). Ē, i roto i tāna ako'anga i runga i te maunga, kua tuatua 'aka'ou aia mei te rima taime nō tā te 'iti tangata o te Atua kia rave nō te kauraro atu i aia (5.6,10, 20; 6.1,33). Ē te tā'openga, kua 'akama'ara atu aia i te kau ta'unga nunui ē te au arataki o te 'iti tangata ē, “I 'aere mai 'oki a Ioane ki a kōtou nei ma te tuatua tika, ē kāre ake nei kōtou i 'irinaki atu i aia.” (21.32).
Kua 'inangaro 'oki a Mātaio i te 'ōronga atu ki te 'iti tangata o tōna tuātau i tēta'i 'akapapa'anga nō te karere ē te 'anga'anga 'ēvangelia a Iēsū. Tē māramarama 'ua ra ē, 'e pu'apinga ma'ata tō tei tātā'ia ra i roto i te kōreromotu ta'ito ki tēia 'iti tangata. Ē kāre rava a Mātaio e kore ana i te 'akaāri mai, mē tā'iku anake te tuatua ki te 'aere'anga mai o Iēsū ē, ko ia te Mesia tei tonokia mai mei kō mai i te Atua. Kua tātā 'oki a Mātaio i tēia puka nei kia pāpū meitaki ē kia kite te au Keretitiāno ē, ko tō rātou 'irinaki'anga i a Iēsū ē, ko ia te Mesia kua 'akatumu'ia te reira i roto i te kōreromotu ta'ito i tātā'ia ra kia tauturu'ia tō rātou 'irinaki'anga kia tupu 'ua atu rāi.
Kua 'akaoti a Mātaio i tāna tua ki te tuatua pōrokiroki a Iēsū ki tāna au pipi, tei 'akakite ki a rātou ē, 'e a'a tā rātou ka rave i muri ake i tōna 'akaruke'anga mai i a rātou:
“Kua tuku'ia mai ki āku te mana katoa o tō te rangi ē tō te 'enua nei. Nō reira, e 'aere kōtou e 'akariro i te au 'iti tangata rava rāi 'ei pipi nāku, i te bāpetīto'anga i a rātou i te ingoa o te Metua, ē nō te Tamaiti, ē nō te Vaerua Tapu; ē i te 'āpi'i'anga atu i a rātou kia 'ākono rātou i te au mea kātoatoa tāku i 'akaue atu ki a kōtou. Ē inā, tei a kōtou nei au i te au rā katoa e tae 'ua atu ki te 'openga o tēianei ao.” (28.18-20).
Te 'akano'ono'o'anga o tēia puka
1. Te 'ui tupuna ē te 'ānau'anga o Iēsū 1.1—2.23
2. Te karere a Ioane Bāpetīto 3.1-12
3. Te bāpetīto'anga'ia ē te tīmata'anga'ia a Iēsū 3.13—4.11
4. Ko Iēsū i Galilea 4.12—18.35
5. Tē 'aere nei a Iēsū mei Galilea atu ki Iērūsalēma 19.1—20.34
6. Tō Iēsū 'akavā'anga'ia ē tōna mate'anga 21.1—27.66
7. Tē ora nei rāi a Iēsū 28.1-20
Επιλέχθηκαν προς το παρόν:
Mātaio Nō runga i tēia puka: CIMRNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Cook Island Maori Revised New Testament © Bible Society of the South Pacific, 2021.