Matááyo 12
12
Kúlích Hef ˈGisanká máállé hí mé ki yaalká he Yíésu
1Aalé Kúlích Hef ˈGisanká tikiˈd Yíésu ubaa lalille lés siindi hurt nadhe. Mú lalille ˈdaa giri ger hí gaa boloyká gaal sííndí met af ki ˈgieˈgite, sííndí koey. 2Aaléka, gál Farisaay yaalmitéél argeká Yíésu geey, kieye, Bá dháash! Lalikú hé nyátálkúnnoka Kúlích Hef ˈGisanká ke ma gaa ekemenyká ekeyche, gaalí yie.
3Yíésu gál Farisaay kinaal geey, kieye, It hé ˈDáwuˈd af giri ubaa sheelle ger hí gaa boloyká hí ekeyká Warˈgat Waaˈgiet ma gaa túony, 4giri mu ˈBíl Waaˈgiet náble hile-, balasha gaalí Waag taak ki iđie-, nyátálka gál gál suoryo-, muuninyká hí ma kokonyká koey-, tá sheelle úba hí koeyká? 5Héétí gál suoryoká hát Kúlích Hef ˈGisanká ˈBíl Waaˈgiet hujich gaa nannuo-, kor hújíchlé kinaal Waag hí ma ˈdú ˈdeđensenká it úba warˈgasam hemuumuriti-, Waaˈgietká gaa tuoycheká, muunîny? 6Tá yú hí geeye, máá ˈBíl Waaˈgiet súm ˈdú ˈdúwaká hé állá yaal. 7Itín héle ˈdeeny Waaˈgiet kieye, Yú itín hí gálaat geer guurá ka ˈgayyaká fede, yáá suor ma fediny, yieká, hí eiy náásanka, it gál hé ˈdeeney mánnallá ma ˈdeđénsen.#12:7 Hoséya 6:6 8Tá Kúlích Hef ˈGisanká máállé hí mé ki yaalká he yáá Iny Máádhátallá, Yíésú hí gál Farisaay yie.
Yíésu máá gíl gáá heljeyká Kúlích Hef ˈGisanká gaa bisie
9Yíésu ál kinaal gaa kieká gál Yuuˈdi ˈbíllé ˈdiiyiminyká hile. 10ˈBíl kinaallá hé máá gil hí ki kiite-, gíl gáá héljo mare hí gaa ije. Aalé gál Farisaay ˈbíl kinaal gaa ijeká ˈdéé tág nie, Yíésu yiete, kieye, Máádhat gaalí Kúlích Hef ˈGisanká gaa bibisuoká taglê? yie. Gaal hatallá yíéllá, ˈgíérích he Yíésu ˈdú ˈdeđenset-, mú hem gaa sisidhoká he hol gaa ˈgeˈgedhe.
11Yíésu gáál yiete, kieye, Itín mááya ányle Kúlích Hef ˈGisanká ˈguoˈd ki ˈjieka, ˈguoˈd ma gáá egeny? 12Máádhat hé any ˈdú ˈdúwaká, muunîny? ˈDaa kinaallá ˈdugaka in Kúlích Hef ˈGisanká ke hé midhabká gaa ekemeyoka taglé, Yíésu hí yie. 13Aalé Yíésu máá giriká geey, kieye, Gíl fat, yie. Mu gíl fadhe, gil đo midhandhe, hát gíl ˈdaatíítí yie. 14Gál Farisaay ál kinaal gaa ijeká đo baad yé ki ˈdie, ˈgíérích Yíésu ki yegeská ˈdeenyle hol geey.
Yisááya ˈdeeny Waaˈgiet héle ˈdiiyimeká Yíésu hí ˈduway
15Aalé Yíésu gáál tawunyle kimiteká đo ál kinaal gaa kie. Gál burnayká mú ˈgar kie, mú el gaa veere. Nyésébích kinaallá gál basham ˈgie-, hí igireká lulle muí bisie. 16Kor Yíésu gáál il gíl gaa helie, giri ˈdaalleka gaalí gálaat ma geđinyká. 17Hééllá hatallá ˈdíéllá he hát héle máá Waag hí ˈdeem ka shigiche-, Yisááya léká hí ˈdiiyimeká ˈduway, 18giri Waag kieye,
Máá chia yú ká sillie-, hújíchchú nannuoká dhaayyíe!
Máállá he máá yú giel-, ye geer gaa memeyoká.
Hím Naasanchú mú ha yú ˈdú kokoo,
mu ˈdéé ki iđiny ˈdúwaká kidh hai ki ˈdiyime.
19Mu hé gálaat hol ma ki fafalminy,
koˈdam ma ˈdaraminy,
ˈjien hurt af gúch ma ki ˈdiyiminy.
20Mu hé iishit ˈgeyyeká ma silminy,
hé úba ˈjiet bolo hí dhoodhoyyeká ma yiesiny,#12:20 Mu iishit ma silminy-, ubaa ˈjiet ma yegesinyallá hélle kieye, mu gál hát mánká nog hai ki seeme.
ˈjíig ˈdaab mu ˈdéé ki iđiny ˈdúwaká les ma ki iđîny-,
ađááb ma ka ádhanká.
21Tá kidh lulle mú bala hai ˈdú nannaa,
mú iiy hai yeedhe,#12:18-21 Yisááya 42:1-3
chieká.
Gál Farisaay kieye, Yíésu fargogint Belsebullo he aryáán yiem ki ˈdeđia, yie
22Aalé gálaat máá aryáán hí hille-, aryáán hí in ubaa af ˈdabsiche mare Yíésu ˈdu gáá eey. Yíésu mú bisie, mu đo biiy gaa arge, ˈdéé huogodhe. 23Yíésu héél tákáma ekey, nyesebich đo af gil hí fame, hol heegete, kieye, Máállá in buot máá ˈbíl íl ˈDawuˈd yé gáá ˈdeˈdeme-, ke met egeseká máámaʼ? gaalí yie. 24Kor gál Farisaay ˈdeenyéél maaleká Yíésu eeshey, kieye, Máállá fargogint Belsebul#12:24 Meeny Bélsebul lééllá úba Sátan meenylé. giri aryáán kánsích léká in aryáán yiem ki ˈdeđia, yie.
25Yíésu ˈdaa giri gáál tawunyle onnoyká đo gáál geey, kieye, Les gálle hol af ká điidhe-, hol tuutuneka, lés kinaallá đo eiy hai ˈgiiˈgisate. Hát tikiˈdééllá é mé tikiˈd yíekaʼ, ˈbíl geer tikiˈd yíekaʼ, gálle dhúrle hol af ká điidhe-, hol tuutuneka, hé hol af ma chochony. 26Tá Sátan gállé kaansúo-, hí el gaa ˈgieká har úba dhúrle hol af ká điidhe-, eiy ˈgiteka, kansimle đo lesso ˈdoyye, muunîny? 27Har yú fargogint Belsebul aryáán yiem ki ˈdeđuoka, gálkícho íín fargogint mááya he aryáán yiem ki ˈdeđia? Aaléka, gaal ííni kinaallá ˈdeenykícho hát he hódhoká hai hogodho. 28Tá yú har Hím Naasan Waaˈgiet aryáán yiem ki ˈdeđuoka, af kinaalka Guch Waaˈgiet hé hí hurt ká hille.
29Tá máádhat háteeye máá fargogoká hátlé er ma hííginká mú ˈbílle af ˈgieˈgia, mú shokodaamle ugunma? Máá kinaallá mú hiigidheka in tákáma mú shokodaamle ugunma. 30Máá ye ma ˈdú iifinyká, hé mááchú muuniny, mé illó ye gaa yaalla. Héétí máá ye ˈdína ma kí ˈdeˈdeminy-, ye walachú ma ˈdu gáá egenyká, he máá walachú baađisuoká. 31Aaléka, yú hí geeye, gálaat héllé ˈdeđew-, lulle eekemeyoká ubaa héllé ˈdeđew-, hogodhoká lulle Waag haí haađicha, tá máá Hím Naasan Waaˈgiet chaaroká ađaablé kinaallá hé Waag hí ma haađiny, Waag mú ˈdéé hai ki iđimicha. 32Máá Iny Máádhat ˈdeeny ˈdeewká ki hodhoká, máá kinaallá héllé ˈdeeney kinaal Waag haí haađicha. Tá máá Hím Naasan Waaˈgiet ˈdeeny ˈdeewká ki hodhoká, ađaablé he hílééllá hé bííy kaanalloká ubaa bííy biraamiet ka chiimetóótíá Waag hí ma haađiny, Waag mú ˈdéé hai ki iđimicha.
33ˈGór yaalmít hí midhíntaka, saanolle úba hé midhab. ˈGór yaalmít hí éésh manítaka, saanolle hé úba éésh mán. ˈGór saanollé gaalí ki kiimita. 34It ˈdálto chaaráal! Itín háteeye kerka hí hé ˈdúwaká hogoto, in hé gaa nyakarichká gerkícho koch háluke? Máádhat ˈdaaka hé hí geer gaa ijoká in he hogodho. 35Máá ˈdúwaká ˈdaaka hé ˈdúwa-, geer ki sisidhoká in ˈdeenylé ˈdúwaká hí yé gáá ˈdeˈdeme. Máá ˈdeewká íín ˈdaaka hé gaa nyakarich-, he geer ki sisidhoká in ˈdeenylé gaa nyakarichká hí yé gáá ˈdeˈdeme. 36Tá yú hí geeye, kúlích gálaat Waag hí ˈdéé ki iđimichoká máádhat ˈdeenylé éésh mán lulle he huogodheká hélle Waag haí hegesete. 37Waag ko ˈdeenséte yíekaʼ, ko má ˈdeensen yíekaʼ, hé kinaallá meka ˈdéé hót kua huogoteká he igira, Yíésu hí gáál yie.
Gál hé af ˈdaˈdaboká il ki aargiroká af ki fedoká
38Aaléka, gál gálaat nyatalaam oonisuoká ubaa gál Farisaay ˈbaal Yíésu geey, kieye, Máá gáál he oonisúóllo! Nyiin hé ke af ˈdaˈdabo-, kuun hí ekemeycho-, nyí ílkínyo ki aargiˈdaká nyí ko gaa feˈde, yie.
39Yíésu íín gáál ˈdéé hol ˈdú nie, kieye, Gál hé gaa nyakarichká geer ki sisidho-, Waag hol a taak gaa nieká in hé gáál af ˈdaˈdabsuoká aargiroká fede. Tá gáál hé máá níínní hí hé kinaallá aargisuoká mán. Hé gaal hí aargiroká tikiˈd tákáma. Hé kinaallá héllé ki égká he yaalmit máá Waag hí ˈdeem ka shigiche-, Yónnas léká. 40Yónnas hát beech geer kulich ubaa chúúre seđ gaa ijeká, Iny Máádhat úba uushich kulich ubaa chúúre seđ hai gaa rafama. 41Kúlích Waag hí gálaat ˈdéé ki iđimichoká gál Ninevi ubaa gál barallóóllá Waag met hai ki ˈdeeme, tá gál Ninevi gál barallóóllá súmmo ˈdeđente, ˈdaa giri gaal íín af giri Yónnas hí ki ˈdiiyimeká Waag makan fameká. Tá onnóo, állá hé máá Yónnas súm ˈdú ˈdúwaká hí yaal. 42Héétí min kansim ˈdaa urru ˈgayyeká kúlích Waag gálaat ˈdéé ki iđimichoká úba les hai gaa keenne, gál barallóóllá úba hai ˈdeđensete, ˈdaa giri íín héle les đúúríchlé fágká gáá kiiyye-, Sólomon ˈdaalimle nee kokoyyeká. Tá onnóo, állá hé máá Sólomon súm ˈdú ˈdúwaká hí yaal, yie.
Aryáán máádhat yé gaa ˈdiiyyeka hátlé geđi mú hol ˈdu gáá nannaatoká
43Aalé Yíésu geđi gáál geey, kieye, Aryáán máádhat yé gaa ˈdiiyyeka, lés ˈbakateká he gaa mamaˈda, ál túmus ki kokoyyoká he hol gaa ˈgeˈgete, kor hé ali ma aargiriny, 44in he ˈdéé hogoto, kieye, Yú ˈbíl chia#12:44 ˈBil álláka he máádhát. Máádhat Hím Naasan Waaˈgiet hí gaa líítaka, in aryáán hí hol ˈdu gáá nannaata, hí higilla. yé gáá ˈdieká geđo hol ˈdú naadha, chegedhe. Bár he ˈbíl kinaal hol ˈdu gáá naatoká, ˈbíl gaalí geer gaa heedhe-, gaalí geer tág koy-, máá níínní hí gaa ijo mánká hai argiyye. 45Aalé đo hai siete, aryaan éíy taaka-, tiiya-, hí súm ˈdú ˈdeewká hai ˈgiete. Aryáán đo hollo hol ká chirate, ˈbíl kinaal hai hille, hai ˈguate, ˈbíl hille kinaallá yaalmitle đo súm hai ˈdeenete, yaalmit erkobká úba kalat. Tá gál barallo-, ˈdeewallá yaalmitle úba hatallá hai cheedhe, Yíésu hí yie.
Waag gálle he gál Waag hát feˈdoká ekemeyoká
46Yíésu hátlé nyesebich geđieká mú ˈjielle ubaa mú nyaaramle ká yimie, baaˈd kí ˈdie, gaal mú hol geđieká he fede. 47Aalé nyésébích kinaal mú tikiˈd Yíésu af ki helie, kieye, ˈJiekú ubaa nyaaramkú baaˈd ˈgee, ko aargiroká fede, yie. 48Aaléka, Yíésu máá hí geđieká ˈdéé hol ˈdú nie, kieye, ˈJiechú he mááya? Nyaaramchú he gálya? yie. 49Yíésu đo mú lalille gíl ki helie, kieye, Gál állá ijóóllá in ˈjiechú ubaa nyaaramchú. 50Máá ˈJaa chia úr ijoká hát fedoká ekemeyoká in nyárchú, in nyaarchú, in ˈjiechú, mú yie.
Επιλέχθηκαν προς το παρόν:
Matááyo 12: dsh
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible Translation and Literacy