Mataio 3
3
Ba'uere robe Hauna Ioane Eiroro.
(Mk 1.28; Lk 3.1-18; Io 1.19-28)
1Rani weianai Ioane Ba'uere robe#3.1 Bapatiso hauna ewaira tina Iuda hano'akunai ena iroro ea'i ramana etibaha, 2“Emi ki'ai tomoraona kabe, pokina Tirama ena obia aiarana hanona aba ekaibari.” 3Neiana hanona mahabanai hauna Isaia 'abina ehinana hauna etibaha,
“Hau ha hano'akunai eio etibaha,
‘Obiapaka ena taeara
tomoba'oruna,
Ena kaoao boana
tomobaberona.’” Isa 41.3
4Ioane ena habuni hanona mahi atana Kamela buirana tanatananai ebabaina, mai huana 'apana hanona poromakau paruana ehaina, ena aniani hanona pekaupekau mai hoho beina. 5Ierusalema maearimakia mai Iuda aonai aiara maikoina, haeamona Ioridana ate herenai aiara ikoinai haukia temai herena aiana kateona. 6Ekia ki'a tehina pounakia, haeamona eba'uere robenakia Ioridana ate aonai.
7Ioane Parisea haukia mai Sadukea haukia bo'okia temai herenai keba'uere robenakia eihanakia raninai ehinabenakia etibaha, “'Erau nahuna haumi e. Tai ehinabenimi puma weiana Tirama aba ketiuahina hauna herenai katobeau pare? 8Raonakabe buabuana tomobawaira tinana. 9Aomiai a'i kato'abi wai hanona Aberahamo 'aba'abana buonai puma weiana herenai katobeau pare. Au wai nahinabenimi Tirama hanona mai hiabuna pihara neiakiai Aberahamo 'aba'abana kebabainakia! 10Wapira hanona aba e'oru matiu pokinai, buabua namokia a'i tibaramanakia matiukia ikoinai hanona ke'uinakia iruba aonai kekapo totonakia.
11Au hanona beiai mo naba'uere robenimi emi raona kabe hoana, ia weiana muri'uai nimai hauna hanona Auba Robeai mai irubai keba'uere robenimi. Ia hanona eapa'ua ki'a baha ba au, au a'i anamo ena tamaka kabuanakia. 12Ena ikomo matiuna imanai ea'ina, ikomo 'ekana ea'i a'i haraina uho weiakia ikoinai kekomonakia paruakia keba'ehonakia, uho namokia ikoinai kebararonakia paraboa aonai kero'anakia, ia hamarakia hanona weiana a'i ni'ao 'apua irubana aonai kehuhu orenakia.”
Ioane Iesu Eba'uere Robena.
(Mk 1.9-11; Lk 3.21-22)
13Rani weianai Iesu hanona Galilea ai emai Ioridana atena Ioane herenai keba'uere robena. 14Ia Ioane ebaoao etibaha, “Oi au poba'uere robena'u hanona penamo. Iamo omai au here'u.” 15Iesu Ioane ena 'abi ebamuena etibaha, “Bariu hanona neiana oi kobabaina. Aka neianai Tirama ena bero akakia ikoikiai kahabatohanakia.” Ba Ioane ehore Iesu eba'uere robena.
16Iesu e'uere robe murinai, beronai beiai ekara'au aonai kupa ekaikau Tirama ena Auba eriri emai ahanai matoha rauria eriri 'abana eihana. 17Ba aia ha Kupai emai e'abi etibaha, “Neiana hanona au Naha'u tohana, E'u raona'au. Au hanona ia naonamo aina.”
Επιλέχθηκαν προς το παρόν:
Mataio 3: rroNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2002, Wycliffe Bible Translators, Inc. All rights reserved.